Samuɛlə dɔlɔɔ 20 - Yálá laawoo hɛɓɛ (dc)Ɉonatan da Davidə 1 Davidə ə pu ə həɠə Nayotə Rama kwɛlɛ, ə pa ə Ɉonatan kaa, yɛ mą: «Lə ɓə ŋą́ gɛ, ɉɔ́n maa lə, lə nɛ̨ŋɛ̨n gbɔ ɓə ŋą́ ɉəɠə ə́ nąn ma yaai gaa bɔ ə báá?» 2 Ɉonatan ə nwoo pulu pənə yɛ mą: «Yili kulɔ ə́ wɔɔ kiliŋąhiɛ hu, hvo pai haai. Nán va mɛ̨nįi lɔpee ta kɛ, akɛ hvo ɉukulɔ li mą́ą́. Lə mɛ̨nį ɓa yai ną́n ə mɛ̨nį yii loo mą́ą́? Hvo pai pɛlii.» 3 Davidə ə gwɛla ma, yɛ mą: «Ə́ nąn gili kaa ɉu, yɛ gwa yɛ́ gu nɛɛi. Gaa giliŋąhiɛ yɛ kɛ diɛ: ‹Maa hvo nɛ̨ɛ̨li Ɉonatan gili hvo pu ɉu; a nee ɉukulɔ Davidə ɓa.› Kɛlaa, gáá gwɛlai a Yai-Laa laa, da ə́ wɔ yii yɛnɛ̨ɛ̨ kpɔ-kpɔ, ɉáá mɛ̨nį mąą hvo kwɛa li mą́ą́ kpɛli tiikpə.» 4 Ɉonatan yɛ Davidə ɓa: «Mɛ̨nįi kpɔ ə́ kaa bɔ ŋą́ gɛ, ŋą́ pɛli gɛi; yii kpɔ ə́ mąą mɛ̨nį ɓə.» 5 Davidə yɛ Ɉonatan ɓa: «Tínąą ɓaa ɲąnin mįnɛ̨ hɛli, mąąnɛ̨ɛ̨ kɛ ŋą́ hee tɔɔmun gwɛlɛ kɔ̨nɔ̨n mįi kɛi lɔwai; kɛlaa, hvaa mą ŋą́ li ŋą́ nóo ɲɛɛ kɔ́wɔ hu, ə lɛɛ la ɉu hvəlaan yələwulii pɔ. 6 Ə́ nąn a gbaɠala kaa yɛ kɛ və́ laa, kɛ mą: ‹Davidə ə ɉuhvɛli kpɔ a nwalawalaa, yɛ kɛ di nɛɛ laa ə li, ə kulɔ bɔ taai Bɛtleɛmə, mąąhɔlɔɓo, di kaa kwɛlan maa haláá kulɔi di ɲəi gwəlii.› 7 Tɔɔmun a kɛ diɛ: ‹Mɛ̨ni lɛlɛɛ li.› Ə́ wɔ tí mun lii a laa. Kɛlaa, nii a kələn gwəi, ə́ kili ə pu ɉu yɛ kɛ diɛ, aa báá mɛ̨nį mąą kili tee gwəi. 8 Gɛ tii a wɛlikɛmąąlaa ə́ wɔ tí mun ma. Mąąhɔlɔɓo, ə́ mo ka yaa ka mįnɛ̨ həɠə Yai-Laa laa hu. Ɛlɛɛ hɔlɔɔ, akɛ ŋą́ ɉɔ́n gɛ a pələi lɔpee, yɛ́ kpįnįi báá; hvo kɛ li da li a ɲą́ą́ ə́ nąn nííla lə mɛ̨nį ɓa?» 9 Ɉonatan yɛ mą: «Yili a lee kɛ a mɛ̨nį ɲɔ̨nwɔ̨ɔ̨ kɛnɛ̨. Ŋą́ gbaɠala kaa kpɔ gɛ́ kɛ ną́n aa ə paa kili tee gwəi a tɛ̨ą, ŋą́ ɉukulɔ yɛ́.» 10 Davidə yɛ Ɉonatan ɓa: «Ə́ nąn a ə́ woo ɲapənə a líiholi, gbɛɛ ɓə pai gílaa pɔ̨nɔ̨i ɉu?» 11 Ɉonatan yɛ Davidə ɓa: «Pa gwəli bələ pɔ.» Di nu hveelɛi di kulɔ, di ɉón a bələ. 12 Ɉonatan yɛ Davidə ɓa: «Yai-Laa Israɛlə nwɔ Yálá laa hu, tínąą a wala kɛ tii hvəlaan, gáá pai ną́n gwəi mɛ̨nį kɔ́lɔn ɉii yɛ hvilɛn na yɛ́, mɛ̨nį kəlee a kɛ gwəi a nɛlɛɛ, yɛ hvilɛn na yɛ́, vá hvaa ə́ pɔ. 13 Kɛlaa, akɛ kiliŋąhiɛ ɲɔ̨nwɔ̨ɔ̨ a kɛ ną́n ma, yɛ kɛ ə mɛ̨nį ɲąąnwąnąą laa Davidə ɓa; ŋą́ wala gílaa pɔ̨nɔ̨, Yai-Laa ə mɛ̨nį ɲąą nwąnąą laa Ɉonatan ɓa; ŋą́ ə́ kilaa pɔ̨nɔ̨, nąąlɔwai ə́ li liilaa hu. Gɛ́ Yai-Laa ə kɛ ə́ pɔ yɛ pələi ə kɛ la ną́n bɔ. 14 Ŋą́ lɛɛ yɛnɛ̨ɛ̨, mąąnɛ̨ɛ̨ ə́ túwɔ́ a ɲą́ą́ a Yai-Laa nwɔ wɛlikɛmąąlaa. 15 Ə lɛɛ ŋą́ haa, hvo kpɛla nwɔ́ pɛlɛ́i hon ɉii a wɛlikɛmąąlaa, ə mą kpɛli kɛ Yai-Laa aa Davidə ɲowoɠaa kulɔ lɔi mɛ̨i tɛitɛi.» 16 Mąą hvo nɛ̨ɛ̨li Ɉonatan laa hvo kpɛɛ, da Saulə nwɔ pɛlɛ́i a gee. A kɛ tii Yai-Laa a nəi Davidə mąąnin gɛ mɛ̨nįi tii hu. 17 Ɉonatan ə gwɛla nwɔ̨nɔ̨ Davidə ɓa mąąhɔlɔɓo, nwɛli ə kɛ mą gwəi tɔ̨nɔ̨ mɛ̨i. 18 Ɉonatan yɛ mą: «Tínąą ɓaa ɲąnin nįnɛ̨ nwɔ hɛli, di kaa pai gbaɠala kaai diɛ kɛ hvo laa, hvo gaai ə́ wɔ kpəlin kaa pai lɛɛi a vowolo. 19 Hvəlaan, hvo nwɔ̨nɔ̨ pa, yá li ɓɛi tii hiɛ ə́ ə́ loo laa a ɲələi mɛ̨nį ə kɛ la, ə́ hee laa Ezɛlə kwɛni kwɛlɛ. 20 Ɲą́ą́n, gáá pai donwą haaɓai ŋɛ̨i pilii nąą kwɛlɛ, yɛ ŋą́ kɛi hɛn da pola. 21 Yili pulu, ŋą́ kɛ nwɔ́ tii mun: ‹'Li ə́ donwąɠaa kwɛli, ŋą́ kɛ nwɔ́ tii mun ma donwąɠaa kaa ə́ lííla pələ, yá pɛli pai a ə́ líílaa yɛ›, a kɛ tii mɛ̨nį ta hvo laa a ɲɔ̨nwɔ̨ɔ̨; a təɲaa kpɔ Yai-Laa ə báá. 22 Kɛlaa, ŋą́ kɛ nokoloi tii ɓa: ‹Donwą kaa ə́ pulu pələ›, li, a kɛ tii Yai-Laa ɓə yɛ ə́ li. 23 Gu wooi tii gu gwɛlɛ gu kee ɓa, yili nwɛi, Yai-Laa ɓə a gɛla, a yələ kəlee mɛ̨nį.» 24 Davidə ə noo ɲɛɛ kɔ́wɔ hu. Ɲąnin nįnɛ̨ tɔɔ, tɔɔmun ə kɛ heeni kɔ̨nɔ̨n ma yɛ naa mįi. Saulə ə yowolaa kɛnɛ̨ kulɔ a Davidə 25 Tɔɔmun ə kɛ heeni nwɔ kpəlin mɛ̨i, yɛ bələi ə kɛi gɛ la a bɔlɔ. Gbəlin dunwɔ̨n ŋąą kɛ bɛlɛ́ nwąną ɓa, Ɉonatan heɛ Saulə tənən ma, Avnɛrə ə hee Saulə kwɛlɛ, Davidə heei ə lɛɛ gbɔwɔ ɓa. 26 Saulə hvo mɛ̨nį ta ɓo a ɲələi tii; ə kɛi giliŋąhiɛ yɛ kɛ diɛ gbaan mɛ̨nį ta aa gaa, aa tɔ́n da həɠə. 27 Ɲąnin nwɔ hvóló hveelɛ yələ, Davidə heei ə lɛɛ gbɔwɔ ɓa, Saulə yɛ non Ɉonatan ɓa: «Lə ɓə kɛ yai Ɉɛse lon hvo wɛi pa kɔ̨nɔ̨n mįi kɛi, ə mą kɛ háákələi?» 28 Ɉonatan yɛ Saulə ɓa: «Davidə ə ɉu hvɛli kpɔ a nwalawalaa, yɛ di nɛɛ laa ə li Bɛtleɛmə. 29 Ə kɛ mą́ą́: ‹Nɛɛ yɛ, hvaa mą ŋą́ li, pɛlɛ́n ɉaláá mɛ̨nį kaa kuɔ taai, yɛ nwɔ̨nɔ̨ mą́ą́; niɛni ɓə dəli, akɛ nwɛ́li kaa nii yɛ́, hvaa mą ŋą́ li ŋą́ níɛni mɛ̨ikaa.› Yili ɓə aa gɛ hvo pa li tɔɔmun nwɔ hɛlii ɓa.» 30 Saulə ə níiholi Ɉonatan pɔ, yɛ mą: «Ə́ wɛlin non ŋɛ̨i, gbaɠala kaa mą́ą́ gɛ́ diɛ, ə́ tɔɔi Ɉɛse lon bulu a ə́ nwumɛ̨ mɛ̨nį da ə́ káá koolon nwumɛ̨ mɛ̨nį. 31 Mąąhɔlɔɓo, yii kpɔ Ɉɛse lon gaa ni a vulú lɔi mɛ̨i, hvo pai kɛi liilaa hu, ə mą kɛ ká ə́ wɔ tɔɔlaai. Aa həli yɛ́! Mo di ɉon di paa la bɔ́ aa ɉɔn gɛ, mąąnɛ̨ɛ̨ ə haa.» 32 Ɉonatan ə nąn Saulə woo pulu pənə, yɛ mą: «Da baa lə mɛ̨nį ɓa? Lə ɓə ə gɛ?» 33 Saulə ə nwɔ kpalai tɛ ɲee mɛ̨i, yɛ kɛ ə bili ma, Ɉonatan ə gbaɠala kaa yɛ kɛ nąn aa Davidə paa mɛ̨nį mąą kili tee gwəi. 34 Ɉonatan ə níiholi, ə həɠə gɔ̨nɔ̨n ma, hvo hɛn da mįi a ɲąnin nįnɛ̨ nwɔ hvóló veelɛ yələi tii. Mąąhɔlɔɓo, nii kələn ŋąą kɛ gwəi Davidə mąą mɛ̨nį hu, hvo gaai nąn aa kɛ nalan. 35 Mąą yələ laa ɓoɔ, yələ wala pɔ, Ɉonatan ə li gbomoi, ɓɛi da Davidə di naa hvaa ɓo. Lokolo ta ə kɛ bɔ. 36 Yɛ nwɔ lokoloi ɓa: «Gilɛ həɠə ə́ li, tonwąi tii ŋą́ bili, ə́ li ə́ gwɛli.» Nokoloi tii ə li a gilɛ, Ɉonatan ə donwą pili, yɛ pɛli tɛɛi nokoloi tii ɓa. 37 Nokoloi tii ə li, ə həli ɓɛi Ɉonatan ə donwą pili laa. Ɉonatan ə mo kpɔ a nwoo kɛnɛ̨ nwɔ lokoloi ɓa, yɛ mą: «Donwą hvo too ə́ ɲɛ̨itɔwɔ pələ?» 38 Ɉonatan ə nwoo tɛ yələi, yɛ mą: gɛ ɉa-ɉa, ə́ maa hulɔ, hvo tɔɔ! Ɉonatan nwɔ lokoloi ə donwą həɠə, ə pənə ə paa la bɔ. 39 Nokoloi tii kili hvo kɛ mɛ̨nį ta hu, kɛlaa, Ɉonatan da Davidə di kɛ mɛ̨nįi tii kpaɠala kɔ́lɔn. 40 Ɉonatan ə donwąɠaa da gilɛn dɛɛ nokoloi tii pɔ, ə li la taai. 41 Nokoloi ə pənə ə li. Davidə ə muhəɠə ɓɛi tii ə kɛ laa ɉɛɠɛɛ pələ, ə pɛlɛ nɔi ɓa, ə gwɛli hvilɛn gee mɛ̨i haaɓa. Yili pulu, di di kee nɛ̨nɛ̨ɓo, di nu hvelɛi di wɔlɔ kpɔ kɛnɛ̨, Davidə nwɔ wɔlɔi yee ə tɛɛ mɛlan ɓa. 42 Ɉonatan yɛ Davidə ɓa: «Li a ə́ liilaa yɛ́, yii lɔ gu nu hveelɛi gu gu kwɛla gu kee ɓa a Yai-Laa laa. Yai-Laa ə kɛ gwa yɛ́ gu lɔwai, ə́ huwu da ɉúwu di lɔwai, və́ ɲɛ̨n dee li!» |