Samuɛlə dɔlɔɔ 24 - Yálá laawoo hɛɓɛ (dc)Davidə ə Saulə lɛɛ yɛnɛ̨ɛ̨, hvo gɛ hvo baa 1 Davidə ə həɠə laa ə tɛ ɲánwuɔ̨ pələ, ə hee Ein-Gɛdi ɲee ɓa. 2 Həɠəi Saulə ə mo Filisti nuą kpɛi pələ ə pa, di mo mą, diɛ mą: «Davidə kaa kɛa Ein-Gɛdi nɔi pun ɉu pələ.» 3 Saulə ə nu waa haaɓa həɠə a kulaaɠaa Israɛlə nuą kəlee lɔwai, yɛ diɛ di Davidə da nwɔ nuąi di kwɛli, ɓɛi da kɛ naa laa ɓaa: «Molu kwɛni wolo», nąą tənən ma. 4 Ə həɠə Mɛlaa kumun gɛɛnąą, yaai tii bələ kwɛlɛ. Kwɛni wolo ta ə kɛ laa Saulə ə lɔ ɉu, yɛ li gala kwɛlɛ. Davidə yaan, da nwɔ nuą di kɛ laa gwɛni wolo kpon ɉu pələ. 5 Davidə nwɔ nuą diɛ mą: «Ɲələi Yai-Laa ə vaa ɓo yɛ́, ya ka aa həli, yai ə kɛ mą: ‹Gáá pai ə́ yɔwɔ lɔi ə́ yee ŋą, ɛlɛɛ, bələi a nɛ̨ɛ̨ la yɛ́, ə́ ɉon di.›» Davidə ə muhəɠə, ə Saulə nwɔ həɠəi gbuɔ ta tee mą ɲąą. 6 Kɛlaa, yili pulu, Davidə lii ə kulɔ ma, mąąhɔlɔɓo, aa kɛ Saulə nwɔ həɠəi ta tee mą. 7 Yɛ nwɔ nuąi diɛ: «Yai-Laa ə gíhiɓo, gɛ́ dúwɔ́ yili ɓo a nwɔ́ mɛ̨nį nąmu. Mąąhɔlɔɓo, ya ɓə Yai-Laa ə dɔɔ wulɔ lɔ mą.» 8 Nwooɠaa tii ɓə Davidə ə nwɔ nuąi kpɛla la bələi, hvo hvaa mą di hvo di yee pɛlɛ Saulə ɓa. Saulə ə muhəɠə, ə kulɔ gwɛni wolo hu, yɛ nwɔɔ li ɓo. 9 Davidə ə muhəɠə kɛa, ə kulɔ gwɛni wolo hu, ə tomą Saulə pulu pələ, yɛ kɛ mą: «Nwɔ́ mɛ̨nį nąmu tɔɔmun!» Saulə ə tinɛ̨n ə nąą kaa, Davidə ə pɛlɛ nɔi ɓa niiɓa ə kwɛli hvilɛn mą. 10 Yɛ Saulə ɓa: «Lə mɛ̨nį ɓa nuąi da kɛ kɛi yɛ́: ‹Davidə kaa ə́ kwɛlii a mɛ̨nį ɲɔ̨n, ɛlɛɛ,› yɛ́n, ə́ wəli tɔɔ di woo ɓa? 11 Ə́ gbaɠala kaa yɛ́, yɛ́ kpįnįi yɛ́ kɛ, Yai-Laa ə́ ə́ lɔ ɲéé ŋą háákələi gwɛni wolo hu? Kɛlaa, və́ gɛ və́ ə́ paa; ŋą́ ə́ mąąwɛli kaa, gɛ́ kɛ diɛ: ‹Vá ɲéé pɛlɛ nwún nąmu ɓa, mąąhɔlɔɓo, nui Yai-Laa aa ɉəɠə ɉu, aa ɉee a tɔɔmun yaa li.› 12 Nán! Ə́ ɲɛ̨i hee ɓɛ, ə́ wɔ həɠəi gbuɔ ta kaa ɲéé ŋą. Ŋą́ ə́ wɔ həɠəi ta tee mą, ɛlɛɛ, və́ ə́ paa li. Ə́ kili ə pu ɉu, ɛlɛɛ, ə́ gbaɠala kaa, yɛ́ kiliŋąhiɛ ɲɔ̨nwɔ̨ɔ̨ hvo gwə́i yɛ hvilɛn na yɛ́, və́ ta tɔɔ li ə́ la; və́ ta ɓaɠaɓo li yɛ́. Yɛ́ lɔ ɓə yáá hvilɛn búlu, yáá ɓaɠaɓo mą́ą́ yɛ́ ə́ báá. 13 Gɛ́ Yai-Laa ə gwa yɛ́ gu lɔwai mɛ̨nį hutɔɔ. Yai-Laa ə nwą́ną kulɔ yɛ́. Kɛlaa, və́ pai ɲéé tunwɔ̨n ɉii yɛ́. 14 Yɛ bələi da mo la a bɔlɔ hanwon ɉu, diɛ mą: ‹Mɛ̨ni ɲɔ̨n a kulɔ mɛ̨nį ɲɔ̨n gɛ mun ɉu.› Kɛlaa, və́ pai ɲéé tunwɔ̨n ɉii yɛ́. 15 Gbɛɛ ɓə tii Israɛlə tɔɔmun gaa kɔ́ pɛlɛi mąi? Gbɛɛ ɓə tii vilɛn ŋąą bulu yɛ gbɛi? Yilɛ powai li mɔ̨ɔ̨, a wala kɛ tii, kpə-kpə ta li! 16 Gɛ́ Yai-Laa ə mɛ̨nįi ŋɛ̨i hutɔɔ, ə tɛ̨ą ɓo gwa yɛ́ gu lɔwai, ə mą́ą́ mɛ̨nį hu kpɛɛ, yɛ mą́ą́kɔ̨nwɔ̨, ə nwɔ́ tɛ̨ą kulɔ pɔ̨nɔ̨ŋą, a gúlɔi a mo ə́ yee ɲąi.» 17 Kpɛɛi Davidə ə mo, a mɛ̨nįɠaa tii ɓoɔ Saulə ɓa, Saulə yɛ Davidə ɓa: «Ə́ woo li nón Davidə!» Yili pulu, Saulə ə pola a wɔlɔ. 18 Yɛ Davidə ɓa: «Ə́ haŋąąi ə́ tɛɛ mą́ą́! Mąąhɔlɔɓo, yáá mɛ̨nį lɛlɛɛɠaa kɛ mą́ą́, ə lɛɛ, ɲą́ą́n, ɲɔ̨nwɔ̨ɔ̨ ɓə gáá gəi a yɛ́. 19 Yáá ə́ wɔ mɛ̨nį lɛlɛ pələ lɛ, a dúwɔ́ taaləi ŋɛ̨i yáá mo a ɲą́ą́i haakələi. Yai-Laa aa kɛ nɔ́ ə́ yee ŋą, kɛlaa, hvo báá li. 20 Nu da ɲowo da kwiɛn, a mɔ̨ɔ̨ nɛɛ laa a nwəli pulu laɠiɛ yɛ li. Mɛ̨nįi yáá gɛ mą́ą́ háákələi, Yai-Laa ə mąą hvɛla tɛɛ ə́ pɔ. 21 Yii hu, gíli aa pu ɉu gɛ́ ə́ kaa pai kɛi a tɔɔmun. Israɛlə tɔɔlaa kaa pai lɛɛi ə́ yee ŋą. 22 Yii hu kɛa, ə́ kwɛla mą́ą́ a Yai-Laa laa, yɛ́ kɛ hvo pai ɉúwu pui, ɉáá pulu, yɛ́ kɛ hvo pai náá kpɛɛi ną́n ɲəi bɛlɛ́n nuą lɔwai.» 23 Davidə ə gwɛla tii Saulə ɓa. Yili pulu, Saulə ə pənə ə li bɔɔli. Davidə yaan, da nwɔ nuąi di pənə di tɛ ɓɛi di kɛ laa di mąąkilɛ pələi. |