Tɔɔɓɛlaa dɔlɔɔ 21 - Yálá laawoo hɛɓɛ (dc)Nabɔtə nwɔ viɲə yɛa 1 Mɛ̨nįɠaa tii tɛɛ pulu, mɛ̨nįi kɛ ya ka: Viɲə yɛa ə kɛ Izreɛlə mun da yəi, diɛ kɛ naa ɓaa: Nabɔtə. Viɲə yɛai tii ə kɛ Samari tɔɔmun Akabə nwɔ pɛlɛ́i kwɛlɛ. 2 Akabə yɛ Nabɔtə ɓa: «Yɛ́ viɲə yɛai ŋɛ̨i tɛɛ bɔ́ ŋą́ gɛ a nɔw yɛa. Mąąhɔlɔɓo, nąą lɛɠɛɛi nwɔ́ pɛ́lɛ́i ɓa. Ɛlɛɛ, ŋą́ viɲə yɛa takpɛli tɛɛ ə́ pɔ, nɛlɛɛ dɛɛ yii tii ɓa. A wala kɛ tii, yá hvaa nwɔ̨nɔ̨ mą, ŋą́ ɉɔ̨nwɔ̨ tɛɛ ə́ pɔ a wali.» 3 Nabɔtə yɛ Akabə ɓa: «Yai-Laa ɲɛ̨i ɓa, yili hvo haŋą li, gɛ́ ną́nni kwɛlin ɉəɠə gɛ́ dɛɛ ə́ pɔ.» 4 Akabə ə pənə ə li bɔɔli yá ə laa gɔlɔi nii kələn ŋąą gwəi kpɔ kɛnɛ̨, nwooi Izreɛlə mun Nabɔtə ə mo mą, mąą mɛ̨nį ɓa. Yai ə kɛ la mą, vá pɛli ną́nni kwɛlin dɛɛi ə́ pɔ. Akabə ə laa ɲəi gbin ŋą, ə ɲɛ̨i tinɛ̨n bɛlɛ́ pɔ pələ, ɛlɛɛ, hvo gɛ hvo kɔ̨nɔ̨n mįi nii kələn bələ ɓa gwəi. 5 Nɛ̨ą Ɉezabɛlə ə pa yɛ mą: «Lə ɓə kɛ yai ə́ ɲįnąą yiliɛ ŋɛ̨i, ɛlɛɛ, hvó gɛi kɔ̨nɔ̨n ma?» 6 Akabə yɛ mą: «Ŋį́ kɛ Izreɛlə mun Nabɔtə ɓa, ‹Ə́ wɔ viɲə yɛai tɛɛ bɔ́ ŋą́ ɲa, awala kɛ tii, ŋą́ viɲə yɛa takpɛli tɛɛ ə́ pɔ a bɔɔi.› Kɛlaa yɛ mą́ą́: ‹Hva pɛli nwɔ viɲə yɛai tɛɛi bɔ́.›» 7 Akabə nɛ̨ą Ɉezabɛlə yɛ mą: «Kɛlɛi yɛ́ kpɔ ɓə Israɛlə lɔi ɲąąwooɓoi-ee! 'Ə́ muhəɠə ə́ kɔ̨nɔ̨n mįi, ə́ ə́ kwəinɛ̨ɛ̨. Ɲą́ą́ ɓə pai Izreɛlə mun Nabɔtə nwɔ viɲə yɛai tɛɛ ə́ pɔ.» 8 Ɉezabɛlə ə hɛɓɛ́ kɛ a Akabə laa, ə yili kɔ́lɔn ɉɛn gɛ mą. Ə ɉɛɓɛ́i tɛɛ Israɛlə ɲąąwooɓo nuąi kɛ Nabɔtə pɔ taai diɛ, da nu kpɛa kpɛaa. 9 Mɛ̨nįɠaa ə bɛ̨ɛ̨ ɉɛɓɛ́ hu, diɛ ka; yɛ diɛ: «Ka hin gɛnɛ̨ lɔ mɛ̨nį noloɓo, ka Nabɔtə hee nu kɛnɛ̨ haɠa ɓa nu kəlee ɲɛ̨i tɔwɔ. 10 Ɛlɛɛ, ka nu kpoloon veelɛ hee gwɛlɛ. Di lɛɛ pɛlɛ nwuɔ̨ diɛ kɛ mą: ‹Aa Yálá da tɔɔmun di lalan› Akɛ tii, ka gulɔ nuą lɔwai, ka lɛɛ ɉɔɔi a kwɛni, ə lɛɛ la ɉu ə haa.» 11 Nabɔtə pɔ taai nu kpɛa kpɛa da ɲąąwooɓo kɛ nuą di ɉəɠə a Ɉezabɛlə woo, yɛ bələi bɛ̨ɛ̨i kɛ la ɉɛɓɛ́ hu. 12 Di hin mɛ̨nį noloɓo, di Nabɔtə hee nu kɛnɛ̨ haɠa ɓa nu kəlee ɲɛ̨i tɔwɔ, ɛlɛɛ nu kpoloon veelɛ di hee gwɛlɛ. 13 Nu kpoloon veelɛi tii di lɛɛ pɛlɛ Nabɔtə ɓa nuą kəlee ɲɛ̨i ɓa. Diɛ kɛ mą: «Nabɔtə aa Yálá da tɔɔmun di nɛ̨ŋɛ̨n naa.» Ɲąąɓa, di Nabɔtə kulɔ taai, di lɛɛ ɉɔɔi a kwɛni, ə lɛɛ la ɉu ə haa. 14 Nąąlɔwai, di kɛla tɔɔ Ɉezabɛlə pɔɔli diɛ mą; daa lɛɛ Nabɔtə hɔɔi a kwɛni aa haa. 15 Yii kɛa Ɉezabɛlə ə bələ mɛ̨n diɛ kɛ mą, daa Nabɔtə hɔɔ a kwɛni aa haa; yɛ Akabə ɓa: «'Ə́ muhəɠə ə́ li, Izreɛlə mun Nabɔtə nwɔ viɲə yɛai ə lənə nɔwɔtɔɔ mɛ̨nį ɓa yɛ́, ə ɉəɠə a ə́ wɔɔ. Mąąhɔlɔɓo, Nabɔtə hvo kɛa yɛnɛ̨ɛ̨, aa haa.» 16 Bələ mɛ̨n Akabə ə mo, ə muhəɠə yɛ li Izreɛlə mun Nabɔtə nwɔ viɲə yɛai həɠəi a nwɔɔ. Yálá ə Akabə da Ɉezabɛlə di wɔ túwɔ́ pələ ɲɔ̨n ɉutɔɔ 17 Nąąlɔwai Yai-Laa ə mo Tisbe mun Eli ɓa, yɛ mą: 18 «'Ə́ muhəɠə, ə́ li, ə́ Akabə laakwiɛn yai a Israɛlə tɔɔmun Samari. Aa li Nabɔtə yəi viɲə yɛa; yɛ ə ɉəɠə ə gɛ a wɔɔ. 19 Yá li ə́ bələ ŋɛ̨i ɓo mą, yɛ mą: ‹Yáá nu paa, ɛlɛɛ ə́ kaa nwɔ̨nɔ̨ bɔ ə́ hɛn ɉɔlɔɓo›, yɛ nwɔ̨nɔ̨ mą; Yai-Laa woo ka: ‹Ɓɛi kpɔlɔɔ tii, yilɛɠaa di Nabɔtə ɲąmą kpələ laa, yilɛɠaa kaa kpɔlɔɔ pai yɛ́ kpɛli ə́ ɲąmą kpələi laa.›» 20 Akabə yɛ Eli ɓa: «Ee kə ɲówo! Yáá nwɔ̨nɔ̨ gáá.» Eli yɛ Akabə ɓa: «Ee! Ŋą́ą́ ə́ kaa-o. Mąąhɔlɔɓo, yáá ə́ kpɔwɔ kwɛlɛ túwɔ́ pələ ɲɔ̨n ma, mɛ̨nį a nwąną Yai-Laa ɓa, yɛ́ gɛ. 21 Mɛ̨nį Yai-Laa ə mo ya ka; yɛ diɛ: Gáá pai kpalo ɓɛlai Akabə ɓa: gáá pai ə́ huwu kpɛɛi lɔi mɛ̨i, ə mą kɛ, yii ə́ laa kaa mą. 22 Gáá pai ə́ wɔ pɛ́lɛ́i kɛi yɛ bələi ŋą́ Nevatə lon Ɉeroboamə nwɛi lɛɛ la, ŋą́ gɛ yɛ bələi ŋą́ Ahiya lon Baesa nwɛi kɛ la. Gáá yili laai yɛ́ dúwɔ́ pələ ɲɔ̨n ə́ gulɔ mąą mɛ̨nį ɓa; ɛlɛɛ da Israɛlə tooi ə mo nɛ̨ŋɛ̨n ɉu.» 23 Yai-Laa ə pənə ə da ɓo yɛ hvilɛn na Ɉezabɛlə ɓa, yɛ diɛ: «Yilɛɠaa kaa pai Ɉezabɛlə mįi Izreɛlə daai. 24 Akabə yəi bɛlɛ́n nuąi lɔpee da haa taai, yilɛɠaa ɓə da bowa mįi, yii a haa lɔwɔi, yələi nwɛ̨nįɠaa ɓə da bowa mįi, yii a haa kpomói, yələi nwɛ̨nįɠaa ɓə da bowa kpələ.» 25 Nu ta hvo ta kɛ hɔlɔɓo li, yɛ pɛli mɛ̨nį ɲɔ̨n gɛi Yai-Laa ɲɛ̨i ɓa, gɛnɛ̨ yee yɛ həli Akabə nwɛi pɔ. Mąąhɔlɔɓo, nɛ̨ą Ɉezabɛlə ə nwun ɉu lan. 26 Akabə ə túwɔ́ kpɔlɔɔ a ɲɔ̨nwɔ̨ɔ̨ yɛ Amɔrə nuą ŋɛ̨i Yai-Laa ə di kpɛ di wɔ lɔi hu yɛ Israɛlə nuą hee laa, yɛ kwɛli hvilɛn haliɠaa diɛ. Akabə ə niihɛlɛn nwɔ túwɔ́ pələ ɲɔ̨n mąą mɛ̨nį ɓa 27 Ɓɛlɔwai Akabə ə bələi tii mɛ̨n na, ə mąą həɠə huɓɛla, ə ɓíi haɠa too gwaną, ə hįn nɔ, yɛ yíi ɓíi haɠaɠaa mɛ̨i, yɛ mąąwɛli hiɛ ɓo. 28 Yai-Laa ə pənə yɛ Tisbe mun Eli ɓa: 29 «Yáá Akabə kaa, aa nwɔ túwɔ́ pələ ɲɔ̨nŋąą mąą liihɛlɛn ɉee ɲɛ̨́i ɓa. Yili ɓa, ɓɛlɔwai gaa ni la yɛnɛ̨ɛ̨, və́ pai mɛ̨nį ɲąąnwąnąąɠaa tii laai mą. Kɛlaa, non nwɔ tɔɔlaa lɔwai ɓə gaa pai mɛ̨nįɠaa tii laai la Akabə nwɔ pɛ́lɛ́i ɓa.» |