Samuɛlə dɔlɔɔ 14 - Yálá laawoo hɛɓɛ (dc)Ɉonatan ə wolo Filisti nuą kpulu ta ɓa 1 Yələ ta, Saulə lon Ɉonatan yɛ nwɔ ɓíitiɛ̨ ɓa: «Pa gwəli, Filisti nuą tii ɓɛli pələ, gu həli diɛ.» Kɛlaa, hvo nąn gili pu ɉu. 2 Saulə ə kɛ heeni Givea ɲɛ̨n ɉu, wulu kɛnɛ̨ ta mu, Migrɔn daai, nu nwun mɛ̨ida ɲɔ̨nwɔ̨mąn mə kɛ bɔ. 3 Ahituvə lon Ahiya, yai kɛ a Ikavɔdə mąnįn, Ikavɔdə ə kɛ a Yai-Laa nwɔ haláá laa həli mun Eli ŋɛ̨i kɛ Silo, non ɉulɔnu Pinasə nwɔ lon. Ahiya tii ɓə ɉaláá kulɔ hɛnŋaa di kɛ ɲəi. Nuą kili hvo kɛ ɉu, diɛ kɛ Ɉonatan aa li laa. 4 Ɉonatan ə kɛi dɛɛ pələ kwɛli, yɛ kɛ ə wolo Filisti nuą diɛ kɛɛnąą ŋąą tiikpə ta ɓa, ɲee kɛɛnąą ta ɓa, kwɛni tɔɔi kɛ bələ hveelɛi kəlee. Di laa ɓaa kɛ a Bosesə da Sɛne. 5 Gwɛni kpuwulu tɔ̨nɔ̨ ə kɛ ɲánwuɔ̨ pələ, Mikmasə tənən ma, dɔ̨nɔ̨ ə ɓo ɉɛɠɛɛ pələ, Gɛva tənən ma. 6 Ɉonatan yɛ nwɔ ɓíitiɛ̨ ɓa: «Pa gu həli gɛ́nɛ kpolɔwaɠaa tii diɛ, gbəli hu Yai-Laa kaa pai kpɔnmąą tɛɛi gu pɔ, hvo gaai, nu ə tamą, a wala kɛ tii, di hvo tamą, hɛn da hva pɛli tɔɔi Yai-Laa tɔwɔ kɔ́ nɛ̨ɛ̨ mɛ̨nį ɓa nu ɓa.» 7 Bɔ mun yɛ mą: yii lɔpee ə́ kaa bɔ, gɛ, gáá ə́ pulu, ə́ kwəi mɛ̨nį kaa a gwə́i mɛ̨nį. 8 Ɉonatan yɛ mą: «Yii hu, gu kaa ɉaŋai di pɔɔli pələ, ə lɛɛ, di ka káá pai gu kaai, 9 da kɛ guɔ: ‹Ka tɔɔ laa, ku pa ku həli kaa› gwa lɛɛ tɔɔni gu tɔɔi gu hva li di pɔ. 10 Kɛlaa, da kɛ guɔ: ‹Ka tɛ ɲee ka həli kuɔ›, gwa tɛ. Akɛ tii, Yai-Laa aa di lɔ gu yee ŋą, gbaɠala ka pələ ka tii gu yəi.» 11 Di nu hveelɛɛi di di kpɔɔ lɛ, Filisti nuą di di kaa. Filisti nuą diɛ kɛ diɛ: «Hebreuɠaa ka tii kulɔi di loo pələi.» 12 Nuą tii kɛ bələ nwun na, diɛ bələ mąą kpɛ, diɛ Ɉonatan da bɔ mun tii diɛ: «Ka tɛ ɓɛ ku pɔ, mɛ̨nį ta kaa ku kwəi, ku mo kaa.» Ɉonatan yɛ bɔ mun ma: «Hvilɛn bulu gu ɲee tɛ. Yai-Laa aa di lɔ Israɛlə yee ŋą.» 13 Ɉonatan ə kɛi tɛ, yɛ tala ɲee ɓa, nwɔ tímun ə ɓo bulu. Ɉonatan nwɔ kɔ́ kɔ́ ɓɔwai ə kɛi Filisti nuą pili nɔi ɓa, bɔ mun yɛ di kpəli ŋąąyíi bulu. 14 Gɔ tɔlɔɔi Ɉonatan da bulu mun di doo, nu pow hveelɛ ɲɔ̨nwɔ̨mąn ɓə lɛɛ ɉu. Lɛɛ, ɓɛi di kɛi gɔ́ kɔ́ laa, naa tiikpəi kɛ yɛ nu tɔ̨nɔ̨ túwɔ́i kɛɛ hii. 15 Nuą di ɲɔw, gɔ́ ɓuwu la, da ɲɛɛkɔwɔɠaa hu, ə mą kɛ nɔi kəlee hu, nuą tii kɛ bələ nwun na da nɔi huwolo nuą diɛ kpɛli, di ɲɔw kpɔ kɛnɛ̨, nɔi ə kpɛlin, Yai-Laa a nuą hu pu diɛ a ɲɔw. Filisti nuą di pu Israɛlə tɔwɔ 16 Saulə nwɔ nuąi kɛ bələ nwun na Givea daai Bɛnɉamɛn lɔi hu, diɛ di ɲɛ̨i kɛ bələ ɓa, di Filisti nuą kaa diɛ taɠa-taɠa a bələ kəlee. 17 Saulə yɛ bɔ nuą diɛ: «Ka nuą təli tɛitɛi, nui aa kulɔ gu lɔwai, gu kɛ a gɔlɔn ŋąą.» Di nuą təli, Ɉonatan da bɔ mun mə di hvo kɛ laa. 18 Saulə yɛ Ahiya ɓa: «Yai-Laa nwɔ kəhii lɛɠɛ ɓɛ!» Volói tii Yálá nwɔ kəhii ə kɛ Israɛlə lonnii pɔ. 19 Ɓɛlɔwai Saulə ə kɛi mɛ̨nį ɓo la ɉaláá laa həli mun ma, Filisti nuą pɔɔli ə kɛ lɔ ɉuwu-ɉuwu, Saulə yɛ ɉaláá laa həli mun ma: «Nɛɛ tii!» 20 Saulə da nuąi kpɔ kɛ daai, di di ŋąąkpɔn, də li ɓɛi di kɛi gɔ́ kɔ́ laa. Filisti nuą diɛ ɓɔwa pili di kee ɓa, naa ə ɓo ɉuwu-ɉuwu. 21 Hebreuɠaa tii kɛ Filisti nuą di wɔ kóló hu, vaa toɔ, da diɛni ɓə pa gɔ́ ɓa, di kulɔ Filisti nuą lɔwai, di pa Israɛlə nuą pɔ, di too Saulə da Ɉonatan ni pɔ. 22 Israɛlə nuą kpɔ kɛ daa di loo Ɛfraimə yee hu, di gɔ́ kala mɛ̨nį Filisti nuą diɛ bələ mɛ̨n, di hvilɛn di pulu a kɔ́ diɛ kpɛli di hee Filisti nuą hu. 23 Yai-Laa ə gɔ́ nɛɛ Israɛlə ɓa a volói tii. Gɔ hu ə kɛnɛ̨ kpɔ, ə həli Bɛtə-Awɛn pulu pələ. 24 Israɛlə nuą di mɔ̨nɔ̨ mįi a mąą yələ, mąąhɔlɔɓo, Saulə ə nuą kpaan a nwoo ŋɛ̨i, yɛ diɛ: «Nui lɔpee a kɔ̨nɔ̨n gɔwɔn ə lɛɛ la ɉu yələ ə wulu, Yai-Laa ə mąą nu nɛ̨ŋɛ̨n naa, hvo kɛ li ŋą́ gbɛa nwą́ną kulɔ ɲɔ́woɠaa diɛ. Nui lɔpee ta hvo lɛɠɛ kɔ̨nɔ̨n ma.» Nuą di Ɉonatan nwun mąąɓo 25 Gɔ kɔ́ nuą kəlee daa kɛ lɔ nɔi. Kwɛi nwulɔ ə kɛ laa 26 lɔi nuą di mo nɔwai, di gwɛi nwulɔ kaa yɛ pu, kɛlaa, nu ta hvo da lɔ na. Mąąhɔlɔɓo, nuą di kɛi ɲɔw nɛ̨ŋɛ̨n naa woo ɓa. 27 Kɛlaa, Ɉonatan hvo nąn nwoo tii mɛ̨n, ɓɛlɔwai ə kɛi mɛ̨nįi tii ɓo la nuą diɛ, yɛ gwɛla. Wulu kpiɛn ə kɛ Ɉonatan yəi, ə ɉaŋa ə nɔ gwəi nwulɔ hu, ə lɛɛ, ə ɉiɛ lɔ na, ɲɛ̨i ə pɔ̨nɔ̨ nwun ma. 28 Nu ta yɛ mą: «Ə́ nąn ə nu kəlee kpaan a gwɛla woo, yɛ diɛ: ‹Nui lɔpee a kɔ̨nɔ̨n mįi háákələi hvólói mu, nɛ̨ŋɛ̨n naai›, ɛlɛɛ, nuą hvii aa kpɛɛ kɛnɛ̨.» 29 Ɉonatan yɛ mą: «Nán a mɛ̨nį ɲąąnwąnąą laa nɔi ɓa, ka ɓɛ kaa li, ɲɛ̨i aa pɔ̨nɔ̨ nwún ma a gwɛin nwulɔ woloi ŋɛ̨i lɔ ŋą́ gɔwɔn. 30 Gu hvo mun kɛ nuą də li kɛ háákələi kɔ̨nɔ̨n mįi; ɉɛnŋaa gwəli ɉɔlɔɓo gu yowoɠaa pɔɔli, da mɔ̨nɔ̨i gwəli naa Filisti nuą diɛ, Ɲɛ̨i ə li kɛnɛ̨ tai!» 31 Volói tii, gɔ́ ə kala Filisti nuą diɛ, ə həɠə Mikmasə, ə həli Ayalɔn. Nuą hvii ə kpɛɛ kɛnɛ̨, 32 di too gɔ́ pulu hɛnŋaa hu, di daatɛlɛɛ pɛlɛɛɠaa həɠə, di nįŋɛ̨ɠaa da di lonnii di nwun dee nɔi ɓa, di mįi da ɲąmą. 33 Di pa di mo Saulə ɓa, diɛ mą: «Nuą kaa nɛ̨ŋɛ̨n ɉəɠəi Yai-Laa ɓa. Di kaa huwɔ mįi da ɲąmą.» Saulə yɛ mą: «Lɔ gílii nuą ɓaa kaa. Ka kwɛni kpuwulu kɛnɛ̨ kiliɠilin, ka nɛɠɛ ɓɛ mą́ą́.» 34 Saulə yɛ diɛ: «Ka taɠa nuą lɔwai, kaa diɛ nu kəlee ə pa a nwɔ nįŋɛ̨ a wala kɛ tii nwɔ ɓɛlaa. Ka di nwun dee, ə lɛɛ ka di mįi ɓɛ, nɛ̨ŋɛ̨n va kɛ ɉu Yai-Laa ɓa, yɛ kaa kɛi mįi da ŋąmą.» Mąą kpįnįi tii hu, nu kəlee ə pa a nįŋɛ̨i kɛ aa ɉon, ə lɛɛ, di baa gɛɛnąą tii ɓa. 35 Bələ ɓə Saulə ə haláá kulɔi pɛli la Yai-Laa ɓa, ɉaláá kulɔi dɔlɔɔ tɔlɔɔ ka tii yii Saulə ə bɛli Yai-Laa ɓa. 36 Saulə yɛ diɛ: «Ka gu hvilɛn Filisti nuą pulu gbinįi ŋɛ̨i hu, ka gu lɛɛ di paai, ə lɛɛ la ɉu yələ ə ɓɔ, gu hvo da lɔpee lɛɛ a vulú.» Diɛ mą: «Yii lɔpee a nɛɛ yɛ́, gɛ.» Ɉaláá kulɔ mun yɛ diɛ: «Ka gu lɛɠɛ ɓɛ Yálá ɓa.» 37 Saulə ə Yálá mąąnin gɛ, yɛ mą: «Ŋą́ lɛɛ Filisti nuą pulu? Awala kɛ tii, ŋą́ həɠə di pulu? Akɛti, gɔ́ kaa pai nɛ̨ɛ̨i Israɛlə nuą diɛ?» Kɛlaa, Yálá hvo Saulə woo pulu pənə a ɲələi tii. 38 Saulə yɛ nɔi ɲɛ̨itɔwɔ nuą diɛ: «Ka kəlee ka lɛɠɛ ɓɛ! Ka mɛ̨nįi ŋɛ̨i hukpɛ a nɛlɛɛ, nɛ̨ŋɛ̨n nəi ɓə kələi daa ɉəɠə? 39 A tɛ̨ą Yai-Laa Israɛlə nwun mąąɓomun, kaa a vulú, ə mą kɛ nón Ɉonatan mə nɛ̨ŋɛ̨n tii həɠə, a haa.» Nui lɔpee ta hvo nwoo pulu pənə. 40 Saulə yɛ Israɛlə nuą kəlee diɛ: «Ka tɔɔ pələ tɔ̨nɔ̨, ɲą́ą́ kwa nón Ɉonatan ku tɔɔ pələ tɔ̨nɔ̨.» Nuą diɛ Saulə ɓa: «Yii lɔpee a nɛ̨ɛ̨ yɛ́, gɛ.» 41 Saulə yɛ Yai-Laa ɓa: «Yai-Laa! Lə mɛ̨nį ɓa hvo ə́ wɔɔ luwɔi woo pulu pənə li háákələi? Akɛ nɛ̨ŋɛ̨n gaa mą́ą́, a wala kɛ tii, nón Ɉonatan ɓa, Israɛlə nwɔ Yálá gɛ́ ə́ tɛ̨ą lɛ.» Mɛ̨nįi ə lɛɛ Ɉonatan da Saulə diɛ. Mɛ̨nį ta hvo lɛɛ nɔi nuą diɛ. 42 Saulə yɛ diɛ: «Ka ku ɓɛlɛ ɓo, ɲą́ą́ kwa nón Ɉonatan.» Mɛlɛ ə lɛɛ Ɉonatan ɓa. 43 Saulə yɛ Ɉonatan ɓa: «Mɛ̨nįi ə́ gɛ, mo mą́ą́.» Ɉonatan yɛ nąn ma: «A tɛ̨ą, wulu kpiyɛn mə ŋą́ ɉunwɔ lɔ kwɛ̨in nwulɔ hu, ŋą́ gɔwɔn. Yii hu, váái ma, ŋą́ haa.» 44 Saulə yɛ Ɉonatan ɓa: «Ɉonatan, ya wala haa Yálá ə mɛ̨nį nwąnąą kɛnɛ̨ laa mą́ą́.» 45 Kɛlaa, nuą kəlee diɛ Saulə ɓa: «Ɉonatan a pɛli mɔ̨ɔ̨ haai, Yaai gɛ gɔ́ kɛnɛ̨i ŋɛ̨i yɛ nɛɛ guɔ? Yili hvo pɛli li ɉu. Yai-Laa kaa a vulú, akɛ yili a kɛ tii, kɛɛ kala mɛ̨nį kɛnɛ̨ kpɔ-kpɔɔ li. Ɉonatan nwun nəɠa tɔ̨nɔ̨ kpɛli hva kulɔ nwuɔ̨. Mąąhɔlɔɓo, Yálá ɓə kpɔnmąą tɛɛ bɔ, yɛ mɛ̨nįi ŋɛ̨i kɛ háákələi.» Bələ ɓə nuą di Ɉonatan nwun mąąɓo la diɛ gulɔ haa hu. 46 Saulə ə həɠə Filisti nuą pulu, yiliɠaai də li di wɔ lɔi hu. Kɔɠaa di nɛɛ Saulə ɓa Saulə yəi bɛlɛ́n nuą 47 Dɔɔlaa hɔlɔɓoi Saulə ə mo Israɛlə lɔi hu, ə kɔ́ pɛlɛ ɲowoɠaai kɛ gwɛ diɛ, diɛ ɓaa: Moabə lɔi, Amɔn lɔi, Edɔmə lɔi, Sova tɔɔɓɛlaa, Filisti nuą. Gɔ tɛitɛi kəlee hu, ə kɛi nɛɛ Saulə ɓa. 48 Saulə ə vaŋa kɛnɛ̨ pələ lɛ a Amalɛkə hvo ə mo kɔ́ hu, ə Israɛlə kulɔ naa nɔ̨nwɔ̨ ɓomun ɲəi. 49 Saulə lon ɉinąą laa ka: Ɉonatan, Yiswi, da Malki-Sua. Nonnii nɛ̨ąą hveelɛi laa ka: Nu pɔlɔ ɓa kɛ a: Meravə. Nogolo laa mun laa ka: Mikalə. 50 Saulə nɛ̨ą laa ɓa kɛ a: Ahinoamə, yai kɛ a Ahimaasə lon nɛ̨ɛ̨nu. Saulə nwɔ kɔlaɠa nwun nąmu laa ɓaa kɛ a: Avinɛrə. Saulə galá Nɛrə lon ni kɛ. 51 Kisə ə kɛ Saulə nąn, Nɛrə yɛ ɓo a: Avnɛrə nąn, Nɛrə yaan, nwɔɔ nąn maa: Aviɛlə. 52 Filisti kɔ́ ə kpɔlu Saulə nwɔ yɛnɛ̨ɛ̨ kəlee yee mu. Ya lɔ ɓaa kɛ Saulə, a huwalawala mun da kaa Israɛlə nuą lɔwai, a mąą nu həɠə, da yaa di tɔɔi ə kɛ tɔ̨nɔ̨. |