Samuɛlə dɔlɔɔ 25 - Yálá laawoo hɛɓɛ (dc)Nabalə ə kwəiɲɔ̨n gulɔ Davidə ɓa 1 Samuɛlə haa pulu, Israɛlə nuą di di ŋąąkpɔn, di ɉaa mɛ̨nį kɛ, di noo bɔ taai Rama. Davidə ə muhəɠə ə li Paran nɔi pun ɉu. 2 Hulɔnu ta ə kɛ Maɔn daai, ɲəi hɛnŋaa di kɛ Karmɛlə. Ɉulɔnui tii ə kɛ a hɛn gɔw ną́mu kɛnɛ̨. Ɓɛlaa waa haaɓa da Ɓɔɔli waa tɔ̨nɔ̨ ɓə kɛ ɲəi. Nąąlɔwai ɉulɔnui tii ə tɛ Karmɛlə yee ɓa nwɔɔ taatɛlɛɛɠaa ləɠa tee mɛ̨nį ɓa. 3 Ɉulɔnui tii laa ɓa kɛ a Navalə, nɛ̨ą laa ɓaa Avigailə. Nɛ̨ɛ̨nui tii ə kɛ a kilimąą nɛ̨ɛ̨nu. Kɛlaa, ɉilɛ kili walawalaa kɛ, nwɔ mɛ̨nį ɲɔ̨nwɔ̨ɔ̨. Ə kɛ a Kalɛbə nu huwu ta. 4 Davidə ə lɛɛ nɔi pun ɉu, ə bələ mɛ̨n diɛ mą: Navalə kaa nwɔ ɓɛlaaɠaai ləɠa teei. 5 Davidə ə hilɛlɛa pow tɔɔ, yɛ diɛ: «'Ka li Karmɛlə, ka həli Navalə ɓa, ka nwɔ́ hvaamąą ɓo mą, 6 kaa mą: ‹Gwəlan ŋɛ̨i pai ə nɛɛ yɛ́, yɛ bələi ɲɔɔ kwɛlan mu nwɛi aa kɛ la. Liilaa ə kɛ ə́ pɔ, liilaa ə kɛ ə́ wɔɔ pɛlɛ́i mɛ̨i; liilaa ə kɛ ə́ yəi hɛn gəlee mɛ̨i. 7 Ŋą́ą́ bələ mɛ̨n, diɛ di kaa taatɛlɛɛɠaa ləɠa teei ə́ pɔɔli, ə həli yɛ́, kwa ə́ wɔɔ taatɛlɛɛ mɛ̨i kaa nuąi ku kɛ ku kee pɔ, di hvo di mɔ̨nɔ̨ ɓo, hɛn da hvo pili di yəi, volóɠaai kpɔ tii di gɛ Karmɛlə yee nwuɔ̨. 8 Ə́ wɔ hilɛlɛa mąąnin gɛ, di kaa pai kɛi yɛ́: Tɛ̨ą li. Ə́ yee lɛlɛɛ hee kani nwɔ́ hilɛlɛai mu, hvo gaai kwaa pa a hɛli yələ. Nɛ̨ɛ̨ yɛ́, yii ə́ yee a pɛli mą, dɛɛ ə́ wɔ tínuą da ə́ lon Davidə ni pɔ.›» 9 Davidə nwɔ hilɛlɛai də li, di tɔɔ nwooɠaa tii kəlee ɓa, di ɉukulɔ Navalə ɓa, Davidə laa hu. Di tɔɔ diɛ nąą mąąkpɔn. 10 Navalə ə Davidə nwɔ nuą woo pulu pənə, yɛ diɛ: «Gbɛɛ ɓaa Davidə, gbɛɛ ɓaa Ɉɛse lon? Luwɔ tamąą kaa yiihu kulɔi di nąmįną pɔ, diɛ pu. 11 Ya ɓə ŋą́ li tɔɔi, gɛ́ nwɔ́ lɛɠɛ, nwɔ́ lɔɔ, nwɔ́ yá, da nwɔ́ huwɔi ŋą́ baa nwɔ́ ɓɛlaa ləɠa mɛ̨i tee nuą diɛ, gɛ́ dɛɛ nuąi və́ di kɔ́lɔn di pɔ!» 12 Davidə nwɔ hilɛlɛai di pənə di pulu, di pa a di yeehvowolo, di mɛ̨nįɠaa tii kəlee hukulɔ Davidə ɓa. 13 Davidə yɛ nwɔ nuąi diɛ: «Nu kəlee ə nwɔ kɔ́ kɔ́ ɓɔwai kpulɔn nəŋəi.» Di kəlee di di wɔ ɓɔwaɠaai həɠə, Davidə yaa kpɛli ə nwɛi həɠə. Di kəlee di kɛ yɛ nu nwun nąąn ɲɔ̨nwɔ̨mąn, di hvilɛn Davidə pulu. Nu nwun veelɛ ə lɛɛ diɲɛɠaa kwɛlɛ. Avigailə ə ɉilɛ nwɔ pɛlɛ́i nwun mąąɓo 14 Navalə nwɔ kóló kɛ mun da ə li ə nwoo hukulɔ Navalə nɛ̨ą Avigailə ɓa, yɛ mą: «Davidə ka tii aa lɛɛ nɔi pun ɉu, aa nuą tɔɔ diɛ pa di woo pili ku ną́mu ɓa; ya ka tii ku ną́mu aa di ɲɛ̨i hvala. 15 Ɛlɛɛ, yaan, nuąi tii di kɛi ku hon gbɔ a nɛlɛɛ, ɓɛlɔwai kwa diɛni ku kɛ la ku kee ɓa, kuɔ tɛ, kuɔ yɛɛ, di hvo ku mɔ̨nɔ̨ ɓo. Ɓɛlɔwai kwa diɛni ku kɛ la gbomoi, hɛn da hvo pili ku yəi. 16 Diɛ ɓə kɛi ku mąąkpɛ, hvóló da kpįnį, ɓɛlɔwai kwa diɛni ku kɛ la ku kee pɔ, ku ɲɛ̨i ə ɓo daatɛlɛɛɠaa diɛ. 17 Mɛ̨nį a kɛ tii, hvo kɛli ə́ gɛ pələ kwɛli mą, yii yá pɛli gɛi, ə́ gɛ. Mąąhɔlɔɓo, ku ną́mu da nwɔ pɛlɛ́i kəlee di nwun na pili mɛ̨nį hvo pai ɉəɠəi mą. Nwɛi tii nwɛi, nu kpoloon ni, nu hva pɛli mɛ̨nį ɓoi mą.» 18 Avigailə ə mąąhulɔ, ə lɛɠɛ nwun veelɛ həɠə, ə bɛlɛ lɔɔ ɓala hveelɛ ɓa, da ɓɛlaa looli, aa kɛ baa aa ɲili; kpai kɔ́w yələn ŋąą gəgən ɉu lɔɔli, viɲə kpaɠa nwun dɔ̨nɔ̨, ə ɓo a gbalaa, nwɔ̨mįi nwun veelɛ di pɛliɛ a ɓolaa, ə gəlee laa hoohvaalən bulu, 19 Yɛ ɉilɛlɛa diɛ: «'Ka li dɔ́wɔ́ gáá ka pulu gɛ́ pa.» Kɛlaa, hvo mo ɉilɛ Navalə ɓa. 20 Ə tɛ hoohvaalən mɛ̨i, gɛɛ ɲee yɛɛi bələ hu heei ta, Davidə da nwɔ nuąi di kɛi yɛɛ nąą pələ. Da diɛni di kwiɛn. 21 Davidə ə kɛi mo yɛ kɛ diɛ: «Akɛti, kpɛli ɓə tii ŋą́ gɛ gɛ́ ɉulɔnui tii yəi hɛnŋaa mąąkpɛ nɔi pun ɉu, da lɔpee hvo pili li ɉui? Daa mɛ̨nį mɛ̨inɛ̨ɛ̨ pɔɔ kulɔ mą́ą́ a mɛ̨nį ɲɔ̨nwɔ̨ɔ̨. 22 Mɛ̨nįi mąąnɛ̨ɛ̨ Yálá ə naa Davidə ɲowoɠaa diɛ, ə naa Davidə ɓa, akɛ Navalə yəi bɛlɛ́n mun dɔ̨nɔ̨ kpɛli a lɛɛ a vulú yələ ə ɓɔ.» 23 Avigailə ə Davidə kaa, ə həɠə ɉoohvaalən mɛ̨i a mąąhulaa, ə hvilɛn. Ə pɛlɛ nɔi ɓa, ə kwɛli hvilɛn Davidə lííla. 24 Yili pulu, ə too gɔwɔ mun, yɛ mą: «Ɲą́ą́ ɉɔ́n ni nwɔ́ mɛ̨nį nąmu, ə́ wɔ luwɔnɛ̨ąi lɛɛ laa ə pələ wolo ɓo yɛ́, ə́ wəli tɔɔ ə́ wɔ luwɔnɛ̨ąi woo ɓa. 25 Nwɔ́ mɛ̨nį nąmu, hvo ə́ kili lɛɛ Navalə nu kpoloon tii ɓa; naa kpɔ-kpɔɔ li, naa ɓaa: Nu kpoloon. Ɛlɛɛ, nu kpoloon naa hvilɛn ŋaai bulu. Kɛlaa, nwɛ́i, ɉilɛlɛai nwɔ́ mɛ̨nį nąmu ə di tɔɔ, və́ di kaa. 26 Kɛlaa, nwɔ́ mɛ́ni nąmu, Yai-Laa laa hu, ɛlɛɛ, yɛ́ kpįnįi ə́ laa mąą mɛ̨nį ɓa, Yai-Laa ka tii kpəɲąn ə́ tɔwɔ, hvo ə́ yee lɔ li nu paa mɛ̨nį hu. Hvo ə́ lɛɛ li laa yɛ́ ə́ nwąną kulɔ yɛ kpįnįi. Yálá ə gɛ, ə́ yowowɠaa da nuąi mɛ̨nį ɲɔ̨n gili kaa di kwəi yɛ hvilɛn na yɛ́, di ɲąąkpɛɛi ə kɛ yɛ Navalə. 27 Ə́ hąmąi ŋɛ̨i ə́ wɔ luwɔnɛ̨ąi ə paa la nwɔ mɛ̨nį nąmu pɔ, ə́ yee hee mu, ə́ dɛɛ ə́ nwɔ hilɛlɛai ə́ bulu, di pɔ. 28 Ə́ wɔ luwɔnɛ̨ąi mąąhvaalɛɛ, nɛ̨ɛ̨ yɛ́. Mąąhɔlɔɓo, Yai-Laa kaa pai lamun bɛlɛ́ tɔɔi nwɔ́ mɛ̨nį nąmu ɓa, yili hvo pai ɉəɠəi mą. Hvo gaai nwɔ́ mɛ̨nį nąmu kaa Yai-Laa nwɔ kɔ́ɠaa kɔ́i, ɛlɛɛ di hvo pai hɔn ɲɔ̨n gaai ə́ yíi hvóló kəlee hu. 29 Nuą daa di muhəɠə nwɔ́ mɛ̨nį Nąmu laa ɓa, di hvilɛnŋaa bulu, ə gɛ di baa, kɛlaa di ma gɛ tii, nwɔ́ mɛ̨nį Nąmu nwɔ yɛnɛ̨ɛ̨ a lɛɛ Yai-Laa ə́ wɔ Yálá yəi, ə naa hɔn mo. Kɛlaa, ə́ yowoɠaa di wɔ yɛnɛ̨ɛ̨ nwɛi, Yai-Laa a naa vingwɛni hu, ə bili kpɔ kwɛa la. 30 Ɓɛlɔwai Yai-Laa kaa pai mɛ̨nį lɛlɛɛɠaai ə vaa ɓo ə́ mąą mɛ̨nį hu, a gəlee kɛ, gaa pai ə́ heeii Israɛlə nwun na. 31 Mąą hvo nɛ̨ɛ̨li hvo tɔɔ takpa-takpa, yɛ́ ɲąmą pu, yɛ́ kɛ diɛ ə́ kaa ə nwąną kulɔi. Hvo túwɔ́ a viyen ŋąą. Ɛlɛɛ, ɲələi Yai-Laa a ɲɛ̨i lɛlɛ hee la nwɔ́ mɛ̨nį nąmu ɓa, ə gili lɛɛ nwɔ luwɔnɛ̨ąi hu.» 32 Davidə yɛ Avigailə ɓa: «Mąąwiɛ ə kɛ Yai-Laa Israɛlə nwɔ Yálái ɓa, yai ə́ tɔɔ háákələi yɛ́ pa náákwiɛn ɉii. 33 Lúwɔ́ ə kɛ ə́ wɔ kiliŋąhiɛ ɓa, yai kpəɲąn dɔ́wɔ́ háákələi, və́ ɲee too li nu paa mɛ̨nį hu. Və́ nwąną kulɔ li ɲą́ą́ gbíníi. 34 Kɛlaa, a tɛ̨ą, yii kpɔ Yai-Laa Israɛlə nwɔ Yálái kaa a vulú, hvo hvaa mą və́ mɛ̨nį ɲɔ̨n gɛ a yɛ́, yai kpəɲąn dɔ́wɔ́, yá wala kɛ pa hvo náákwiɛn, tínąą yələ wala pɔ, hɛn nɔpee ta hvo li lɛɛ Navalə yəi bɛlɛ́n a vulú, yii a nwɛlaa tɛ pɛlɛ́ ɓa.» 35 Ɉɛnŋaai Avigailə ə paa la Davidə pɔ, ə ɲee hee mu, yɛ mą: «'Pənə ə́ li ə́ pɔɔli liilaa hu, ə́ kaa gaai, ŋą́ą́ nwə́li tɔɔ ə́ woo ɓa, gáá ə́ mąą hvaalɛɛi.» Navalə haa mɛ̨nį, Avigailə ə hee Davidə pɔ 36 Avigailə ə pənə ə pa Navalə pɔ, Navalə ə kɛi hɛli pu ɲəi bɛlɛ́n, ə kɛ kpɔ a tɔɔ kuu kpɔ-kpɔɔ. Lɔɔ yee a kɛ tɛɛ mą, nɛ̨ą hvo mɛ̨nįi tii hukulɔ mą, ə lɛɛ ɉu yələ ə ɓɔ. 37 Yələ ɓɔɔ, yələ wala pɔ nɔɔ təɠɛɛ kɛa Navalə ɲɛ̨i, mɛ̨nį tɛɛ, nɛ̨ą ə ɉukulɔ mą. Ə kɛ lɔ tii, Navalə nii a gbəla ə tɔɔ gwəi, ɉu ə yili lɔ tin a ɲɔw. 38 Hvóló pow kulaa ɉu, Yai-Laa ə Navalə kɛlɛ, ə haa. 39 Davidə ə Navalə haa mɛ̨nį bələ mɛ̨n, yɛ diɛ: «Mąąwiɛ ə kɛ Yai-Laa ɓa, aa mą́ą́ tɛ̨ą ɓo nwumɛ̨ mɛ̨nįi Navalə ə gɛ a ɲą́ą́ ɉu. Ɛlɛɛ ə ɲee too nwɔ tí mun ɉu, yili hvo mɛ̨nį ɲɔ̨nwɔ̨ɔ̨ kɛ li. Navalə nwɔ mɛ̨nį ɲɔ̨n tii, Yai-Laa aa nwulu lɛɛ Navalə kpįnįi nwuɔ̨.» Davidə ə nuą tɔɔ, diɛ li Avigailə hu hvɛlii hilɛ tai mɛ̨nį ɓa. 40 Davidə nwɔ tínuą də li Avigailə pɔɔli Karmɛlə, diɛ mą: «Davidə ə ku tɔɔ ə́ pɔɔli, yɛ ə ə́ həɠə a nɛ̨ą.» 41 Avigailə ə muhəɠə, ə pɛlɛ niiɓa nɔi ɓa, ə kwɛli hvilɛ Yálá ɓa, yɛ mą: «Ə́ wɔ tímun kaa a luwɔ-nɛ̨ą, váái mą gɛ́ nwɔ́ mɛ̨nį nąmu yee pɔ nuą kɔ́wɔ mąą waa.» 42 Avigailə ə gɔwɔ mąąhulɔ, ə tɛ nwɔ hoohvaalən mɛ̨i, nwɔ tínuą lɔɔli di lɛɛ bɔ, ə hvilɛn nuąi Davidə ə di tɔɔ di pulu, ə kɛ a Davidə nɛ̨ą. 43 Davidə aa kɛ Izreɛlə nɛ̨ɛ̨nu ta yii naa ɓaa Ahinoamə ɉəɠə a nɛ̨ą. Di nu hveelɛi di kɛ a nɛ̨ąni. 44 Saulə aa kɛ non nɛ̨ɛ̨nu Mikalə ŋɛ̨i kɛ a Davidə nɛ̨ą, tɛɛ Laisə lon Palti pɔ a nɛ̨ą, yai kɛ a Galimə mun da. |