Samuɛlə dɔlɔɔ 29 - Yálá laawoo hɛɓɛ (dc)

Filisti nuą di di yee kulɔ Davidə hu

¹ Filisti nuą di di wɔ kɔ́kulááɠaa kəlee ɲąąkpɔn Afɛkə, Israɛlə nuą di di tɔɔ gulɔ ɲee lɔwai, Izreɛlə kwɛlɛ.

² Filisti tɔɔɓɛlaa di kɛi lia tɛɛ gɔ́ laɠaɠaa ɲɛ̨itɔwɔ, gɔ́ laɠa kpɛa-kpɛaɠaa da bɛlɛɛ-pɛlɛɛɠaa mąn. Davidə da nwɔ nuąi ɓə kɛi pa a gbəlan mąą, da Akisə ni.

³ Filisti tɔɔɓɛlaa diɛ Akisə ɓa: «Gbɛɛ nuą ɓaa Hebreuɠaai ŋɛ̨i?» Akisə yɛ diɛ: «Davidə ka tii yai a Israɛlə tɔɔmun Saulə nwɔ kɛla, gwɛlan dɔ̨nɔ̨ veelɛnąą ka, gaa gɔ́wɔ́ mɛ̨i, ə lɛɛ, yii kpɔ ə pa ɓɛ, ə lɛɛla ɉu, háákələi ə həli, və ta ɉɔn gaa li mą.»

⁴ Filisti tɔɔɓɛlaa di di liiholi Akisə pɔ, diɛ mą: «Nui ŋɛ̨i yali bulu, ə li ɓɛi ə́ ɉee laa, gwa diɛni gu hvo li gɔ́ ɓa, hvo pa nee pɛlɛ guɔ gɔ́ hu. Lə ɓə a pɛli gɛi, ə gɛ, nwɔ mɛ̨nį Nąmu kwəi ə nɛ̨ɛ̨ ɓɔ? Kɛlɛi gu wɔ nuą ŋɛ̨i nwun galənŋaa lɔ ɓə?

⁵ Davidə tii ɓə di kɛi nwələ too a naa, diɛ kɛ diɛ: ‹Saulə aa nwɔ nu waa paa, Davidə aa nwɔ nu waa pow pow paa, kɛlɛi maa Davidə ɓəi?›»

⁶ Akisə ə Davidə təli, yɛ mą: «Yai-laa Yálá hvulúmąą laa hu, nu haŋąą ɓaa yɛ́. Gwə́i nɛ̨ɛ̨ mɛ̨nį ɓa gwa yɛ gwəli gɔ́ ɓa, mąąhɔlɔɓo, və́ mɛ̨nį ɲɔ̨n gaa li ə́ yee pɔ. Yii kpɔ ə́ pa bɔ́, ə lɛɛ ɉu háákələi hvóló a həli. Kɛlaa, ə́ wɛli hvo nɔi nwun nąmįną diɛ.

⁷ 'Yáli ə́ pulu, li a ə́ liilaa yɛ́, ə gɛ hvo pa mɛ̨nį ta kɛ yɛ nwąną Filisti nuą diɛ.»

⁸ Davidə yɛ Akisə ɓa: «Lə ɓə ŋą́ gɛ, lə ɓə yá pɛli moi ə́ wɔ tímun ma a ɉɔn, ə həɠə ɲələi ŋą́ lɔ la ə́ wɔ kólói hu ə həli háákələi ɓa, yai vá pɛli lii kɔ́ pɛlɛi nwɔ́ mɛ̨nį nąmu tɔɔmun ɲowoɠaa diɛ?»

⁹ Akisə ə Davidə woo pulu pənə, yɛ mą: «Gíli kaa tii ɉu, a tɛ̨ą, yáá níí hon yɛ Yálá nwɔ malaka. Kɛlaa, Filisti nu kpɛa-kpɛaɠaa diɛ gwa kaa ni gu hvo li gɔ́ ɓa.

¹⁰ A kɛ yili, kaa tii, ka humo tínąą, ka ə́ Nąmu yee pɔ nuą, ka pa ɓɛ, ə lɛɛ, ka li ɓɛi ŋą́ ka hee laa. Ka humo ka ká muhəɠə, yələ a ɓɔ lɔ, ka li.»

¹¹ Davidə ə humo ə muhəɠə, yaa da nwɔ nuąi, də li yələ wala piinɛ̨ɛ̨, ə pənə yɛ li Filisti lɔi hu, Filisti nuą diɛn diɛ li Izreɛlə.