Tɔɔɓɛlaa dɔlɔɔ 20 - Yálá laawoo hɛɓɛ (dc)Siri tɔɔmun ə kɔ́ pɛlɛ Samari ɓa 1 Aramə tɔɔmun Bɛn-Hadadə ə nwɔ kɔ́kulááɠaai kəlee ɲąąkpɔn, da tɔɔɓɛlaa pow haaɓa kɔ́w hveelɛ, da nwɔ kɔ́ hooɠaa, da gɔ́ kɔ́ wotoloɠaa. Ə li ə Samari mąątínɛ̨n a kɔlaɠa. 2 Ə kɛla tɔɔ Israɛlə tɔɔmun Akabə pɔ, yɛ mą: 3 «Bɛn-Hadadə yɛ, ə́ wɔ walii da ə́ wɔ hɛni kəlee kaa a nwɔ́ɔ́; bɛlɛɛ ə́ nɛ̨ąni da ə́ lonnii nɛlɛ-lɛlɛɛɠaa diɛ.» 4 Israɛlə tɔɔmun ə bulu pənə yɛ mą: «Bələi kpɔlɔɔ tii ə́ mo la, bələ ɓə gaa la nwɔ́ mɛ̨nį nąmu, ɲą́ą́ kwa ɲə́i hɛnŋąą kəlee, ku kaa ə́ wɔɔ.» 5 Gɛlaɠaa di pənə nwɔ̨nɔ̨ di pa a veelɛnąą, diɛ mą: Tɔɔmun Bɛn-Hadadə yɛ: «Ə́ wɔ hɛni, ə́ wɔ wali, da ə́ nɛ̨ąni, ə mą kɛ ə́ lonnii, di tɛɛ bɔ́. 6 Tinąą, ɓɛlɔwai, ŋą́ nuą tɔɔ ə́ pɔɔli, di ə́ yəi bɛlɛ́n ɉɛnŋąą kəlee həɠə, di nąą kpoloon, ə mą kɛ ə́ wɔ luwɔɠaai di wɔ pɛlɛ́ɠaa. Hɛn kpɔ ə́ wɔɔ kiliŋąhiɛ kaa mą ə́ yəi bɛlɛ́n, da tinąą gəlee həɠə.» 7 Israɛlə tɔɔmun ə nɔi nu kpɛa kpɛaa kəlee ŋąąkpɔn, yɛ diɛ: «Mɛ̨nį ɲɔ̨n ɉulɔnui ŋɛ̨i kaa gwɛ́lii la, kaa gaa? Aa nɛ̨́ąni, nónnii, nwɔ́ waliɠaa da ɉɛniɠaa gəlee həɠə.» 8 Nuą kəlee diɛ mą: «Hvo ə́ wəli tɔɔ nwoo ɓa.» 9 Israɛlə tɔɔmun ə Bɛn-Hadadə nwɔ kɛlaɠaai woo pulu pənə yɛ diɛ: «'Ka li kaa Bɛn-Hadadə ɓa: Yii tɔlɔɔ ə vɛli mą́ą́, ŋą́ yili kəlee kɛ, kɛlaa, yii ŋɛ̨i lɛɛ pulu, vá pɛli mą.» Gɛlaɠaa di li di mɛ̨nįɠaa tii kəlee hukulɔ tɔɔmun Bɛn-Hada ɓa. 10 Bɛn-Hadadə ə pənə nwɔ̨nɔ̨ ə di tɔɔ, yɛ diɛ, ka li kaa mą: «Yiihui, Samari lɔi a wala wolo nąą hvo lɛɛ a muluun gbala, ną́nni di wɔ haliɠaai di báá.» 11 Israɛlə tɔɔmun ə nwoo ŋąą pənə yɛ mą: «'Ka li kaa Bɛn-Hadadə ɓa: Nui lii kɔ́ ɓa, hva bilin mo, hvo kɛ yɛ nui aa yee tɛɛ mąą kɛ.» 12 Nąąlɔwai, Bɛn-Hadadə da mɛlaa tɔɔɓəalaa di lɛɛ di kpələi di wɔ həɠə kələɠaai mu, di bələi tii ɓo mą. Yɛ nwɔ ɲɛ̨itɔwɔ nuąi diɛ: Ka ka muhəɠə ka gu kɔ́ pɛlɛ Samari ɓa. 13 Kɛlaa, Yálá kwəi mɛ̨nį hukulɔ mun da ə pa tɔɔmun Akabə pɔ, yɛ mą: «Mɛ̨nįi Yai-Laa ə mo ya ka, yɛ: Yáá nu kpɔn gɛnɛ̨ɛ ŋɛ̨i kaa, gáá gəlee tooi ə́ yee ŋą, yili ɓə yá gɔlɔn na yɛ́ diɛ ɲą́ą́ ɓə a Yai-Laa.» 14 Akabə yɛ mą: «Gbɛɛ haalai ɓə ə́ kaa pai di tooi la yéé ŋą?» Yálá kwəi mɛ̨nį hukulɔ mun yɛ mą: «Yai-Laa yɛ: Daa kulááɠaa haalai ɓə.» Akabə yɛ mą: «Gbɛɛ ɓə pai tɔɔi di ɲɛ̨itɔwɔ diɛ li gɔ́ ɓa?» Yili yɛ mą: «Yɛ́ ɓə!» 15 Akabə ə daa kulááɠaa kəlee ɲąąkpɔn, di kɛ a nu nwun veelɛ ɲee haaɓa kɔ́w hveelɛ. Yili pulu, ə Israɛlə nuą kəlee hee kpəlin na kɛ di ɓo a hinąą waa mɛ̨ihveelɛ. 16 Di kulɔ a hvóló paa nwun ma lɔwai, Bɛn-Hadadə da nwɔ nuąi di ɓo ɉəɠə kələɠaa mu, diɛ pilɛ lɔɔ hu; da dɔɔɓɛlaa pow haaɓa kɔ́w hveelɛi tii kɛ bɔi. 17 Guláá kpɛa kpɛa ɓə tɔlɔɔ kulɔ tɔwɔ, di mo Bɛn-Hadadə ɓa, diɛ mą: «Nuą daa kulɔ Samari diɛ pa.» 18 Yɛ diɛ: «Akɛ di kaa pai gu lɔwai pɛli mɛ̨nį ɓa, ka di hon a di hvulú, akɛ nwɔ̨nɔ̨ di kaa pai kɔ́ kɛ mɛ̨nį ɓa, ka di hon a di hvulú.» 19 Nuąi kulɔ tɔwɔ, di kɛ a daa kulááɠaa, ɛlɛɛ gɔlaɠaɠaa di lɛɛ di pulu. 20 Nu tɛi tɛi ə nwɔ nu paa; tɔɔmun Bɛn-Hadadə da nwɔ kɔ́kulááɠaai di pu, Israɛlə lonnii di hvilɛn di pulu. Aramə tɔɔmun Bɛn-Hadadə ə tɛ nwɔ hooi mɛ̨i ə pu, da hoo nąmįną takpɛliɠaa. 21 Yili pulu, Israɛlə tɔɔmun ə pənə ə kulɔ, ə too ɉoo nąmįną hu da nwotolo nąmįną, ə Aramə nuą paa kpɔ kɛnɛ̨. 22 Yálá kwəi mɛ̨nį hukulɔ mun ə pənə yɛ Israɛlə tɔɔmun ma: «'Li kpɔ tɔwɔ pələ a liikpələ da huwalawalalaa, kɛlaa, mɛ̨nįi ə kaa gɛi ə́ kiliŋą laa mą; mąąhɔlɔɓo, gwɛlan pai, Aramə tɔɔmun gaa pai muhəɠəi yɛ́ a kɔ́.» Aramə ə pənə nwɔ̨nɔ̨ ə muhəɠə Israɛlə laa ɓa Yálá kwəi mɛ̨nį hukulɔ mun dɔ̨nɔ̨i tii ə pənə ə mɛ̨nį ɓo 23 Aramə tɔɔmun bɔ nuą di mo mą, diɛ mą: «'Nuąi tii di wɔ Yálái kaa a yee hu Yálá, yili ɓə gɛ di yee yɛ tɛɛ la guɔ; gu kɔ́ pɛlɛ kɛa diɛ nɛ̨ŋɛ̨ hu. Ku laai na kuɔ gu yee a kiɛ tɛɛ diɛ. 24 Yii kani mąąnɛ̨ɛ̨ ə́ gɛ, ya ka: Dɔɔɓɛlaa yee kulɔ, ə́ di mąąhvalin a lɔi ɲɛ̨itɔwɔ nuą. 25 Yɛ́ kpinįi, kuláá nįnɛ̨ɠaa həɠə, di walawala pələ ə kɛ yɛ bələi dɔlɔɔɠaa di kɛ la, a diɛi lɛɛ gɔ́ hu, ə mą kɛ hooɠaa da gɔ́ kɔ́ wotoloɠaa ɛlɛɛ, gu gɔ́ pɛlɛ diɛ nɛ̨ŋɛ̨ lɔi hu, gbəli hu gu yee kaa pai kiɛ tɛɛ diɛ.» Bɛn-Hadadə ə di woo hon, ə gɛ yɛ bələi di mo la. 26 Gwɛlan tii tɛɛ pulu, lɔ nwɔ̨nɔ̨ a nąąlɔwai, Bɛn-Hadadə ə nwɔ kɔlaɠai ɲąąkpɔn Aramə, diɛ li kɔ́ pɛlɛi Israɛlə ɓa Afɛkə. 27 Israɛlə nuą kəlee di di ɲąąkpɔn, diɛ li Aramə nuą laakwiɛn ɉii a kɔ́. Israɛlə nuą di di wɔ kɔ́laɠi hee Aramə nuą tənən ma, a gbulu pɛlɛɛ hveelɛ yɛ ɓɛlaaɠaa; ya pa, Aramə nuą daa kɛ nɔi kəlee kpɛɛ mą a di kpulu. 28 Yálá nwɔ nui ə mąą lɛɠɛ Israɛlə tɔɔmun ma, yɛ mą: «Yii Yai-Laa ə mo ya ka: Yii Aramə nuą diɛ Yai-Laa kaa a yee hu Yálá, hvo a nɛ̨ŋɛ̨ hu Yálá; gáá nu kpulu ŋɛ̨i kəlee lɔi ə́ yee ŋą ə gɛ ka gɔlɔn kaa diɛ: Ɲą́ą́ ɓə a Yai-Laa.» 29 Hvóló mɛ̨ihveelɛ yee mu, gɔ́laɠaɠaa hiɛi kɛ di kee tənən ma. Voló mɛ̨ihveelɛ yələ ɓə di gɔ́ yili ŋą. Israɛlə nuą di Aramə nuą nu waa nwun dɔ̨nɔ̨ paa kɔ́kulááɠaai kɛ di kɔ́wɔ ŋą di lɔwai. 30 Nuąi yiiɠaai pu, di li di mąąkilɛi Afɛkə, daa mąąkpɛ hį́i ə pu di mɛ̨i, nuą tii, di kɛ a nu waa pow hveelɛ kɔ́w mɛ̨ihveelɛ. Yii ɓaa Bɛn-Hadadə nwɛi, ə pu, ə tɛ taai, ə li ə mąąkilɛ pɛlɛ́ lon da mu. Akabə ə Bɛn-Hadadə lɛɛ a vulú 31 Bɛn-Hadadə pɔ nuą diɛ mą: «Kwaa bələ mɛ̨n, diɛ Israɛlə pɛ́lɛ́i mu tɔɔɓɛlaa da nu ɲɛ̨imąąwɛli kaa. Yili ɓa, ka gu ɓíi haɠaɠaa yili guɔ, gu yɛli kpulɔn gu gwąną, gu li gu tɛ́ɛ́ pili Israɛlə tɔɔmun ma. Gbəli hu kiɛ, gaa pai ə́ nɔ̨ɔ̨ lɛɛi ə́ hu.» 32 Di míi haɠaɠaa yili diɛ, di di yeeɠaa yili, di naa di nwuɔ̨, di li Israɛlə tɔɔmun nííla; diɛ mą: «Ə́ wɔ luwɔ Bɛn-Hadadə gaa nɛ̨ɛ̨mąą hvəi yɛ́, yɛ, ə́ nɛɛ a vulú.» Akabə yɛ diɛ: «Nán non Bɛn-Hadadə tii kaa ni yɛnɛ̨ɛ̨?» 33 Bɛn-Hadadə nwɔ nuąi di gaa, diɛ Akabə aa ɲɛ̨i lɛlɛɛ hee diɛ, di di mąąhulɔ, ə gɛ, di Akabə hon nwoo hu, diɛ mą: «Bɛn-Hadadə kaa a ə́ nąn non?» Akabə yɛ diɛ: «Ka li ka mo Bɛn-Hadadə ɓa, ə pa.» Bɛn-Hadadə ə pa ə həli Akabə ɓa, Akabə ə dɛ ə ɉee nwɔ wotoloi hu. 34 Bɛn-Hadadə yɛ mą: «Daaɠaai ną́n ə ɉəɠə ə́ nąn ɲəi, pənə ə́ gəlee həɠə. Ya pɛli ə́ ə́ wɔ lɔwɔ́tɔɔ pɛlɛ́ɠaa tɔɔ Damasə, yɛ bələi ną́n ə kɛi gɛ la Samari.» Akabə yɛ mą: «Mįnɛ̨i ŋɛ̨i gwa yɛ́ gu kaa ɉəɠəi, ɉaalai, gáá ə́ lɛɛi laa ə́ li.» Bɛn-Hadadə da Akabə di mįnɛ̨ həɠə, ə nɛɛ laa ə li. Yálá ə haŋą Akabə ɓa nwɔ hviikpɛɛ laa mąą mɛ̨nį ɓa 35 Yai-Laa ə gwəi mɛ̨nį hukulɔ nuą di wɔ kalan non dɔ̨nɔ̨ tí, yili yɛ mɛlan ma: «Gɛ́lɛ!» Kɛlaa, mɛlan və gɛ hvo gɛlɛ. 36 Nui ŋɛ̨i di hvo gɛlɛ, ə tinɛ̨n, yɛ mɛlan ma: «Mɛ̨nįi Yai-Laa ə́ ə́ tí la, yii hvo gɛ li, ə́ ɲɛ̨i hee laa, ə́ kaa lɔ pai həɠəi gwɛ́lɛ ɓɛ, yala ta ə wolo yɛ́.» Di di ɓɛlaɓo lɔ, da yala di kwilɛn, ɲala ə wolo mą ə baa. 37 Nui tɔ́nɔ̨i tii, ə nu takpɛli kaa, yɛ yili ɓa: «Gáá nɛ̨ɛ̨mąą hvəi yɛ́, gɛ́lɛ!» Ɉulɔnui tii ə pɛlɛ mą ə gɛlɛ kpɔ nɛ̨ɛ̨-nɛ̨ɛ̨, ə mąą nwąną. 38 Yálá kwəi mɛ̨nį hukulɔ mun tii, ə li, ə tɔɔ bələ kwɛlɛ, yɛ Israɛlə tɔɔmun mąąkpɔn; ə həɠə mɛla yili ɲɛ̨i. 39 Yii kɛa tɔɔmun ə kɛi tɛɛ, ə tomą, yɛ mą: «Tɔɔmun, ə́ wɔ luwɔi ni di həɠə kɔ́ mɛ̨i diɛ pa, ya ka tii nu ta ə kulɔ mɛlaa pɔ, ə pa a hulɔnu ta, yɛ mą́ą́: ‹Ə́ ɲɛ̨i kɛi nui ŋɛ̨i ɓa, a pili, ə́ nwun a lɛɛ ɉu, a wala kɛ tii wali kwələ waa haaɓa ɓə ya gbɛɛ la.› 40 Yaan, ɓɛlɔwai ə́ wɔ luwɔi ə kɛ kólóɠaa kɛ la, yɛ li ɓɛ pələ da ɓɛ pələ, nui tii ə pili.» Tɔɔmun yɛ mą: «Yɛ́ kpinįi yaa ə́ kpɔwɔ kiti tee!» 41 Yálá kwəi mɛ̨nį hukulɔ mun ə nɛɛ mą ə ɉəɠə ɓɛla həɠə ɲɛ̨i, Israɛlə tɔɔmun ə gaa, ə gɔlɔn gɛa yɛ Yálá nwɔ kwəi mɛ̨nį hukulɔ mun da li. 42 Yili yɛ mą: «Mɛ̨nįi Yai-Laa ə mo ya ka: Yii nui ŋɛ̨i ŋą́ doo ə́ yəi, gɛ́ ə́ baa, yáá nɛɛ laa, yɛ́ ɓə ə́ kaa lɛɛi a nąą hɛn, nwɔ nuąi kɛi pa haai, di mąąhvalin maa ə́ wɔɔ nuąi.» 43 Israɛlə tɔɔmun ə pənə ə li bɔɔli Samari, gɔlɔ haa mą, yá aa laa gɔlɔi niiholiɛ. |