Tɔɔɓɛlaa dɔlɔɔ 9 - Yálá laawoo hɛɓɛ (dc)

Yálá ə pənə ə gbɔwɔ lɛ Salomɔn ɓa

¹ Ɓɛlɔwai tɔɔmun Salomɔn ə kpɛɛ la a Yai-Laa hee pɛlɛ́ tɔɔ, da dɔɔ pɛlɛ́, da yiiɠaa kpɔ ə kɛ bɔ ə gɛ, ə yili kəlee kɛ.

² Yai-Laa ə pənə nwɔ̨nɔ̨ ə gbɔwɔ lɛ mą a veelɛnąą, yɛ bələi ə gɛ la Gabaɔn.

³ Yai-Laa yɛ Salomɔn ɓa: «Vɛli woo da nɛ̨ɛ̨mąą wooi ŋɛ̨i ə́ naa həli mą́ą́, ŋą́ą́ mɛ̨n, bɛlɛ́i ŋɛ̨i ə́ dɔɔ, ŋą́ą́ gɛ a pɛlɛ́ mąąhəɠɛɛ. Náá kaa pai kɛi mą a yələ kəlee, nwɔ́ kɛɛ kaa da nwɔ́ kiliŋąhiɛ yɛ ɓo mɛ̨i a yələ kəlee.

⁴ Ə́ wɛi, akɛ yá hiɛ ɲɛ̨́i ɓa yɛ bələi ə́ nąn Davidə ə gɛ la, a kwəi kwələlaa, ə́ tələnmoɔ, yɛ túwɔ́ yɛ bələ ŋą́ ə́ tí la, yá ə́ yee kanąn nwɔ́ tɔ́n nwooɠaai diɛ, da nɔi hon bələi ŋą́ nɛ,

⁵ ŋą́ ə́ wɔ tɔɔ kpəlin laa hɔn mo a yələ kəlee Israɛlə nwun na; yɛ bələi ŋą́ mo la ə́ nąn Davidə ɓa, gɛ́ kɛ mą: ‹Nu kaa pai hɔlɔɓoi ə́ yəi bɛlɛ́n a yələ kəlee, yɛ hee Israɛlə nwɔ tɔɔ kpəlin hu.›

⁶ Kɛlaa, akɛ ka ka lonnii ka ka pulu tinɛ̨n mą́ą́, ka wala nwɔ́ tíɓoɠaa da nwɔ́ tɔ́n nwooɠaai ŋą́ naa ka nwuɔ̨ di hon, ɛlɛɛ, kaa haliɠaa mąąwiɛ, kaa kwɛli hvilɛn diɛ,

⁷ ka gɛ tii, nɔi ŋɛ̨i ŋą́ dɛɛ Israɛlə pɔ, ŋą́ ɉəɠə ɲəi. Bələi mąn ŋą́ náá hee la mą a nwɔ́ɔ́, ŋą́ bili kwɛaa la, ə həɠə ɲɛ̨́i mu. Ɛlɛɛ, nu huwu kəlee da di laa pu Israɛlə hu, diɛ yɛlɛ diɛ.

⁸ Bɛlɛ́ laaləi kpon ŋɛ̨i, nui lɔpee pai tɛɛi gwɛlɛ, gwəi a pili mą, ə kwəlee hvɛɛ, yɛ kɛ mą: ‹Lə ɓə kɛ yai, Yai-Laa ə dúwɔ́ taaləi ŋɛ̨i ɓo a nɔi ŋɛ̨i da bɛlɛ́i ŋɛ̨i?›

⁹ Da nwoo pulu pənə diɛ kɛ mą: ‹Mąąhɔlɔɓo, di Yai-Laa lɛɛ laa, yai a di wɔ Yálá, yai wɔlɔ di nąnni kulɔ Eziptə lɔi hu, diɛ hvilɛn haliɠaa pulu, diɛ kwɛli hvilɛn diɛ, diɛ di mąą mɛ̨nį kɛ. Yili mąą mɛ̨nį ɓə gɛ, Yai-Laa di wɔ Yálái yɛ mɔ̨nɔ̨ ŋɛ̨i laa di mɛ̨i.›»

Salomɔn kɛ mɛ̨nį takpɛliɠaa

¹⁰ Gwɛlan bow hveelɛi tii Salomɔn ə bɛlɛ́ hveelɛi tɔɔ la: Yai-Laa nwɔ pɛ́lɛ́i, da dɔɔ pɛlɛ́; gwɛlanŋąą tii di tɛɛ.

¹¹ Tirə tɔɔmun Hiramə, yai kpitili wulu da siprə wulu tɛɛ Salomɔn pɔ, da hɛni, yɛ bələi ə kɛ la bɔ; tɔɔmun Salomɔn ə taa pow hveelɛ tɛɛ Hiramə pɔ Galile lɔi hu.

¹² Hiramə ə həɠə Tirə, daaɠaa tii Salomɔn ə di tɛɛ bɔ, yɛ li di kaai. Kɛlaa, daaɠaa tii di hvo niihon.

¹³ Yɛ mą: «Taa lə kɛɛɠaa ɓə ŋɛ̨i ə́ di tɛɛ bɔ́i ną́n non?» Di daaɠaa tii laa hee a Kavulə naai tii ɓə gaa mą, háá ɓa háá.

¹⁴ Hiramə ə hɛni kilə waa haaɓa pulu nwun mɛ̨ida tɛɛ Salomɔn ɓa.

¹⁵ Tɔɔmun Salomɔn ə pɔlɔtɛ kóló laa nuą mɛ̨i, di Yai-Laa hee pɛlɛ́ tɔɔ, da yaa kpinįi tii ɲíi pɛlɛ, di Ɉerusalɛmə mąąkpɛ hį́i tɔɔ, di non dɔɔ ɉu, di ɉu hon ɉɛnŋąą tɔɔ di lɔwai. Di Hasɔrə taa tɔɔ, di Megido taa da Gɛzɛrə taa tɔɔ.

¹⁶ Eziptə tɔɔmun aa ta kɛ kɔ́ pɛlɛ Gɛzɛrə taa ɓa, aa ɉon, yii kɛa ə Kanaan nuąi kɛ laa gəlee paa, ə nwɔ̨n nɔ daai, ə nąą kələn. Eziptə tɔɔmun ə gɛɛnąą tii tɛɛ non nɛ̨ɛ̨nu pɔ, ɓɛlɔwai di kɛi li naalɛi la ɉilɛ Salomɔn pɔ.

¹⁷ Salomɔn ə pənə ə Gɛzɛrə taa tɔɔ. Salomɔn ə Bɛtə-Horɔn ɉɛɠɛɛ pələ tɔɔ.

¹⁸ Salomɔn ə Baalatə taa da Tamarə taa di tɔɔ, diɛi kɛ a kɛɛnąą pun,

¹⁹ ə mą kɛ daaɠaa kpɔ tii nwɔ kɔ̨nɔ̨n gələɠaai di kɛ ɉu. Ə mą kɛ da daa yiiɠaai nwɔ wotoloɠaa di kɛ ɉu da ɉooɠaa. Ɓɛi kpɔ nɛ̨ɛ̨ Salomɔn ɓa, ə nąą kəlee tɔɔ Ɉerusalɛmə, Liban lɔi hu, ə mą kɛ nɔi yiiɠaai kɛ ɲee mu.

²⁰ Nu kpulu tamąą di lɛɛ nɔi, diɛi di hvo kɛ a Israɛlə nu huwu, diɛ ɓa: Amɔrə nuą, Hɛtə nuą, Pelezzi nuą, Hivi nuą, da Ɉebusə nuą, yiliɠaa ɓə di hvo kɛ a Israɛlə lonnii ta.

²¹ Nuą tii di lonnii kɛ laa, diɛi Israɛlə lonnii di hvo kɛ di paa li, Salomɔn ə di kɛ a pɔlɔtɛɠaa. Háá ɓa háá, di kaa ni la.

²² Salomɔn hvo Israɛlə lon da pɛlɛ pɔlɔtɛ kóló ɓa. Di wɛi, di kɛ a kɔ́ kɔ́ nuą, diɛ ɓo a nwɔ nwun nąmįną, pɛlɛɛɠaa da gbɛa-kpɛa, a kɔ́ wotolo nwun nąmįną, da hoo gilɛ həɠə nuą.

²³ Nuąi kɛ Salomɔn nwɔ kólóɠaa nwun na, di kɛ a: nu nwun nɔɔli ɲee lɔɔli, diɛ ɓə kɛi nɔi nuą tí kóló ɓa, diɛ gɛ.

²⁴ Eziptə tɔɔmun lon nɛ̨ɛ̨nu həɠɛɛ Davidə taa, ə li bɛlɛ́i Salomɔn ə dɔɔ mą mu, nąą pulu ɓə Salomɔn ə daa mąąkpɛ hį́i lon dɔɔ la ɉu,

²⁵ Kwɛlan dɔ̨nɔ̨ yee mu, Salomɔn ə kɛi haláá kulɔ Yai-Laa ɓa gee mɛ̨i haaɓa: haláái da gəlee kələn, pɔnaa kulɔ haláá. Ə kɛi gəlee kɛ Yai-Laa lííla, yɛ lansan kələn ɉaláá kulɔi tii kɛ Yai-Laa lííla mɛ̨i. Bələ ɓə ə kɛi bɛlɛ́i tii tɔɔ mɛ̨nį nwun nɛ la.

²⁶ Tɔɔmun Salomɔn ə kələnŋąą pɛli Esiɔn-Gɛvɛrə, Eilatə kwɛlɛ, gboloyá kponą kwɛlɛ Edɔmə lɔi hu.

²⁷ Hiramə ə kɛi pɔ nuą tɛɛ gələnŋąą tii hu, a kələn ɉiɛ nuą, di ɓo a yá mɛ̨nį kɔ́lɔn ŋąą a nɛlɛɛ, da Salomɔn yee pɔ nuą di kɛ di kee pɔ.

²⁸ Da li Ofirə, da pənə da pa, da pa a hɛni, tɔɔmun Salomɔn pɔ a hɛni kilə waa pow kɔ́w hveelɛ.