Tɔɔɓɛlaa dɔlɔɔ 16 - Yálá laawoo hɛɓɛ (dc)1 Yai-Laa ə mɛ̨nį ɓo Hanani lon Ɉehu ɓa, yɛ hvilɛn na Baesa ɓa, yɛ mą: 2 «Ɲą́ą́ ɓə ə́ kulɔ muluun ɉu, gɛ́ ə́ hee nwɔ́ nu huwu Israɛlə nwun na a tɔɔmun, kɛlaa, yáá hvilɛn Ɉeroboamə hiɛ pələ hu, yáá gɛ nwɔ́ nu huwui Israɛlə aa nɛ̨ŋɛ̨n ɉəɠə, diɛ nwɔ́ lii kələn gwəi muhəɠə a di kɛ nɛ̨ŋɛ̨n. 3 Yili mąą mɛ̨nį ɓa, gáá pai Baesa da nwɔ pɛ́lɛ́i di kələi yɛ kala. Bələi tii ŋą́ Nevatə lon Ɉeroboamə nwɔ pɛ́lɛ́i kɛ la, bələ ɓə gáá gɛi la a nwɔ pɛ́lɛ́i. 4 Baesa yəi bɛlɛ́n mun nɔpee pai haai taai, yilɛɠaa ɓə da bowa mįi, ɛlɛɛ, ɲəi bɛlɛ́n mun nɔpee pai haai kpomói, yələi nwɛ̨nįɠaa da bowa kpələ.» 5 Baesa kɛ mɛ̨nįɠaa gbəli, mɛ̨nįɠaai ə gɛ, nwɔ kuláá laa, kɛlɛi bɛ̨ɛ̨ Israɛlə tɔɔɓɛlaa di kɛ mɛ̨nį hɛɓɛ́ hu. 6 Baesa ə laa nąnni kwɛlɛ, di bowa loo Tirsa. Non Ela ə hee a tɔɔmun a nąn mąąhvalin. 7 Hanani lon Ɉehu, yai kɛ a Yálá kwəi mɛ̨nį hukulɔ mun, ya ɓə nwɔ̨nɔ̨ Yai-Laa ə hvaa bɔ, yɛ naa həli Baesa ɓa, da nwɔ pɛ́lɛ́i, yɛ hvilɛn na mɛ̨nį ɲɔ̨n kpɔ ə gɛ Yai-Laa ɲɛ̨i ɓa, mąą mɛ̨nį ɓa. Yii kpɔ tii Yai-Laa liikələn gwəi, yaai ə hvilɛn na Ɉeroboamə túwɔ́ pələ pulu, ɛlɛɛ, yili yəi bɛlɛ́n nuą paai ə mo. Ela Israɛlə tɔɔmun 8 Ɉuda tɔɔmun Asa nwɔ tɔɔlaa gwɛlan bow hveelɛ gɔw mɛ̨ida lɔwai ɓə Baesa lon Ela ə dɔɔlaa hɔlɔɓo la Israɛlə lɔi nwun na, Tirsa daa ɓə ə kɛ laa heeni. Ə dɔɔlaa kɛ a kwɛlan veelɛ. 9 Ela yee pɔ mun Zimri, yai kɛ a gɔ́ wotolo bələ tɔ̨nɔ̨ ɲąąwooɓomun, ə nɔgili kɛ mą. Tɔɔmun Ela ə kɛ Tirsa daai nąąlɔwai, yɛ lɔɔ kpələ a ɲee tɛɛ pələ mą. Di kɛi gɛ tii dɔɔ pɛlɛ́ mɛ̨i kaa mun Arsa yəi bɛlɛ́n. 10 Zimri ə lɔ, ə ɓɔwa pu Ela ɓa, ə baa; ə kɛ tii Ɉuda tɔɔmun Asa nwɔ tɔɔlaa gwɛlan bow hveelɛ kɔ́w mɛ̨ihveelɛ lɔwai. Zimri ə hee a dɔɔmun mąąhvalin. 11 Ə dɔɔlaa hɔlɔɓo lɔ, ə lɛɛ heeni dɔɔkpəlin ɉu, ə Baesa yəi bɛlɛ́n nuą kəlee paa. Hvo kpɛli nu ta lɛɛ, ə kɛ a hulɔnu ə kɛ a nɛ̨ɛ̨nu, ə ma kpɛli kɛ bɔ mun da. 12 Zimri ə Baesa yəi bɛlɛ́n nuą kəlee paa, yɛ bələi Yai-Laa ə bu la gwəi mɛ̨nį hukulɔ mun Ɉehu la, yɛ mo Baesa ɓa. 13 Yili ə kɛ tii, ə hvilɛn Baesa da non Ela di kɛ nɛ̨nɛ̨nŋaai di ɉəɠə, yiiɠaai di Israɛlə yee lɔ ɉu, mąą mɛ̨nį ɓa, diɛ Yai-Laa Israɛlə nwɔ Yálá liikələn gwəi mɛ̨nį kɛ, a di wɔ kwɛli hvilɛn mɛ̨nį haliɠaa diɛ. 14 Ela kɛ mɛ̨nįɠaa gbəli, yii kpɔ ə gɛ, kɛlɛi di pɛ̨ɛ̨ Israɛlə tɔɔɓɛlaa di wɔ hɛɓɛ́i hu-e? Zimri Israɛlə tɔɔmun 15 Ɉuda tɔɔmun Asa nwɔ tɔɔlaa gwɛlan bow hveelɛ kɔ́w mɛ̨ihveelɛ lɔwai, Zimri ə tɔɔlaa kɛ Israɛlə lɔi hu a hvóló mɛ̨ihveelɛ. Ɉeɛi kɛ Tirsa daai. Nɔi lonnii di kɛ kɔ́ ɓa Gibetɔn, ɓɛi kɛ a Filisti nuą di wɔɔ. 16 Nuą tii kɛ gɔ́ mɛ̨i, di bələ mɛ̨n, diɛ kɛ: Zimri aa lɔgili kɛ, aa tɔɔmun baa. Mąą yələ lɔ ɓə Israɛlə nuą di gɔ́laɠa nwun nąmu Omri hee la a tɔɔmun gɔ́ mɛ̨i. 17 Omri da Israɛlə nuą kəlee di həɠə Gibetɔn, di kɔ́ tinɛ̨n Tirsa ɓa. 18 Ɓɛlɔwai Zimri ə gaa la, yɛ daa daa mąątinɛ̨n, ə li tɔɔmun nwɔ lɔi mu pɛ́lɛ́i mu pələ, ə nwɔ̨n doo bɛlɛ́ hu, yaai tii ə lɛɛ ɉu. 19 Nɛ̨ŋɛ̨nŋąąi ə ɉəɠə, bulu mɔ̨nɔ̨ li kɛ. Mɛ̨nįi ɲɔ̨nwɔ̨ɔ̨ Yai-Laa ɲɛ̨i ɓa, ə ɲee lɔ ɉu, ə hvilɛn Ɉeroboamə túwɔ́ pələ pulu, nɛ̨ŋɛ̨n yili ə Israɛlə yee lɔ ɉu, yɛ da kɛ. 20 Zimri kɛ mɛ̨nįɠaa gbəli, nɔgilii ə gɛ, kɛlɛi bɛ̨ɛ̨ Israɛlə tɔɔɓɛlaa kɛ mɛ̨nį hɛɓɛ́ hu-e? 21 Nąąlɔwai, Israɛlə nuą di di ɓɛlaɓo ɉu hveelɛ. Nu bələ tɔ̨nɔ̨, ə hvilɛn Ginatə lon Tivni pulu, di gɛ a di wɔ tɔɔmun. Bələ tɔ̨nɔ̨ ə hvilɛn Omri pulu, di gɛ a di wɔ tɔɔmun. 22 Nuąi tɔɔ Omri pulu, di yee ə tɛɛ Ginatə lon Tivni pulu nuą diɛ. Tivni ə haa. Omri ə lɛɛ a dɔɔmun. Omri Israɛlə tɔɔmun 23 Ɉuda tɔɔmun Asa nwɔ tɔɔlaa gwɛlan bow haaɓa lɔwai ɓə, Omri ə kɛ la a tɔɔmun Israɛlə lɔi nwun na. Ə kwɛlan bow kɔ́w hveelɛ kɛ dɔɔlaa hu. Ə kwɛlan mɛ̨ida kɛ Tirsa. 24 Yili pulu, ə Samari yee ya Sɛmɛrə yəi a wali kwələ waa mɛ̨ida. Ə ɲee mąątinɛ̨n a hįi, ɛlɛɛ, daai ə dɔɔ, ə naa hee a Samari, a ɲeei tii nąmu Sɛmɛrə laa. 25 Mɛ̨nįi ɲɔ̨nwɔ̨ɔ̨ Yai-Laa ɲɛ̨i ɓa, Omri ə ɲee lɔ ɉu, ə ɲɔ̨nwɔ̨ ə tɛɛ nuąi kɛ ɲɛ̨i tɔwɔ gəlee diɛ. 26 Ə hvilɛn Nevatə lon Ɉeroboamə túwɔ́ pələ pulu mɛ̨nį kəlee hu; nɛ̨ŋɛ̨n yili ə Israɛlə yee lɔ ɉu, ə hvilɛn bulu, yɛ Yai-Laa Israɛlə nwɔ Yálá liikələn gwəi mɛ̨nį kɛ, a kwɛli hvilɛn mɛ̨nį haliɠaa diɛ. 27 Omri kɛ mɛ̨nįɠaa gbəli, guláá laai ə gɛ da mɛ̨nįɠaa, kɛlɛi gəlee pɛ̨ɛ̨ Israɛlə tɔɔɓɛlaa kɛ mɛ̨nį hɛɓɛ́ hu-e? 28 Omri ə laa nąnni kwɛlɛ, di bowa loo Samari daai. Non Akabə ə hee a nąn mąąhvalin. Akabə Israɛlə tɔɔmun 29 Omri lon Akabə ə tɔɔlaa hɔlɔɓo Israɛlə lɔi nwun na, ɓɛlɔwai Ɉuda tɔɔmun Asa ə kɛ la nwɔ tɔɔlaa gwɛlan bow haaɓa kɔ́w mɛ̨ihaaɓa lɔwai. Akabə ə tɔɔlaa kɛ a kwɛlan bow hveelɛ kɔ́w hveelɛ Israɛlə nwun na Samari. 30 Mɛ̨nįi ɲɔ̨nwɔ̨ɔ̨ Yai-Laa ɲɛ̨i ɓa, Omri lon Akabə ə ɲee lɔ ɉu, ɲee ə tɛɛ nuąi wɔlɔ daa tɛɛ di kəlee diɛ. 31 Vilɛn mɛ̨nį Nevatə lon Ɉeroboamə nwɔ nɛ̨ŋɛ̨nŋąą pulu, yili lɔ hvəi, ə li kpɔ, ə Sidɔn nuą di wɔ tɔɔmun Ɛtbaalə lon Ɉezabɛlə həɠə a nɛ̨ą; ɛlɛɛ, ə li yɛ Baalə mąąwiɛ, yɛ kwɛli hvilɛn mą. 32 Bɛlɛ́i ŋɛ̨i ə dɔɔ Samari daa, ə Baalə kɔ́i pɛli laa bɛlɛ́n. 33 Akabə ə wulu ta tɔɔ, diɛ gɔ́. Yai-Laa Israɛlə nwɔ Yálái liikələn gwəi túwɔ́i di kɛi ɓo da lɔ ɓə ə kɛi pɛlɛ mą, ɲee yɛ tɛɛ Israɛlə tɔɔɓɛlaa kpɔ kɛ dɔwɔ Israɛlə lɔi hu gəlee diɛ. 34 Akabə nwɔ tɔɔlaa lɔwai ɓə, Betɛlə mun Hiɛlə ə pənə ə Ɉeriko taa tɔɔ la. Non ɉulɔnu dɔlɔɔ Aviramə ɓə di gɛ a daa wulu hvilɛn ɉɛn. Non ɉulɔnu veelɛnąą Seguvə ɓə di gɛ a ɉį́i la kponŋąą gɔwɔ hvilɛn ɉɛ. Yɛ bələi Yai-Laa ə bu la Nun lon Ɉosue la yɛ mo. |