Tɔɔɓɛlaa dɔlɔɔ 17 - Yálá laawoo hɛɓɛ (dc)Eli ə hvóló laa tee mɛ̨nį ɓo 1 Yálá kwəi mɛ̨nį hukulɔ mun Eli, yai həɠə Tisbe Galaadə lɔi hu, ə mo tɔɔmun Akabə ɓa, a ɲələi tii, yɛ mą: «Akɛ kpɔ Yai-Laa Israɛlə nwɔ Yálá, yai gáá tíi mą, gaa a vulú, gáá moi yɛ́, gɛ́ yɛ́: tulɔ hvo pai pui, ɛlɛɛ, luwuluwu hva pu, gwɛlanŋaa ŋɛ̨i yee mu, hvo kɛli ŋą́ hvaa mą, ya ɓə tulɔ a pu la.» Eli ə li Keritə kwɛlɛ 2 Yili pulu, Yai-Laa yɛ Eli ɓa: 3 «'Həɠə ɓɛ, ə́ li voló ɓɛlai pələ; ə́ ə́ loo Keritə huluun ɉii, Ɉurdɛn kwɛlɛ, 4 yɛ́ ə́ kpələ ɲá huluun ɉii, ɛlɛɛ, ŋą́ą́ Goą-goąnɠąą tí, diɛ ə́ kɔ̨nɔ̨n gɛ gɛɛnąąi tii ɓa.» 5 Eli ə gɛ lɔ yɛ bələi Yai-Laa ə mo la mą. Ə li, ə hee Keritə yá lon bɔ, Ɉurdɛn voló ɓɛlai pələ. 6 Goa-goanŋąą di gɔ̨nɔ̨n da huwo a yələwala, da yələwulii. Eli ə kɛi gbələ ɲa huluun ɉii. Eli da Sarepta nɛ̨ɛ̨nui di mąą mɛ̨nį 7 Gwɛlan tii yee mu, hvóló kɛnɛ̨ ə hɔɔ. Eli ə li mąąkilɛi Keritə huluun ɉii. Kɛlaa, ɉu hvo kɛa, ɲai tii ə kpala, mąąhɔlɔɓo, tulɔ hvo kɛi pu. 8 Nąąlɔwai ɓə Yai-Laa ə kɛ la Eli ɓa: 9 «'Ə́ muhəɠə, li Sarɛpta Sidɔn lɔi hu, ə́ lɛɛ laa; ŋą́ą́ kalanin da tí, yɛ ə́ kɔ̨nɔ̨n gɛ.» 10 Eli ə muhəɠə, ə li Sarɛpta, ə li lɔ daa kpala, kalanin da ə kɛi kwɛi kwɛli, Eli ə dəli, yɛ mą: «Ya laɠi ta wolo tɛɛ bɔ́ ŋą́ gbələ.» 11 Nɛ̨ɛ̨nui tii kɛɛ lii ɲa haɠai, Eli ə pənə ə dəli bulu pələ, yɛ mą: «Néé! Yá li ə́ lɛɠɛ kpuwɔ lon bɛlɛ mą ə́ paa la.» 12 Nɛ̨ɛ̨nui yɛ Eli ɓa: «A tɛ̨ą, yɛ bələi Yai-Laa kaa la vulú! Lɛɠɛ hvo ɲə́i! Lɛɠɛ hunwɔ logolo tiikpə ɓə ɲə́i nəɠi kpon ŋą, ɛlɛɛ wulɔ logolo tiikpə ɓə ɲə́i múluun ɉu. Yili nwɔ kwɛi wolo lɔ ka ŋɛ̨i ŋą́ kɛi gwɛli, ŋą́ li, ŋą́ ɲili, kwa nón kwa mįi kɛa, kuɔ haa mąą kpɔn.» 13 Eli yɛ mą: «Ə mą kə tii, hvó ɲɔw, gɛ yɛ bələi tii ŋą́ mo la yɛ́. Kɛlaa, gbɛa nii lɛɠɛ logolo kɛ a nɛɠɛ hunwɔi tii, ə́ paa la bɔ́; yili pulu, ə́ ka ə́ lon ka wɛi yili kɛa. 14 Mąąhɔlɔɓo, Yai-Laa Israɛlə nwɔ Yálái yɛ diɛ: ‹Nɛɠɛ hunwɔ hvo pai kpɛɛi nəɠi hu, nwulɔ ta hva kulɔ mą múluun ɉu, ə lɛɛ la ɉu, Yai-Laa ə tulɔ pu lɔi mɛ̨i.›» 15 Nɛ̨ɛ̨nui tii ə li ə gɛ yɛ bələi Eli ə mo la mą, di kɔ̨nɔ̨n ɉɔlɔɓo di mįi a hvóló tamąą, Eli, ə mą kɛ, nɛ̨ɛ̨nui da ɲəi bɛlɛ́n nuą. 16 Ə həɠə ɲələi tii ɓa, nɛɠɛ hunwɔ hvo kpɛɛ nəɠi hu, nwulɔ mąą hvo yɛɛ múluun ɉu, yɛ bələi Yai-Laa ə mo la Eli ɓa, yili yɛ ɉukulɔ. Eli ə galanin non malo 17 Mɛ̨nįɠaa tii tɛɛ pulu, nɛ̨ɛ̨nui tii lon ə ɲɔ̨n ɉəɠə. Ɲɔ̨n ə wiɛ nokoloi ɓa, ə tɛɛ ɲɛ̨n ɉu, ə haa. 18 Nokoloi nee yɛ Eli ɓa: «Yálá nwɔ nu! Lə mɛ̨nį ɓə gwa yɛ́ gu lɔwai? Ə́ lɔ ɲə́i bɛlɛ́n nwɔ́ nɛ̨ŋɛ̨nŋąą kili too mɛ̨nį ɓa Yálá ŋą, da nón nwun napili mɛ̨nį?» 19 Eli yɛ mą: «'Ə́ lon və!» Eli ə nokoloi həɠə ɲəi, ə li la nwɛ̨ą pɛlɛ́ mu, ə naa nwɔ gbin ŋą, 20 Ə Yai-Laa hvɛli a nwoo kɛnɛ̨, yɛ mą: «Yai-Laa nwɔ́ Yálá, galanin ŋɛ̨i a nwɛ̨́ą leenɛ̨ą, a nwɛ̨́ą laa kɛ a yələ kəlee, ya ɓə ya mąąwɛli kpɔ ŋɛ̨i kɛnɛ̨, yɛ́ li hvaai mą, non yɛ haa!» 21 Ə pɛlɛ nokoloi mɛ̨i gee mɛ̨i haaɓa, ə tomą Yai-Laa pɔ pələ, yɛ mą: «Yai-Laa nwɔ́ Yálá! Nɛ̨ɛ̨ yɛ́! Gɛ́ nokoloi ŋɛ̨i nįį ə pənə ə too ɉu.» 22 Yai-Laa ə ɲee hee Eli woo mu, nokoloi nįį ə pənə ə too ɉu, ə pənə ə kɛ a vulú. 23 Eli ə gbəŋə, ə kulɔ la nwɛ̨ą pɛlɛ́ mu, ə yɛɛ la ɓɛi nee ə kɛ laa, ə dɛɛ nee pɔ, yɛ mą: «Ə́i! Ə́ lon vulú mąą ka.» 24 Nɛ̨ɛ̨nui yɛ Eli ɓa: «Ŋą́ą́ gbaɠala kaa kɛa gbalo mɛ̨nįi ŋɛ̨i pɔ pələ, gɛ́, Yálá nwɔ nu ɓaa a yɛ́. Ɛlɛɛ, mɛ̨nįi ya mo a Yai-Laa laa, tɛ̨ą li.» |