Samuɛlə dɔlɔɔ 30 - Yálá laawoo hɛɓɛ (dc)

Di Siklagə kələn, Davidə ə hvilɛn Amalɛkə pulu

¹ Kɛlaa voló haaɓa yələ, lii Davidə da nwɔ nuąi di mo Siklagə, Amalɛkə nuą daa kɛ pa toomɛ̨i kɛ Siklagə da Negɛvə. Daa kɛ Siklagə hɛnŋaa kəlee həɠə, ɛlɛɛ daa daa gələn.

² Nɛ̨ąą da nuą kpɔ kɛ daai, nɛapɛlɛɛ da nu kpɛa-kpɛa, di gəlee hon a kɔluwɔ, kɛlaa di hvo nu ta paa, kɛlaa, də li a diɛ tɔwɔ pələ.

³ Pai Davidə da nwɔ nuąi di mo taai, di daa kaa gələn ŋąą, daa li a di nɛ̨ąni da di lonnii kəlee.

⁴ Davidə da nwɔ nuąi di pola a wɔlɔ, diɛ tomą, di lɛɛ wɔlɔi, ə lɛɛ ɉu hvaŋą ə kpɛɛ di yəi.

⁵ Daa kɛ Davidə nɛ̨ąni hveelɛi hon. Izreɛlə mun Ahinoamə, da Karmɛlə mun Navalə nɛ̨ą, Avigailə.

⁶ Davidə kwəi pilɛɛ kɛ mą, mąąhɔlɔɓo, nuą di kɛi baa mɛ̨nį ɓo a kwɛni. Nu kəlee liikələn ŋąą kɛ gwəi, da kɛi di kiliŋąhiɛ di lonnii hinąą da di lonnii nɛ̨ąą diɛ. Kɛlaa Yai-laa haalai, Davidə ə nii kpələ.

⁷ Davidə yɛ ɉaláá laa həli mun Abiatarə ɓa, yai kɛ a Ahimelɛkə, yɛ mą: «Pa a ɉaláá kulɔ həɠə.» Abiatarə ə li a ɉaláá kulɔ həɠə Davidə pɔ.

⁸ Davidə ə Yai-Laa mąąnin gɛ, yɛ mą: «Ŋą́ pɛli hvilɛn ɉii nu kpului tii pulu, gáá pai di hon ɉii ɓai?» Yai-Laa yɛ mą: «Hvilɛn di pulu, ə́ kaa pai di hon ɉii, ə́ ə́ wɔ nuąi kaa, ə di kulɔ di yəi.»

⁹ Davidə da bɔ nuą də li, di həli Ɲai tii da kɛ mą Besɔrə na.

¹⁰ Davidə da nu nwun nąąn di lɛɛ di ɲɛ̨itɔwɔ, diɛ li, kɛlaa nu nwun veelɛ di lɛɛ laa, di hvįikpɛɛ pələ ɓa, di hvo pɛli Besɔrə teen ɉii.

¹¹ Di Eziptə mun da kaa ɲɛa kɔ́wɔ hu, di ɉon, də li la Davidə pɔ. Di lɔpɛin tɛɛ bɔ ə mįi, di ya tɛɛ bɔ ə gbələ.

¹² Di ɓolaa nwɔ̨mįi da viɲə ɓá kpaɠa hveelɛ tɛɛ bɔ a gbalaa. Ɉulɔnui tii ə kpɛɛ a gɔ̨nɔ̨n mįɛ̨ nįį ə lɔ, aa kɛ pulu həɠə hvóló haaɓa da kpįnį haaɓa yee mu, hvo kɛi hɛn da mįi, hvo kɛi hɛn da kpələ.

¹³ Davidə yɛ mą: «Gbɛɛ nwɔ nu ɓaa yɛ́, ɛlɛɛ, ə́ həɠə mį?» Yili yɛ mą: «Eziptə mun maa ɲą́ą́, Amalɛkə mun da nwɔ luwɔ ɓaa a ɲą́ą́, ə ɓo mą́ą́, ə dóó, mąąhɔlɔɓo, gɔ́lɔi hvo kɛ pɔ̨nɔ̨ li; voló ɉaaɓa ɓaa háákələi.

¹⁴ Kuɔ ɓə li doo mɛ̨i kɛi Kereti lɔi ɉɛɠɛɛ pələ, Ɉuda lɔi, da Kalɛbə nwɔ lɔi ɉɛgɛɛ pələ; ɛlɛɛ, kuɔ ɓə nwɔ̨n bili Siklagə.»

¹⁵ Davidə yɛ mą: «Yá pɛli tɔɔi dɔ́wɔ gu həli nu kpului tii ɓa?» Ɉulɔnui tii yɛ mą: «Yá ə́ kwɛla a Yálá, yɛ́ diɛ hva báá, ɛlɛɛ hva dɛɛ nwɔ́ luwɔ nąmu pɔ a nįnɛ̨ ŋą́ tɔɔ ə́ tɔwɔ.»

Davidə ə Amalɛkə nuą hon

¹⁶ Ɉulɔnui tii ə tɔɔ Davidə tɔwɔ, də li Amalɛkə nuą daa kɛ taɠa taɠa nɔi nąą kəlee diɛ kɔ̨nɔ̨n mįi, diɛ di kpələ, diɛ kwəinɛ̨ɛ̨ kɛnɛ̨ kulɔ a ɉɛn gɛnɛ̨i tii di ɉɔlɔɓo Filisti lɔi hu da Ɉuda lɔi hu.

¹⁷ Davidə ə pɛlɛ di paa ɓa, ə həɠə yələ ɓoɔ ɓa, ə lɛɛ maa ɉu yələ wului pɔ; nu ta hvo kulɔ ɉu, ə kulɔ laŋaa nwun nąąn bulu, di tɛ ɲɔ̨nwɔmɛɛɠaa mɛ̨i, di pu.

¹⁸ Yii kpɔ Amalɛkə nuą di ɉəɠə, Davidə ə gəlee hɔlɔɓo, ə nɛ̨ąni hveelɛi diɛ kpɛli di nwun gulɔ haa yəi.

¹⁹ Nu ta hvo lɛɛ pulu nɛapɛlɛɛ da nu kpɛa-kpa di lɔwai, di lon ɉinąą da di lon nɛ̨ąą. Ə mą kɛ ɉɛnŋaai Amalɛkə nuą di ɉəɠə, da lɔpee hvo lɛɛ pulu. Davidə ə pənə ə pa a gəlee.

²⁰ Davidə ə daatɛlɛɛɠaa kəlee həɠə, nįŋɛ̨ɠaa da mɛlaaɠaa. Nuąi kɛi hiɛ dɔwɔ diɛ bələ lɛ, di kɛi kɛ diɛ: «Ɉɛn Davidə ə ɉon kɔ́ hu ya ka.»

²¹ Davidə ə həli nu nwun veelɛi tii nee lɛɛ Besɔrə ya kwɛlɛ diɛ. Di kulɔ, diɛ pa Davidə laakwiɛn ɉii. Davidə ə həli diɛ, da nu kpulu, ə di túwɔ́ ɓo.

²² Nuąi tii da Davidə ni də li, nuą tii lɔwai, yiiɠaai di kwəi ɲɔ̨nwɔ diɛ, da nu kpoloonŋaa, di tɔɔ diɛ kɛ diɛ: «Yii gwa nuąi ŋɛ̨i gu hvo li li; ɉɛnŋaai ŋɛ̨i gu di hon, gu hvo da tɛɛ di pɔ, ə kulɔ lɔ di nɛ̨ąni da di lonnii. Diɛ lɔ ɓə da di həɠə də li a diɛ.»

²³ Kɛlaa, Davidə yɛ diɛ: «Ka hva pɛli gɛi tii ną́n nonnii, a hɛn Yai-Laa ə dɛɛ gu pɔ, yaai tii ɲɛ̨i kɛ guɔi, ə lɛɛ, nu kpului tii too gu mɛ̨i, yɛ di too gu yee ŋą.

²⁴ Gbɛɛ kpɔ ɓə a pɛli nwəli tɔɔi ka woo ɓa mɛ̨nįi ŋɛ̨i hu. Nui a li gɔ́ ɓa, da nui a lɛɛ ɉɛnŋaakwɛlɛ, di kɔ́ pələ a kɛ lɔ tɔ̨nɔ̨ gɔ́ honŋaa tii, da gəlee pɛlɛ lɔ gee ɓa, di ŋaakwɛlɛ.»

²⁵ Ə həɠə ɲələi tii ɓa, ə yili kɛ a Israɛlə nwɔ tɔ́n da ɉiɛ pələ ta ə lɛɛ, gaa nii mą, ə mą kɛ yiihu.

²⁶ Həlii Davidə ə mo Siklagə, ə Ɉuda kalanɉonŋaa kɔ́ a ɉɛnŋaai di ə ɉɔlɔɓo, ə di wɛi tɛɛ di pɔ. Yɛ diɛ: «Ka hąmą ka, hɛn ku ɉon kɔ́ hu Yai-Laa ɲowoɠaa yəi, da li.»

²⁷ Ə da tɛɛ Betɛlə nuą diɛ, da Ramotə nɛ̨ŋɛ̨ lɔi hu nuą diɛ, da Yatirə nuą diɛ.

²⁸ Ə da tɛɛ Aroɛrə nuą diɛ, da Sifemotə nuą, Ɛstemoa nuą.

²⁹ Ə da tɛɛ Rakalə nuą diɛ, Yerahmeɛlə taaɠaa, da Keni taaɠaa.

³⁰ Ə da tɛɛ Hɔrma nuą diɛ, da Bɔrə-Asan nuą, Atakə nuą,

³¹ da Hebrɔn nuą, da ɓɛi lɔpee Davidə da nwɔ nuą di tɛɛ laa.