Tɔɔɓɛlaa dɔlɔɔ 22 - Yálá laawoo hɛɓɛ (dc)Akabə ə kɛ bɔ ə pənə ə Ramotə taa həɠə 1 Kwɛlan veelɛ yee mu, liilaa ə kɛ nɔi, kɔ́ hvo kɛ Aramə lɔi da Israɛlə lɔi di lɔwai. 2 Gwɛlan ɉaaɓa lɔwai, Ɉosafatə yai a Ɉuda nɔi tɔɔmun, ə həɠə ə li Israɛlə nɔi tɔɔmun bɔ. 3 Israɛlə tɔɔmun aa kɛ mo nwɔ nwun nąmįną diɛ, yɛ diɛ: «Ka kili kaa ɉu kaa, Ramotə taai ŋɛ̨i Galaadə, gaa a gu wɔɔ kɛlɛi? Lə mɛ̨nį ɓa, ka gu hvo ɉəɠəi Aramə tɔɔmun ɲəi?.» 4 Yili pulu, yɛ Ɉosafatə ɓa: «Ə́ kaa pai hvaai mą, ə́ too bɔ́, gwə li gu kɔ́ pɛlɛ Ramotə ɓa, yai gaa Galaadə?» Ɉosafatə yɛ Israɛlə tɔɔmun ma: «Gu kaa tɔ̨nɔ̨, ɲą́ą́ gwa yɛ́; ə́ wɔ nuą da nwɔ́ nuą, ə́ wɔ hooɠaa da nwɔ́ hooɠaa, gəlee kaa a hɛn dɔ̨nɔ̨.» 5 Yili pulu, Ɉosafatə yɛ Israɛlə tɔɔmun ma: «Yai-Laa mąąnin gɛ, ə́ nwɔ kiliŋąhiɛ kaa mɛ̨nįi ŋɛ̨i hu.» 6 Israɛlə tɔɔmun ə Yálá kwəi mɛ̨nį hukulɔ nuą ŋąąkpɔn, diɛ ɓo a nu nwun nąąn ɲɔ̨nwɔ̨mą; ə di mąąnin gɛ, yɛ diɛ: «Akɛti, mąąnɛ̨ɛ̨ ŋą́ li ŋą́ kɔ́ pɛlɛ Ramotə taa ɓa, yai gaa Galaadə, a wala kɛ tii, ŋą́ lɛɛ ɓɛ?» Di kəlee diɛ mą: «Hɛn gəlee Nąmu Yálá kaa lii daai tii lɔi tɔɔmun ɲee ŋą.» 7 Ɉosafatə yɛ nwɔ̨nɔ̨ Israɛlə tɔɔmun ma: «Yai-Laa kwəi mɛ̨nį hukulɔ mun dakpɛli hvo ɓɛ, yii gwa pɛli Yai-Laa mąąnin gɛi bɔ pələ?» 8 Kɛlaa, Israɛlə tɔɔmun yɛ Ɉosafatə ɓa: «Hulɔnu ta kaa ɓɛ, gwa pɛli Yai-Laa mąąnin gɛi bɔ pələ, kɛlaa, nwɛ́i, nwɛli hvo mą́ą́; Mąąhɔlɔɓo, mɛ̨nįi a ɉəɠə Yálá la yɛ mo, hva kɛ a nɛlɛɛ yɛ hvilɛn na mą́ą́, ɲɔ̨nwɔ̨ɔ̨ lɔ ɓə a kɛ moi a hvóló kəlee. Mąą hulɔnui ɓaa: Yimla lon Mise.» Ɉosafatə yɛ tɔɔmun ma: «Tɔɔmun hvo kɛ gaa yili ɓoi tii.» 9 Nąąlɔwai, tɔɔmun ə nwɔ tímun təli, yɛ mą: «'Li kpɔlɔɔ ɉa, ə́ Yimla lon Mise təli, ə pa.» 10 Israɛlə tɔɔmun da Ɉuda tɔɔmun di kɛ heeni dɔɔ kpəlinŋąą hu, di wɔ tɔɔ həɠəɠaai di ɓo di kwąną, di heɛ Samari taa ɉį́i la. Yálá kwəi mɛ̨nį hukulɔ nuą diɛ Yálá kwəi mɛ̨nį ɓo di lííla. 11 Nąąlɔwai Kenaana lon Sidkiyahu, ə huwɔ mįnɛ̨ pɛli a kwɛli, ə dɔɔ nwuɔ̨, yɛ kɛ diɛ: «Yai-Laa yɛ diɛ: ‹Mįnɛ̨ɠaa ŋɛ̨i, di kaa a huwalawalai ə́ kaa lii Aramə nuą huwu pui la, mąą pɔɔ kɔ́ɔn.›» 12 Yálá kwəi mɛ̨nį hukulɔ nuą tii kəlee di kɛi mo tii, diɛ kɛ mą: «Li! Ə́ kɔ́ pɛlɛ Ramotə taa ɓa yai gaa Galaadə, ə́ yee kaa lii lɔi, Yai-Laa aa dɔɔmun tii lɔ ə́ yee ŋą.» Yálá kwəi mɛ̨nį hukulɔ mun Mise ə gɔ́ kala mɛ̨nį ɓo diɛ 13 Nąąlɔwai, nui ŋɛ̨i di dɔɔ yɛ li Mise təlii, ə mo Mise ɓa, yɛ mą: «Ə́ wəli tɔɔ, Yálá kwəi mɛ̨nį hukulɔ nuą kəlee woo tɔɔi aa kɛ tɔ̨nɔ̨, diɛ tɔɔmun gaa lii yeetɛɛmąą kɛi; yili ɓa, ya li, too di pɔ ka kəlee ka mo lɔ tii.» 14 Mise yɛ mą: «Yii kpɔ Yai-Laa kaa a vulú, mɛ̨nįi Yai-Laa kaa lii kɛi mą́ą́: ‹Mo!› ya ɓə gáá lii moi.» 15 Mise ə pa, ə həli tɔɔmun ma, tɔɔmun yɛ mą: «Mise! Akɛti, mąąnɛ̨ɛ̨ kwə li ku kɔ́ pɛlɛ Ramotə taa ɓa, yai gaa Galaadə, awala kɛ tii, ku lɛɛ ɓɛ? Yɛ́ lə?» Mise yɛ tɔɔmun mą: «Li! Ə́ yee kaa lii lɔi, Yai-Laa kaa lii taa tii tɛɛi nwɔ́ tɔɔmun bɔ.» 16 Kɛlaa, tɔɔmun yɛ Mise ɓa: «Ə́ kaa bɔ ŋį́ kɛ yɛ́ ə́ kwɛla gee mɛ̨i yɛli Yai-Laa ɲɛ̨i ɓa, ə gɛ, ə́ tɛ̨ą ɓo mą́ą́?» 17 Nąąlɔwai, Mise ə mo kɛa, yɛ diɛ: «Ŋą́ Israɛlə nuą kaa, di taɠa taɠa ɲeeɠaa ɓa, yɛ ɓɛlaaɠaai di mɛ̨imun və mą. Yai-Laa yɛ diɛ: ‹Di nąmu hvo kɛa diɛ, di pənə kani di li nu kəlee ə hee ɲəi bɛlɛ́ laaləi.›» 18 Israɛlə tɔɔmun yɛ Ɉosafatə ɓa: «Kɛlɛi ŋį́ lee mo yɛ́, gɛ́ yɛ́, hva mɛ̨nį lɛlɛɛ həɠə Yálá la yɛ mo mą́ą́, ɲɔ̨nwɔ̨ɔ̨ lɔ ɓə a mo.» 19 Mise ə pənə nwɔ̨nɔ̨ yɛ mą: «Ə́ wəli tɔɔ, ə́ Yai-Laa woo mɛ̨n, ŋį́ Yai-Laa kaa heeni nwɔ tɔɔ kpəlin hu, huwala walaɠaai yələkɔlɔn ɉu, gəlee tinɛ̨n ŋąą mą. 20 Yɛ diɛ: ‹Gbɛɛ ɓə lii ə kili ɲɔ̨nwɔ̨ɔ̨ too Akabə kwəi, ə gɛ ə li ə kɔ́ pɛlɛ Ramotə ɓa yai gaa Galaadə, ə gɛ di baa?› Dɔ̨nɔ̨ ə kɛi nwɔ woo ŋąąpənəi kɛ a dee, dakpɛli yɛ nwɔ woo ŋąąpənəi kɛ a ɉuwu takpɛli. 21 Nąąlɔwai, malaka ta ə kulɔ mɛlaa lɔwai ə tɔɔ Yai-Laa lííla, yɛ mą: ‹Ɲą́ą́ ɓə lii ŋį́ ɲąąhɛn!› Yai-Laa yɛ mą: ‹Ə́ kaa lii gɛi ləi?› 22 Malakai tii yɛ mą: ‹Gáá lii, ŋą́ kɛ a lɛɛ kili, ŋą́ too Yálá kwəi mɛ̨nį hukulɔ nuąi tii laa diɛ.› Yai-Laa yɛ mą: ‹'Li, ə́ yee kaa lii lɔi, li ə́ gɛ tii.› 23 Yiihu kɛa, yáá gaa tii, Yai-Laa aa lɛɛ kili too ə́ wɔ Yálá kwəi mɛ̨nį hukulɔ nuąi kəlee kwəi, diɛi di kaa ɓɛ; mąąhɔlɔɓo, Yai-Laa aa wɔlɔ kɛ mɛ̨nį ɲąnwąnąą mąą mɛ̨nį bələ ɓo yɛ hvilɛn na yɛ́.» 24 Nąąlɔwai, Kenaana lon Sidkiyahu ə nɛɛ mą, ə Mise laa lɔwa, yɛ mą: «Mįnɛ̨ pələ ɓə Yai-Laa nwɔ Kilii ə kulɔ la ɉú, yɛ mɛ̨nįɠaa ŋɛ̨i ɓo yɛ́?» 25 Mise yɛ mą: «Yɛ́ kpinįi ə kaa pai nąą kaai, a volói ə kaa pai kɛi pui la yɛ ə́ nwun mąąkilɛi kwɛli, ya lɔ bɛlɛ́ yii mu, ə́ kulɔ laa yɛ lɔ dakpɛli mu.» 26 Yili pulu, Israɛlə tɔɔmun yɛ diɛ: «Ka Mise hon, ka dɛɛ daa nąmu Amɔn pɔ, di dɛɛ tɔɔmun non Yoasə pɔ. 27 Yɛ diɛ, tɔɔmun nwoo ka, yɛ: ka ɉulɔnui ŋɛ̨i too gaho ŋą; ka hvo kɔ̨nɔ̨n nɛlɛɛ tɛɛ bɔ, ɛlɛɛ hvo kpələ ya hɔlɔɓo kɛnɛ̨, ə lɛɛ la ɉu ŋą́ li ŋą́ yeetɛɛmąą kɛ, ŋą́ pa liilaa hu.» 28 Mise yɛ tɔɔmun ma: «Lii ə́ kaa moi, ya pənə ya pa, a kɛ tii Yai-Laa hvəi mɛ̨nį ɓo mą́ą́ gɛ́ mo. Yili pulu, yɛ diɛ: ‹Nu kəlee ə nwóó mɛ̨n.›» Akabə lɛɛ mɛ̨nį gɔ́ hu 29 Israɛlə tɔɔmun da Ɉuda tɔɔmun Ɉosafatə, di həgə diɛ li kɔ́ pɛ́lɛ́i Ramotə ɓa Galaadə. 30 Israɛlə tɔɔmun yɛ Ɉosafatə ɓa: «Gáá nwɔ́ tɔɔ həɠəi kulɔi gwąną, ŋą́ gbɔ́wɔ́ kɛ a nu takpɛli ŋą́ li gɔ́ mɛ̨i ə́ wɛi, ə́ wɔ həɠəi lɛɛ ə́ kwąną.» Israɛlə tɔɔmun ə ɉəɠə kulɔ, ə li gɔ́ mɛ̨i. 31 Yaan, Aramə tɔɔmun nwɔ kɔ́kuláá pow haaɓa kɔ́w hveelɛi ŋɛ̨i kɛ nwotoloɠaa hu, ə mo diɛ yɛ diɛ; Lii ka káá moi, ka mo gɔ́kuláá pɛlɛɛɠaa diɛ, ə mą kɛ gbɛa kpɛa. Ka wolo lɔ Israɛlə tɔɔmun ma. 32 Yaan, yii kɛa gɔ́kulááɠaai ŋɛ̨i kɛ nwotolo hu, di Ɉosafatə kaa dɔɔ həɠə ə ɓo nwąną, di mo kɛa di kee lɔwai diɛ mą: Israɛlə tɔɔmun kpɔ ka tii kiɛ. Di tinɛ̨n gɛa di hee mą a kɔ́, kɛlaa, Ɉosafatə ə tomą kpɔ a kɔ́kuláá woo. 33 Yii kɛa gɔ́kulááɠaa di gaa diɛ Israɛlə tɔɔmun və li, di həɠə bulu. 34 Hulɔnu ta ə mɛ̨ɛ̨kɔw pili lɔ tii dɛɠii, ə kpɔn Israɛlə tɔɔmun kɛŋən ɉu, gəŋən mąą kpulu hɛn yili yɛli lɔwai. Israɛlə tɔɔmun yɛ nwɔ wotolo hiɛ mun ma: «Tinɛ̨n a ɲą́ą́, gu kulɔ gɔ́ kpalan ŋą, mąąhɔlɔɓo, mɛ̨nį ta aa kɛ a ɲą́ą́ a nwąnąą.» 35 Volói tii, gɔ́ ə kpɔlu kpɔ a neelee, di tɔɔmun nɛɛ tɔɔni gɔ́ kpalan ŋą Aramə tənən ma, kɛlaa, yələwulii pɔ lɔwai, tɔɔmun ə haa. Ɓɛi tii mɛ̨ɛ̨kɔw ə kpawo laa, ŋąmą ə kɛi kulɔ laa yɛ pu nwotolo hu. 36 Yələwulii hvóló ɓa, nu ta tomą woo ə tɔɔ gɔ́ kpanąn ŋą, yɛ kɛ mą: «Nu kəlee ə li bɔ lɔi, nu kəlee ə li bɔ taai, 37 mąąhɔlɔɓo, tɔɔmun aa haa.» Israɛlə nuą di pənə di pa a tɔɔmun bowa Samari, di noo. 38 Ɲá heei ŋɛ̨i di bɛli Samari kwɛlɛ, nąą ɓə di li laa a Akabə nwotolo diɛ mąą waa; yilɛɠaa diɛ ŋąma kɔ́mɔ̨n, wɛlikɛ nɛ̨ąą diɛ di waa ɲái, yɛ bələi ta Yai-Laa ə mo la. 39 Akabə kɛ mɛ̨nį gbəliɠaa, yiiɠaai kpɔ ə gɛ, ɉələ ɲin bɛlɛ́i ə dɔɔ, ə mą kɛ daa kpɛa kpɛaai ə dɔɔ, gəlee di hvo mɔ̨ɔ̨ pɛ̨ɛ̨ li Israɛlə tɔɔɓɛlaa kɛ mɛ̨nį hɛɓɛ́ hu? 40 Akabə ə laa nąnni kwɛlɛ, non Akaziasə ə hee dɔɔlaa kpəlin ɉu a nąn mąąhvalin. Ɉosafatə Ɉuda tɔɔmun 41 Asa lon Ɉosafatə ə kɛ a tɔɔmun Ɉuda lɔi hu, ɓɛlɔwai Akabə ə kɛ la a Israɛlə tɔɔmun, nwɔ tɔɔlaa gwɛlan ə kɛ kɛa la a kwɛlan nąąn. 42 Ɉosafatə kaa kwɛlan ə kɛ pow haaɓa kɔ́w lɔɔli, ɓɛlɔwai ə dɔɔlaa həɠə la. Ə kwɛlan bow hveelɛ kɔ́w lɔɔli kɛ dɔɔlaa hu Ɉerusalɛmə. Ɉosafatə nee laa ɓa kɛ a: Azuva, yai kɛ a Silhi lon. 43 Ɉosafatə ə hvilɛ gbɔlɔɔ nąn Asa hiɛ pələ hu, hvo kpɛli hvóló túwɔ́ pələ ta ɓa. Yii kpɔ kɛ ɉaŋąą Yai-Laa ɲɛ̨i ɓa, ə yili kɛ. 44 Kɛlaa, ə mą kɛ tii, hali kɔ́iɠaa di hvo kpɛɛ nɔi, nuą di kɛi lɔ halááɠaa kulɔ, diɛ lansan kələn ɉali kɔ́iɠaa tii ɓa. 45 Liilaa ə kɛ Ɉosafatə da Israɛlə di lɔwai. 46 Ɉosafatə kɛ mɛ̨nįɠaa, guláá laai ə gɛ, da pələi ə kɔ́ kɔ́ la, mɛ̨nįɠaa tii di hvo mɔ̨ɔ̨ pɛ̨ɛ̨ li Ɉuda tɔɔɓɛlaa kɛ mɛ̨nį hɛɓɛ́ hu? 47 Ɉaláá wɛli kɛ nuą kpəliɠaai lɛɛ Ɉosafatə nąn Asa nwɔ yələ, ə gəlee kpɛ nɔi. 48 Tɔɔmun hvo kɛ heeni Edɔmə lɔi hu, kɛlaa, ə ɲɛ̨ikɔw ta hee laa. 49 Ɉosafatə ə kələn kpɛa kpɛaa pɛli, ə gɛ, diɛ li Ofirə diɛ hɛni kwɛli. Kɛlaa, di hvo pɛli lii, mąąhɔlɔɓo, gələnŋąą di kala Esiɔn-Gɛvɛrə. 50 Nąąlɔwai, Akabə lon Akaziasə yɛ Ɉosafatə ɓa: «Gɛ́ ə́ wɔ kóló kɛ nuąi da nwɛ́iɠaai diɛ lɛɛ di kee pɔ, diɛ li gələnŋąą hu.» Kɛlaa, Ɉosafatə hvo hvaa mą. 51 Yili pulu, Ɉosafatə ə laa nąnni kwɛlɛ, di noo nąnni kámą hu galá Davidə taa. Ɉosafatə lon Ɉoramə ə dɔɔlaa həɠə. Akaziasə Israɛlə tɔɔmun 52 Akabə lon Akaziasə ə kɛ a tɔɔmun Israɛlə lɔi hu, ə hee Samari, Ɉosafatə Ɉuda tɔɔmun nwɔ tɔɔlaa gwɛlan mɛ̨ihveelɛ lɔwai. Akaziasə ə tɔɔlaa kɛ a kwɛlan veelɛ Israɛlə lɔi hu. 53 Mɛ̨nįi ɲɔ̨nwɔ̨ɔ̨ Yai-Laa ɲɛ̨i ɓa, Akazia ə ɲee lɔ ɉu, ə hvilɛn nąn da nee di túwɔ́ pələ pulu. Ə mą kɛ a Ɉeroboamə, yai kɛ a Nevatə lon, yai Israɛlə yee lɔ nɛ̨ŋɛ̨n ɉu. 54 Yɛ tí Baalə ɓa, yɛ kwɛli hvilɛn mą, yɛ Yai-Laa Israɛlə nwɔ Yálái liikələn gwəi, yɛ bələi kpɔlɔɔ nąn ə gɛ la. |