Samuɛlə dɔlɔɔ 19 - Yálá laawoo hɛɓɛ (dc)Ɉonatan ə Davidə nwun mąąkɔ̨nwɔ̨ 1 Davidə paa mɛ̨nį kili teei Saulə ə dee gwəi, ə ɉu kulɔ non Ɉonatan ɓa, da yee tii nuą kəlee. Ɛlɛɛ yaan, Davidə wɛli ə kɛ Saulə lon Ɉonatan ɓa kpɔ kɛnɛ̨. 2 Ɉonatan ə Davidə gilaa pɔ̨nɔ̨, yɛ kɛ mą: «Nán Saulə kaa ə́ paa pələ kwɛlii, ə́ kpɔɔ mąąkpɛ a nɛlɛɛ. Tínąą yələwala pɔ, hee kpɔ kpɛ, ə́ ə́ loo. 3 Gáá pai kulɔi, ŋą́ tɔɔ ną́n gwɛlɛ ɲɛa kɔ́wɔ hu ɓɛi ə́ kaa pai kɛi laa. Gáá pai ə́ mąą mɛ̨nį ɓoi ną́n ma, pələi ŋą́ gaa la ŋą́ ɉu kulɔ yɛ́.» 4 Ɉonatan ə Davidə mąąkɔ̨nwɔ̨ pələ kwɛli nąn ɲəi, yɛ mą: «Tɔɔmun və ɓaɠaɓo nwɔ tí mun Davidə ɓa, gbala ə tɔɔ, hvo nɛ̨ŋɛ̨n ɉəɠə li yɛ́, ə lɛɛ, nwɔ kulaa laa kaa a kóló lɛlɛɛi nu a gɛ, ə́ ma mɛ̨nį ɓa. 5 Davidə ə gili kulɔ nwɔ yɛnɛ̨ɛ̨ hu, yɛ Filisti hulɔnui paa, ɛlɛɛ, Yai-Laa ə kɔ́ kɛnɛ̨ nɛɛ Israɛlə nuą kəlee ɓa, ə́ naa kaa, ə́ kwəi ə nɛ̨ɛ̨ ɉu. Ə́ kaa pai nɛ̨ŋɛ̨n ɉəɠəi, yɛ́ kwəi kwələ mun ɲąmą pu, yɛ́ Davidə paa kpɛli-kpɛli, lə mɛ̨nį ɓa?» 6 Saulə ə nwəli tɔɔ Ɉonatan woo ɓa, Saulə ə nwoo kwɛlɛ, yɛ mą: «Akɛ kpɔ Yai-Laa kaa laa, di hvo pai baai.» 7 Ɉonatan ə Davidə təli, ə nwooɠaa tii kəlee hukulɔ mą. Yili pulu, Ɉonatan ə pa a Davidə Saulə pɔ, ə lɛɛ, Davidə ə nwɔ kólói həɠə, yɛ pələi ə kɛi gɛ la a bɔlɔ. Mikalə ə Davidə nwun gulɔ mɛ̨nįi 8 Gɔ ə pənə ə muhəɠə. Davidə ə li ə kɔ́ pɛlɛ Filisti nuą diɛ, ə hee kpɔ di hu a nwalawalaa di pu dɔwɔ. 9 Yálá ə ɲįnɛ̨n da tɔɔ, ə hvilɛn Saulə pulu. Saulə ə kɛ heni ɲəi bɛlɛ́n, nwɔ kpalai ə ɓo ɲəi, Davidə yaan, yɛ nwɔ gwɛnįn ɲɔw. 10 Saulə ə gɛ pələ kwɛli mą yɛ kɛ ə Davidə kpanwo bɛlɛ́ nwąną ɓa a nwɔ kpalai. Davidə ə həɠə Saulə nwɔ kpalai tɔwɔ, gbala ə kpanwo bɛlɛ́ nwąną ɓa. Davidə ə pu ə həɠə laa gbinįi tii hu. 11 Saulə ə nuą tɔɔ Davidə yəi bɛlɛ́n, ə gɛ, di naa maahɛŋi di baa yələwala pɔ. Davidə nɛ̨ą Mikalə ə ɉilɛ wəli lon doo ɉu, yɛ mą: «Ya wala ə́ nwun mąąkilɛ gbinįi ŋɛ̨i hu, da tínąą ə́ paa.» 12 Mikalə ə Davidə tɛɛ finɛɛtɛlɛ la pələ, Davidə ə pu, ə li, ə gbɔwɔ kulɔ ɉu. 13 Mikalə ə bɛlɛ́n ɉali həɠə ə naa gbin ŋą, ə ɓooli ləɠa ɓɔlɔ lɔ nwuɔ̨, ə həɠə pɛlɛ mɛ̨i. 14 Saulə ə nuą tɔɔ Davidə hon mɛ̨nį ɓa, Mikalə yɛ diɛ: «Gɔlɔi hvo pɔ̨nɔ̨ li.» 15 Saulə ə nuą tɔɔ Davidə naa kaa mɛ̨nį ɓa, yɛ diɛ: «Ka nɛɛ laani ɲɔ̨n gɛ haɠa ɓa, ka ɉəɠə ka paa la ŋą́ baa.» 16 Nuąi di di tɔɔ, lɔi di mo, ɉalii tii lɔ ɓə kɛ gbin ŋą, mooli ləɠa ɓɔlɔ ə ɓo nwuɔ̨. 17 Saulə yɛ Mikalə ɓa: «Lə ɓə kɛ yaai ə́ mówo ŋɛ̨i, yɛ́ ɲówo lɛɛ laa yɛ li, yɛ nwun mąąkilɛ?» Mikalə yɛ nąn ma: «Ə kɛ mą́ą́: ‹Nɛ́ɛ́ laa ŋą́ li, wala kɛ tii, ə́ kaa bɔ ŋą́ ə́ paa?›» Davidə da Saulə də li Rama 18 Davidə ə gbɔwɔ nwun mąąkɔ̨nwɔ̨, ə pu ə li, Samuɛlə pɔɔli Rama. Mɛ̨nįɠaai kpɔ Saulə ə naa ma, ə ɉukulɔ Samuɛlə ɓa. Yaa da Samuɛlə də li di hee Nayotə. 19 Nuą di pa diɛ Saulə ɓa: «Davidə kaa Nayotə daai Rama kwɛlɛ.» 20 Saulə ə nuą tɔɔ Davidə hon mɛ̨nį ɓa. Di Yálá kwəi mɛ̨nį hukulɔ nuą kpulu kaa, diɛ mɛ̨nįɠaa ɓo Yálá yee kɔ́nma. Samuɛlə ə kɛ di ɲɛ̨itɔwɔ. Yálá nwɔ Kilii ə too Saulə nwɔ nuąi ə di tɔɔ di hu; diɛ kpɛli mąn diɛ mɛ̨nįɠaa ɓo, di hvo kɛ di kpɔɔ yee kɔ́nma. 21 Nuą də li di yili hukulɔ Saulə ɓa, ə nu takpɛliɠaa tɔɔ, diɛ kpɛli mąn, di hvo lɛɛ di kpɔɔ yee kɔ́nma. Saulə ə nuą tɔɔ gee mɛ̨i ɉaaɓa naa, yiliɠaa kpɛli mąn di hvo lɛɛ di kpɔɔ yee kɔ́nma. 22 Saulə yaa kpįnįi ə tɛɛ yɛ li Rama, ə həli ɲálɔwa kɛnɛ̨ɛ kwɛlɛ, yaai gaa Seku daai. Ə kɛɛ mąąnin kɛ, yɛ diɛ: «Samuɛlə da Davidə di kaa mį?» Diɛ mą: «Di kaa Nayotə daai Rama kwɛlɛ.» 23 Saulə ə tɛɛ ə li Nayotə Rama kwɛlɛ, Yálá nwɔ Kilii ə ɉon yaa kpɛli, ə lɛɛ la ɉu ə həli Nayotə Rama kwɛlɛ. 24 Yaa kpɛli mąn, ə nwɔ gbaawii kulɔ mą, yɛ mɛ̨nįɠaa ɓo, hvo kɛ a gbɔwɔ yee kɔ́nma mɛ̨nį Samuɛlə lííla. Yili pulu, ə lɛɛ a gbuwulu, ə too, ə túwɔ́ a pulu, ə yii la, yili mąą mɛ̨nį ɓə da kɛ kɛi la diɛ: «Saulə yaa kpɛli gaa mɔ̨ɔ̨ a Yálá kwəi mɛ̨nį hukulɔ mun da?» |