Samuɛlə dɔlɔɔ 27 - Yálá laawoo hɛɓɛ (dc)Davidə ə mąąkilɛ Filisti nuą pɔɔli 1 Davidə ə mo gwəi pələ, yɛ kɛ mą: «yələ ta, ə kɛ a pələ lɔpee, gbəli hu, Saulə kaa pai báái, mɛ̨nįi ŋɛ̨i hon bələ takpɛli hvo laa, hvo kɛ li lɔ ŋą́ mą́ą́kilɛ Filisti nuą pɔɔli, Saulə kaa pai kpɛlai gwɛ́liɛ ɓa Israɛlə lɔi kɔ́lɔ kəlee, gúlɔ pələ lɔ ka tii ɲəi.» 2 Davidə da bɔ nuą nwun mɛ̨idai də li Maokə lon Akisə pɔɔli, yai kɛ a Gatə tɔɔmun. 3 Davidə ə hee Akisə kɔ́wɔ mɛ̨i Gatə, yaa, da bɔ nuą kəlee da ɲee bɛlɛ́n nuą. Davidə da nɛ̨ąni hveelɛi: Izreɛlə nɛ̨ɛ̨nu Ahinoamə da Avigailə, Karmɛlə mun Navalə nɛ̨ą. 4 Di ɉukulɔ Saulə ɓa, diɛ mą: Davidə aa pu, aa li Gatə, Saulə ə kpɛla kɛa gwɛliɛ ɓa. 5 Davidə yɛ Akisə ɓa: «Akɛ mą́ą́ mɛ̨nį aa ə́ lii hon, taa ta tɛɛ bɔ́ nɔi kwəi pələ, ŋą́ hee laa. Ə́ wɔ tí mun a lɛɛ pələ kɛ ləi ə́ kwɛlɛ daa-lee hu?» 6 Akisə ə nɛɛ mą ə Siklagə tɛɛ bɔ. Yili mɛ̨nį ɓə gɛ Siklagə kaa la a Ɉuda tɔɔ ɓɛlaa di wɔ lɔi ta, ə mą kɛ háákələi. 7 Kwɛlan dɔ̨nɔ̨ ɲąnin nąąn mə Davidə ə gɛ Filisti lɔi hu. 8 Davidə da nwɔ nuą də li, di kɔ́ pɛlɛ Gesurə nuą diɛ, da Girze nuą da Amalɛkə nuą, nuąi tii ɓə kɛ heeni Surə ə lɛɛ ɉu ə həli Eziptə lɔi hu. Nu huwuɠaai tii ɓə heeni nɔi tii hu wɔlɔ kɛ ɓa. 9 Davidə ə kɛi nuą paa, yɛi kɛ a hulɔnu a wala kɛ tii nɛ̨ɛ̨nu, hvo kɛi da lɛɛ yɛnɛ̨ɛ̨. Yɛ di wɔ taatɛlɛɛɠaa gbɛa-kpɛa da bɛlɛɛ-pɛlɛɛ, ɉoohvaalənŋaa, ɲɔ̨nwɔmɛɛɠaa da həɠəɠaa yɛ gəlee həɠə. A pənə kɛ a pa, ə kɛi li Akisə pɔɔli. 10 Akisə a kɛ mą: «Ka li doomɛ̨i kɛi mįnɛ̨ pələ háákələi?» Davidə ə kɛi kɛ mą: «Ɉuda lɔi hu ɉɛɠɛɛ pələ.» A wala kɛ tii, «Yerahmeɛlə lɔi ɉɛɠɛɛ pɔlə.» A wala kɛ tii nwɔ̨nɔ̨, «Keni lɔi ɉɛɠɛɛ pələ.» 11 Davidə hvo kɛi hvaa mą di hvo pa Gatə a nu ta yii a kɛ a vulú, ə kɛ a nɛ̨ɛ̨nu, ə kɛ a hulɔnu. Ə kɛi ɲɔw, yɛ diɛ di hvo pa nee ku pulu kulɔ, diɛ kɛ mą: «Bələi Davidə a gɛ la bələ ka.» Bələ ɓə Davidə ə kɛi túwɔ́ la, ɓɛlɔwai kpɔ tii ə kɛ la Filisti nuą di wɔ lɔi hu. 12 Akisə laikɛ Davidə la, ə kɛi mo gwəi pələ yɛ kɛ diɛ: «Davidə aa gili kulɔ Israɛlə lɔi hu, gaa pai lɛɛi ɲéé mu a yələ kəlee.» |