Tɔɔɓɛlaa dɔlɔɔ 19 - Yálá laawoo hɛɓɛ (dc)Eli hvii ə kpɛɛ 1 Mɛ̨nįi kpɔ Eli ə gɛ, Baalə laa yəlikɛ nuąi ə di paa a ɓɔwa kwɛaa, tɔɔmun Akabə ə gəlee hukulɔ nɛ̨ą Ɉezabɛlə ɓa. 2 Ɉezabɛlə ə nu ta tɔɔ Eli pɔ, yɛ mą: «'Li, yɛ́ Eli ɓa: ‹Ɉezabɛlə aa gwɛla a nwɔ haliɠaa kəlee laa, yɛ diɛ: «Tinąą, ɓɛlɔwai, mɛ̨nįi tii ə́ naa Baalə laa yəlikɛ nuąi diɛ, a da laa yɛ́.»›» 3 Bələ mɛ̨n Eli ə mo, ə pu, ə bɔmun nɛɛ laa, yɛ li mąąkilɛi Beɛrə-Seva, yai kɛ a Ɉuda taa ta. 4 Eli yaa kpinįi ə hvóló tɔ̨nɔ̨ hiɛ kɛ yɛ li nɔi pun ɉu. Líi ə mo laa, ə hee ɉenɛ wulu mu. Eli ə hee laa, yɛ haa huhvɛli, yɛ kɛ mą: «Oo kə! Yai-Laa! Víi aa kpɛɛ kpɔ kɛnɛ̨, ɉə́ɠə kɛa yɛnɛ̨ɛ̨, və́ hviɛlaɓo li və́ tɛɛ ną́nni diɛ.» 5 Yili pulu ə laa nwulu nįnįn mu, yíi ə tɛɛ la. Kɛlaa, malaka ta ə nwun, yɛ mą: «'Ə́ muhəɠə, ə́ kɔ̨nɔ̨n mįi, ə́ ə́ kpələ.» 6 Eli ə muhəɠə, ə nwun dɔwɔ kaa, ə nwɔ̨mįi kaa laani, mɔ̨n ŋąą kwɛni hulaa mɛ̨i, ya heɛ gwɛlɛ. Eli ə kɔ̨nɔ̨n mįi, ə gbələ, ə pənə ə laa. 7 Kɛlaa, Yai-Laa nwɔ malaka ə pənə nwɔ̨nɔ̨ ə pa, ə nwun, yɛ mą: «'Ə́ muhəɠə ə́ kɔ̨nɔ̨n mįi, mąąhɔlɔɓo, bələi ə́ pai ɉon ɉii la gwɛaai.» 8 Eli ə muhəɠə, ə kɔ̨nɔ̨n mįi, ə gbələ, yii kɛa ə huwalawala hɔlɔɓo gɔ̨nɔ̨n tii mįi pulu, ə hvóló pow nąąn da kpinį pow nąąn ɉiɛ kɛ, yɛ li Yálá nwɔ yeei ɓa, yai gaa Horɛbə. Yálá ə pənə ə Eli hvaŋąlɔ 9 Həlii Eli ə mo Horɛbə yee ɓa, ə lɔ kwɛni wolo ta hu, ə yíi laa. Yai-Laa ə pələ ɓo mą, yɛ mą: «Eli! Lə mɛ̨nį ɓa ə́ kaa ɓɛ?» 10 Eli yɛ mą: «Yai-Laa Mɛ̨nį Kəlee ŋą Hééɓomun Yálá, ə́ wɛli kɛ pələ mą́ą́, aa tolo lɔ ɉú, vá pɛli mą ɲɛ̨́i heei Israɛlə nuą túwɔ́ pələ ɲɔ̨n mą. Hvo gaai, daa ə́ wɔɔ mįnɛ̨i mąą kala, daa ə́ wɔɔ haláá kulɔiɠaa kəlee wolo, ɛlɛɛ, daa ə́ kwəi mɛ̨nį hukulɔ nuą kəlee paa a ɓɔwa kwɛaa, ɲą́ą́ dɔ̨nɔ̨ lɔ ɓə ŋą́ą́ lɛɛ, ya ka diɛ di nwún napili.» 11 Yai-Laa nwɔ malaka yɛ Eli ɓa: «'Kulɔ ə́ li ə́ tɔɔ ɲee mɛ̨i, ə́ ə́ ɲɛ̨i kɛ Yai-Laa tɔwɔ, ə́ ə́ ɲɛ̨i hee Yai-Laa kaa pai tɛɛi.» Ɲąąɓa, tulɔ hvaŋą kɛnɛ̨ ta ə tɛɛ, vaŋa kɛnɛ̨ pələ, yɛ yee ɓɛla, yɛ kwɛniɠaa ɓɛla. Kɛlaa, Yai-Laa hvo kɛ vaŋąi tii hu. Vaŋąi tii tɛɛ pulu, lɔi ə kpɛlin kpɔ kɛnɛ̨, Yai-Laa hvo kɛ nɔi kpɛlin ŋąą tii hu. 12 Nɔi kpɛlin ŋąą pulu, nwɔ̨n ə kulɔ. Kɛlaa, Yai-Laa hvo kɛ nwɔ̨n ɉu. Nwɔ̨n dɛɛ pulu, hvaŋą hvɛlɛ tɛ-tɛ ə tɛɛ, 13 yii lɔ Eli ə vaŋą hvɛlɛ tɛ-tɛi tii tɛɛ mɛ̨nį kili kɔ́lɔn, ə nwɔ biliɉui pɛlɛ ɲɛ̨i, ə kulɔ ə tɔɔ gwɛni wolo laaləi. Woo ta ə həli Eli ɓa, yɛ mą: «Eli, lə ɓə ə́ kaa gɛi ɓɛ?» 14 Eli yɛ mą: «Yai-Laa Mɛ̨nį Kəlee ŋą Hééɓomun Yálá, ə́ wɛli kɛ pələ mą́ą́, aa tolo lɔ ɉú, vá kpɛli pɛli ɲɛ̨́i heei Israɛlə nuą túwɔ́ pələ ɲɔ̨n ma. Hvo gaai, daa ə́ wɔ mįnɛ̨i maa kala, daa ə́ wɔ haláá kulɔiɠaa wolo, ɛlɛɛ, daa ə́ kwəi mɛ̨nį hukulɔ nuą kəlee paa a ɓɔwa kwɛa, ɲą́ą́ dɔ̨nɔ̨ gbən nɔ ɓə ŋą́ą́ lɛɛ, ya ka, diɛ di nwún napili.» 15 Yai-Laa yɛ mą: «'Ə́ muhəɠə, ə́ ə́ pulu pənə, ə́ li Damasə nɔi pun ɉu pələ, yá həli laa, ə́ dɔɔ wulɔ lɔ Hazaɛlə ɓa, ə́ gɛ a Aramə tɔɔmun. 16 Yili pulu, ə́ dɔɔ wulɔ lɔ Nimsi lon Ɉehu ɓa, ə́ gɛ a Israɛlə tɔɔmun. Ɛlɛɛ, Safatə lon Elise, yai gaa a Avɛlə-Mehola mun, 'ə́ dɔɔ wulɔ lɔ mą, 'ə́ gɛ a gwə́i mɛ̨nį hukulɔ mun a ə́ mąąhvalin. 17 Nui lɔpe pai kulɔi Hazaɛlə nwɔ ɓɔwai yee wolo ɓa, Ɉehu a baa, nui lɔpee pai kulɔi Ɉehu yee wolo ɓa, Elise a baa. 18 Kɛlaa, gáá pai nu kpəli wolo lɛɛi Israɛlə a nu waa mɛ̨ihveelɛ diɛi di hvo ta pɛlɛ li di liiɓa, di hvo kwɛli hvilɛn Baalə ɓa.» Eli ə Elise hee a mąąhvalin 19 Eli həɠɛɛ laa, ə li ə Safatə lon Elise kaa yɛ kɛɛhin, aa kpinįn bow kɔ́w tɔ̨nɔ̨ kulɔ, ə ɓo gɔw hveelɛnąą ɓa a gbəli. Eli ə nwɔ biliɉui pu Elise kalan ŋą. 20 Elise ə nįŋɛ̨ɠaa lɛɛ laa, ə hvilɛn Eli pulu a gilɛ, yɛ mą: «Nɛ́ɛ́ laa, ŋą́ li ŋą́ yələwala too néé da ną́n diɛ, guɔ kɛa li.» Kɛlaa, Eli yɛ mą: «Lə kpɔ ɓə ŋą́ gɛ yɛ́?» 21 Elise ə pənə ə li, ə nwɔ kɛɛhin nįŋɛ̨ hveelɛi paa ə gulɔ a haláá, ə nwun ma wulu kɛ a gwɛi, ə ɉuwɔ yili, da bɔ nuą di mįi. Yili pulu ə hvilɛn Eli pulu, a nwɔ tímun. |