Samuɛlə dɔlɔɔ 11 - Yálá laawoo hɛɓɛ (dc)

Kɔ́ ə nɛ̨ɛ̨ Saulə ɓa Amɔn lonnii mɛ̨i

¹ Nahasə, Amɔn mun ə kɔ́ pɛlɛ Yavɛsə taa ɓa Galaadə lɔi hu. Di daa mąątínɛ̨n a gɔ́ laɠa, Yavɛsə nuą kəlee diɛ Nahasə ɓa: «Gu too nɛ̨ɛ̨laa hu, ku lɛɛ ə́ yee mu.»

² Nahasə Amɔn mun yɛ diɛ: «Pələi gáá bɔ gwa kaa ni gu liilaa mįnɛ̨ həɠə la, bələ ka: Ŋą́ ka kəlee ka ɓa-mįi-yee ɲɛ̨i kɔ́w wolo. Ŋą́ Israɛlə kəlee nwumɛ̨ tii.»

³ Yavɛsə kalanɉonŋaa diɛ mą: «Hvóló mɛ̨ihveelɛ tɛɛ ku pɔ, ə gɛ, ku kɛlaɠaa tɔɔ Israɛlə lɔi nąą kəlee, nu ta a wala hɔlɔɓo hvo ku kulɔ ɲəi kɛ, kwa ku kpɔɔ tɛɛ ə́ pɔ.»

⁴ Gɛlaɠaa di həli Givea Saulə pɔ taai, di nwooɠaa tii laa həli nuą diɛ, nuą kəlee di tomą a wɔlɔ.

⁵ Nąąlɔwai kpɔlɔɔ ɓə Saulə ə kɛi həɠə la ɲəi ɲɛa, ə ɓo nwɔ nįŋɛ̨ɠaa pulu. Saulə yɛ diɛ: «Lə ɓə kɛ nuą diɛ, yaai di kaa wɔlɔi?» Di Yavɛsə nuą woo hu kulɔ ma,

⁶ Yálá nwɔ Kilii ə pa Saulə pɔ, nwooɠaa tii mɛn ə mo nii ə holi kpɔ kɛnɛ̨.

⁷ Ə Nįŋɛ̨ hveelɛ həɠə, ə ɉu tee-tee, ə ɉuwɔ kpuwuluɠaa tɛɛ nwɛlɛɛ ɓo nuą pɔ, yiliɠaa də li la Israɛlə lɔi kəlee hu, ə nwooɠaa ŋɛ̨i laa mɛ̨i, yɛ diɛ: «Nui lɔpee hvo pai hvaai ma hvo lɛɛ Saulə da Samuɛlə di pɔ, di hvo li gɔ́ ɓa bələ ɓə da nwɔ nįŋɛ̨ɠaai kɛ la. Yai-Laa ə ɲɔw lɔ nɔi lonnii hu, di kəlee də li yɛ nu tɔ̨nɔ̨.»

⁸ Saulə ə nuą lono Bɛzɛkə Israɛlə lonnii di kɛ a nu waa nwun ɉaaɓa (300.000) Ɉuda hinąą nu waa pow haaɓa (30.000).

⁹ Nwɛlɛɛ ɓo nuą tii di di tɔɔ, di mo diɛ, diɛ mą: «Ka li ka Yavɛsə daa yii gaa Galaadə lɔi hu nuą diɛ, tínąą, ɓɛlɔwai voló ŋąą a nwąną la ka káá pai nuą hɔlɔɓoi di kpɔnmąą tɛɛ ka pɔ.» Nuą di di tɔɔ, di pa, di mo Yavɛsə nuą diɛ; yiliɠaa kwəi ə nɛ̨ɛ̨.

¹⁰ Yavɛsə nuą di mo Amɔn nuą diɛ, diɛ mą: «Kwa tínąą pa ka pɔ, ka ku kɛ yɛ bələi ka káá la ɓɔ.»

¹¹ Mąą yələ laaɓoɔ, Saulə ə nuą ɓɛlaɓo ɉu haaɓa, yələ ɓɔi lɔwai, di too Amɔn nuą di wɔ kɔlaɠai hu, di lɛɛ Amɔn nuą paai, ə lɛɛ la ɉu voló ŋąą ə nwąną, nuąi kulɔ, a di yee wolo, di taɠa taɠa, nu hveelɛ hvo pɛli lɛɛ gee ɓa.

¹² Israɛlə nuą diɛ Samuɛlə ɓa: «Gbɛɛ nuą ɓə yələ kɛi kɛ diɛ: ‹Saulə ɓə mɔ̨ɔ̨ pai heei ku mɛ̨i a tɔɔmun?› Ka mąą nuą tii tɛɛ ku pɔ, ku di paa.»

¹³ Saulə yɛ diɛ: «Mąą hvo nɛ̨ɛ̨li di hvo nu ta paa háákələi, mąąhɔlɔɓo, kɔ́ a háákələi nɛɛ Yai-Laa ɓa Israɛlə lɔi hu.»

¹⁴ Samuɛlə yɛ Israɛlə nuą diɛ: «Ka pa gwəli Gilgalə. Ka gu pənə, ka gu dɔɔlaa hee laa, Yálá hee pɛlɛ́ mu.»

¹⁵ Nuą kəlee də li Gilgalə, di Saulə hee a tɔɔmun Yai-Laa lííla. Di pɔnaa kulɔ haláá kulɔ laa Yai-Laa lííla. Saulə da Israɛlə nuą kəlee di hɛli kɛnɛ̨ pu.