Samuɛlə dɔlɔɔ 16 - Yálá laawoo hɛɓɛ (dc)Yálá ə Davidə həɠə ə gɛ a tɔɔmun 1 Yai-Laa yɛ Samuɛlə ɓa: «Ə kaa pai lɛɛi Saulə mąą wɔlɔ ɓoi, ə lɛɛ la ɉu mįnɛ̨ lɔwai? Ɲą́ą́ gbinįi ɓə nɛɛ laa, hvo kɛa a Israɛlə tɔɔmun. Ə́ wɔ huwɔ mįnɛ̨i həɠə, ə́ wulɔ pu vɛɛ. Gáá ə́ tɔɔi Ɉɛse pɔɔli, yai gaa a Bɛtleɛmə daai mun; mąąhɔlɔɓo, nonnii lɔwai, ŋą́ą́ da kaa laa, yii mąąnɛ̨ɛ̨ ŋą́ gɛ a tɔɔmun.» 2 Samuɛlə yɛ mą: «Ŋą́ li pələ kɛ ləi? Saulə a bələ mɛ̨n, gaa pai báái.» Yai-Laa yɛ mą: «Nįŋɛ̨ kpɛla həɠə ə́ li la, yɛ́ diɛ: ‹Ŋą́ pa haláá kulɔi Yai-Laa ɓa.› 3 Ɉaláá kulɔi lɔwai, ə́ Ɉɛse təli, nąąlɔwai, yii mąąnɛ̨ɛ̨ ə́ gɛ, ɲą́ą́ gbinįi ŋą́ nɛ yɛ́. Nui ŋą́ ɲéé lɛ mą, ya ɓə yá mąątí a nwulɔi ŋɛ̨i.» 4 Pələi Yai-Laa ə mo la, Samuɛlə ə gɛ tii. Həlii ə mo Bɛtleɛmə, daa kalanɉonŋaa di gaa, di həɠə diɛ li naakwiɛn ɉii, di mąą yɛ kpɛlin, di mąąnin gɛ, diɛ mą: «Mɛ̨nį lɛlɛɛ ɓə ə́ kaa pai la?» 5 Ə di woo ŋąąpənə, yɛ diɛ: «Liilaa ə tɛɛ ka pɔ, nɛlɛɛ ɓə ŋą́ paa la. Ŋą́ pa haláá kulɔi Yai-Laa ɓa. 'Ka ká mąąhəɠə, ka pa gu ɉaláá kulɔ.» Samuɛlə ə Ɉɛse da nonnii di mąąhəɠə, ə di tə li ɉaláá kulɔi. 6 Ɓɛlɔwai yililɠaa di kɛi paa la, Samuɛlə ə Eliavə kaa, ə mo gwəi pələ yɛ mą: «Nui Yai-Laa aa ɉəɠə, ya ka ŋɛ̨i kiɛ.» 7 Kɛlaa, Yai-Laa yɛ Samuɛlə ɓa: «Hvo ə́ kili lɛɛ nui ŋɛ̨i koloon ma, da dɔɔmɛ̨i, yili hvəi gáá bɔ. Yii nuą da gaa, yili hvəi; nuą di wɛi, da nu kɔ́lɔ ɓa kaa, Yai-Laa yɛ nu líí hu kaa.» 8 Ɉɛse ə Avinadavə təli, yili ə pa ə tɛɛ Samuɛlə lííla, kɛlaa, Samuɛlə yɛ mą: «Nui ŋɛ̨i kpɛli, ya hvəi gaa a Yai-Laa lííɓa.» 9 Ɉɛse ə Sama tɛɛ Samuɛlə lííla, Samuɛlə yɛ mą: «Nui ŋɛ̨i kpɛli hvəi gaa a Yai-Laa lííɓa.» 10 Ɉɛse ə non ɉinąą mɛ̨ihveelɛi kəlee tɛɛ Samuɛlə lííla, Samuɛlə yɛ Ɉɛse ɓa, Yai-Laa hvo ə́ lonnii ŋɛ̨i dɔ̨nɔ̨ kpɛli həɠə li. 11 Samuɛlə yɛ Ɉɛse ɓa: «Ə́ lon ɉinąą kəlee ɓəi?» Ɉɛse yɛ mą: «Ɉulɔnon naa mun gaa daatɛlɛɛɠaa mɛ̨i kaai.» Samuɛlə yɛ Ɉɛse ɓa: «Nu ta tɔɔ, ə li di dəli, mąąhɔlɔɓo, gu hvo pai kɔ̨nɔ̨n mįi akɛ yaai tii hvo ni pa li.» 12 Ɉɛse ə mo, di dəli ə pa. Ɉulɔnon tii nwɔ kɔ́lɔ kwələ mu kpɔluɔ kɛ, ɲɛ̨i laa lɛlɛɛ, mąąhəɠɛɛ. Yai-Laa yɛ Samuɛlə ɓa: «'Ə́ muhəɠə, 'li ə́ nwulɔ lɔ mą, ya ɓə!» 13 Samuɛlə ə nɛɛ mą, ə nwulɔ həɠə, ə ɉulɔnon tii mąątí la niɛni lɔwai, Yai-Laa nwɔ Kilii ə pa Davidə pɔ a volói tii, ə həɠə ɲələ ɓa yɛ li la tɔwɔ pələ. Samuɛlə ə həɠə ə hvilɛn bələ ɓa, yɛ li Rama daai. Davidə ə lɔ Saulə nwɔ kóló hu 14 Yai-Laa nwɔ Kilii ə kulɔ Saulə yəi, ə lɛɛ, Yai-Laa ə ɲįnɛ̨n vilɛn Saulə pulu, yɛ mɔ̨nɔ̨ɓo. 15 Saulə nwɔ kóló kɛ nuąi di mo mą, diɛ mą: «Ə́ kaa gaai, Yálá aa ɲįnɛ̨n vilɛn ə́ pulu yɛ ə́ mɔ̨nɔ̨ɓo. 16 Ya hvaa mą, kuɔi ŋɛ̨i a ə́ yee pɔ nuą, ku nu ta kwɛli, nwɛlɛɛ gwɛnįn ɲɔwi, a kɛ tii, ɓɛlɔwai ɲįnɛ̨n ŋɛ̨i Yálá ə vilɛn ə́ pulu a kɛi ə́ mɔ̨nɔ̨ɓo, nui tii a kɛ gwɛnįn ɲɔwi, yɛ liilaa tɛɛ ə́ pɔ.» 17 Saulə yɛ nwɔ kóló kɛ nuąi diɛ: «Ka hvɛli kɛ mun nwɛlɛɛ ta kwɛli ka paa la bɔ́.» 18 Bɔ nuąi tii dɔ̨nɔ̨ yɛ mą: «Ɉɛse ŋɛ̨i a Bɛtleɛmə daai mun, ŋą́ non ɉulɔnu tɔ̨nɔ̨ kaa, nwɛlɛɛ hvɛli kɛ, ɉuwalawalaa, gaa a kɔ́ kɔ́ mun nɛlɛɛ, yɛ pə́lə́ ɓo a kili, gaa a laŋąlon nɛlɛɛ, ɛlɛɛ, Yai-Laa kaa bɔ.» 19 Saulə ə wɛlɛɛ tɔɔ Ɉɛse pɔɔli, yɛ mą: «Ə́ lon Davidə tii daatɛlɛɛɠaa pulu, dɛɛ bɔ́.» 20 Ɉɛse ə hoohvaalən dɔ̨nɔ̨ həɠə, ə kɔ̨nɔ̨n diɲɛ pɛli ə ɉee bulu, lɔɔ yáləɠi tɔ̨nɔ̨, da ɓolu lon dɔ̨nɔ̨, ə dɛɛ non Davidə pɔ, yɛ li la Saulə pɔ. 21 Davidə ə li Saulə pɔ, ə lɛɛɛ bɔ kɛa a nwɔ tímun. Davidə wɛli ə too kpɔ Saulə ɓa kɛnɛ̨. Davidə ɓə kɛ a Saulə nwɔ ɓíitíɛ̨, yɛ nwɔ kɔ́ kɔ́ kwɛli hɛnŋaai həɠə. 22 Saulə ə nwɛlɛɛ tɔɔ Ɉɛse pɔɔli, yɛ mą: «Davidə kaa lɛɛi ɲəi a nwɔ́ tímun, mąąhɔlɔɓo, aa níi hon.» 23 Ɓɛlɔwai ɲįnɛ̨n Yálá ə dɔɔ, a pa la Saulə pɔ, Davidə a nwɔ gwɛnįn həɠə yɛ ɲɔw, a kɛ tii Saulə lii a laa mą ɲįnɛ̨n dii ə həɠə bulu. |