Samuɛlə dɔlɔɔ 5 - Yálá laawoo hɛɓɛ (dc)

Mįnɛ̨ kəhi kɛɛ Filisti nuą pɔɔli

¹ Filisti nuą di Yálá nwɔ mįnɛ̨ kəhii həɠə Ɛvɛn-Ezɛrə, də li la Asdɔdə.

² Də li di nɔ di wɔ halii Dagɔn nwɔ pɛlɛ́i mu, di gəhi hee Dagɔn kwɛlɛ.

³ Mąą yələ laaɓoɔ, yələ wala pɔ, Asdɔdə nuą di di ɲįnąąɓo, di Dagɔn kaa bɛlɛɛ niiɓa Yai-Laa nwɔ mįnɛ̨ kəhii lííla. Di ɉaŋą di dɔɔ.

⁴ Mąą yələ laaɓoɔ, di di muhəɠə yələ wala piinɛ̨ɛ̨, di Dagɔn kaa nwɔ̨nɔ̨ tooni Yai-Laa nwɔ mįnɛ̨ kəhii lííla. Dagɔn nwun galən da ɲee hveelɛi di yaliɛ mą, di ɓo tooni bɛlɛ́ laaləi, gbinį lɔ ɓə lɛɛ.

⁵ Yili ɓə gɛ ə həɠə ɲələ ɓa, ə həli yiihu ɓa, Asdɔdə nuą, ɉaláá kulɔ nuą da nuąi da lɔ Dagɔn yəi bɛlɛ́n, di hva di kɔ́wɔ hvilɛn Dagɔn nwɔ pɛlɛ́i laaləi.

⁶ Yai-Laa yee ə wiɛ Asdɔdə nuą mɛ̨i, ə kɛɛ kala di pɔɔli. Ə pulu kulɔ kpan bɛlɛ Asdɔdə da gwɛlɛ taɠaa diɛ.

⁷ Yili nąą kaai Asdɔdə nuą di mo, diɛ mą: «Mąą hvo nɛ̨ɛ̨li, Israɛlə nwɔ Yálái nwɔ mįnɛ̨ kəhi hvo lɛɛ ku pɔɔli. Mąąhɔlɔɓo, aa ɲee wiɛ ku mɛ̨i a mɔlɔɔ; kuɔ mąn, ku wɔ yálá Dagɔn mąn.»

⁸ Di Filisti tɔɔɓɛlaa təli di di ɲąąkpɔn di diɛ diɛ: «Kwa pɛli Israɛlə nwɔ Yálá nwɔ kəhii kɛ pələ kɛi ləi?» Yiliɠaai diɛ diɛ: «Israɛlə nwɔ Yálá nwɔ kəhii, ə li Gatə.» Də li a Israɛlə nwɔ Yálái nwɔ kəhii Gatə.

⁹ Lii di mo la Gatə, Yai-Laa yee ə wiɛ daa nuą mɛ̨i, ɲɔw kɛnɛ̨ ə pili daa nuą hu. Yai-Laa ə mɔ̨nɔ̨ laa diɛ nɛapɛlɛ mąn, nu kpɛa-kpɛa mąn pulu kulɔ kpan ə pɛlɛ gəlee diɛ.

¹⁰ Di nɛɛ mą di Yálá nwɔ kəhii həɠə də li la Ɛkrɔn. Kɛlaa, di lɛɛ lɔ pai a gəhi, Ɛkrɔn nuą di tomą diɛ kɛ: «Daa pa ɓɛ a Israɛlə nwɔ Yálá ŋą kəhii, ku kəlee ku paa mɛ̨nį ɓa.»

¹¹ Di Filisti tɔɔɓɛlaa təli, di di ŋąąkpɔn, diɛ diɛ: «Ka Israɛlə nwɔ Yálái ŋą kəhii pənə ka dɛɛ ɓɛi ə həɠə laa, yili hvo mą, kwa nwɔ́ lɔi hu nuą kəlee ku nwun na hvo pa pili.» Ɲɔw ə lɔ nɔi nuą kəlee hu, diɛ kɛ di haa, ɛlɛɛ, Yálá yee aa kɛ wiɛ di mɛ̨i kpɔ a nwalawalaa.

¹² Nuą lɔwai nuąi di hvo haa, pulu kulɔ kpan ə pɛlɛ gəlee diɛ. Daa nąą kəlee ə kɛi nwoolaa diɛ wɔlɔ, di woo yɛ tɛ yələkɔlɔn ma.