Samuɛlə dɔlɔɔ 28 - Yálá laawoo hɛɓɛ (dc)Saulə ə li tɔlu kpɛi nɛ̨ɛ̨nu ta pɔɔli Ein-Dɔrə daai 1 Nąąlɔwai tii hu, Filisti nuą di di wɔ kɔ́kulááɠaai ɲąąkpɔn diɛ li kɔ́ pɛlɛi Israɛlə ɓa. Akisə yɛ Davidə ɓa: «Mąą nɛ̨ɛ̨ ə́ kili ə pu ɉu yɛ́ diɛ ə́ kaa pai hvilɛn ɉii bɔ́ guɔ li gɔ́ ɓa, yɛ́ ká ə́ wɔ nuąi.» 2 Davidə yɛ Akisə ɓa: «Mɛ̨nįi ə́ wɔ tíɓo kɛ mun kaa pai gɛi, ə́ kaa pai gaai.» Akisə yɛ Davidə ɓa: «Yɛ́ ɓə pai kɛi mą́ą́kpɛi a yələ kəlee.» 3 Samuɛlə aa kɛ haa, Israɛlə nuą kəlee daa kɛ ɉaa mɛ̨nį kɛ. Ə lɛɛ, daa kɛ noo bɔ taai Rama. Saulə aa kɛ tɔlu kpɛ nuą da ɲąmuątaa tɔlukpɛ nuą kəlee kpɛ lɔi hu. 4 Filisti nuą di di ɲąąkpɔn, di di tɔɔi kulɔ Sunamə. Saulə ə nuą Israɛlə nuą ɲąąkpɔn di di tɔɔi kulɔ Gilboa. 5 Saulə ə Filisti nuą di wɔ kɔlaɠai kaa, ə ɲɔw, nii ə kpɛlin gwəi kpɔ kɛnɛ̨. 6 Saulə ə Yai-Laa mąąnin gɛ, kɛlaa, Yai-Laa hvo nwoo pulu pənə, ə kɛ a hįi pələ, ə ma kpɛli kɛ a ɉaláá laa həli mun, ə kɛ a Yálá kwəi mɛ̨nį hukulɔ mun. 7 Saulə yɛ nwɔ nuą diɛ: «Ka Ɲąmuątaa kpɔlikpɛ nɛ̨ɛ̨nu ta kwɛli mą́ą́, ŋą́ li, ŋą́ mąąnin gɛ.» Nwɔ́ tíɓo kɛ nuąi diɛ mą: «Ɲɔ̨muątaa tɔlukpɛmun da kaa Ein-Dɔrə.» 8 Saulə ə mąąhəɠəɠaa mąąhvalin, yɛ now, nu hveelɛ di hvilɛn bɔ, də li nɛ̨ɛ̨nui tii pɔ kwiihąą. Saulə yɛ mą: «Ɲɔ̨muą tɔlukpɛ mą́ą́, nui ŋą́ vaa ɓo yɛ́ ə́ dəli.» 9 Nɛ̨ɛ̨nui tii yɛ mą: «Mɛ̨nįi Saulə ə gɛ, kɛlɛi gbaɠala kaa yɛ́, ə ɲąmuątaa tɔlikpɛ nuą da tɔli takpɛli kpɛ nuą kulɔ nɔi, lə ɓə kɛ yai ə́ kaa tooi mú a nwún nɛɛ pələ mɛ̨nįi?» 10 Saulə ə gwɛla a Yai-Laa laa, yɛ mą: «Yii kpɔ Yai-Laa kaa a vulú, mɛ̨nį ta hva ə́ kaa mɛ̨nįi ŋɛ̨i hu.» 11 Nɛ̨ɛ̨nui tii yɛ mą: «Gbɛɛ ɓə yɛ́ ŋą́ dəli?» Saulə yɛ mą: «Samuɛlə təli mą́ą́.» 12 Nɛ̨ɛ̨nui tii ə Samuɛlə kaa, ə tomą kpɔ kɛnɛ̨. Nɛ̨ɛ̨nui tii yɛ Saulə ɓa: «Ə́ mówo lə mɛ̨nį ɓa: Saulə ɓaa yɛ́!» 13 Tɔɔmun yɛ mą: «Hvo ɲɔw, lə ɓə ə́ gaa?» Nɛ̨ɛ̨nui tii yɛ Saulə ɓa: «Ŋą́ą́ haaɲąmu ta kaa yɛ kulɔ nɔi mu.» 14 Saulə yɛ mą: «Gɛ pələ kaa ləi?» Nɛ̨ɛ̨nui yɛ tii yɛ mą: «Gaa a hulɔgolo, biliɉu ɓə biliɛ galan ɉu.» Saulə ə gbaɠala kaa, yɛ kɛ diɛ Samuɛlə li. Ə nwun vilɛn, ə pɛlɛ nɔi ɓa. 15 Samuɛlə yɛ Saulə ɓa: «Ə́ kaa vįikpɛɛi, yɛ́ dəli lə mɛ̨nį ɓa?» Saulə yɛ mą: «Gwə́i aa pili maa kɛnɛ̨, Filisti nuą daa kɔ́ pɛlɛ mą́ą́, ɛlɛɛ, Yai-Laa aa kulɔ búlu kpɔ a neelee. Hvo kɛa nwoo pulu pənəi a gwəi mɛ̨nį hukulɔ nuą laaləi a wala kɛ tii a hįi woo. Yili ɓə gɛ gɛ́ ə́ təli, mɛ̨nįi mąąnɛ̨ɛ̨ ŋą́ gɛ, nɛ mą́ą́.» 16 Samuɛlə yɛ mą: «Akɛ Yai-Laa aa mąą kwɛa yɛ́, yɛ ɲɛ̨i ɲɔ̨nwɔ̨ɔ̨ hee yɛ́? Maaləngɛ mɛ̨nį ə́ yəi nwun maa lə? 17 Mɛ̨nįi ta Yai-Laa ə mo mą́ą́ gɛ́ mo, ya lɔ ka tii gaa gɛi. Yai-Laa aa dɔɔlaa kulɔ ə́ yəi, aa dɛɛ nu takpɛli pɔ, yii gaa a ə́ hee yɔwɔ ya ɓaa Davidə. 18 Mąąhɔlɔɓo, hvo lɛɛ li Yai-Laa woo mu, hvo nwąną kulɔ li Amalɛkə ɓa. Yili ɓə gɛi Yai-Laa yɛ mɛ̨nį ŋɛ̨i laa yɛ́ háákələi. 19 Ə lɛɛ, Yai-Laa kaa pai yɛ́ ka Israɛlə ka lɔi Filisti nuą yee ŋą. Tínąą, yɛ́ ka ə́ lonnii ka káá pai kɛi bɔ́ haaɓɛlaa taa. Israɛlə kɔlaɠaɠaa diɛ kpɛli, Yai-Laa aa di lɔ Filisti nuą yee ŋą.» 20 Mɛ̨nįi ŋɛ̨i Samuɛlə ə mo Saulə ɓa, ɲɔw pələ ɓa, ə hɔlɔn niiɓa. Ə laa yili mɛ̨i, viikpɛɛi kɛ kɛnɛ̨, aa kɛ túwɔ́ tii, aa yii tii, hvo kɛ hɛn da mįi li. 21 Nɛ̨ɛ̨nui tii ə pənə ə pa, ə Saulə kaa ɲɛ̨ilai mąąhvalin ŋąą; nɛ̨ɛ̨nui tii yɛ mą: «Ə́ kaa gaai, ə́ wɔ luwɔnɛ̨ąi aa wəli tɔɔ ə́ woo ɓa. Gbɔ́wɔ́ nwun na pili mɛ̨nį ka tii ŋą́ tɔɔ dɔwɔ, kɛlaa, ə mą kɛ tii, mɛ̨nį ə́ mo mą́ą́, ŋą́ gəlee kɛ. 22 Yii hu kɛa, ə́ wəli tɔɔ yɛ́ kpɛli mąn ə́ wɔ luwɔnɛ̨ąi woo ɓa, tɔɔ ŋą́ kɔ̨nɔ̨n pɛli, ə́ mįi ə́ nii tawolo ə lɔ, yɛ́ pa hvilɛn ɉii bələ ɓa.» 23 Saulə hvo gɛ, yɛ mą və́ hɛn da mįi. Kɛlaa, ɓɔ nuą di hɔlɔ ma, ə mą kɛ nɛ̨ɛ̨nui tii. Ə hvaa di woo ɓa, ə muhəɠə nɔi ɓa, ə hee gbəli mɛ̨i. 24 Nįŋɛ̨ lon ə kɛ nɛ̨ɛ̨nui tii yəi, yɛ ɲąąkɔn baa mɛ̨nį ɓa, ə baa kpɔlɔɔ ɲąą ɓa, ə lɛɠɛ hunwɔ̨ həɠə, ə giin, ə ɲili, hvə lɛɠɛ tɛ hɛn bu ɉu. 25 Ə ɉee Saulə da bɔ nuą di lííla, di mįi, yili pulu di hvilɛn bələ ɓa, diɛ li gbinįi tii hu. |