Tɔɔɓɛlaa dɔlɔɔ 7 - Yálá laawoo hɛɓɛ (dc)

Dɔɔ pɛlɛ́ tɔɔ mɛ̨nį

¹ Salomɔn ə nwɔ tɔɔ pɛ́lɛ́i tɔɔ, kwɛlan bow kɔ́w haaɓa yeemu, ə kpɛɛ la.

² Ə gbɛa tɔlɔɔ bɛlɛ́ tɔɔ, ə naa hee a Liban wɛla. Bɛlɛ́ dɔɔ ɉu ə kɛ a yee laa mą nwun dɔ̨nɔ̨, ŋąą ə ɓo a yee laa mą pow lɔɔli, dɔɔmɛ̨i ə ɓo a yee laa mą pow haaɓa. Ə kpitili wulu tɔɔ mu a ɲɛli nąąn, ə da pɛlɛ nwuɔ̨, yili ə ɓo lɔ nwɔ̨nɔ̨ a kpitili wulu.

³ Ə bɛlɛ́ gbaan bu a kpitili wulu, yii kɛ bɛlɛ lɔnwɔ̨ pow nąąn kɔ́w lɔɔlii tii tɔɔ mu; ɲɛli tɔ̨nɔ̨ ə ɓo a wulu pow kɔ́w lɔɔli.

⁴ Bɛlɛ́ nwąną bələ tɛitɛi kəlee, hvaŋą pilii ə kɛ mą a ɲɛli haaɓa haaɓa, ɉeɛ gee mɛ̨i, diɛ ɓo di kee tənən ma.

⁵ Vaŋą piliɠaa tii kəlee gbon mɛla nąą kəlee pɛliɛ kɛ a gee, diɛ ɓo di kee tənən mą.

⁶ Yili pulu di pɛlɛ́ ta tɔɔ, yili nɔnwɔ̨ɠaa di ɓo ɉąąi; gwɛa yee ə ɓo a yee laa mą pow lɔɔli, ŋąą kɛnɛ̨ a yee laa mą pow haaɓa. Di vaɠan gɛ dɔwɔ pələ.

⁷ Ə giti tee pɛlɛ́ tɔɔ, di kpitili wulu ɓɛla pɛlɛ ɉu, ə həɠə nɔi ɓa, ə tɛ gbaan mą, nąą ɓə ə kɛi kiti tee laa.

⁸ Bɛlɛ́i mąąnɛ̨ɛ̨ yaa kpinįi ə kɛ mu, ə dɔɔ giti tee pɛlɛ́ kwɛlɛ pələ; dɔɔ pələ ə ɓo lɔ tanɔ̨n, yɛ ɓo gala takpɛli hu. Eziptə tɔɔmun non tii ə ɉəɠə a nɛ̨ą, ə pɛlą tɔɔ mą; dɔɔ pələ ə kɛ lɔ yɛ yii tii.

⁹ Ə bɛlɛ́ɠaai tii kəlee tɔɔ a kwɛni, yii di kɛi mąąhaɠa bələ kəlee, gwɛni lɔwai laa. Kwɛni ɓə di bɛlɛ́ɠaai tii kəlee tɔɔ la ə həɠə nɔi ɓa, ə həli naa kulɔi. Bələ lɔ ɓə di gwəli hąąi nwɔ pɛlɛ́ nwąnąɠaai tɔɔ la; gɔlɔ ɓa da ɉu pələ.

¹⁰ Bɛlɛ́ kɔ́wɔ hvilɛn gwɛni ə kɛ a kwɛni kpɛa kpɛa yii di mąąhaɠa, daɠaa tɔɔ ɉu ə ɓo a yee laa mą pow, da yee laa mą mɛ̨ihaaɓa.

¹¹ Gwɛniɠaai tii mɛ̨i ɓə bɛlɛ́ tɔɔ kwɛniɠaa di hee laa, da gbaan nwulu yai kɛ a kpitili.

¹² Gwəli hąąi mąą kwəli gala ə kɛ a kwɛni mąąhaɠaa, ɲɛli ə ɓo haaɓa, da kpitili wulu yɛli tɔ̨nɔ̨. Bələi lɔ tii di gɛ la a Yai-Laa hee pɛlɛ́ nwɛi.

Yai-Laa hee pɛlɛ́ mu hɛnŋąą

¹³ Salomɔn ə Tirə mun Hiramə həɠə,

¹⁴ Hiramə ə kɛ a Nɛftali nɛ̨ɛ̨nu ta lon. Nɛ̨ɛ̨nu kpɔ ə kɛ a galanįn, Tirə hulɔnu ta ɓə Hiramə kaa nɛ̨ɛ̨nui tii ɓa. Hiramə ə kɛ a nui ŋɛlɛɛ ɓala kwɛli koló ɓa, yɛ goló kɛ kpɔ a nɛlɛɛ. Ə pa tɔɔmun Salomɔn pɔ, golói di dəli mą, ə gəlee kɛ.

¹⁵ Ə bɛlɛ́ dɔɔmu hveelɛ kɛ a ɓala kwɛli, dɔ̨nɔ̨ kwɛa yee yɛ ɓo a yee laa mą pow kɔ́w mɛ̨ihaaɓa. Veelɛnąą tii, yee laa mą pow kɔ́w hveelɛ ɓə a mąątinɛ̨n ə doo gee hu.

¹⁶ Ə gəlee hveelɛi kɔ́n gulɔ a ɓala kwɛli yii di bu. Dɔlɔɔ nwɛi ə ɓo a yee laa mą lɔɔli, ə mą kɛ veelɛnąą.

¹⁷ Dɔɔmu hveelɛi tii ə gɔn gulɔ, ə gəlee mąą pu a kwɛli hɛ̨ąn. Dɔ̨nɔ̨ nwɛi ə kɛ mɛ̨ihveelɛ, dɔ̨nɔ̨ ə ɓo mɛ̨ihveelɛ; ɉeɛ gee huɠaa.

¹⁸ Ə grenadə ɓa mąąnįnįn ɉəɠə a ɲɛli hveelɛ hveelɛ a ɓala kwɛli; ə ɉɛlɛn gwɛli hɛ̨ąnŋaai tii diɛ.

¹⁹ Bɛlɛ́ dɔɔmuɠaai tii, gəlee kɔ́n gulai kɛ, yɛ ɓo yɛ wulu powa a hvólóon. Dɔɔ ɉu ə ɓo a yee laa mą nąąn.

²⁰ Bɛlɛ́ dɔɔmu hveelɛi tii gɔn gulaa, ɲələi pələi nąą kəlee gwɛli hɛ̨ąn gwɛlɛ, grenadə ɓa hɛlɛn ŋąą mą, di ɓo nwun veelɛ, dinɛ̨n ŋąą mą; ə gɛ tii gəlee hveelɛi ɓa.

²¹ Ə bɛlɛ́ dɔɔmuɠaa tii tɔɔ Yálá hee pɛlɛ́ vaɠan dənən ma pələ. Dɔɔmu yii ŋɛ̨i kɛ ɓa-mįi-yee hu, ə naa hee a: Yakin; yii ŋɛ̨i ə dɔɔ kɔ́ɓɛyee hu, ə naa hee a: Boazə.

²² Bɛlɛ́ dɔɔmuɠaa kəlee tona ə kɛ yɛ wulu powa a hvólóon. Bələ ɓə di golói tii laa kulɔ la a nɛlɛɛ.

²³ Ə hɛnɲąŋą kɛnɛ̨ ta hee nɔi ɓa, ə ɓo a ɓala kwɛli, ə yá pu ɉu, ə naa hee a gboloyá. Ɉɛɲąŋąi tii ə kɛ kiliɠilin, ə həɠə nwəli la ɓɛ pələ, ə li ɓɛ pələ, ə kɛ a yee laa mą pow, gbon ɉu kwɛaa a yee laa mą lɔɔli.

²⁴ Ɉɛŋaŋai tii wəli la, di yɛli ta laa laa, ə ɓo a ɓala kwɛli. Dɔɔ ɉu ə ɓo a yee laa mą pow haaɓa, gbinįn ŋąą mą. Gboloyái tii ə bɛli, ə gbąmąɠaa mąąnįnįn ɉəɠə gbon ɉu. Ə pənə ə gbąmąɠaa mąąnįnįn ɉəɠə gɔn mu a ɲɛli hveelɛ. Yee laa mą tɔ̨nɔ̨ nwɛi, ə kɛ a wulu ɓa pow. Dinɛ̨n ŋąą mą, doɔ gee hu. Kolokuintə wulu ɓaɠaa tii kɛ ɉɛɲąŋą hu, di gɛ ɉu, ɓɛlɔwai di kɛ mala kwɛli tii pu la.

²⁵ Di ɉɛɲąŋąi tii pɛli di ɉee nįŋɛ̨ pow kɔ́w hveelɛ mąąnįnįn bulu. Ɉaaɓa ɲɛ̨i heɛ ɲələi pələ, ɉaaɓa ɲɛ̨i heɛ ɉɛɠɛɛ pələ, ɉaaɓa ɲɛ̨i heɛ voló həɠəi pələ, ɉaaɓa ɲɛ̨i heɛ voló tooi pələ; gəlee kponwo paa gee ɓa, gboloyá heɛ di lɔwai.

²⁶ Ɉɛɲąŋąi tii huwiɛ pələ ə kɛ yɛ nu yee ŋą. Nwəli la ə ɓo yɛ da wulu powa hu ɓɛla. Tuku waa hveelɛ hu yá ɓə a naahvɛɛ yá hu.

²⁷ Yili pulu, ə wotolo pow pɛli a ɓala kwɛli. Dɔ̨nɔ̨ gbən dɔɔ ɉu ə ɓo a yee laa mą nąąn, ŋąą kɛnɛ̨ a yee laa mą nąąn, mɛ̨i kwɛa a yee laa mą haaɓa.

²⁸ Bələi di bɛli la, bələ ka: Di hee hɛɲąŋąɠaa di kɛ mą, ɲee piliɛ gee hu nwəli laɠaa.

²⁹ Ɉee hɛn ɲąŋąɠaa tii yee toɔ kɛ gee hu, di yala mąąnįnįn ɉəɠə mą da nįŋɛ̨, ɛlɛɛ, mąąkpɛ malakaɠaa. Naaŋąɠaa ŋɛ̨i kɛ mɛ̨i pələ, ɲalaɠaa da nįŋɛ̨ɠaa di mu pələ, di hɛnŋąą pɛli mą, ɲee lɔɔ ge hu.

³⁰ Nwotoloɠaa tii, dɔ̨nɔ̨ gbən kɔ́wɔ ə kɛ mu nąąn, yɛ ɓo a ɓala kwɛli; gɔwɔ nąąn tii, ɉuhon ɉɛn ə ɓo mą. Ɉuhon ɉɛnŋąą tii di kɛ nwotoloɠaa mu pələ. Ɉɛnŋąą tii di yee toɔ gee hu, hvo kɛ pɛlɛ li gee ɓa.

³¹ Nwotoloɠaa tii, nwəli la laai kɛ, di hɛnɲąŋą hee mɛ̨i a yee laa mą tɛitɛi. Gəlee di kɛ kiliɠilin, di ɓo yɛ dɔɔmu hɛn; dɔɔ ɉu ə ɓo a yee laa mą tɔ̨nɔ̨ da gbulɔ. Di hɛnŋąą mąąnįnįn ɉəɠə nwəli la. Ɉee hɛnŋąą tii kəlee wəli la pɛliɛ kɛ a gee, yiliɠaa di wɛi, di hvo kɛ kiliɠilin.

³² Ɛlɛɛ, di kɔ́wɔɠaa di ɓo di mu kiliɠilin, ɉee hɛnŋąą heɛ mɛ̨i, ɲeeɠaa di ɓo mą, diɛ dɔɔ dɔwɔ. Gɔwɔ tɔ̨nɔ̨ yaan, ə həɠə nwəli la ɓɛ pələ, ə li ɓɛ pələ, ə kɛ a yee laa mą tɔ̨nɔ̨ da gbulɔ.

³³ Gɔwɔɠaa di kɛ yɛ wotolo kɔ́wɔ, gəlee pɛliɛ a ɓala kwɛli.

³⁴ Ɉɛnŋąą ŋɛ̨i di dɔɔ gɔwɔ kwɛlɛɠaa, di kɛ ɉee hɛn nwəli laɠaa ɓa, gbanwoɔ ɉee hɛn ma.

³⁵ Ɉee hɛnŋąą tii kəlee mɛ̨i ə kɛ kiliɠilin, ə ɓo a yee laa mą gbulɔ. Ɉɛnŋąą tii kəlee kwɛlɛ, di di yee too gee hu, gəlee yiliɛ gee ɓa.

³⁶ Ə mąąkpɛ malakaɠaa, yalaɠaa da gwálá laaɠaa mąąnįnįn ɉəɠə ɉɛnŋąą tii kəlee diɛ. Ə ɉɛnŋąą pɛli yɛ yɔwɔɔn, ə mąą tinɛ̨n na.

³⁷ Bələ ɓə ə nwotoloɠaa tii pɛli la, gəlee pɛliɛ a gee, gəlee kɛ pələ ə ɓo tanɔ̨n, a kwɛli huwu tanɔ̨n.

³⁸ Salomɔn ə ɓala kwɛli hɛn ɲąŋą pow pɛli, diɛ pɛli tuku pow nąąn pui dɔ̨nɔ̨ hu. Ɉɛɲąŋąɠaa tii dɔ̨nɔ̨ gbən gwɛa yee ə kɛ a yee laa mą nąąn. Ɉɛɲąŋą powi tii dɛitɛi kəlee heɛ kɛ gboloyá hee hɛn bowi tii mɛ̨i.

³⁹ Salomɔn ə nɔɔli hee bɛlɛ́ mamįiyee hu, ə nɔɔli pɛlɛ gɔɓɛyee hu, yii ɓaa gboloyá nwɛi, ə ɉee bɛlɛ́ mamįiyee hu, voló həɠəi ɉɛɠɛɛ pələ.

Hɛnŋąąi Hiramə ə bɛli di laa ka

⁴⁰ Ɓɛlɔwai Hiramə ə ɲa pu hɛn ɲąŋą, goa-goa, da ɲa taɠa hɛn ɲąŋą kəlee pɛli la, yɛ bələi Salomɔn ə mo la mą, yɛ hvilɛn na Yai-Laa hee pɛlɛ́ ɓa. Yálá hee pɛlɛ́ nwɛiɠaa ka:

⁴¹ Dɔɔmu hveelɛ, gɔn veelɛi ə bɛli ə ɉee di nwuɔ̨. Ə kwɛli hɛ̨an gbinįn gɛ gɔn veelɛi ɓa.

⁴² Ə grenadə wulu ɓa nąąn bɛli ə ɉɛlɛn gwɛli hɛ̨an veelɛi ɓa, yɛ ɓo a yɛli hveelɛ hveelɛ, gɔnŋąą diɛ.

⁴³ Wotolo pow, yá pu hɛn bow, diɛi kɛ nwotoloɠaa hu.

⁴⁴ Hɛɲąŋą kɛnɛ̨, yai kɛ kiliɠili, nįŋɛ̨ hilɛ pow kɔ́w hveelɛ, diɛ ɉɛɲąŋą ə kɛ heeni di pulu.

⁴⁵ Luwu pili hɛnɲąŋąŋaa, goagoaɠaa da yá taɠa hɛɲąŋą. Yai-Laa hee pɛlɛ́ mu hɛnŋąąi Salomɔn ə kɛ Hiramə ɓa bɛli, ə gɛ a ɓala kwɛliɠaa, diɛ lən.

⁴⁶ Di mala kwɛliɠaa tii kəlee pu Ɉurdɛn kwɛlɛ, ɓɛi da ɲá teen naa di kɔ́wɔ ŋą Sukotə da Sartan di lɔwai, ləɠi pɔlɔ hu.

⁴⁷ Salomɔn ə ɉɛnŋąą tii kəlee hee ɉeeiɠaa ɓa. Gəlee pɛlɛɛ gee ɓa, nu hva pɛli kɛ mala kwɛlii tii nwiɛ yee kɔ́lɔn ɉii, mąąhɔlɔɓo, gɛnɛ̨i kɛ.

⁴⁸ Salomɔn ə Yai-Laa hee pɛlɛ́ mu hɛnŋąą kəlee kɛ. Ə ɉaláá kulɔi kɛ a hɛni, ə Yálá kɔ́i kɛ a hɛni, diɛ Yálá kɔ́ nɛɠɛ laa.

⁴⁹ Nwulɔ nwɔ̨n ɉee hɛn gɔn ə kɛ pow. Nɔɔli heɛ ɓa-mįi-yee hu, nɔɔli heɛ kɔ́ɓɛyee hu, gɛɛnąą mąąhəɠɛɛ ɲɛ̨itɔwɔ. Wulu powaɠaa, nwulɔ nwɔnɉee hɛnŋąą, gbɛ̨ą pɛlɛɛɠaa, diɛi kɛ a hɛni.

⁵⁰ Ɲá pu hɛnŋąą, mowa pɛlɛɛ, nwulɔ nwɔ̨n dəŋa yali hɛnŋąą, ɲá taɠa hɛɲąŋą, gbələ kɔ́wɔɠaa, ləɠi pɛlɛɛɠaa a hɛni. Yálá kɔ́ pɛlɛ́ gbon gɔwɔ hvilɛn ɉɛn, da bɛlɛ́ laaləiɠaa di wɛi, gəlee di ɓo a hɛni.

⁵¹ Mɛ̨nįɠaai kɛ mąąnɛ̨ɛ̨ tɔɔmun Salomɔn ə gɛ Yai-Laa hee pɛlɛ́ mu, yii kɛa gəlee laa ə kulɔ a nɛlɛɛ; ɉɛnŋąą ŋɛ̨i nąn Davidə ə naakwɛlanmo Yai-Laa ɓa, ə di həɠə ə pa a diɛ, ə bu Yai-Laa nwɔ pɛ́lɛ́i ɉɛn gɔw laikɛi. Ɉɛnŋąą tii ɓaa: wali, hɛni, da hɛɲąŋąɠaa.