Tɔɔɓɛlaa dɔlɔɔ 5 - Yálá laawoo hɛɓɛ (dc)

¹ Salomɔn ə kɛi tɔɔlaa kɛ, ə həɠə Eufratə ya kwɛlɛ, dɔɔlaaɠaa kpɔ kɛ laa, gəlee mɛ̨i, ə li Filisti nuą di wɔ lɔi ɓa; ə lɛɛ la ɉu, ə həli da Eziptə nuą ɲɛn ma. Salomɔn ŋą yɛnɛ̨ɛ̨ kəlee yee mu, di kɛi tíi kɛ mą, diɛ nįįhɔ̨nwɔ̨ kulɔ mą.

² Hvóló tɔ̨nɔ̨ kɔ̨nɔ̨n di kɛi gɛ Salomɔn yəi bɛlɛ́n, ə kɛ a mɔ̨nun gɔ́w kilə waa mɛ̨inąąn, ɛlɛɛ, lɛɠɛ hunwɔ̨ kilə waa pow kɔ́w mɛ̨ihaaɓa,

³ Nįŋɛ̨ ɓɛlaa pow, da nįŋɛ̨i hvo ɓɛlaa li bow hveelɛ, ɓɛlaa nwun dɔ̨nɔ̨, yili pulu, nɔwɔ huwɔɠaa ɓaa: Dɔlɔ, Ɓɛɛla, Towa, da Yagɔlɔɔ-gɔlɔɔ kpɛa kpɛaa.

⁴ Salomɔn nwɔ ɲąąwooɓo ə kɛ Eufratə ya voló tooi ɉɛɠɛɛ pələ, kəlee mɛ̨i, ə həɠə Tifsa yɛ li Gaza, dɔɔɓɛlaa kpɔ tii kɛ laa ɲá koo ɓa, gəlee di kɛ Salomɔn yee mu. Nɔiɠaai kpɔ kɛi Salomɔn mąą tinɛ̨n, da diɛni di kɛ nɛ̨ɛ̨laa hu.

⁵ Ɉuda nuą da Israɛlə nuą di kɛ a nuą wəli pulu laɠiɛ. Nu kəlee heɛ nwɔ viɲə kpɔlɔ mu, da nwɔ ɓolaa wulu mu. Ə həɠə Dan, ə li Beɛrə-Seva, Salomɔn ŋą yɛnɛ̨ɛ̨ kəlee yee mu.

⁶ Nwului ŋɛ̨i di kɛi ɉooɠaa yili la di kee ɓa, diɛ nwotolo kpulɔn mą, nwaa pow nąąn mə kɛ Salomɔn yəi, nwɔ hooɠaai mąą mɛ̨nį ɓa, ɛlɛɛ, hoo mɛ̨i nuą, nu waa pow kɔ́w hveelɛ.

⁷ Nɔi ɲąąwooɓo nuą tii ɓə kɛi Salomɔn gɔ̨nɔ̨n gɛ, da nuąi kpɔ kɛi di yee lɔ kɔ́wɔ tɔ̨nɔ̨ hu. Nɔi ɲąąwoo tii di hvo kɛi nɛɛ laa, Salomɔn hvo hvɛɠɛ a hɛn nɔpee ta.

⁸ Yii ɓaa kpai da galai mąąnɛ̨ɛ̨ di bu ɉooɠaa diɛ, da yiiɠaai da di gilɛ həɠə, di kɛi pa a gəlee ɓɛi tɔɔmun gaa laa, yɛ bələi ə di tí la.

Salomɔn nwɔ kili mɛ̨nį

⁹ Yálá ə kili da nwun gɛ ɉu laa tɛɛ Salomɔn pɔ kpɔ a ɉu kɛnɛ̨, mɛ̨nįi a nu kwəi pili mą gbaŋala kaa laa walaa, gulɔ nɔwai kɛ laa walaa yɛ gboloyá kwɛlɛ ɲɛ̨ą kɔ́w.

¹⁰ Salomɔn kili kɛnɛ̨i kɛ dɛɛ Arabə lɔi da Eziptə kilimąą nuą diɛ.

¹¹ Gili kɛnɛ̨ɛ̨i kɛ dɛɛ gilimąą nuąi diɛ, dɛɛ Ɛzra mun Etan ɓa, dɛɛ Heman ɓa, dɛɛ Kalkolə ɓa da Darda; diɛi kɛ a Maholə lonnii. Salomɔn laa ə tɛ gwɛlɛ lɔiɠaa kəlee hu.

¹² Hanwon ə ɉɔɔ, ə kɛ waa haaɓa, wələ waa tɔ̨nɔ̨ wələ lɔɔli ɓə ə doo.

¹³ Ə wulɔ huwui lɔpee gəlee mąą mɛ̨nį ɓo, ə mą kɛ kpitili ŋɛ̨i kɛ Liban da isopə ŋɛ̨i a kulɔ pɛlɛ́ nwąną ɓai. Ə huwɔɠaa mąą mɛ̨nį ɓo, da nwɛ̨nįɠaa, tala huwɔɠaa da hɔ̨nwɔ̨leeɠaa.

¹⁴ Nuą di kɛi həɠə lɔi lɔpee gəlee hu, diɛ pa diɛ di wəli tɔɔ Salomɔn nwɔ kili pələ ɓa, yii kɛi kulɔ na. Tɔɔɓɛlaa diɛ həɠə lɔi nąą kəlee diɛ pa diɛ Salomɔn nwɔ kilimąą wooɠaa mɛ̨n.

Salomɔn ə Yálá hee pɛlɛ́ tɔɔ mɛ̨nį gɛ pələ pɛli kɛ

¹⁵ Tirə tɔɔmun Hiramə ə nwɔ nuą tɔɔ Salomɔn pɔɔli, mąąhɔlɔɓo, aa kɛ mąn diɛ kɛ daa ɉee a nąn Davidə mąąhvalin. Hiramə yaan, ə wɔlɔ kɛ a Davidə mɛlan.

¹⁶ Salomɔn ə wɛlɛɛ tɔɔ Hiramə pɔɔli, yɛ mą:

¹⁷ «Ə́ kili kaa ɉu, yɛ́ kɛ, ną́n Davidə hvo pɛli li pɛlɛ́ tɔɔi Yai-Laa ɓa, yai a nwɔ Yálá; mąąhɔlɔɓo, ɲowoɠaa ŋɛ̨i kɛ gwɛlɛ, di kɛi kɔ́ hee mą a yələ kəlee. Kɛlaa, ə mą kɛ tii, Yai-Laa ə ɲee tɛɛ ɲowoɠaa diɛ, ə di too gɔwɔ mu.

¹⁸ Kɛlaa, yiihui ŋɛ̨i, Yai-Laa aa liilaa tɛɛ bɔ́, kwa gwɛ́lɛ lɔiɠaa kəlee ku lɔwai, yowolaa hvo kɛa ku lɔwai, mɛ̨nį ɲąąnwąnąą takpɛli niihɛlɛn hvo kɛa mą́ą́.

¹⁹ Gáá bɔ ŋą́ pɛlɛ́ tɔɔ Yai-Laa nwɔ́ Yálái ɓa. Yɛ bələi Yai-Laa ə mo la ną́n Davidə ɓa, yɛ kɛ mą: ‹Ə́ lon gaa pai ɉeei a ə́ mąąhvalin dɔɔkpəlin ɉu, ya ɓə pai ɉéé pɛlɛ́ tɔɔi.›

²⁰ Yili ɓa, gáá ɉuhvɛlii yɛ́, gɛ́, kpitili wului ŋɛ̨i gaa Liban, di da tee a nwɔ́ɔ́. Gáá pai nwɔ́ kóló kɛ nuą tɛɛi, di pɛlɛ ə́ nwɛiɠaa diɛ, diɛ gólói tii kɛ. Yii ə́ kaa bɔ ə́ wɔɔ kóló kɛ nuą tɛitɛi di ɉɔlɔɓo a di hala, vaaɓo mą́ą́, ŋą́ yili tɛɛ ə́ pɔ. Ə́ kili kaa ɉu, yɛ́ diɛ, nu ta hvo ɓɛ ku pɔɔli, yɛ pɛli sɛdrə wulu teei yɛ bələi Sidɔn nuą ka gɛ la.»

²¹ Yii lɔ Hiramə ə Salomɔn nwɔ wɛlɛɛ woo tii mąn, gwəi ə nɛ̨ɛ̨ kpɔ kɛnɛ̨, yɛ diɛ: «Háákələi, mąąwiɛ kɛnɛ̨ kaa Yai-Laa ɓa, yai ŋɛ̨i lon gilimąą dɛɛ Davidə pɔ, ə hvaa mą, ə dɔɔ nu kpulu kɛnɛ̨i ŋɛ̨i nwun na.»

²² Hiramə ə nu tɔɔ Salomɔn pɔ, diɛ mą: «Hiramə yɛ mą: ‹Ŋą́ą́ ə́ wɔɔ wɛlɛɛi mąn, Ée! Kpitili wulu da siprə wului ə́ mąąkpaan gaa mą, gáá gəlee tɛɛi ə́ pɔ.

²³ Nwɔ́ kóló kɛ nuąi di kaa pai kɛi ɉəɠəi Liban, diɛ paa la gboloyá kwɛlɛ. Ɲą́ą́ gbinįi gáá pai kɛi ɲili kɛi, gɛ́ doo gboloyá ŋą; ɓɛi ya nąą lɛ, diɛ paa la laa. Da paa la, ŋį́ di hvoloon, yɛ́ kpinįi ə ɉəɠə kɛa ə́ li la. Yii ə́ kaa gɛi a ə́ wɔɔ nąą, ya ɓaa: ə́ nwɔ́ tɔɔ pɛ́lɛ́i mu nuą kɔ̨nɔ̨n gɛ›.»

²⁴ Bələ ɓə Hiramə ə kpitili wulu da siprə wulu tɛɛ la Salomɔn pɔ, yɛ bələi ə kɛ la bɔ.

²⁵ Ɛlɛɛ, Salomɔn yaan, ə mɔ̨nun kilə waa nwun mɛ̨ida da olivə wulɔ nįnɛ̨ tuku nwun mɛ̨ihaaɓa ɲee mɛ̨ihaaɓa tɛɛ a Hiramə nwɔ tɔɔ pɛ́lɛ́i mu nuą kɔ̨nɔ̨n. Yili ɓə Salomɔn ə kɛi dɛɛ Hiramə pɔ, kwɛlan ɉəli pələ tɛitɛi kəlee.

²⁶ Yai-Laa ə kili tɛɛ Salomɔn pɔ, yɛ bələi ə naakwɛlanmo la mą. Nɛ̨ɛ̨laa ə kɛ Hiramə da Salomɔn di lɔwai, di nu hveelɛ di mįnɛ̨ həɠə.

Salomɔn ə góló kɛ pələ lɛ

²⁷ Salomɔn ə pɔlɔtɛ kóló muhəɠə Israɛlə nuą lɔwai. Bɔlɔtɛɠaa di kɛ a nu waa pow haaɓa.

²⁸ Ə kɛi di tɔɔ Liban lɔi hu, ɲąnin dɔ̨nɔ̨ yee mu, nu waa pow; yiliɠaai da ɲąnin dɔ̨nɔ̨ kɛ, dakpɛliɠaa di li. Gbulu yii a li, a pənə a pa, ɲąnin veelɛ a tɛɛ, di pənə nwɔ̨nɔ̨ di li. Adoniramə ɓə kɛ bɔlɔtɛɠaa nwun na.

²⁹ Tiɲɛ̨ həɠə nuą nu waa pow mɛ̨ihveelɛ ə kɛ Salomɔn yəi, ɛlɛɛ, kwɛni haɠa nuą nu waa pow mɛ̨ihaaɓa di ɓo ɲeeɠaa ɓa.

³⁰ Nuąi Salomɔn ə di lɔ nɔi ɲąąwooɓo nuą yee mu, diɛ ɓo a góló kɛ nuą nwun nąmįną, di laa hvo kɛ nu kwɛni hu; yiliɠaai di kɛ a nu waa haaɓa pulu nwun ɉaaɓa.

³¹ Yɛ bələi tɔɔmun ə mo la diɛ, di kɛi kwɛni kpɛa kpɛaa kulɔ diɛ mąą haɠa, ə gɛ, di gɛ a bɛlɛ́ kɔ́wɔ hvilɛn gwɛni.

³² Salomɔn nwɔ kóló kɛ nuąi, da Hiramə nwɛiɠaai, da Gebalə nuą, di di yee pɛlɛ góló ɓa. Daɠaa diɛ gwɛni mąą haɠa, daɠaa diɛ nwulu haɠa bɛlɛ́ tɔɔ mɛ̨nį ɓa.