Samuɛlə dɔlɔɔ 6 - Yálá laawoo hɛɓɛ (dc)

Filisti nuą di Yálá nwɔ mįnɛ̨ kəhii pənə di dɛɛ

¹ Yai-Laa nwɔ kəhii ə ɲąnin mɛ̨ihveelɛ kɛ Filisti nuą di wɔ lɔi hu.

² Filisti nuą di di wɔ haláá laa həli nuą, da dɔlikpɛ nuą mąąnin gɛ, diɛ diɛ: «Lə ɓə kwa pɛli gɛi a Yai-Laa nwɔ kəhii ŋɛ̨i? Bələi kwa pɛli gɛi la kuɔ pɛli dɛɛi ɓɛi ə həɠə laa; ka bələ lɛ kuɔ?»

³ Ɉaláá laa həli nuą diɛ diɛ: «Ka kɛ bɔ ka Yálá nwɔ kəhii pənə ka dɛɛ ɓɛi ə həɠə laa, ka hvo dɛɛ lɔ tii kpɛli-kpɛli, kɛlaa, mąąnɛ̨ɛ̨ ka ká pɔɔ ŋą pɛli haláá kulɔ mąą mɛ̨nį hu, ə gɛ ka nwun mąą ə ɓo, ɛlɛɛ, mɛ̨nįi kɛi gɛ yɛ mɛ̨nį ɲąąnwąnąą laa kaa, ka pɛli kɔ́lɔn ɉii.»

⁴ Nɔi lonnii diɛ diɛ: «Lə ɓə kwa pɛli gɛi a ku pɔɔ ŋą pɛli hɛn?» Ɉaláá laa həli nuą diɛ diɛ: «Bələi lɔ nɔi tɔɔɓɛlaa kaa la lɔɔli, ka pulu kulɔ kpan mąąnįnįn bɛli lɔ tii lɔɔli a hɛni, kpəɠəi mąąnįnįn nɔɔli a hɛni. Mąąhɔlɔɓo, mɔ̨nɔ̨ huwu tanɔ̨n tii ɓə naa ka mɛ̨i ka ká wɔ tɔɔɓɛlaai.

⁵ Ɲɔ̨n tii kɛi ka laanɔ̨nwɔ̨ ɓo, ka mąąnįnįn ɉəɠə, da gbəɠiɠaa ŋɛ̨i kɛi ka wɔ lɔi kala. Ka Israɛlə nwɔ Yálá mąąwiɛ. Gbəli hu ɲee hvo kɛa pai wiɛ ka mɛ̨i ka ká wɔ yáláɠaa ə mą kɛ ka wɔ lɔiɠaa.

⁶ Ka hvo ka kili walawala yɛ bələi Eziptə nuą da di wɔ tɔɔmun ni di gɛ la. Di mɔ̨nɔ̨ ɓoi Yálá ə mo, yili ɓə gɛ diɛ nwɔ nuąi lɛɛ la laa diɛ li.

⁷ Ka wotolo nįnɛ̨ pɛli, ka nįŋɛ̨ haa hveelɛ həɠə, yiiɠaa di lonnii laa kaa ni a ɲįnį ɓa, ɛlɛɛ, di hvo ni kóló kɛ li. Nįŋɛ̨ haaɠaa tii ɓə ka nwotolo kpulɔn diɛ, diɛ ɲala. Ka di lonnii kulɔ diɛ, ka li a diɛ nįŋɛ̨ gala hu.

⁸ Ka Yai-Laa nwɔ kəhii həɠə, ka ɉee nwotolo hu. Ɉɛnŋaa tii ka di pɛli a ɉɛni, ka pɔɔ ŋą pɛli mɛ̨nį ɓa, ka di laa kəhi lon da hu, ka ɉee Yálá nwɔ kəhii kwɛlɛ; ka nįŋɛ̨ɠaa lɛɛ laa də li a ɉɛnŋaa tii di kpɔwɔ ɓa.

⁹ Ka gaa nįŋɛ̨ɠaa da Israɛlə pələ həɠə diɛ li Bɛtə-Sɛmɛsə pələ, a kɛ tii, ya ka tii ɲee ə kɛ guɔ, kɛlaa, da wala ɉon a bələ, a kɛ tii, naa hvo kɛ gu wɔ laanɔ̨nwɔ̨i ŋɛ̨i hu.»

¹⁰ Nuą di gɛ yɛ bələi di di tí la. Di nįŋɛ̨ kɔ̨nwɔ̨lee hveelɛ həɠə, di lonnii laa ə ɓo ni ɲįnį ɓa, di di kpulɔn nwotolo ɓa, di di lonnii lɛɛ nįŋɛ̨ gala hu.

¹¹ Di Yai-Laa nwɔ kəhii hee nwotolo hu, da gəhi lon tii gbəɠəɠaa da ɲɔ̨n tii pɛlɛ diɛ, di mąąnįnįn ə kɛ ɉu.

¹² Nįŋɛ̨ɠaai tii di bələ haŋą Bɛtə-Sɛmɛsə pələ. Di lɛɛ lɔ bələ tɔ̨nɔ̨i tii mɛ̨i diɛ li, diɛ wɔlɔ, di hvo li ɓa-mįi-yee hu pələ da kɔ́ɓɛyee hu pələ. Filisti tɔɔɓɛlaa hvilɛn ŋąą di pulu, ə lɛɛ ɉu di həli Bɛtə-Sɛmɛsə ɲɛ̨n ma.

¹³ Bɛtə-Sɛmɛsə nuą di kɛi mɔ̨nun dee ɲɛɛ kɔ́wɔ hu, di di nwun muhəɠə, di Yálá nwɔ kəhii kaa, də li di naakwiɛn a kwəinɛ̨ɛ̨.

¹⁴ Nwotolo ə həli Bɛtə-Sɛmɛsə Ɉosue yəi ɲɛa, ə tɔɔ laa. Kwɛni kpuwulu kɛnɛ̨ ə kɛ laa, di nwotolo wuluɠaa kɛ a kwɛi, di nįŋɛ̨ hveelɛi tii kulɔ a haláái da gəlee kələn Yai-Laa ɓa.

¹⁵ Leviɠaa di Yai-Laa nwɔ kəhii yɛɛ, da gəhi lon tii kɛ gwɛlɛ, Bɛtə-Sɛmɛsə nuą di haláá kulɔ Yai-Laa ɓa a ɲələ. Dɔ̨nɔ̨ ə ɓo a ponaa kulɔ haláá, da haláái da gəlee kələn.

¹⁶ Yii kɛa Filisti tɔɔɓɛlaa di nąą kaa tii, di di pulu pənə, də li Ɛkrɔn a mąą yələ.

¹⁷ Ɲɔ̨n tii pɛlɛ Filisti nuą diɛ, yai di mąąnįnįn ɉəɠə a hɛni, di nɛ̨ɛ̨mąą hvə la Yai-Laa ɓa; diɛ ka: Dɔ̨nɔ̨ ə kɛ a Asdɔdə nwɔɔ, dɔ̨nɔ̨ Gaza, dɔ̨nɔ̨ Askelɔn, dɔ̨nɔ̨ Gatə, dɔ̨nɔ̨ Ɛkrɔn.

¹⁸ Gbəɠəiɠaa tamąąi lɔ kɛ yɛ bələ Filisti tɔɔɓɛlaa di kɛ la lɔɔli, da di hee taa, daaɠaai di mąątinɛ̨n ŋąą a hįi, da yiiɠaai di mąą hvo tinɛ̨n ni a hįi. Gwɛni kpuwulu kɛnɛ̨i tii di gəhi hee mɛ̨i, gaa laa háá ɓa háá, ɓɛi Ɉosue nwɔ tíi ə kɛ laa Bɛtə-Sɛmɛsə.

¹⁹ Bɛtə-Sɛmɛsə nuą lɔwai, Yekonia lonnii di hvo gɛ di hvo di kwəinɛ̨ɛ̨ ɓɛlɔwai di Yai-Laa nwɔ kəhii kaa la. Yili ɓə gɛ, Yai-Laa ə nu pow mɛ̨ihveelɛ paa di lɔwai. Nuąi lɛɛ a di hvulú, di wɔlɔ, mąąhɔlɔɓo, Yai-Laa aa kɛ mɔ̨nɔ̨ kɛnɛ̨ laa di mɛ̨i.

²⁰ Bɛtə-Sɛmɛsə nuą diɛ diɛ: «Gbɛɛ ɓə a pɛli tɔɔi Yai-Laa lííla, yai mąąhəɠɛɛ?» Diɛ nwɔ̨nɔ̨ diɛ: «A həɠə ku pɔɔli, gbɛɛ ɓə gaa pai lii bɔɔli?»

²¹ Di nuą tɔɔ Kiriatə-Yearimə nuą pɔɔli, diɛ diɛ: «Filisti nuą daa Yai-Laa nwɔ kəhii tɛɛ, ka pa ka ɉəɠə, ka li la ka pɔɔli.»