Samuɛlə dɔlɔɔ 21 - Yálá laawoo hɛɓɛ (dc)Davidə ə li ɉaláá laa həli mun Ahimelɛkə pɔ Nɔvə daai 1 Davidə ə kɛi li, Ɉonatan yaan yɛ pa taai. 2 Davidə ə pa Nɔvə ɉaláá laa həli mun Ahimelɛkə pɔɔli. Ahimelɛkə ə pa Davidə laakwiɛn ɉii maa yɛ kpɛlin, yɛ Davidə ɓa: «Gɛ pələ kaa ləi yaai, yɛ́ tɔ̨nɔ̨ lɔ ɓə, nu ta hvo ə́ pɔ?» 3 Davidə yɛ ɉaláá laa həli mun Ahimelɛkə ɓa: «Tɔɔmun mə dí; yɛ mą́ą́: ‹Mɛ̨nii gaa ə́ tɔɔi la, mąą hvo nɛ̨ɛ̨li nu lɔpee ta kili hvo pu ɉu›, yii ɓaa bɔ́ nuą, ŋą́ kɛɛnąą ta lɛ diɛ, ɓɛi ku kaa pai pənəi kuɔ ku kee kaa laa. 4 Kɛlaa, lə ɓə ə́ yəi? Lɛɠɛ lɔɔli tɛɛ bɔ́; yii lɔpee a too ə́ yə́i, ə́ dɛɛ bɔ́.» 5 Ɉaláá laa həli mun yɛ Davidə ɓa: «Lɛɠɛ kpɛli-kpɛli hvo ɲəi, kɛlaa, ɉaláá lɛɠɛ ta kaa ɓɛ. Akɛ ə́ pɔ nuą di hvo ni lɛɠɛ li nɛ̨ąą diɛ.» 6 Davidə yɛ ɉaláá laa həli mun ɓa: «Ee! Di nɛ̨ɛ̨nu tɔ́n dɔɔ kuɔ yɛ bələi da kɛ gɛi la a bɔlɔ-pɔlɔ, kwaa kɛi li kɔ́ ɓa. Ɉiɛ yii nwɛi, gaa a hiɛ kpɛli-kpɛli, kɛlaa, a tɛ̨ą, yii ɓaa mɛ̨nįi tii nwɛi, di mąąhəɠɛɛi ɉu.» 7 Ɉaláá laa həli mun ə ɉaláá lɛɠɛ ta tɛɛ bɔ. Mąąhɔlɔɓo, lɛɠɛ takpɛli hvo kɛ laa, hvo kɛli lɔ lɛɠɛi kɛ a Yálá kɔ́ hɛn. Daa kɛ ɉəɠə Yai-Laa lííla, diɛ lɛɠɛ mɔnŋąą nįnɛ̨ laa laa a mąąhvalin. 8 Mąą yələ lɔ, Saulə nwɔ tí mun da ə kɛ la Yai-Laa hee pɛlɛ́ mu, yɛ kóló kɛ diɛ kɛ naa ɓa: Doɛgə, Edɔmə mun da li kɛ; ya ɓə kɛ Saulə nwɔ taatɛlɛɛ mɛ̨i kaa nuą nwun na. 9 Davidə yɛ Ahimelɛkə ɓa: «Kpala kaa ə́ yəi ɓɛ, a wala kɛ tii ɓɔwa kwɛa ta kaa ə́ yəi ɓɛ? Və́ pa li a nwɔ́ kɔ́ kɔ́ ɓɔwai, da kwɛli hɛn da lɔpee, mąąhɔlɔɓo, mɛ̨nįi tɔɔmun ə dɔ́ɔ́ la, ə kɛ a mɛ̨nį mąą hulaa.» 10 Ɉaláá laa həli mun yɛ mą: «Filisti mun ŋɛ̨i a Goliatə, yaa tii wɔlɔ ə́ baa ɲá ɓoloon bɔ nwulu kpulu mu, nwɔ kɔ́ kɔ́ ɓɔwai kaa ɓɛ, mąą kpįnįnŋaa a həɠə; noɔ ɉaláá kulɔ həɠə pulu, ya kɛ bɔ ə́ ɉəɠə a ə́ wɔɔ, ɉəɠə. Mąąhɔlɔɓo, dakpɛli hvo ɓɛ.» Davidə yɛ mą: «Ɲɔ̨nwɔ̨mąn va hɔlɔɓo, və.» Davidə ə li Gatə daai Filisti nuą pɔɔli 11 Davidə ə pu a ɲələi tii Saulə ɓa; ə li Gatə daai tɔɔmun Akisə pɔɔli. 12 Akisə yee pɔ nuą, diɛ Akisə ɓa: «Kɛlɛi Davidə ɓəi-yee! Yaai gaa a Israɛlə tɔɔmun. Ya hvə nɛ̨ąą di kɛi nwələ too a naa diɛ mąną la, diɛ kɛ mą: ‹Saulə ə nu waa tamąą paa! Davidə ə nu waa pow tamąą paa.›» 13 Davidə ə giliŋąhiɛ nwooɠaa tii hu, ə ɲɔw kpɔ kɛnɛ̨ Gatə tɔɔmun Akisə ɓa. 14 Yili ɓə gɛ Davidə ə gbɔwɔ kɛ a ɓowo mun di ɲɛ̨i ɓa, yɛ hvaa lɔ poto-poto di yəi. Yɛ lia hɛnŋaa mąąnįnįn gɛ gbonŋaa ɓa. Yɛ nɛaya yɛɛ gbɛlɛ hu. 15 Akisə yɛ ɲee pɔ nuą diɛ: «Ka hvo gaai a ɓowo mun! Ka paa la bɔ́ lə mɛ̨nį ɓa? 16 Ɓowo nuą ɓə di hvo ɲə́i, yaai ka pa a yii bɔ́, yɛ vįikpɛɛ a nwɔ ɓowo mɛ̨nįɠaa? Akɛti, yii yɛ mɔ̨ɔ̨ ə lɔ ɲə́i bɛlɛ́n?» |