Samuɛlə dɔlɔɔ 22 - Yálá laawoo hɛɓɛ (dc)Davidə ə li mąąkilɛ pələi 1 Davidə ə həɠə laa, ə li ə mąąkilɛ Adulamə kwɛni wolo hu. Niɛni da nąn ɲəi bɛlɛ́n nuą kəlee di bələ mɛ̨n, di laŋąnnaa mą gɛɛnąą tii ɓa. 2 Nuąi kpɔ mɛ̨nį ə kɛ di wəli pulu, nuąi kpɔ kwələ ə kɛ diɛ, da nuąi di kwəi hvo kɛ nɛ̨ɛ̨li, di di ɲąąkpɔn gwɛlɛ, ə kɛ aa di nwun nąmu. Nuą tii di kɛ a nu nwun nąąn (400). 3 Davidə ə həɠə laa, ə li Moabə lɔi hu Mispe daai; yɛ Moabə tɔɔmun ma: «Gɛ́ ə́ hvaa mą, nán da néé di pa di lɛɛ ɓɛ ka kwɛlɛ, ə lɛɛ la ɉu, mɛ̨nįi Yálá yɛ ə gɛ mą́ą́ ŋą́ gbaɠala kaa.» 4 Davidə ə li a gaa nuą Moabə tɔɔmun bɔɔli, di lɛɛ yili kɔ́wɔ mɛ̨i ɓɛlɔwai Davidə ə kɛ la mąąkilɛ pələi. 5 Yələ ta, Yálá kwəi mɛ̨nį hukulɔ mun Gadə yɛ Davidə ɓa: «Hvo lɛɛ ə mąąkilɛ pələi, pənə ə́ li Ɉuda lɔi hu.» Davidə ə pənə ə lɔ Ɉuda lɔi hu, ə li ə hee Hɛrɛtə nwɛla hu. Saulə ə Nɔvə haláá kulɔ nuą paa 6 Saulə ə bələ mɛ̨n diɛ kɛ daa Davidə da mɛlaa di kaa. Saulə ə kɛ heeni tamarisə nwulu mu, yaa tii ɉaláá kulɔi Givea daai, nwɔ kpalai ə ɓo ɲəi, nwɔ tínuą kəlee tɔɔ gwɛlɛ. 7 Saulə yɛ nwɔ tínuą tii kɛ gwɛlɛ tɔɔni diɛ: «Ə həli kaa Bɛnɉamɛn lonnii! Akɛti, Ɉɛse lon gaa mɔ̨ɔ̨ pai tíi kɛi da viɲə yɛɛɠaa tɛɛi ka kəlee ka pɔ? Gaa mɔ̨ɔ̨ pai ka kɛi a kɔ́kulááɠaa kɔlaɠa pɛlɛɛ da gbɛa-kpɛaaɠaa nwun na? Kpaa-oo! 8 Lə ɓə kani kɛ, yaai ka kəlee ka lɔ gílii? Nu ta hva gílaa pɔ̨nɔ̨, hvo kɛ mą́ą́: ‹Ə́ lon da Ɉɛse lon di kaa nɛ̨ɛ̨laa ɓa!› Mą́ą́ liihɛlɛn və ka ta ɓa! Nón aa kɛi bɔ mun ɉaɠa yɛ dɔɔ ná, yɛ hɛlɛn dɛ dɔ́wɔ́, yɛ bələi gaa gɛi la háákələi, ɛlɛɛ, nu ta hva gílaa pɔ̨nɔ̨ ɉu!» 9 Edɔmə mun Doɛgə ə kɛ tɔɔni Saulə yee pɔ nuą kwɛlɛ, ə Saulə woo pulu pənə, yɛ mą: «Ŋą́ Ɉɛse lon gaa Nɔvə, Ahituvə lon Ahimelɛkə pɔɔli. 10 Ahimelɛkə ə Yai-Laa mąąnin gɛ Davidə mąą mɛ̨nį hu, yili pulu, ə kɔ̨nɔ̨n dɛɛ bɔ, ə Filisti hulɔnu Goliatə nwɔ kɔ́ kɔ́ ɓɔwai tɛɛ bɔ.» 11 Tɔɔmun ə ɉaláá laa həli mun Ahituvə lon Ahimelɛkə təli, da ɲəi bɛlɛ́n nuą, da Nɔvə haláá kulɔ nuą kəlee, di kəlee di pa tɔɔmun bɔɔli. 12 Saulə yɛ diɛ: «Ahituvə lon, ə wəli tɔɔ a nɛlɛɛ.» Yili yɛ mą: «Ŋą́ą́ nwə́li tɔɔ, nwɔ mɛ̨nį nąmu.» 13 Saulə yɛ mą: lə mɛ̨nį ɓa yai ka lɔ gílii, yɛ́ ka Ɉɛse lon, yɛ́ lɛɠɛ tɛɛ bɔ, da kɔ́ kɔ́ ɓɔwa; yɛ́ Yai-Laa mąąnin gɛ mąą mɛ̨nį hu, yɛ pɛli tɔɔi ná? Yɛ́ ɓaalə tɛ dɔwɔ yɛ bələi gaa gɛi la háákələi. 14 Ahimelɛkə ə tɔɔmun nwoo pulu pənə yɛ mą: «Ə́ wɔ tínuą lɔwai, nu ta kaa laa yii ya pɛli ə́ kilitɔɔi mą, yɛ həli Davidə pɔ? Davidə kaa a tɔɔmun mɔlɔ, ya ɓə a ə́ kpįnį mąą kpɛ, diɛ mąąwiɛ ə́ yəi bɛlɛ́n. 15 Ɲələi tii lɔ ɓə mɔ̨ɔ̨ ŋą́ gɔwɔ tɔɔ la gɛ́ Yálá mąąnin gɛ mąą mɛ̨nį hu? Ee kə! Tɔɔmun, hvo mɛ̨nį hee ə́ wɔ tí mun nwuɔ̨ da ɲəi bɛlɛ́n nuą kəlee. Mąąhɔlɔɓo, ə́ wɔ tí mun hvo kɛ mɛ̨nįi tii hukɔlɔn ni gbɔ tanɔ̨n gbɛli.» 16 Tɔɔmun yɛ mą: «Ə́ kaa haai, Ahimelɛkə yɛ́, ka ə́ nąn ɲəi bɛlɛ́n nuą kəlee.» 17 Tɔɔmun yɛ gwɛlɛ nuą diɛ: «Ka lɛɠɛ ɓɛ, ka Yai-Laa nwɔ haláá laa həli nuą kəlee paa. Mąąhɔlɔɓo, diɛ kpɛli mąn da kɛ kpɔnmąą tɛɛi Davidə pɔ. Di kili ə kɛ ɉu diɛ kɛ Davidə kaa pui, ɛlɛɛ, di hvo ɉukulɔ li mą́ą́.» Kɛlaa, tɔɔmun ɲee pɔ nuą di hvo gɛ, di hvo di yee pɛlɛ Yai-Laa nwɔ haláá laa həli nuą diɛ. 18 Tɔɔmun yɛ kɛa kɛ Doɛgə ɓa: «Yɛ́ ɓə, lɛɠɛ ɓɛ, ɉaláá laa həli nuą paa.» Edɔmə mun Doɛgə ə lɛɠɛ laa, yaa kpįnįi ə ɉaláá laa həli nuą paa. Mąą yələi tii, nu pow mɛ̨ihaaɓa kɔ́w lɔɔli ɓə ə di paa, diɛi kɛ a ɉaláá həɠə kwɛlɛɛ too nuą. 19 Ɉaláá laa həli nuą pɔ taai Nɔvə nwɛi, ɉinąą mąn, nɛ̨ąą mąn, nɛapɛlɛɛ da yiiɠaai di laa kaa ɲįnį ɓa, di gəlee paa; yɛi kɛ a nįŋɛ̨, hoohvaalən, da ɓɛlaa, ə gəlee kɛ a ɓɔwa kwəaa kɔ̨nɔ̨n. 20 Ahituvə lon Ahimelɛkə lon ɉulɔnu tɔ̨nɔ̨ gbən ɓə kulɔ ɉu, diɛ kɛ naa ɓaa: Abiatarə, ɉulɔnon tii ə pu, ə laŋąn Davidə ɓa. 21 Abiatarə ə mo Davidə ɓa, yɛ mą: «Saulə aa Yai-Laa nwɔ haláá laa həli nuą paa.» 22 Davidə yɛ Abiatarə ɓa: «Gíli ə kɛ ɉu a ɲələi tii, ŋą́ gaa kpɔ gɛ́ kɛ Edɔmə mun Doɛgə ə kɛ Nɔvə daai. Gíli ə kɛ ɉu, gɛ́ kɛ, gaa pai mɛ̨nį kəlee ɓoi Saulə ɓa yili hva pɛli kɛ ɉəɠəi mą. Mɛ̨nįi tii ə́ nąn nwɔ pɛlɛ́i kəlee ə lɛɛ ɉu, ɲą́ą́ náá pɔɔ kaa ɉu. 23 Lɛɛ ɓɛ gwɛ́lɛ, hvo ɲɔw, nui yɛ ə́ ə́ paa, ɲą́ą́ ka tii yɛ ə báá, ya kɛ gwɛ́lɛ, mɛ̨nį ta hva ə́ kaa.» |