Samuɛlə dɔlɔɔ 10 - Yálá laawoo hɛɓɛ (dc)1 Samuɛlə ə nwulɔ kpowo həɠə, ə bu Saulə nwuɔ̨, ə nɛ̨nɛ̨ɓo, yɛ mą: «Yai-Laa ka tii aa ə́ həɠə, ə gɛ, ə́ kɛ a gwɛlin ɲąąwooɓomun. 2 Háákələi, gwa gu ɓɛlaɓo, ə́ kaa lii nu hveelɛ kaai Rasɛlə kámą kwɛlɛ, Bɛnɉamɛn nwɔ lɔi ɲɛ̨n ma, Sɛlsa, di kaa pai kɛi yɛ́: ‹Ɉoohvaalənŋaai ə́ li di kwɛlii, daa di kaa. Ə́ nąn aa lɛ̨ą ɉoohvaalən mɛ̨nį ɓa, ə́ mąą liihlɛn mə kɛa aa too mą, gaa kɛi diɛ: «Lə ɓə ŋą́ pɛli gɛi nón mąą mɛ̨nį ɓa.»› 3 Ya pa həɠəi laa, ə́ ka pai həlii Tabɔrə nwɔ kpitilii kwɛlɛ, ə́ nu haaɓa kaa diɛ li Betɛlə daa. Ɓooli lon ɉaaɓa kaa pai kɛi dɔ̨nɔ̨ yəi, lɛɠɛ haaɓa ə ɓo dɔ̨nɔ̨ yəi, lɔɔ ɓala ə ɓo ɉaaɓa naa yəi. 4 Di kaa pai di woo pilii yɛ́, di lɛɠɛ hveelɛ tɛɛ ə́ pɔ, ɉon di yəi. 5 Yili pulu, ə́ kaa pai həli Givea Yálá taa, ɓɛi Filisti tɔɔɓɛlaa kaa laa. Yá həli daa kwɛlɛ, ə́ kaa pai kulɔi Yálá kwəi mɛ̨nį hukulɔ nuą kpulu mɛ̨i, diɛ həɠə ɉaláá kulɔi, diɛ tɛ taai, hvɛli kɛ nuą di ɓo di tɔwɔ, diɛ gwɛnįn ɲɔw, da ɓala, diɛ ɓɔɔ hvɛɛ, diɛ bɛlɛgwəi gwɛnįn ɲɔw. Di kaa pai kɛi Yálá-Nįi yee kɔ́nma. 6 Nąąlɔwai Yai-Laa nwɔ Kilii kaa pai tɛɛi ə́ pɔ, yɛ́ mɛ̨nįɠaa kɛ ka diɛni, Gilii tii kaa pai ə́ kɛ pələ mąąhvalin ɉii. 7 Ya mɛ̨nįɠaa tii kaa diɛ həli yɛ́, mɛ̨nį lɔpee ya gaa, yɛ́ ə́ yee a pɛli mą, ə́ gɛ. Mąąhɔlɔɓo, Yálá kaa ə́ pɔ. 8 Ə́ kaa pai lii Gilgalə dɔ́wɔ, nwɛ́i, gáá pai pai, ə gɛ, ŋą́ liilaa haláá kulɔ Yálá ɓa, da haláá yii da gəlee kələn. Mą́ą́kpɔn naa hvóló mɛ̨ihveelɛ yee mu, ə lɛɛ la ɉu, ŋą́ pa ŋą́ ə́ kaa laa. Mɛ̨nįi mąąnɛ̨ɛ̨ ə́ gɛ, nąąlɔwai ɓə ŋą́ nɛ la yɛ́.» 9 Saulə ə lɛɛ lɔ bulu tɔɔ Samuɛlə ɓa yɛ li, Yálá ə gili mąą pənə gwəi; mɛ̨nįɠaa tii di həli Saulə ɓa a mąą yələ. 10 Həli di mo Givea, da Yálá kwəi mɛ̨nį hukulɔ nuą di kwiɛn. Nąąlɔwai, Yálá nwɔ Kilii ə pa bɔ, hvo kɛa kɛ gbɔwɔ yee kɔ́nma lɔ yɛ pələi yiiɠaai tii di kɛ la. 11 Nuąi kpɔ kɛ gɔlɔn a bɔlɔ, di gaa, yɛ Yálá kwəi mɛ̨nį ɓo da yiiɠaai tii. Nuą di kɛi di kee mąąnin gɛ, diɛ kɛ diɛ: «Lə ɓə kɛ Kisə lon ma? A kɛ tii Saulə yaa kpɛli aa too kɛa Yálá kwəi mɛ̨nį hukulɔ nuą pɔ?» 12 Nu ta ə mo nu kpulu lɔwai, yɛ diɛ: «Gbɛɛ ɓaa yiiɠaai di nąn?» Yili mąą mɛ̨nį ɓə da kɛ ɉanwon ŋɛ̨i hɔɔi la diɛ kɛ diɛ: «Saulə yaa kpɛli gaa a Yálá kwəi mɛ̨nį hukulɔ mun da?» 13 Saulə ə pənə ə gbɔwɔ hɔlɔɓo, ə həɠə ɉaláá kulɔi. 14 Saulə galá ə mąąnin gɛ, yaa da bɔ mun, yɛ diɛ: «Mįnɛ̨ ɓə ka li laa?» Diɛ mą: «Ɉoohvaalənŋaa kwɛlii. Kɛlaa, ku hvo hɛn da kaa, ya ɓə gɛ kwə li ku Samuɛlə ɓa.» 15 Saulə galá yɛ mą: «Mɛ̨nįi Samuɛlə ə mo kaa, ɉulɔ mą́ą́.» 16 Saulə yɛ galá ba: «Ə́ kɛ kuɔ daa ɉoohvaalənŋaa kaa.» Kɛlaa, mɛ̨nįi Samuɛlə ə mo mą dɔɔlaa mɛ̨nį hu, hvo da ɓo mą. Di dɔɔ hee mɛ̨nį kɔ́ a kpɛ̨ɛ̨, ə lɛɛ Saulə ɓa 17 Samuɛlə ə nɔi lonnii ŋąąkpɔn Mispa Yai-Laa lííla. 18 Yɛ Israɛlə lonnii diɛ: «Yai-Laa Israɛlə nwɔ Yálá woo ka, yɛ diɛ: ‹Ɲą́ą́ ɓə ka kulɔ Eziptə lɔi hu, ŋą́ ka nwun mąąɓo Eziptə nuą yəi, da dɔɔ lɔiɠaai kpɔ kɛi ka mɔ̨nɔ̨ ɓo, ŋą́ ka kulɔ di yəi. 19 Ya ka tii, háákələi, kaa ka kili kulɔ ka wɔ Yálái hu, yaa tii a ka kulɔ ka wɔɔ mɔ̨nɔ̨ɠaa kəlee hu, da ka wɔɔ kwəi pili mąą mɛ̨nįɠaa kəlee. Ya ɓə kaa diɛ: «Ə tɔɔmun dɛɛ ka pɔ.» A kɛ tii kani, ka pa Yai-Laa lííla a ka huwuɠaa laa, da gwəliɠaa laa.›» 20 Samuɛlə ə nuą kəlee ŋąąkpɔn, di gbɛ̨ɛ̨ bili, Bɛnɉamɛn huwu ɓə gbɛ̨ɛ̨ ə nɛ. 21 Bɛnɉamɛn kwəliɠaa di lɛɠɛ laa. Gbɛ̨ɛ̨ ə Matri kwəli lɛ. Yili pulu, ə Kisə lon Saulə laa ɓo, kɛlaa, di gwɛli di hvo gaa. 22 Di Yai-Laa mąąnin gɛ, diɛ mą: «Nui tii ə pa mun ɓɛ ɓəi?» Yai-Laa yɛ diɛ: «Ya ka tii nooi diɲɛɠaa lɔwai.» 23 Di li a gilɛ, di ɲee hon, di paa la. Di dɔɔ nuą hąmąi; gweaa nwun naɠin ŋąą nu kəlee mɛ̨i. 24 Samuɛlə yɛ nɔi lonnii kəlee diɛ: «Nui Yai-Laa ə ɲee lɛ mą, kaa gaa! Gɔɔn mąą hvo nɔi lonnii kəlee lɔwai.» Nąąlɔwai, nu kəlee ə ɲee lɔwa, diɛ tomą, diɛ kɛ mą: «Tɔɔmun ə́ yii ə kwɛa!» 25 Yili pulu, Samuɛlə ə dɔɔlaa yɛnɛ̨ɛ̨ kɛ pələ hukulɔ nuą diɛ, ə bɛ̨ɛ̨ hɛɓɛ́ hu ə naa Yai-Laa lííla. Yili pulu, Samuɛlə ə ɲee ɓo nuą diɛ, nu kəlee yɛ li bɔɔli. 26 Saulə yaa kpɛli ə li bɔɔli Givea, gɔ́kulááɠaai Yálá ə di lii muhəɠə di lɛɛ bɔ. 27 Kɛlaa, nu kpoloonŋaa di kɛi kɛ diɛ: «Yii a pɛli gu nwun mąąɓoi ləi?» Di kɛi viiɓo, di hvo mąąpu. Kɛlaa, nwɛi, yili hvo kɛ mą a mɛ̨nį ta. |