Samuɛlə dɔlɔɔ 13 - Yálá laawoo hɛɓɛ (dc)

Israɛlə ə nwun gulɔ Filisti nuą yəi mu

¹ Saulə kaa kwɛlan ə kɛ a… ɓɛlɔwai di ɉee la a tɔɔmun. Ɛlɛɛ, ə tɔɔlaa kɛ Israɛlə nwun na a kwɛlan veelɛ.

² Saulə ə nu waa haaɓa həɠə ɉu Israɛlə lɔi hu. Saulə da nu waa hveelɛ ɓə kɛ Mikmasə da Betɛlə yee ɓa, nu waa tɔ̨nɔ̨ da Ɉonatan ni di ɓo Givea Bɛnɉamɛn lɔi hu, ə nu kpəliɠaa lɛɛ laa diɛ li di bɔɔli.

³ Ɉonatan ə Filisti nuą di wɔɔ nwun nąmu paa Gɛva. Filisti nuą di bələ mɛ̨n, diɛ mą Hebreuɠaa daa di muhəɠə. Saulə ə tulu hvɛɛ nąąlɔwai, nɔi nąą kəlee.

⁴ Israɛlə nuą kəlee di mɛ̨nįi tii bələ mɛ̨n, diɛ kɛ, Saulə aa Filisti nuą ɲąąwooɓomun baa. Nɔi lonnii di di ɲąąkpɔn ə lɛɛ, Israɛlə ə yowo laa hvilɛn da Filisti nuą di lɔwai. Nu kpulu kəlee ə ɲąąkpɔn, di hvilɛn Saulə pulu Gilgalə daai.

⁵ Filisti nuą di di muhəɠə di kɔ́ pɛlɛ Israɛlə ɓa. Kɔ kɔ́ wotolo waa pow haaɓa ə kɛ di yəi. Nu waa mɛ̨ida di ɓo hoo mɛ̨i, ə lɛɛ, gɔ́laɠa kɛnɛ̨ yɛ gboloyá kwɛlɛ ɲɛa kɔ́w. Di tɛ di di tɔɔi kulɔ Mikmasə Bɛtə-Awɛn voló həɠəi pələ.

⁶ Israɛlə nu di gaa diɛ gɔ́ aa kpɔlu, mąąhɔlɔɓo, daa kɛ hee di hu kɛnɛ̨. Nuą di kɛi di loo gwɛni woloɠaa hu, kɛɛnąą loɔɠaa, gwɛniɠaa lɔwai, da woloɠaa hu nɔi mu, da ɲá-lɔwaɠaa hu.

⁷ Hebreuɠaa taɠaa di Ɉurdɛn teen, diɛ li Gadə lɔi hu, da Galaadə. Saulə ə kɛ nii Gilgalə, ə lɛɛ, nuą maa ə kɛi kpɛlin bulu.

⁸ Guui Samuɛlə ə ɉee a hvoló mɛ̨ihveelɛ, Saulə ə guu tii mąąkpɔn. Kɛlaa, Samuɛlə hvo pa Gilgalə daai. Nuą di həɠə Saulə pulu, di taɠa.

⁹ Saulə yɛ diɛ: ka pa ɉaláá hɛnŋaa da gəlee kələn Yálá ɓa, ka dɛɛ bɔ́, da liilaa halááɠaa, ə Yálá mąąwiɛ haláá kulɔ.

¹⁰ Di kpɛɛ kpɔlɔɔ kɛa a ɉaláá tii kulaa-o, Samuɛlə yɛ pa. Saulə ə li ə naakwiɛn, ə duwɔɓo.

¹¹ Samuɛlə yɛ mą: «Lə ɓə ŋɛ̨i ə́ gɛi?» Saulə yɛ mą: «Ŋą́ą́ gaa nuą diɛ kulɔ búlu, diɛ taɠa taɠa; ə lɛɛ, yɛ́ kpɛli, hvo kɛi pa a guui gu ɉee, yili pulu, Filisti nuą daa kɛ di ŋąąkpɔn Mikmasə.

¹² Yili ɓə gɛ, gɛ́ kɛ diɛ, Filisti nuą yɛɛ hiɛ ka, di wolo mą́ą́ Gilgalə, ə lɛɛ, vá ni kɛ a Yai-Laa liilaa haláá kulaa.»

¹³ Samuɛlə yɛ Saulə ɓa: «Yáá túwɔ́ yɛ ɓowo mun. Hvo Yai-Laa ə́ wɔ Yálá nwɔ tiɓoi kɛ li, a yai ə naa ə́ nwuɔ̨i, ə li kɛ túwɔ́ tii, Yai-Laa ə li ə́ wɔ tɔɔlaai huwalawala Israɛlə mɛ̨i a yələ kəlee.

¹⁴ Kɛlaa, yii laai hu, ə́ wɔ tɔɔlaai hvo pai lamuni ɉu. Yai-Laa aa nu kwɛli mą a niiɓa mun, ɛlɛɛ, Yai-Laa aa ɉee a nwɔ nu huwui ɲąąwooɓo mun. Hvo gaai, mɛ̨nįi Yai-Laa ə kɛ yɛ ə gɛ, hvo gɛ li.»

¹⁵ Samuɛlə ə tɛɛ yɛ li, ə həɠə Gilgalə, yɛ li Givea Bɛnɉamɛn lɔi hu. Saulə ə bɔ nuą lono, di ɓo a nu nwun mɛ̨ida ɲɔ̨nwɔ̨mąn.

¹⁶ Saulə da non Ɉonatan, da nuąi kɛ di pɔ, di kɛ Gɛva, Bɛnɉamɛn lɔi hu, Filisti nuą diɛn, di ɓo Mikmasə.

¹⁷ Nɔi hu wolo nuą di həɠə Filisti nuą di wɔ kɔlaɠai hu, a di kpulu hee ɉaaɓa. Nu kpulu tɔ̨nɔ̨ ə ɉon a Ofra pələ Sualə lɔi hu.

¹⁸ Veelɛ naa ə ɉon a Bɛtə-Horɔn pələ, ɉaaɓa naa yaan, ə ɉon a nɔi ɲɛ̨in ɉu pələ. Ɲɛn ŋɛ̨i tɔɔ húlú yɛɛ kɔwɔ moloon mɛ̨i, bɔ pələ, nɔi pun ɉu pələ.

¹⁹ Kwɛli yɔw mun və kɛ Israɛlə lɔi hu nąąlɔwai, hvo gaai Filisti nuą daa kɛ mo diɛ kɛ diɛ: mąą hvo nɛ̨ɛ̨li Hebreuɠaa di hvo kɔ́ kɔ́ ɓɔwaɠaa da kpalaɠaa pɛli.

²⁰ Israɛlə lonnii kəlee di kɛi li Filisti nuą pɔɔli di wɔ kɛɛ hin ɉɛnŋaa, di wɔ kaliɠaa, da di wɔ yowaɠaa, da di wɔ ɓɔwaɠaa ɲąąli mɛ̨nį ɓa.

²¹ Nįŋɛ̨ kaaləɠaa ɲąąli wali, da galəɠaa ɲąąli wali, ə kɛ a sikle ɓɛla ɓoɔ ɉu haaɓa, ɉeei hveelɛ, ə lɛɛ, ɲowa da mowaɠaa ɲąąli wali, ə kɛ a ɉeei tɔ̨nɔ̨.

²² Yili ɓə gɛ, gɔ́ kɔ́ yələ, kɔ́ kɔ́ ɓɔwa da kpala, di hvo kɛ Saulə da Ɉonatan di pɔ nuą yəi, kɛlaa, di da hɔlɔɓo Saulə da non Ɉonatan di wɔɔ.

²³ Filisti nuą kpulu ta ə kulɔ, diɛ di ɲɛ̨i kɛ Mikmasə bələ nwun na ɓa.