Samuɛlə dɔlɔɔ 15 - Yálá laawoo hɛɓɛ (dc)Saulə ə ɉɔn gɛ a Yálá 1 Samuɛlə yɛ Saulə ɓa: «Ɲą́ą́ ɓə Yai-Laa ə dɔ́ɔ́, gɛ́ dɔɔlaa hee wulɔ hiɛ yɛ́, yɛ́ kɛ a tɔɔmun Israɛlə nuą nwun na. Ə́ wəli tɔɔ kɛa Yai-Laa woo ɓa. 2 Yai-Laa Mɛ̨nį Kəlee ŋą Hééɓomun yɛ: ‹Gaa Amalɛkə hutɔɔi, mɛ̨nįi ə naa Israɛlə nuą diɛ mąą mɛ̨nį ɓa, ɓɛlɔwai, Israɛlə ə kulɔ la Eziptə lɔi hu, yɛ pa, ə pələ too dɔwɔ. 3 Yili ɓa, li, ə́ Amalɛkə nuą kəlee paa, hvo dɔ̨nɔ̨ kpɛli lɛɛ, da ɉɛnŋaai kpɔ gaa laa gəlee; ə kɛ a hulɔnu, nɛ̨ɛ̨nu, lokolo, ə mą kɛ a ɲįnį kpələ lon, nįŋɛ̨ɠaa, ɓɛlaaɠaa, ɲɔ̨nwɔmɛɛɠaa, da hoohvaalənŋaa.›» 4 Saulə ə nuą ŋąąkpɔn, ə di lono Telaimə daai, di kɛ a nu waa nwun veelɛ, Ɉuda nuą di ɓo a nu waa pow. 5 Saulə ə li a diɛ Amalɛkə daai kwɛlɛ, ə di loo moloon ɉu. 6 Saulə yɛ Keni nuą diɛ: «Ka li, ka həɠə ɓɛ, ka kulɔ Amalɛkə nuą lɔwai, və́ pa ka hon yɛ diɛ. Mąąhɔlɔɓo, di wɛli kpɛɛmaa túwɔ́ ɓo a Israɛlə nuą ɓɛlɔwai yiliɠaa di kulɔ la Eziptə lɔi hu» Keni nuą di kulɔ Amalɛkə nuą lɔwai. 7 Saulə ə Amalɛkə nuą kɛlɛ, ə həɠə Hawila daai, ə həli la Surə daai Eziptə lɔi voló həɠəi pələ. 8 Ə Amalɛkə tɔɔmun Agagə hon a vulú; ə nu kpəliɠaa kəlee paa di lɛɛ a kɔ́ kɔ́ ɓɔwa kɔ̨nɔ̨n. 9 Kɛlaa, Saulə da nwɔ nuąi di Agagə lɛɛ a vúlu; ə mą kɛ, daatɛlɛɛ kpɛa-kpɛa da bɛlɛɛɠaa, yiiɠaa kɛ di yolaa. Mɛlaa lonnii yiiɠaa kpɔ kɛ ɉu a nɛlɛɛ di hvo gɛ di hvo gəlee paa. Kɛlaa, yiiɠaa kɛ di kpala-kpalaa diɛ lɔ ɓə di di paa. 10 Yai-Laa ə mo Samuɛlə ɓa, yɛ mą: 11 «Saulə heei ŋɛ̨i ŋą́ mo a tɔɔmun, ŋą́ą́ nwóó yali bulu. Mąąhɔlɔɓo, aa bulu tɔɔ mą́ą́, wooi ŋą́ mo mą, hva ɉon.» Samuɛlə kwəi ə pili mą, gbinįi tii yee mu, yɛ nwoo tɛ Yai-Laa ɓa. 12 Yələ ɓɔɔ, Samuɛlə ə humo, yɛ li Saulə laakwiɛn ɉii. Di mo Samuɛlə ɓa, diɛ mą: «Saulə aa li Karmɛlə yee ɓa, aa kili lɛɛ ɉu hɛn da tɔɔlaa; aa pənə aa mąą kwɛa nąą ɓa, aa yɛɛ Gilgalə.» 13 Samuɛlə ə li ə həli Saulə ɓa, Saulə yɛ Samuɛlə ɓa: «Yai-Laa nwɔ lúwɔ́ ə yɛɛ ə́ mɛ̨́i; ŋą́ą́ Yai-Laa wooɠaa kəlee pɔ mɛ̨nį kɛ.» 14 Samuɛlə yɛ Saulə ɓa: «Mɛlaa wɔlɔ wooɠaai ŋɛ̨i gáá mɛ̨n ɉii, da nįŋɛ̨ wɔlɔ wooɠaai ŋɛ̨i tɔɔ nwə́lii, yili mukulaa ɓaa lə?» 15 Saulə yɛ Samuɛlə ɓa: «Nuą di daatɛlɛɛɠaai tii hon Amalɛkə nuą pɔɔli, mɛlaa kɔ́lɔ lɛlɛɛ mąɠaai tii da nįŋɛ̨ɠaa, di yiliɠaai lɛɛ di yee pulu, ə gɛ di pa gulɔ a haláá, Yai-Laa ə́ wɔ Yálái ɓa. Gbəliɠaai tii nwɛi, ku gəlee kulɔ a haláá.» 16 Samuɛlə yɛ Saulə ɓa: «Nɛɛ tii! Mɛ̨nį Yai-Laa ə mo mą́ą́ háá kpįnįi, gáá moi yɛ́.» Saulə yɛ Samuɛlə ɓa: «Mo!» 17 Samuɛlə yɛ mą: «Pələi mąn hvo kɛnɛ̨ li la ə́ kpɔɔ ɲɛ̨i ɓa, hvo mɔ̨ɔ̨ heeni Israɛlə nuą kəlee nwun na? Yai-Laa ə́ ə́ mąątí, ə́ ə́ kɛ a Israɛlə tɔɔmun. 18 Yai-Laa ə ə́ tɔɔ kɔ́ ɓa, ə mo yɛ́, yɛ kɛ yɛ́: ‹Li! Amalɛkə nuąi ŋɛ̨i a nɛ̨ŋɛ̨n ɉəɠə nuą, ə́ gəlee paa kpɔ tɛ̨ɛ̨tɛ̨ɛ̨, hvo húlu maa hɛn nɔpee ta lɛɛ.› 19 Lə mɛ̨nį ɓa hvo kɛ Yai-Laa wooi tii hon ni, hvo bɔ mɛ̨nį kɛ? Lə mɛ̨nį ɓa ə́ kɔ́ pulu hɛn ɉəɠə, ə lɛɛ, mɛ̨nįi ɲɔ̨nwɔ̨ɔ̨ Yai-Laa ɲɛ̨i ɓa, yɛ́ gɛ?» 20 Saulə yɛ Samuɛlə ɓa: «Ŋą́ Yai-Laa woo hon. Ɓɛi Yai-Laa ə dɔɔ laa gɔ́ mɛ̨i, ŋą li. Ŋą́ Amalɛkə lɔi hutɔɔmun Agagə hon, da Amalɛkə lɔi kəlee, ŋą́ ɉu nuą kəlee kulɔ a haláá. 21 Ɉɛnŋaai ku ɉɔlɔɓo gɔ́ hu, daatɛlɛɛ bɛlɛɛɠaa da gbɛa-gbɛa, yiiɠaai kɛ gɔlɔ lɛlɛɛ laa mą, mąąnɛ̨ɛ̨ kɛ di gəlee kulɔ a haláá, nuą di yiliɠaai həɠə, ə gɛ di pa gulɔ Yai-Laa ə́ wɔ Yálái ɓa a haláá, Gilgalə daai.» 22 Nąąlɔwai, Samuɛlə ə mo Saulə ɓa, yɛ mą: «A kɛ tii, taatɛlɛɛ kulaa Yai-Laa ɓa a haláá yii da gəlee kələn, yili ɓə mɔ̨ɔ̨ nwɛli kaa mą, a wala kɛ tii, Yai-Laa woo hon ŋąą? Kpaa-oo! Woo hon naa hviɛlaɓoɔi ɓɛlaa hilɛɠaa wulɔ ɓa. 23 Kɛlaa, nu kulaa Yálá woo mu nɛ̨ŋɛ̨n gaa lɔ yɛ, kwɛli hvilɛn ŋąą hali ɓa nwɔ nɛ̨ŋɛ̨n, da wəli kpɔlɔ nɛ̨ŋɛ̨n, ə mą kɛ tɔlu kpɛ nɛ̨ŋɛ̨n. Yii kpɔ yáá lənə Yai-Laa woo ɓa, yaa kpɛli aa lənə yɛ́, hvó kɛa a tɔɔmun.» 24 Saulə yɛ Samuɛlə ɓa: «Ŋą́ą́ nɛ̨ŋɛ̨n ɉəɠə, ŋą́ą́ kulɔ Yai-Laa woo mu, ŋą́ą́ ə́ woo pili. Ɲɔw ɓə ŋą́ kɛi mo nuą diɛ, gɛ́ hvaa di woo ɓa. 25 Yii hu kɛa, gáá nɛ̨ɛ̨mąą hvəi yɛ́, gɛ́ ə́ gɛ́ nɛ̨ŋɛ̨n mąąhvaalɛɛ, pa ə́ lɛɛ bulu, gwə li ŋą́ pɛlɛ Yai-Laa kɔ́wɔ mu.» 26 Samuɛlə yɛ Saulə ɓa: «Və́ hvilɛn ɉii ə́ pulu, gwa yɛ́ gu hvo li, mąąhɔlɔɓo, yáá lənə Yai-Laa woo ɓa, Yai-Laa aa lənə yɛ́, hvo kɛa a Israɛlə tɔɔmun.» 27 Ɓɛlɔwai Samuɛlə ə bulu pənə la, yɛ kɛ ə li, Saulə ə Samuɛlə nwɔ həɠə kɛnɛ̨ won ɉon, ə ə tee mą. 28 Samuɛlə yɛ Saulə ɓa: «Yai-Laa aa ə́ wɔɔ naa tee Israɛlə tɔɔlaa ɓa háákələi, aa dɔɔlaa tɛɛ nu takpɛli pɔ, yii viɛlaɓoɔ yɛ́. 29 Ə lɛɛ nwɔ̨nɔ̨, Israɛlə nwɔ mąąwiɛ hva hea too gbɔwɔ la, yii a mo, hva ɉəɠə mą, mąąhɔlɔɓo, hvo yɛ nu, yii a yali gələn ma.» 30 Saulə yɛ mą: «Ŋą́ą́ nɛ̨ŋɛ̨n ɉəɠə, yiihu, gáá nɛ̨ɛ̨mąą hvəi yɛ́, gɛ́ ə́ hvaa mą, ə́ mą́ą́wiɛ nwɔ́ nuą da Israɛlə nuą di ɲɛ̨i ɓa. Pa gwə li, ŋą́ pɛlɛ Yai-Laa ə́ wɔ Yálái kɔ́wɔ mu.» 31 Samuɛlə ə pənə ə pa Saulə pɔ, Saulə ə pɛlɛ Yai-Laa kɔ́ɔmu. 32 Samuɛlə yɛ mą: «Ka Amalɛkə tɔɔmun Agagə hon, ka paa la bɔ́.» Agagə kɛɛ pai, gwəinɛ̨ɛ̨i kɛ, ə kɛ nwɔ kwəi baa mɛ̨nį aa ɉəɠə mą. 33 Samuɛlə yɛ mą: «Bələi ə́ wɔ ɓɔwa kwɛai ə kɛi nɛ̨ąą hvɛɠɛ la a di lonnii, ə́ lee yaa kpɛli, gaa hvɛɠɛi a non.» Samuɛlə ə Agagə nwu dee Yai-Laa lííla Gilgalə daa. 34 Samuɛlə ə pənə ə li bɔ taai Rama. Saulə yaa kpɛli, ə li Givea. 35 Samuɛlə hvə kɛa ɲɛ̨i tɔɔ Saulə ɓa, ə lɛɛ la ɉu ə haa. Samuɛlə ə kɛi Saulə mąą wɔlɔ ɓo, mąąhɔlɔɓo, Saulə kɛ mɛ̨nį a Israɛlə tɔɔmun, Yai-Laa aa kɛ nwoo yali bulu. |