Samuɛlə dɔlɔɔ 26 - Yálá laawoo hɛɓɛ (dc)Davidə ə Saulə hulu maa lɛɛ Zifə lɔi pun ɉu 1 Zifə nuą di pa di Saulə kaa Givea, diɛ mą: «A kɛ tii, Davidə hvo mɔ̨ɔ̨ Hakila ɲee kpu kpu nwuɔ̨, nɔi pun gɔwɔ tɔɔi pələ yɛ noo?» 2 Saulə ə muhəɠə ə li Zifə nɔi pun ɉu, ə nu waa haaɓa hvilɛn bɔ, a Israɛlə kulaaɠaa diɛ li Davidə kwɛlii. 3 Saulə ə dɔɔi kulɔ Hakila yee kpukpu nwuɔ̨ nɔi pun gɔwɔ tɔɔi pələ, bələ kwɛlɛ. Davidə ə lɛɛ nɔi pun ɉu, ə gbaɠala kaa, yɛ kɛ Saulə aa pa gwɛli mɛ̨nį ɓa nɔi pun ɉu. 4 Davidə ə nuą tɔɔ, diɛ li nɛ̨lɛ̨ɛ̨n naa kɛi, akɛ Saulə aa pa kpɔ a nelee. 5 Davidə ə muhəɠə, ə pa ɓɛi Saulə aa dɔɔi gulɔ laa, ɓɛi Saulə da Nɛrə lon Avnɛrə yai kɛ a nwɔ kɔlaɠa nwun nąmu di kɛ laa laani, Davidə ə nąą kaa. Saulə laani, gɔ́kulááɠaa daa mąątinɛ̨n. 6 Hɛtə mun Ahimelɛkə da Ɉoabə gaayɔwɔ kɛ a Avisai Seruya lon, Davidə yɛ diɛ: «Gbɛɛ ɓə kwa yaa ku kaa lii Saulə pɔ nwɔ kɔ́kulááɠaai lɔwai?» Avisai yɛ mą: «Gwa yɛ́ ɓə lii.» 7 Davidə da Avisai di həli kwii hąą, ɓɛi gɔ́ laɠa ə kɛ laa, naa kwɛlɛ. Saulə ə kɛ laa ni yɛ yii nuą lɔwai. Nwɔ kpalai hvilɛn ŋąą nwun na nɔi ɓa. Avnɛrə da gɔ́kuláá kəlee di kɛi yii, di ɓo pu ni gwɛlɛ. 8 Avisai yɛ Davidə ɓa: «Yálá aa ə́ yowo lɔ ə́ yee ŋą háákələi. Hvaa kɛa mą, ŋą́ gbɔn nɔi ɓa a kpala pilii tɔ̨nɔ̨; vá veelɛnąą too mą.» 9 Davidə yɛ Avisai ɓa: «Hvo baa. Nui Yai-Laa ə tɔɔ wulɔ lɔ mą, gbɛɛ ɓə a pɛli ɲee tunwɔ̨n ɉii mą, nu a yili kɛ, hvo kɛ li di mąą nu hutɔɔ.» 10 Davidə yɛ diɛ: «Yai-Laa kaa a vulú, yaa lɔ ɓə mąąnɛ̨ɛ̨ ə gɛlɛ, ə mą kɛ ɉaa yələ aa ɉəli, a wala kɛ tii, ə li kɔ́ mɛ̨i ə lɛɛ ɉu. 11 Yai-Laa ə gɛ́ a hɔn maa mun, akɛ ŋą́ ɲéé pɛlɛ nui Yai-Laa ə ɉee a tɔɔmun ma. Gbalai tii gwɛlɛ, da nwɔ ya pu hɛn həɠə gwə li.» 12 Davidə ə gbala həɠə Saulə nwun na da ɲá pu hɛn, də li. Nu ta hvo di kaa, nu ta hvo gili kɔ́lɔn, ɛlɛɛ, nu ta hvo nwun. Di kəlee di kɛi yíi, Yai-Laa aa kɛ yíi kɛnɛ̨ tɛ di ɲɛ̨i. 13 Davidə ə tɛɛ a pələ takpɛli, ə tɛ ə tɔɔ ɲee ton na kwɛa la. 14 Davidə ə nwoo pili kpɔ kɛnɛ̨ gɔ́ kɔ́ nuą da Nɛrə lon Avnɛrə ni di tənən ma pələ, yɛ mą: «Avnɛrə! Hvo hvaai?» Avnɛrə yɛ mą: «Gbɛɛ ɓa a yɛ́-o, yaai ə́ kaa tomąi tɔɔmun nwəlii?» 15 Davidə yɛ Avnɛrə ɓa: «Kɛlɛi kpakolo ɓaa a yɛ́-e! Ə lɛɛ, ə́ ɲɔ̨nwɔ̨mąn və Israɛlə lɔi hu-e, lə ɓə kɛ yai hvo ə́ ɲɛ̨i kɛ li ə́ nwun nąmu tɔɔmun ma? Nɔi lon da ə pa, yɛ kɛ ə tɔɔmun ə́ nwun nąmu paa. 16 Mɛ̨nįi tii yáá gɛ, hvo lɛlɛ li. Yɛ bələi Yai-Laa kaa la a vulú, mąąnɛ̨ɛ̨ kɛ di ka kəlee ka paa, mąąhɔlɔɓo, ka hvo ka ɲɛ̨i kɛ li ka wɔ tɔɔmun ma, yai Yai-Laa aa dɔɔ wulɔ hiɛ mą. Naa kaa tai, tɔɔmun nwɔ kpalai da nwɔ ya pu hɛn di kaa mį?» 17 Saulə ə Davidə woo kɔ́lɔn, yɛ mą: «Ə́ woo li, nón Davidə!» Davidə yɛ mą: «Nwóó li tɔɔmun nwɔ́ mɛ̨nį Nąmu.» 18 Davidə yɛ nwɔ̨nɔ̨ mą: «Akɛtii, nwɔ́ mɛ̨nį Nąmu hvilɛn mɛ̨nį nwɔ tí mun bulu, nwun maa a lə? Lə ɓə ŋą́ gɛ, ɉɔ́n maa a lə? 19 Nwɔ́ mɛ̨nį nąmu tɔɔmun, ə́ wəli tɔɔ yiihu ə́ wɔ tí mun woo ɓa: ‹Akɛ Yai-Laa ɓə ə́ ɲąątɔɔi mą́ą́, ə hvaa mą, haláá hɛn di kaa dɛɛi bɔ, yili ə niilaa. Kɛlaa, akɛ nuą ɓə, mąą nuąi di kɛ a nɛ̨ŋɛ̨n naa nuą Yai-Laa ɲɛ̨i ɓa. Hvo gai, daa gbɛ́ háákələi, yɛ́ gulɔ Yai-Laa nwɔ lɔi hu, diɛ kɛ mą́ą́: Li ə́ tí haliɠaa diɛ.› 20 Yálá hvo gɛ ɲą́mą hvo pu lɔi ɓa, mą́ą́ kwɛa Yai-Laa ɓa. Mąąhɔlɔɓo, Israɛlə tɔɔmun aa kɔ́ muhəɠə, vilɛn ŋąą la kpə-kpə pulu, yɛ da kɛi haɉali kpɛ yeeɠaa lɔwai.» 21 Saulə yɛ mą: «Ŋą́ą́ nɛ̨ŋɛ̨n ɉəɠə, pənə ə pa nón Davidə. Vá kɛa mɛ̨nį ɲɔ̨n gɛ a yɛ́. Mąąhɔlɔɓo, yáá nwɔ́ yɛnɛ̨ɛ̨ kaa a hɛn mąąwiaa háákələi. A tɛ̨ą, ŋą́ą́ túwɔ́ yɛ ɓowo mun, ŋą́ą́ lan gbɔ kɛnɛ̨.» 22 Davidə ə pənə yɛ diɛ: «Tɔɔmun nwɔ kpalai ka, tɔɔmun bɔ hulɔnon dɔ̨nɔ̨ ə pa ə ɉəɠə. 23 Yai-Laa kaa pai nu kəlee hvɛla kulɔi yɛ bələi dúwɔ́ pələ kaa la. Yai-Laa aa kɛ ə́ lɔ ɲéé ŋą háákələi, kɛlaa, və́ gɛ li və́ ɲéé pɛlɛ nui Yai-Laa aa dɔɔ wulɔ hiɛ mą. 24 Bələi lɔi tii ŋą́ ə́ wɔ yɛnɛ̨ɛ̨ kaa la a hɛn mąą mɛ̨nį nwąnąą, nwei kaa lɔ tii a hɛn mąą mɛ̨nį nwąnąą Yai-Laa ɲɛ̨i ɓa. Ə lɛɛ, ə gúlɔ nwún napili mɛ̨nįɠaa kəlee hu.» 25 Saulə yɛ Davidə ɓa: «Nón! Yálá ə lúwɔ́ too yɛ́. A tɛ̨ą, ə́ kaa pai mɛ̨nį kpɛa-kpɛaa kɛi, ə́ kɛ mɛ̨nįɠaa hu kaa pai nɛ̨ɛ̨i, hea hvo ɉu.» Davidə ə tɛɛ yɛ li, Saulə ə pənə ə li bɔɔli. |