Tɔɔɓɛlaa dɔlɔɔ 18 - Yálá laawoo hɛɓɛ (dc)Karmɛlə haláá 1 Yələ tamąą tɛɛ pulu, Yai-Laa ə pələ ɓɔ Eli ɓa a gwɛlan ɉaaɓa nąą, yɛ mą: «'Li! Ə́i kpɔwɔ lɛ Akabə ɓa, gáá pai tulɔ pui lɔi mɛ̨i.» 2 Eli ə li, ə gbɔwɔ lɛ Akabə ɓa. Pulu aa kpɔlu Samari lɔi hu nąąlɔwai. 3 Akabə ə Ovadiahu təli, ya ɓə kɛ dɔɔ pɛlɛ́ nwun na, Ovadiahu yaan, ə kɛi ɲɔw Yai-Laa ɓa kpɔ kɛnɛ̨. 4 Ɓɛlɔwai Ɉezabɛlə ə Yálá kwəi mɛ̨nį hukulɔ nuą paa la, Ovadiahu ə Yálá kwəi mɛ̨nį hukulɔ nuą nu nwun dɔ̨nɔ̨ həɠə ə di loo. Ə di loo a nu pow lɔɔli lɔɔli kwɛni wolo hveelɛ hu, ɛlɛɛ, yɛ di kɔ̨nɔ̨n gɛ a lɛɠɛ da yá. 5 Akabə yɛ Ovadiahu ɓa: «'Li, nɔi ɲa nwun gulɔi kəlee ɓa, moloon gəlee hu, gbəli hu gu kaa pai kala tiliin ɉɔlɔɓoi, ə kɛ a díɲɛ̨-həɠə hooɠaa da ɉooɠaa kɔ̨nɔ̨n, diɛ pɛli lɛɛi gu yəi a di hvulú. Ɛlɛɛ, gu hva kiɛ kpaan daatɛlɛɛɠaa bələ tɔ̨nɔ̨ paai.» 6 Di nɔi ŋąąkwɛlɛ di lɔwai, ɓɛi di tɛitɛi di kɛi pa tɛɛi laa. Akabə yaa tɔ̨nɔ̨ ə ɉon a nwɔ pələ, Ovadiahu yaa kpɛli ə ɉon a pələ takpɛli. 7 Ovadiahu kɛɛ bələ pɔ, da Eli di kwiɛn. Ovadyahu ə gɔlɔn, ə pɛlɛ niiɓa nɔi ɓa, yɛ mą: «Nwɔ́ mɛ̨nį nąmu Eli! Yɛ́ li?» 8 Eli yɛ mą: «Ee! Ɲą́ą́ li. 'Li ə́ mo ə́ nwun nąmu ɓa, yɛ mą: ‹Ŋą́ą́ Eli kaa.›» 9 Ovadiahu yɛ mą: «Mɛ̨nį ɲɔ̨n nə kɛɛ ɓə ŋą́ gɛ, yai ə́ ka dóói Akabə yee ŋą. Yɛ pa báái? 10 Akɛ Yai-Laa ə́ nwɔ Yálái kaa a vulú, lɔi ta hvo laa, tɔɔlaa ta hvo laa, ɓɛi nwɔ́ mɛ̨nį nąmu Akabə hvo ni nuą tɔɔ li laa, ə́ kwɛli mɛ̨nį ɓa. Akɛ dɔɔlaa tii, a wala kɛ tii, nɔi tii hu nuą da kɛ mą: ‹Hvoo ɓɛ!›, a kɛ diɛ: ‹Ka ka kwɛla, akɛ ka hvo ni gaa li!› 11 Ɛlɛɛ, yiihu kɛa, yɛ́ kɛ mą́ą́: ‹'Li yɛ́ ə́ nąmu ɓa: «Ŋą́ą́ Eli kaa.»› 12 Gbəli hu, gáá lɔ pai həɠəi ɓɛ, Yai-Laa nwɔ Kilii yɛ li a yɛ́ ɓɛi və́ nąą kɔ́lɔn; ə lɛɛ, ŋą́ mo Akabə ɓa, a wala ə́ kaa, gaa pai báái. Ya pa, ə həɠə múhəɠə yələ ɓa, ŋą́ ɲɔw Yai-Laa ɓa. 13 Akɛ tii, mɛ̨nį ta ŋą́ gɛ, di hvo ta ɉukulɔ li námu ɓa, ɓɛlɔwai Ɉezabɛlə ə kɛi Yai-Laa kwəi mɛ̨nį hukulɔ nuą paa la, ŋą́ Yai-Laa kwəi mɛ̨nį hukulɔ nuą nu nwun dɔ̨nɔ̨ loo kwɛni wolo hveelɛ hu a nu pow lɔɔli lɔɔli, gɛ́ di kɔ̨nɔ̨n gɛ a lɛɠɛ da yá. 14 Yiihui ŋɛ̨i, yɛ́ kɛ mą́ą́ li ə́ mo ə́ wɔ mɛ̨nį nąmu tɔɔmun ma, yɛ kɛ mą: ‹Eli kaa pai.› Ŋą́ li moi tii mą, a báá.» 15 Eli yɛ mą: «Akɛ Yai-Laa Mɛ̨nį Kəlee ŋą Hééɓomun ŋɛ̨i gáá tíi mą gaa a vulú; háákələi kpɔ-kpɔɔ Akabə a kələi gáá.» Eli da Akabə di di kee kaa 16 Ovadiahu ə li ə həli Akabə ɓa, ə nwoo hukulɔ mą. Akabə ə həɠə yɛ li Eli laakwiɛn ɉii. 17 Eli kaai Akabə ə mo, yɛ mą: «Eli! Yɛ́ ɓəi! Yɛ́i yáá kpalo ɓɛla Israɛlə ɓa yɛ́ ɓəi!» 18 Eli yɛ mą: «Ɲą́ą́ və́i kpalo ɓɛla Israɛlə ɓa. Yɛ́mun mə ka ə́ nąn ɲəi bɛlɛ́n nuą. Mąąhɔlɔɓo, kaa lənə Yai-Laa nwɔ tiɓoɠaa diɛ, ɛlɛɛ yáá hvilɛn Baalə pulu. 19 Yiihu kɛa, Israɛlə nu huwu kəlee ɲąąkpɔn gwɛ́lɛ Karmɛlə yee nwuɔ̨, ə mą kɛ Baalə laa yəli kɛ nuą nu nwun nąąn yee lɔɔli; da Asera laa yəli kɛ nuą, nu nwun nąąn, diɛi da Ɉezabɛlə ni da kɛ kɔ̨nɔ̨n mįi gee ɓa.» Eli da Baalə laa yəli kɛ nuą di di kee kaa Karmɛlə yee nwuɔ̨ 20 Akabə ə Israɛlə nuą kəlee təli da Baalə laa yəli kɛ nuą Karmɛlə yee nwuɔ̨. 21 Eli ə mąą lɛɠɛ diɛ, yɛ diɛ: «Ka káá pai lɛɛi tɔɔi yai yai, ə lɛɛ la ɉu mįnɛ̨ lɔwai? Akɛ ka káá lɛɛi Yai-Laa gu wɔ Yálái pulu, ka lɛɛ bulu; akɛ ka káá hvilɛn ɉii Baalə pulu, ka hvilɛn bulu.» Kɛlaa, nuą di hvo pɛli woo ta ɓoi. 22 Eli yɛ Israɛlə nuą diɛ: «Ɲą́ą́ dɔ̨nɔ̨ lɔ ɓə ŋą́ą́ lɛɛ a Yai-Laa kwəi mɛ̨nį hukulɔ mun; Baalə nwɔ nuąi di ɓo a nu nwun nąąn yee lɔɔli. 23 Ka nįŋɛ̨ hilɛ hveelɛ tɛɛ kɛa ku pɔ. Baalə nwɔ nuąi di dɔ̨nɔ̨ həɠə ɉu a di wɛi, di baa, di naa kwɛi mɛ̨i, kɛlaa di hvo nwɔ̨n nɛɠɛ mą. Ɲą́ą́ gbɛli, ŋą́ nwɛi kɛ lɔ tii, ŋą́ nwɔ́ nįŋɛ̨i paa, ŋą́ naa gwɛi mɛ̨i, vá nwɔ̨n nɛɠɛ mą. 24 Yili pulu, ka ka woo tɛ ka wɔ halii pɔ pələ, ɲą́ą́ gbɛli, ŋą́ nwoo tɛ Yai-Laa pɔ pələ. Ɲálá hveelɛ tii, yii a nwɔ̨n dɛɛ, a kɛ tii ya ɓə a Yálá hvulú mąą.» Nu kəlee diɛ mą: «Kwaa hvaa mą.» 25 Eli yɛ Baalə laa yəlikɛ nuąi diɛ: «Ka ka wɛi həɠə ɉu, ka baa; Mąąhɔlɔɓo, kaa ɓə ka tamąą. Ka ka woo tɛ ka wɔ halii pɔ pələ, kɛlaa ka hvo nwɔ̨n ɉee gwɛi ɓa.» 26 Di di wɔ nįŋɛ̨i həɠə, ɛlɛɛ di baa; yili pulu, di di woo tɛ Baalə pɔ pələ, ə həɠə yələwala ɓa, ə lɛɛ ɉu hvóló ə haŋą; diɛ kɛ mą: «Baalə, ku woo pulu pənə!» Kɛlaa woo ta hvo tɔɔ, nu ta hvo kpɛli mɛ̨nį ta ɓo, di kɛi mąną di wɔ haláá kulɔi di bɛli níila. 27 Hvóló paa nwun ma, Eli ə kɛi yɛlɛ kulɔ di hu, yɛ kɛ diɛ: «'Ka tomą a ka nwąnąi, kɛlɛi yálá li-e! Mąą mɛ̨nįɠaa tamąąi, aa li kiɛ kɛɛnąą ta. Gaa li kiɛ pələ pɔ, a wala kɛ tii gaa kiɛ yíi. Hvo kɛi ka ɲį́nąąɓo.» 28 Di kɛi tomą kpɔ a nwalawalaa, ɛlɛɛ, yɛ bələi da kɛ gɛi la a bɔlɔ, diɛ di mąą nwąną a ɓɔwa da kpalaɠaa; ə lɛɛ kpɔ ɉu ɲąmą yɛ kulɔ di kɔ́lɔ nąą kəlee. 29 Hvóló paa kɛa nwun ma, di kɛi lɔ tomą, ə lɛɛ ɉu ə həli la yələwulii haláá kulɔi lɔwai ɓa. Kɛlaa woo ta hvo tɔɔ, di hvo woo ɲąą pənə hɔlɔɓo, mɛ̨nį ta hvo kɛ. 30 Eli yɛ nuą diɛ: «Ka lɛɠɛ mą́ą́», nuą kəlee di lɛɠɛ mą, Yai-Laa nwɔ haláá kulɔi tii kɛ daa gala, Eli ə nąą pɛli. 31 Ə kwɛni pow kɔ́w hveelɛ laa laa, yɛ bələi Israɛlə nu huwu hee kpəlin na kaa la a Ɉakɔbə lonnii, yai Yai-Laa ə kɛ mą: «Di kaa pai kɛi ə́ laa ɓaa Israɛlə.» 32 Eli ə gwɛniɠaai tii pɛli a haláá kulɔi, Yai-Laa laa ɓa. Yili pulu, di lɔwa tee, di ɉaláá kulɔi mąątinɛ̨n a téa kwələ ɲąą hveelɛ pui yá hu. 33 Ə gwɛi laa, ə ɉuwɔ hu tee ə bu gwɛi mɛ̨i. 34 Yɛ diɛ: «Ka nowaɠaai ŋɛ̨i laahvɛɛ a yá, a yáləɠi ɲą nąąn, ka da pu ɉuwɔ ɓa, da gwɛi.» Nuą di kɛ tii. Eli yɛ nwɔ̨nɔ̨ diɛ: «'Ka pənə nwɔ̨nɔ̨ ka gɛ tii.» Nuą di gɛ tii. Yɛ nwɔ̨nɔ̨ diɛ: «'Ka pənə nwɔ̨nɔ̨ ka ɉaaɓa nąą kɛ.» 35 Yá kpoloon ə ɉaláá kulɔi mąątinɛ̨n. Nowai tii di dee, naa ə hvee a yá. 36 Yələ wulii haláá kulɔi lɔwai, Yálá kwəi mɛ̨nį hukulɔ mun Eli ə lɛɠɛ laa, ə nwoo tɛ yɛ diɛ: «Yai-Laa! Abrahamə Isaakə, da Ɉakɔbə ni di wɔɔ Yálá, nɛ háákələi Israɛlə nuą diɛ, yɛ́ diɛ yɛ́ ɓə a Yálá Israɛlə lɔi hu, ɛlɛɛ, gɛ́ ɓo a ə́ wɔ tímun. Ɛlɛɛ, ə lawoo pɔ ɓə ŋą́ mɛ̨nįɠaa kəlee kɛ la. 37 Nwóó ŋąą pənə, Ee kə! Yai-Laa nwóó ŋąą pənə. 'Gɛ, nu huwui ŋɛ̨i ə gɔlɔn yɛ kɛ, yɛ́ ɓə a Yálá, 'Gɛ, di gɔlɔn diɛ kɛ yɛ́ ɓə yá ə́ wɔ nu huwui lii tinɛ̨n ə́ pɔ pələ.» 38 Yai-Laa ə nwɔ̨n gulɔ yələi, ə ɉaláá hɛnŋąą kələn, ə gwɛi kələn, ə gwɛniɠaa kələn, bɔlɔi di gulɔ di dɔɔ, ə kəlee kələn, ɲái kɛ nowa hu, ə gbala. 39 Ɓɛlɔwai Israɛlə nuą di gaa la tii, nu kəlee di pɛlɛ nɔi ɓa, diɛ kɛ: «Yai-Laa ɓə a Yálá! Yai-Laa ɓə a Yálá kpɔɔ kpɔɔ.» 40 Eli yɛ diɛ: «Ka Baalə laa yəlikɛ nuą hon, ka hvo dɔ̨nɔ̨ kpɛli lɛɛ laa hvo pu.» Di nuą tii kəlee hon, Eli ə li a gəlee Kisɔn ɲa ɓoloon bɔ; ə di kəlee di nwun dee laa. Tulɔ ə pənə ə pu 41 Yili pulu, Eli yɛ Akabə ɓa: «'Li, ə́ ə́ kɔ̨nɔ̨n mįi, ə́ ə́ kpələ, mąąhɔlɔɓo, tulɔ tuwɔ tín gaa tɔɔi.» 42 Akabə ə li yɛ gɔ̨nɔ̨n mįi, ə gbələ; nąąlɔwai, Eli yaa kpɛli, yɛ tɛ Karmɛlə yee ton ɉu, ə mąą pɛlɛ, ə nwun nɔ gɔwɔ lɔwai. 43 Yɛ bɔmun ma: «'Tɛ́, ə́ gboloyá mɛ̨i pələ kaa!» Yili ə li ə nąą kaa, kɛlaa, hvo hɛn da kaa. Eli yɛ mą: «Kɛ lii yɛ́ nąą kaa gee mɛ̨i mɛ̨ihveelɛ.» 44 Mɛ̨ihveelɛnąą, Eli bɔmun yɛ mą: «Tulɔ kpinįn nogolo kaa gboloyá mɛ̨i.» Eli ə pənə yɛ mą: «'Li ə́ yɛ́ Akabə ɓa, ə kɛhu ə ɉoo hąą yili, ə li, ə gɛ, tulɔ hvo pa bələ too dɔwɔ.» 45 Tulɔ kpinįn ə kɛi ɲələi tɛɠi, hvaŋą yɛ dɛɛ; tulɔ ə pu kpɔ kɛnɛ̨. Ə kɛ kpɔlɔɔ tii, Akabə aa kɛ tɛ ɉoo mɛ̨i yɛ li Izreɛlə daai pələ. 46 Eli ə ɉąą yili, Yai-Laa ə ɲee pɛlɛ mɛ̨i, ə tɛɛ Akabə tɔwɔ a gilɛ, ə lɛɛ la ɉu, di li di həli Izreɛlə. |