Tɔɔɓɛlaa dɔlɔɔ 8 - Yálá laawoo hɛɓɛ (dc)

Mįnɛ̨ kəhi hee mɛ̨nį Yálá yəi pɛlɛ́n

¹ Nąąlɔwai, tɔɔmun Salomɔn ə Israɛlə kalanɉonŋąą, da bɛlɛ́ nąmįną kəlee təli Ɉerusalɛmə; ə gɛ di li di Yai-Laa nwɔ mįnɛ̨ kəhii həɠə Davidə yəi gwəlii, yii da kɛ mą sion;

² Israɛlə nuą kəlee di di ɲąąkpɔn tɔɔmun Salomɔn kwɛlɛ a ɲąnįn ŋɛ̨i da kɛ mą Etanimə, di wɔ kwɛlan ɲąnįn mɛ̨ihveelɛ lɔwai; a ɉɛli yələ.

³ Yii kɛa Israɛlə kalanɉonŋąą kəlee di pa, ɉaláá laa həli nuą di mįnɛ̨ kəhi həɠə.

⁴ Di Yai-Laa nwɔ mįnɛ̨ kəhii həɠə da gee kaa kələ, da mu hɛnŋąą kəlee. Ɉaláá laa həli nuą da Levi lonnii ɓə ɉəɠə.

⁵ Tɔɔmun Salomɔn da Israɛlə nuą kəlee di ɲąąkpɔn ŋąą kɛ mįnɛ̨ kəhi lííla, di ɓɛlaaɠaa da nįŋɛ̨ɠaa kulɔ a gbulu kɛnɛ̨, lonon və kɛ mą.

⁶ Ɉaláá laa həli nuą di Yai-Laa nwɔ mįnɛ̨ kəhii hee ɉeei, gɛɛnąą mąąhəɠɛɛ gəlee ɓa, mąąkpɛ malakaɠaa koon mu.

⁷ Mąąhɔlɔɓo, malakaɠaa koon ɉaŋąą kɛ ɓɛi mįnɛ̨ kəhi ə kɛ laa, diɛ mɛ̨i kpulu; ə mą kɛ da gwɛlɛ hɛnŋąą.

⁸ Gwɛlɛ wuluɠaai tii kwɛai kɛ, nu ya kɛ bɛlɛ́ kɛnɛ̨ mu pələ, yɛ don na kaa. Kɛlaa nu hva kɛ ɲɛnɛ̨ɛ̨ pələ hva gaa. Di kaa lɔ nii laa háákələi.

⁹ Hɛn dakpɛli hvo kɛ mįnɛ̨ kəhi hu, hvo kɛ li lɔ gwɛni ɓɛla hveelɛi Moisə ə naa ɉu Horɛbə yee ɓa, ɓɛlɔwai Yálá da Israɛlə nu di mįnɛ̨ həɠə la di kulaa Eziptə lɔi hu.

¹⁰ Ɓɛlɔwai ɉaláá laa həli nuą di kɛi kulɔ la gɛɛnąą mąąhəɠɛɛ ɓa, tulɔ kpinįn ə Yai-Laa nwɔ pɛ́lɛ́i mu hvɛɛ.

¹¹ Ə lɛɛ ɉaláá laa həli nuą di hvo pɛli góló kɛ pələ kaai dulɔ kpinįn tii ɓa. Mąąhɔlɔɓo, Yai-Laa nwɔ mąąwiɛ bɛlɛ́ laahvɛɛ.

¹² Nąąlɔwai Salomɔn yɛ diɛ: «Yai-Laa ə naa gwəi yɛ: Ə hee tulɔ kpinįn ɉu kpinɛ̨ɛ̨ hu.

¹³ A tɛ̨ą ŋą́ą́ tɔɔ pɛlɛ́ mąąwiaa tɔɔ yɛ́, Ɓɛi ə́ kaa pai kɛi laa a yələ kəlee.»

Salomɔn ə bɛlɛ́ laa həli Yálá ɓa

¹⁴ Tɔɔmun Salomɔn ə tinɛŋ ə ɲɛ̨i hee Israɛlə lonnii pɔ pələ, ə luwɔ too diɛ. Israɛlə lonnii kəlee ɲąą kpɔnŋąą, di ɓo tɔɔni.

¹⁵ Yɛ diɛ: «Mąąwiɛ ə kɛ Yai-Laa ɓa, Israɛlə nwɔ Yálá. Mɛ̨nįi ə mo ną́n Davidə ɓa yaa kpinįi aa bɔ mɛ̨nį kɛ a gbɔɔ-kpɔɔ yəə.

¹⁶ Ə kɛ ną́n ma: ‹Ə həɠə volói ŋɛ̨i ə nwɔ nu huwu Israɛlə kulɔ la Eziptə lɔi hu ɓa, və́ kɛi taa ta həɠə ɉu Israɛlə nuą lɔwai ɓɛi ŋą pɛlɛ́ tɔɔ laa a náá mąąwiɛ pɛlɛ́. Kɛlaa ŋą́ Davidə həɠə ɉu ŋą́ ɉee nwɔ́ nu huwu Israɛlə nwun na.›

¹⁷ Nán Davidə ə gili tee gwəi yɛ kɛ ə pɛlɛ́ tɔɔ Yai-Laa laa ɓa; yai a Israɛlə nwɔ Yálá.

¹⁸ Kɛlaa, Yai-Laa ə mo ną́n Davidə ɓa; yɛ mą: ‹Yaa gili tee ə kwəi yɛ ə́ pɛlɛ́ tɔɔ náá mąą mɛ̨nį ɓa. A tɛ̨ą, yáá gɛ a nɛlɛɛ.

¹⁹ Kɛlaa hvó pai bɛlɛ́i tii tɔɔi mą́ą́. Ə́ lon mə, yai a kulɔ ə́ kpinį hu; ya ɓə pai bɛlɛ́i tii tɔɔi náá mąą mɛ̨nį ɓa.›

²⁰ Mɛ̨nįi Yai-Laa ə mo ną́n ma, ya ka tii ə naa hon. Ŋą́ą́ lɛɛ ną́n bɔɔ ŋą, ŋą́ą́ hee Israɛlə dɔɔkpəlin mɛ̨i, yɛ bələi Yai-Laa ə mo la. Ŋą́ą́ bɛlɛ́i ŋɛ̨i tɔɔ Israɛlə nwɔ Yálá, Yai-Laa laa ɓa.

²¹ Ɛlɛɛ, ŋą́ą́ kɛɛnąą ta pɛli kpɔ bɛlɛ́i tii mu, ɓɛi mįnɛ̨ kəhi mąą nɛ̨ɛ̨ ə hee laa. Yaai mįnɛ̨i da ku nąnni di ɉəɠə gaa ɉu, ɓɛlɔwai ə di kulɔ la Eziptə lɔi hu.»

Salomɔn nwɔ Yálá hvɛli woo

²² Yili pulu, Salomɔn ə haŋą ə tɔɔ Israɛlə nuą kəlee ɲɛ̨i ɓa, Yai-Laa nwɔ haláá kulɔi lííla, ə ɲee kəlee tɛ ɲələi;

²³ yɛ diɛ: «Yai-Laa Israɛlə nwɔ Yálá, Yálá ta hvo laa, ka Yáá ka pɛliɛ, ə mą kɛ yələi, yələkɔlɔn ɉu ɓə, da lɔi mɛ̨i, yɛ pɛli mįnɛ̨i da nwɔ nuą di ɉəɠə, naahɔn moi yɛ gili kɛ di hu a wɛlikɛmąąlaa, ɓɛlɔwai da hiɛ la a ɉaŋąą ə́ ɲɛ̨i ɓa.

²⁴ Mɛ̨nįi Ə́ mo, yáá bɔ mɛ̨nį kɛ háákələi kwaa gaa.

²⁵ Yiihu kɛa, Yai-Laa Israɛlə nwɔ Yálá, nwooi ə mo ną́n Davidə ɓa, bɔ mɛ̨nį kɛ; yai ə́ kɛ la mą: ‹Ə́ huwu hvo pai teei Israɛlə dɔɔkpəlin ɉu, akɛ da hiɛ ɲɛ̨i ɓa, yɛ bələi ə́ hiɛ la ɲɛ̨i ɓa.›

²⁶ Yilihu kɛa Israɛlə nwɔ Yálá, mɛ̨nįi ə́ naakwɛlanmo ə́ wɔ tímun ną́n Davidə ɓa, bɔ mɛ̨nį kɛ kani kɛa wɛ!

²⁷ «Akɛti, Yálá a pɛli mą heei lɔi mɛ̨i? Bələi mąn Yələkɔlɔn ɉu kɛnɛ̨ la, aa nąą kəlee laahvɛɛ, gu hvomun kɛ bɛlɛ́ logolo ŋɛ̨i ŋą́ dɔɔ mąi?

²⁸ Oo! Yai-Laa nwɔ́ Yálá, Ə́ wəli tɔɔ ə́ hvɛli woo da ə́ mąąnɛ̨ɛ̨ wooi ə́ wɔ tímun gaa naa həli yɛ́, mą. Ə́ wəli tɔɔ yɛ́ tímun tomą woo da ŋą vɛli wooi gaa naa həli yɛ́ háákələi, nwɔ́ Yálá.

²⁹ Ə́ ɲɛ̨i kɛ bɛlɛ́i ŋɛ̨i ɓa a yələ kəlee, gɛɛnąą ŋɛ̨i ə́ kɛ diɛ: ‹Náá kaa pai kɛi ɓɛ›, vɛli ɓoi yɛ́ tímun gaa naa həli yɛ́ gɛɛnąą ŋɛ̨i ɓa ə́ wəli tɔɔ mą.

³⁰ Nɛ̨ɛ̨mąą wooi ə́ wɔ tímun da Israɛlə nu huwu di kaa vəi, di ɲɛ̨i hiɛ gɛɛnąą ŋɛ̨i pələ, nɛ̨ɛ̨ yɛ́, ə́ wəli tɔɔ mą. Ɓɛi ə́ kaa laa yələkɔlɔn ɉu, ə́ ə́ wəli tɔɔ laa, ə́ ku mąąhvaalɛɛ.

³¹ «Akɛ nu ta a mɛ̨nį ɲɔ̨n gɛ a mɛlan, yili yɛ mą: ‹Ə́ kwɛla›, ə gwɛla a ə́ wɔ haláá kulɔi ŋɛ̨i ɓa bɛlɛn;

³² Ee! Yai-Laa, lɛɛ yələkɔlɔn ɉu, ə́ ə́ wəli tɔɔ, ə́ ə́ kɛ mɛ̨nį kɛ ɉu, ə́ ə́ wɔ tínuą hutɔɔ, nui a ɉɔn gɛ, ə́ gala mą, a nwɔ nɛ̨ŋɛ̨n yɛɛi ya mo a nwun. Ɛlɛɛ, nui túwɔ́ a ɉaŋąą, nwɔ tələnmolaa ə kulɔ pɔ̨nɔ̨ŋą.

³³ «Ə́ wɔ nu huwu Israɛlə a nɛ̨ŋɛ̨n ɉəɠə yɛ́, ɲowow yee a tɛɛ mą kɔ́ hu, gɛ nɛ̨ŋɛ̨n tii mąą mɛ̨nį ɓa; a pənə a pa ə́ pɔ, yɛ ə́ laa mąąwiɛ, yɛ ə́ hvɛli, yɛ nɛ̨ɛ̨mąą hvə yɛ́ bɛlɛ́i ŋɛ̨i mu,

³⁴ Ee kə Yai-Laa, lɛɛ yələkɔlɔn ɉu ə́ ə́ wəli tɔɔ, ə́ ə́ wɔ nu huwui nwɔ nɛ̨ŋɛ̨nŋąą mąąhvaalɛɛ, ɛlɛɛ, ə́ pənə ə́ pa a diɛ nɔi ŋɛ̨i hu ɓɛ, yai ta, ə́ dɛɛ ku nąnni pɔi.

³⁵ «Akɛ nɔi lonnii da nɛ̨ŋɛ̨n ɉəɠə yɛ́, di kɛ nɛ̨ŋɛ̨n mąą mɛ̨nį ɓa, yələkɔlən ɉu a kpala, tulɔ a kpəla mą, da di ɲɛ̨i haŋą gɛɛnąą ŋɛ̨i ɓa pələ, di di yee kulɔ di kɛ nɛ̨ŋɛ̨n ɉu, diɛ ə́ laa mąąwiɛ, diɛ ə́ hvɛli, mąąhɔlɔɓo, yáá mɔ̨nɔ̨ laa di mɛ̨i;

³⁶ Ną́mu, yɛ́i ə́ kaa yələkɔlɔn ɉu, ə́ wəli tɔɔ, ə́ ə́ wɔɔ tímun Israɛlə ŋą nɛ̨ŋɛ̨n mąąhvaalɛɛ. Bələ haŋąąi mąą nɛ̨ɛ̨ di hiɛ la, ə́ nɛ diɛ, ə́ tulɔ tɛɛ ə́ wɔ lɔi pɔ, nɔi ŋɛ̨i ə́ dɛɛ ə́ wɔ nuąi pɔ a di kwɛlin.

³⁷ «Akɛ pulu a too nɔi, kwəi kulɔ ɲɔ̨n ə pɛlɛ nuą diɛ, akɛ kolo a lɔ ɉihɛnŋąą hu, Peeləɠaa da poninŋąą diɛ kɛɛ kala nɔi, ə mą kɛ di yowoɠaa daa di mąątinɛ̨n a kɔ́, ə mą kɛ a mɛ̨nį ɲąąnwąnąą huwui lɔpee gəlee, ə kɛ a ɲɔ̨n ɉuwui lɔpee gəlee.

³⁸ Vɛli ɓo nwun ə kɛ a mɛ̨nįi lɔpee, ə kɛ a mɛ̨nį huwui lɔpee gəlee mąą nɛ̨ɛ̨mąą hvə nwun, mąą nu ə kɛ a ə́ wɔ nu huwui Israɛlə mun da, mąą nu kili a pu ɉu yɛ kɛ mɔ̨nɔ̨i tii naa mɛ̨i ɉutɔɔ mɔ̨nɔ̨ li, mɔ̨nɔ̨i tii a kpanwo niiɓa, mąą nu a ɲɛ̨i tinɛ̨n bɛlɛ́i ŋɛ̨i pɔ pələ, ə́ ə́ hvɛli;

³⁹ Ee Yai-Laa, lɛɛ yələkɔlɔn ɉu, ɓɛi ə́ kaa laa, ə́ ə́ wəli tɔɔ, ə́ mąąhvaalɛɛ, ə́ ə́ kɛ mɛ̨nį kɛ ɉu; ə́ ɉon yɛ bələi ə túwɔ́ la. Mąąhɔlɔɓo, ə́ gwəi kɔ́lɔn, yaan, yɛ́ tɔ̨nɔ̨ lɔ ɓə nu kanŋaa kwəi kiliŋąhiɛ kɔ́lɔn.

⁴⁰ Gɛ tii, ə gɛ, Israɛlə lonnii diɛ pɛli ɲɔwi yɛ́, di wɔ yɛnɛ̨ɛ̨ kəlee yee mu, ɓɛ nɔi, yai ə́ dɛɛ ku nąnni pɔi.

⁴¹ «Ə mą kɛ nui hvo a ə́ wɔ nu huwui Israɛlə mun da, a həɠə lɔi takpɛli hu kwɛaa la, ə́ laa wɛli ɓa;

⁴² Mąąhɔlɔɓo, di kaa pai kɛi ə́ laa kɛnɛ̨ mɛ̨nį bələ mąn ɉii, da ə́ wɔ huwalawala mɛ̨nį; mąą nu a pa bɛlɛ́i ŋɛ̨i pɔ, yɛ ə́ hvɛli,

⁴³ Ee Yai-Laa! Lɛɛ yələkɔlɔn ɉu, ə́ ə́ wəli tɔɔ, ə́ mɛ̨nį kəlee kɛ, yɛ bələi nwɛ̨ąi tii kaa pai vɛli la yɛ́. Ə gɛ, yɛnɛ̨ɛ̨ nuą kəlee diɛ pɛli ə́ laa kɔ́lɔn ɉii, ɛlɛɛ, diɛ ɲɔw yɛ́, yɛ bələi ə́ wɔ nu huwu Israɛlə a ɲɔw la yɛ́. Ɛlɛɛ, di gili kɔ́lɔn diɛ kɛ da kɛi ə́ laa ɓoi bɛlɛ́i ŋɛ̨i mɛ̨i, yai ŋą́ dɔɔ.

⁴⁴ «Ə́ wɔ nu huwui aa kɛi pa lii kɔ́ pɛlɛi ɲowoɠaa diɛ, yɛ ɉon a bələi ə́ kaa pai nɛi mą, da ə́ hvɛli daai ə́ ɉəɠə ɉu bɔ pələ, da bɛlɛ́i ŋą́ dɔɔ ə́ laa mąą mɛ̨nį ɓa,

⁴⁵ Yələkɔlɔn ɉu Yálá, ə́ wəli tɔɔ ə́ hvɛli woo ɓa, da nwɔ nɛ̨ɛ̨mąą woo, ɛlɛɛ, ə́ di wɔ tɛ̨ą mɛ̨nį ɲɛ̨i kulɔ, a nɛ pələ diɛ.

⁴⁶ «Ɲələi Israɛlə a nɛ̨ŋɛ̨n ɉəɠə la yɛ́, mąąhɔlɔɓo, nu ta hvo laa yii hva nɛ̨ŋɛ̨n ɉəɠə, yá ə́ liiholi di pɔ, ə́ di lɔ di yowoɠaa yee ŋą, ɛlɛɛ, nuą da di hon, di li a diɛ nwɛ̨ą lɔi hu, luwɔlaa hu, ə kɛ kwɛa la, ə kɛ kpuwɔ la,

⁴⁷ nɔi da kɛ ɉu luwɔlaa hu, da lɛɛ laa, da di kiliŋąhiɛ, da di túwɔ́ pələ mąąhvalin, da nɛ̨ɛ̨mąą hvə yɛ́, ɓɛi tii di kaa laa nuwɔlaa hu, diɛ kɛ mą: ‹Nɛ̨ŋɛ̨n ɉəɠə nuą ɓaa kuɔ, kwaa ku ɉon gɛ, kwaa nɛ̨ŋɛ̨n ɉəɠə›.

⁴⁸ Da pənə da pa ə́ pɔ di kwəi tɔ̨nɔ̨ mɛ̨i, a di lii kəlee, nɔi tii di yowoɠaa di li a diɛ ɉu, da kɛi ə́ hvɛli di ɲɛ̨i tinɛ̨n ŋąą di wɔ lɔi pɔ pələ, yai wɔlɔ ə́ dɛɛ di nąnni pɔi, da daai ə́ ɉəɠə ɉu bɔ pələ, da bɛlɛ́i ŋą́ dɔɔ ə́ laa ɓa, bɔ pələ,

⁴⁹ lɛ́ɛ́ yələkɔlɔn ɉu, ɓɛi ə́ kaa laa, ə́ ə́ wəli tɔɔ di wɔ hvɛli ɓo woo da di wɔ nɛ̨ɛ̨mąą woo ɓa. Ɛlɛɛ, di wɔ tɛ̨ą mɛ̨nį ɲɛ̨i kulɔ a nɛ pələ diɛ.

⁵⁰ Ə́ wɔ nu huwui ŋɛ̨i nɛ̨ŋɛ̨n ɉəɠə yɛ́, mąąhvaalɛɛ, ə́ di wɔ kulɔ nwoo mu laa kəlee mąąhvaalɛɛ. Nuąi da kɛ di yəi luwɔlaa hu, gɛ, yiliɠaai di di ɲɛ̨imąąwɛli kaa. Ə kə! Di di ɲɛ̨imąąwɛli kaa.

⁵¹ Mąąhɔlɔɓo, ə́ wɔ nu huwui li, ə́ kwɛlin ni, nuą ə́ di kulɔ Eziptə lɔi hu hvuluun nwɔ̨n ɉu, diɛ li.

⁵² «Yai-Laa! Ə́ ɲɛ̨i lɛlɛɛ hee ə́ wɔ tímun da ə́ wɔ nu huwu Israɛlə nwɔ hvɛli woo ɓa, di tomą pələ tɛitɛi kəlee ə́ pɔ pələ, ə́ wəli tɔɔ diɛ.

⁵³ Hvó gaai, yɛ́ ɓə di tɔɔ a dee, diɛ ɓo a ə́ wɔ, ə́ kwɛlin ɓaa diɛ yɛnɛ̨ɛ̨ nuą kəlee lɔwai, yɛ bələi ə́ bu la ə́ wɔ tímun Moisə la, yɛ mo, ɓɛlɔwai ə́ ku nąnni kulɔ la Eziptə lɔi hu, yɛ́i a Yai-Laa ku wɔ Yálá.»

Salomɔn ə Yálá nwɔ lúwɔ́ hu hvɛli

⁵⁴ Vɛli ɓo wooɠaa tii kəlee da nɛ̨ɛ̨mąą hvə wooɠaa tii kəlee, Salomɔn ə naa həli Yai-Laa ɓa, a nwoo laa kulɔi. Salomɔn ə gɛ puu ni Yai-Laa nwɔ haláá kulɔi lííla ɲeeɠaa tɛɛ ɲələi pələ, ə muhəɠə,

⁵⁵ ə ɓo tɔɔni, ə lúwɔ́ too Israɛlə nuą diɛ a nwoo kɛnɛ̨, yɛ mą:

⁵⁶ «Mąąwiɛ ə kɛ Yai-Laa ɓa! Ya ɓə kɛɛnɛ̨ɛ̨ tɛɛ nwɔ nu huwui Israɛlə pɔ, yɛ vįitɔɔ laa, yɛ bələ ə gbɛa kɛ mo la. Nwoo lɛlɛɛɠaai kpɔ ə di pu wɔ tímun Moisə la, da lɔpee hvo too li kpɛli kpɛli.

⁵⁷ Yai-Laa, ku wɔ Yálá ə kɛ gu pɔ, yɛ bələi ə kɛ la gu nąnni pɔ! Hvo ɲee ɓo guɔ, hvo həɠə gu pulu.

⁵⁸ Ə gu wɔ kiliŋąhiɛɠaa tinɛ̨n bɔ pələ, guɔ pɛli hiɛi nwɔ pələɠaa kəlee hu, ɛlɛɛ, guɔ nwɔ tíɓoɠaai, da nwɔ tɔ́n nwooɠaai hon. Nɔi hon bələɠaai ə nɛ gu nąnni diɛ, guɔ pɛli ɉon ɉii.

⁵⁹ Nąɛ̨ɛ̨mąą hvə wooɠaa ŋɛ̨i gáá moi Yai-Laa ɓa, di kɛ lɔ gu wɔ Yálái lííla a yələ kəlee, yɛ nwɔ tínuą Israɛlə nuą kulɔ di gbaan mɛ̨nįɠaa hu, hvóló tɛitɛi kəlee yee mu.

⁶⁰ Ə kɛ tii, lɔi mɛ̨i nu huwuɠaa kəlee da gili kɔ́lɔn diɛ kɛ: ‹Yai-Laa ɓə gaa a Yálá, dakpɛli hvo laa.›

⁶¹ Ka kwəi a kwələ Yai-Laa ka wɔ Yálái ɓa, kaa pɛli hvilɛn ɉii nwɔ tɔ́n nwooɠaai pulu, kaa ka yee hee nwɔ tiɓoɠaai mu, yɛ bələi ka káá gɛi la háákələi.»

Ɉalááɠaai di gulɔ a Yálá hee pɛlɛ́ laa ɓo yələ

⁶² Tɔɔmun Salomɔn da Israɛlə nuą kəlee di haláá kulɔ Yai-Laa ɓa.

⁶³ Salomɔn ə: Nįŋɛ̨ waa pow hveelɛ kɔ́w hveelɛ, ɓooli, da ɓɛlaa waa nwun dɔ̨nɔ̨ ɲee hveelɛ kulɔ a ponaa kulɔ haláá Yai-Laa ɓa. Bələ ɓə Salomɔn da Israɛlə nuą kəlee di Yai-Laa nwɔ pɛlɛ́i laa ɓo hɛli pu la.

⁶⁴ Mąą yələ, gwəli hąąi tii Yai-Laa nwɔ pɛlɛ́i lííla, tɔɔmun ə nąą mąąhəɠə, mąąhɔlɔɓo, nąą ɓə di ɉaláá hɛn da gəlee kələn da bɔnaa kulɔ halááɠaa kulɔ laa, ə mą kɛ, ɉuwɔ wulɔɠaa. Ɉaláá kulɔi tii kɛ Yai-Laa lííla a mala kwɛli, diikpɛi kɛ ɉalááɠaa tii mąą mɛ̨nį ɓa.

⁶⁵ Ɲąnin mɛ̨ihveelɛ yələ ɓə Salomɔn ə ɉɛli pu la da Israɛlə nuą, ə kɛ a ŋąąkpɔn gɛnɛ̨. Ə həɠə Lebo-Hamatə ə li Eziptə, nuą di kɛi həɠə nąą kəlee. Di kɛ Yai-Laa ku wɔ Yálá lííla hvóló mɛ̨ihveelɛ yee mu, di pənə di hvóló mɛ̨ihveelɛ laa mɛ̨i.

⁶⁶ Voló mɛ̨ihaaɓa yələ, Salomɔn ə ɓo nuą diɛ, di di hvɛli da tɔɔmun ni, nu kəlee ə li bɔ taai a gwəinɛ̨ɛ̨. Di kwəinɛ̨ɛ̨i kɛ, mɛ̨nįi kpɔ Yai-Laa ə gɛ nwɔ tímun Davidə da nwɔ nu huwui Israɛlə ɓa, mąą mɛ̨nį ɓa.