Samuɛlə dɔlɔɔ 23 - Yálá laawoo hɛɓɛ (dc)Davidə ə li Keila da Horesa 1 Yələ ta, nu ta ə pa yɛ Davidə ɓa: Filisti nuą di kaa kɔ́ kɔ́i Keila, diɛ kɔ̨nɔ̨n gələɠaa laa yali. 2 Davidə ə Yai-Laa mąąnin gɛ, yɛ mą: «Akɛtii, mąąnɛ̨ɛ̨ ŋą́ li ŋą́ kɔ́ pɛlɛ Filisti nuą diɛ?» Yai-Laa yɛ Davidə ɓa: «Li ə́ kɔ́ pɛlɛ diɛ, ə́ yee kaa li lɔi ə́ Keila taa nwun mąąɓo.» 3 Davidə pɔ nuą diɛ Davidə ɓa: «Ɉuda lɔi hu ɓə ku kaa ɲɔwi laa, akɛ kwa li Keila daai kɔ́ pɛlɛi Filisti nuą diɛ, yili a kɛ ləi?» 4 Davidə ə pənə nwɔ̨nɔ̨ ə Yai-Laa mąąnin gɛ, Yai-Laa yɛ mą: «Hvilɛn bələ ɓa, ə́ li Keila daai, gáá lii yeetɛɛmąą tɛɛi ə́ pɔ Filisti nuą mɛ̨i.» 5 Davidə da nwɔ nuąi, di tɛɛ diɛ li Keila, di kɔ́ pɛlɛ Filisti nuą diɛ. Ə di wɔ taatɛlɛɛɠaai həɠə. Gɔ ə kala kpɔ Filisti nuą diɛ kpɔ hɔwɔ-hɔwɔ. Bələ ɓə Davidə ə Keila daai nuą nwun mąąɓo la. 6 Ɓɛlɔwai Ahimelɛkə lon Abiatarə, ə pu la ə mąą kilɛ Davidə pɔɔli Keila, ə ɉaláá kulɔ həɠə həɠə yɛ paa la. 7 Nuą di mo Saulə ɓa, diɛ mą: «Davidə aa li Keila daai.» Saulə ə mo yɛ diɛ: «Yálá aa nɔ ɲéé ŋą, mąąhɔlɔɓo, aa lɔ Keila, ɓɛi naa laa kpulɔɔ.» 8 Saulə ə nuą kəlee ŋąąkpɔn, ə gɛ, ə li ə kɔ́ pɛlɛ Davidə da nwɔ nuąi diɛ. 9 Davidə ə bələ mɛ̨n yɛ kɛ mąą mɛ̨nį ɓə Saulə kaa mɛ̨nį ɲɔ̨nwɔ̨ɔ̨ tii kɛi la. Davidə ə mo ɉaláá laa həli mun Abiatarə ɓa, yɛ mą: «Pa a ɉaláá həɠə!» 10 Davidə yɛ Yai-Laa ɓa: «Yɛ́i a Israɛlə nwɔ Yálá, ə́ wɔ luwɔ aa bələ mɛ̨n diɛ kɛ Saulə kaa bɔ ə pa Keila daai, ə daa wolo mą́ą́ mɛ̨nį ɓa. 11 Akɛtii, Keila nuą kaa pai nɔ́i ɲee ŋą? Akɛtii Saulə kaa pai mɔ̨ɔ̨ yɛ bələi ə́ nwɔ luwɔ ə bələ mɛ̨n na? Yai-Laa Israɛlə nwɔ Yálá, ə́ wɔ luwɔi kilaa pɔ̨nɔ̨ mɛ̨nįi ŋɛ̨i hu.» Yai-Laa yɛ mą: «Tɛ̨ą li, gaa pai.» 12 Davidə ye mą: «Akɛtii Keila nuą kaa pai ɲą́ą́ kwa nwɔ́ nuąi ku tɛɛi Saulə pɔ?» Yai-Laa yɛ mą: «Di kaa pai ka lɔ ɲee ŋą.» 13 Davidə da nwɔ nuąi di həɠə Keila. Di kɛ a nu nwun mɛ̨ida ɲɔ̨nwɔ̨mąn, di kulɔ Keila, diɛ li di nwun ma. Di mo Saulə ɓa, diɛ mą: «Davidə aa kulɔ Keila daai.» Saulə ə gɔ́ mɛ̨nį lɛɛ laa. 14 Davidə ə li ə hee nɔi pun ɉu yɛ noo; ə ɉeei kulɔ ɲee hɛŋɛlɛn ma Zifə nɔi pun ɉu. Volói tii kəlee yee mu, Saulə ə kɛi gwɛli. Kɛlaa, Yai-Laa hvo hvaa mą Saulə yee hvo pɛli Davidə ɓa. 15 Davidə ə gbaɠala kaa, yɛ kɛ Saulə aa kɔ́ muhəɠə baa mɛ̨nį ɓa. Davidə ə kɛ Zifə nɔi pun ɉu Horesa daai. 16 Saulə lon Ɉonatan ə muhəɠə, ə li Horesa daai, ə Davidə hvaŋąlɔ Yálá laa hu; 17 yɛ mą: «Hvo ɲɔw, ną́n Saulə yee hvo pai pɛlii yɛ́; yɛ́ ɓə pai kɛi a tɔɔmun, gɛ́ ɓo ə́ pɔ, ną́n gili kaa tii ɉu.» 18 Di nu hveelɛ di mįnɛ̨ həɠə Yai-Laa ɲɛ̨i ɓa. Davidə ə lɛɛ Horesa, Ɉonatan ə pənə ə li bɔɔli. Saulə ə hvilɛn Davidə pulu 19 Zifə daai nuą də li di həli Saulə ɓa Givea; diɛ mą: «Kɛlɛi Davidə kaa nooi ku pɔɔli, ɓɛi tii gwɛniɠaa kaa laa Horesa, Hakila yee nwuɔ̨, yaa tii nɔi pun gɔwɔ mu pələi. 20 A kɛ tii, tɔɔmun, yələi ya kɛ la bɔ ə́ pa laai, pa, kuɔ ɓə pa nɔi ə́ yee ŋą.» 21 Saulə yɛ diɛ: «Yai-Laa nwɔ lúwɔ́ ə yɛɛ ka mɛ̨i, kaai ŋɛ̨i kaa ɲɛ̨́i mąąwɛli kaa. 22 Ka li ka kɛɛ mąąnin kɛ, ka ká ɲɛ̨i laa, kɛɛnąąɠaai kpɔ a kɛ tɛɛi laa, ka nąąɠaa kaa; diɛ gbąnąąi a gɔbulu pələ. 23 'Ka ká ɲɛ̨ilaa, gɛɛnąąɠaai kpɔ a kɛ nooi laa, ka nąąɠaa kaa, ka kɛ a nąą kəlee kɔ́lɔn ŋąą, ka pa ka mo mą́ą́. Nąąlɔwai, gwa gaani gwa li, a kɛ nɔi hu, ŋą́ hvilɛn Ɉuda lɔi nąą kəlee ŋą́ gaa.» 24 Nuąi tii di pənə də li Zifə daai Saulə tɔwɔ. Davidə da nwɔ nuąi di kɛ Maɔn, nɛ̨ŋɛ̨ lɔi ɉɛɠɛɛ pələ. 25 Saulə da nwɔ nuąi di hvilɛn diɛ Davidə kwɛli. Di mo Davidə ɓa, ə yɛɛ gwɛni woloɠaa kɛɛnąą, ə ɉeei kulɔ laa. Saulə ə bələ mɛ̨n, ə hvilɛn Davidə pulu Maɔn nɔi pun ɉu. 26 Saulə da nwɔ nuąi di kɛ ɲee bələ tɔ̨nɔ̨, Davidə da nwɛiɠaa di ɓo bələ tɔ̨nɔ̨. Davidə ə gɔwɔ mąąhulɔ, yɛ pu Saulə tɔwɔ. Saulə da nwɔ nuąi di kɛi tɔɔ a di nwąnąąi diɛ tɛɛ ɓɛ pələi Davidə da nwɔ nuąi di kaa la, ə gɛ di pɛli di hon ɉii. 27 Nąąlɔwai wɛlɛɛ ɓomun da ə pa, yɛ Saulə ɓa: «Ə́ mąąhulɔ ə́ pa, Filisti nuą daa kɔ́ pɛlɛ nɔi ɓa.» 28 Yili ɓə gɛ Saulə ə kpɛla Davidə kpɛɛ ɓa, yɛ li pɛlɛi Filisti nuą diɛ. Yili mąą mɛ̨nį ɓə gɛ di gɛɛnąą tii laa hee a: «Nu ɓɛlaɓo kwɛni.» |