Tɔɔɓɛlaa dɔlɔɔ 3 - Yálá laawoo hɛɓɛ (dc)Salomɔn ə Eziptə tɔɔmun lon ɉəɠə a nɛ̨ą 1 Salomɔn ə kɛ a Eziptə tɔɔmun mɔlɔ; ə Eziptə tɔɔmun tii lon ɉəɠə a nɛ̨ą, ə ɉeei kulɔ Davidə taa. Ə lɛɛ laa, ə lɛɛ la ɉu Salomɔn ə kpɛɛ a nwɔ tɔɔ pɛ́lɛ́i tɔɔ da Yai-Laa nwɔ pɛ́lɛ́i, ə mą kɛ Ɉerusalɛmə mąąkpɛ hį́i. 2 Nąąlɔwai tii, nuą di kɛi ni haláá kulɔ ɲeeɠaa ɓa, ɓɛi di nąą pɛli; mąąhɔlɔɓo, di hvo nii kɛ pɛlɛ́ tɔɔ li a Yai-Laa nwɔɔ. 3 Salomɔn ə Yai-Laa wɛlilakɛ, niɛwooi ŋɛ̨i nąn Davidə ə gɛ mą, ə ɉon; kɛlaa yaamun, ɲeeɓa ɓə ə kɛi ɉaláá kulɔ laa, diɛ lansan kələn naa. Salomɔn ə kili hvɛli Yálá ɓa 4 Yələ ta, tɔɔmun ə li Gabaɔn, ə gɛ ə haláá kulɔ laa, mąąhɔlɔɓo, nąą ɓə kɛ a nuą di wɔ haláá kulɔi walawala. Haláái da gəlee kələn Salomɔn ə yili ɲɔ̨nwɔ̨mąn nwaa tɔ̨nɔ̨ kulɔ laa Yai-Laa ɓa. 5 Ɓɛlɔwai Salomɔn ə kɛ nií la Gabaɔn, Yai-Laa ə gbɔwɔ lɛ mą a kpinį hįį pələ, yɛ mą: «Hɛn ə kaa bɔ, 'vɛli mą́ą́, ŋį́ dɛɛ ə́ pɔ.» 6 Salomɔn yɛ mą: «Yɛ́ ɓə ə́ ɲɛ̨i lɛlɛɛ hee ną́n Davidə ə́ wɔ luwɔi ɓa, mąąhɔlɔɓo, ə hiɛ a ɉaŋąą ə́ ɲɛ̨i ɓa; tələnmolaa hu, a gwəi kwəlɛɛ yɛ́. Yili ɓə gɛ, yɛ́ kulɔ ə́ woo ɓa, ə́ non ɉee háákəlee dɔɔkpəlin ɉu. 7 Yai-Laa nwɔ́ Yálá, yiihui ŋɛ̨i, yɛ́ ɓə hvaa mą, ɲą́ą́ ŋɛ̨i a ə́ wɔ luwɔ, ə́ ɉéé a ną́n Davidə mąąhvalin, gáá a hulɔnon, və́ ni wala ɲąąwooɓo kɛ. 8 Ə́ wɔ luwɔi ka ə́ wɔɔ nu kpulu kɛnɛ̨i nwun na, diɛi wɔlɔ ə́ di həɠə ɉu, diɛi di kpulu hu kɛnɛ̨, nu hva pɛli di lonoi. 9 Yii mąą nɛ̨ɛ̨ ə́ dɛɛ ə́ wɔ luwɔi pɔ, ya ɓaa: Ə́ kili tɛɛ bɔ, da mɛ̨nį ɲąą kaa, yɛ pɛli mɛ̨nįɠaa gulɔ nɔwai kɔ́lɔn ɉii la, ə gɛ, ə́ wɔ nu kpului ŋɛ̨i mąą mɛ̨nį nwąną yɛ́, ə tɔɔ la di ɲɛ̨itɔwɔ.» 10 Mɛ̨nįi tii Salomɔn ə ɉu hvɛli, ə nɛ̨ɛ̨ Yai-Laa ɓa. 11 Yálá yɛ mą: «Gɛ mɛ̨nį yili lɔ ɓə ə́ hvɛli mą́ą́, hvó kɛ ə́ yíi kwɛa mɛ̨nį ɓo li, hvó ə́ yee la hvólóon mɛ̨nį ɓo li, hvó ə́ yowowɠaa paa mɛ̨nį ɓo li, kili ɓə ə́ ɉu hvɛli, ə gɛ, ə́ nuą ŋɛ̨i ɲąąwooɓo la a ɉaŋąą; 12 yili mąą mɛ̨nį ɓa, bələi tii ə́ mo la, gáá kpɔlɔɔ gɛi tii, gáá kili tɛɛi ə́ pɔ, ɲɔ̨nwɔ̨mąn hvo ta kɛ li nu ta ɓa, gɛɛ hvo pa kɛ hɔlɔɓo, hvo nwɔ̨nɔ̨ pai kɛi nu ta ɓa ə́ haa pulu hvo həli ə́ pɔ. 13 Yii kpɛli hvó ɉu hvɛli li mą́ą́, gáá dɛɛi ə́ pɔ; ya ɓaa: hɛn kɔ́w, da mąąwiɛ. Ɉɛnŋąą tii kaa kɛi ə́ yəi, ə́ wɔ yɛnɛ̨ɛ̨ kəlee yee mu, tɔɔmun da hvo pai kɛ lɔi mɛ̨i, yɛ həli ə́ pɔ. 14 Akɛ yii gáá bɔ yá gɛ, ə́ nwɔ́ tɔ́n da bɔ liɛwooɠaa hon, yɛ ə́ nąn Davidə, ŋą́ ə́ wɔ yɛnɛ̨ɛ̨ hu kwɛa.» 15 Salomɔn ə ɲɛ̨nąą ɓo, ə gaa yɛ Yai-Laa ka tii mɛ̨nį ɓo mą hįi pələ. Ə li Ɉerusalɛmə, ə gbɔwɔ lɛ Yai-Laa ɓa nwɔ mįnɛ̨ kəhii lííla, haláái da gəlee kələn, da pɔnaa kulɔ haláá, ə yiliɠaa kulɔ Yai-Laa ɓa, yili pulu, ə nwɔ ɲɛ̨itɔwɔ nuą ɓɛlɛ hee. Salomɔn ə kitii tee a kili kɛ ɲəi 16 Yələ ta, wɛlikɛnɛ̨ąą hveelɛ di pa Salomɔn lííla 17 Dɔ̨nɔ̨ yɛ mą: «Nwɔ́ mɛ̨nį nąmu tɔɔmun, mɛ̨nįi ŋɛ̨i gaa kwa nɛ̨ɛ̨nui ŋɛ̨i ku lɔwai, ɉutɔɔ. Kwa yaa ku kaa pɛlɛ́ tɔ̨nɔ̨ mu, ku lɛɛ laa a yələ ta, ŋį́ nááyɛɛ, 18 Hvóló haaɓa tɛɛ pulu, yaa kpɛli ə naayɛɛ. Kwa yaa lɔ ɓə ku kee ɓa, nu takpɛli hu ku pɔ bɛlɛ́n, ku nu hveelɛ lɔ ɓə laa. 19 Kpinii, nɛ̨ɛ̨nui ŋɛ̨i ə laa non mɛ̨i ə baa. 20 Ə muhəɠə a kwii hąą, ə nwɔ́ lon həɠə gwɛ́lɛ, nąąlɔwai, ə́ wɔ luwɔ nɛ̨ąi ə kɛi yíi; ə naa niíla. Ə nwɔ lokolo powai həɠə, ə naa nííla. 21 Yələɓɔɔ, ŋą́ muhəɠə, gɛ́ kɛ ŋą́ ɲįnį tɔɔ nón na, yɛ ɓo kɛa a bowa. Kɛɛ huponoɔ kɛa, ŋį́ mąąkpɛɛ, hvo kɛ a nón tii ŋį́ gaa.» 22 Nɛ̨ɛ̨nu yii tii yaan, yɛ diɛ: «Kpaa! Nón ga ŋɛ̨i a vulú, ə́ wɛi ka tii aa haa.» Nɛ̨ɛ̨nu dɔlɔɔ tii yɛ mą: «Kpaa! Yɛ́mun ə́ wɛi ka ŋɛ̨i aa haa, nwɛ́i ka ti a vulú.» Bələ ɓə di kɛi di woo hukulɔ la tɔɔmun nií la. 23 Tɔɔmun yɛ diɛ: «Nu yii yɛ: ‹Nwɔ́ lon ka ŋɛ̨i a vulú, mɛ́lan nwɛi ka ŋɛ̨i aa haa.› Yii yaan yɛ diɛ: ‹Kpaa! Nwɛ́i ka ŋɛ̨i a vulú, ə́ wɛi ka ŋɛ̨i aa haa.›» 24 Tɔɔmun yɛ kɛa diɛ: «'Ka li, ka pa a nwɔ́ ɓɔwa kwɛai!» Di nɛɛ mą di pa a mowa. 25 Tɔɔmun yɛ diɛ: «Nokoloi ŋɛ̨i a vulú, ka ɉu tee ɉu hveelɛ; ka bələ tɔ̨nɔ̨ tɛɛ yii pɔ, ka bələ tɔ̨nɔ̨ tɛɛ yii pɔ.» 26 Nɛ̨ɛ̨nui ŋɛ̨i non maa kɛ a nokolo hvulú, níi ə ɓɛla mą non mąą mɛ̨nį ɓa, yɛ tɔɔmun ma: «Nwɔ́ mɛ̨nį nąmu, nɛ̨ɛ̨mąą ɓə gáá vəi yɛ́; nokolo hvulú ŋɛ̨i tɛɛ mɛ́lan bɔ, hvó kɛ ə́ kaa nokolo paai.» Nɛ̨ɛ̨nu yii tii nwɔ wooi lɔ ɓaa: «Hvaa lɛɛ ə́ yəi, hva lɛɛ ɲə́i, ka ɉu tee.» 27 Nąąlɔwai, tɔɔmun ə mo kɛa, yɛ diɛ: «Nɛ̨ɛ̨nu dɔlɔɔ ŋɛ̨i ləi nwoo hukulɔ, ka nokolo hvulú mąą tɛɛ bɔ, ka hvo baa; ya ɓə non ni.» 28 Giiti tii tɔɔmun ə dee, bələ ə taɠa taɠa Israɛlə lɔi hu; nu kəlee diɛ ɲɔw tɔɔmun ma. Mąąhɔlɔɓo, di gaa diɛ Yálá-taa kili kaa mą, yɛ mɛ̨nįɠaa hutɔɔ la. |