Tɔɔɓɛlaa dɔlɔɔ 15 - Yálá laawoo hɛɓɛ (dc)

Abiyamə ə kɛ a Ɉuda tɔɔmun

¹ Nevatə lon Ɉeroboamə nwɔ tɔɔlaa gwɛlan bow kɔ́w mɛ̨ihaaɓa lɔwai ɓə, Abiyamə ə tɔɔlaa hɔlɔɓo la Ɉuda lɔi hu.

² Ə tɔɔlaa kɛ Ɉerusalɛmə a kwɛlan ɉaaɓa. Abiyamə nee laa ɓa kɛ a Maaka; yai kɛ a Absalɔn lon.

³ Nɛ̨ŋɛ̨nŋaai kpɔ wɔlɔ Abiyamə nąn ə ɉəɠə, ə hvilɛn gəlee pulu yɛ gɛ, hvo gwəi kwələ nwɔ Yálái Yai-Laa ɓa, hvo túwɔ́ a nɛlɛɛ, yɛ bələi nąn Davidə ə túwɔ́ la.

⁴ Davidə mąą mɛ̨nį ɓə gɛ, Yai-Laa yɛ labon nɛɛ Ɉerusalɛmə, yɛ Davidə lon da hee dɔɔkpəlin ɉu Ɉerusalɛmə, yɛ nąą laa hɔn mo.

⁵ Yai-Laa ə gɛ tii, mąąhɔlɔɓo, mɛ̨nįi kɛ ɉaŋąą Yai-Laa ɲɛ̨i ɓa, Davidə ə gɛ. Mɛ̨nįɠaa kpɔ ə Davidə tí la, Davidə hvo mąą kwɛa da lɔpee ɓa nwɔ yɛnɛ̨ɛ̨ kəlee yee mu. Hvo kɛli lɔ mɛ̨nįi ŋɛ̨i Davidə ə naa Hɛtə mun Uri ɓai.

⁶ Kɔ ə kɛ Roboamə da Ɉeroboamə di lɔwai Roboamə nwɔ yɛnɛ̨ɛ̨ kəlee yee mu.

⁷ Abiyamə kɛ mɛ̨nįɠaa kəlee da dúwɔ́ pələɠaa, yili hvo mɔ̨ɔ̨ pɛ̨ɛ̨ li Ɉuda tɔɔɓɛlaa di wɔ hɛɓɛ́i hu? Kɔ ə kɛ nwɔ̨nɔ̨ Abiyamə da Ɉeroboamə di lɔwai.

⁸ Abiyamə ə laa nąnni kwɛlɛ, di bowa loo Davidə taa. Abiyamə lon Asa ɓə hee dɔɔkpəlin ɉu a nąn mąąhvalin.

Asa ə kɛ a Ɉuda tɔɔmun

⁹ Ɓɛlɔwai Ɉeroboamə nwɔ tɔɔlaa gwɛlan ə kɛ la pow hveelɛ Israɛlə lɔi nwun na, nąąlɔwai ɓə Asa ə hee la a tɔɔmun Ɉuda lɔi hu.

¹⁰ Asa ə tɔɔlaa kɛ Ɉerusalɛmə a kwɛlan bow nąąn gɔw tanɔ̨n. Asa nee laa ɓa kɛ a: Maaka, yai kɛ a Absalɔn lon.

¹¹ Mɛ̨nįi kɛ ɉaŋąą Yai-Laa ɲɛ̨i ɓa, Asa ə gɛ, yɛ bələi galá Davidə ə gɛ la.

¹² Asa ə ɉaláá wɛlikɛ nuąi tii kəlee kulɔ nɔi, ə nąnnii di wɔ haliɠaa kəlee kulɔ nɔi.

¹³ Ɛlɛɛ, ə nee Maaka nwɔ tɔɔmun nee laa kulɔ ɲəi, mąąhɔlɔɓo, nɛ̨ɛ̨nui tii aa kɛ ɓɛlɛkpɛɛmąą wulu ta tɔɔ Asera laa hu diɛ haláá kulɔ mą, Asa ə nwului tii hu tee tee, ə gələn Sedrɔn moloon ɉu.

¹⁴ Kɛlaa, ɉaláá kulɔiɠaa tii di lɛɛ laa. Ə mą kɛ tii, Asa ə túwɔ́ a ɉaŋąą, ə gwəi kwələ Yai-Laa ɓa nwɔ yɛnɛ̨ɛ̨ kəlee yee mu.

¹⁵ Ɉɛnŋaai di nąnni di naakwɛlanmo Yai-Laa ɓa, ə ɉəɠə, ə li la Yai-Laa yəi bɛlɛ́n; diɛ ɓaa: wali, hɛni, da pɛlɛ́n ɉɛɲąŋą.

¹⁶ Kɔ ə kɛ Asa da Israɛlə tɔɔmun Baesa di lɔwai di wɔ yɛnɛ̨ɛ̨ kəlee yee mu.

¹⁷ Baesa Israɛlə tɔɔmun ə tɛ kɔ́ pɛlɛi Ɉuda lɔi ɓa. Ə hį́i tɔɔ Rama taa ɓa, ə gɛ, ə pələ too la tii Ɉuda tɔɔmun Asa tɔwɔ.

¹⁸ Wali da hɛni yii lɛɛ Yai-Laa nwɔ hɛn gɔw laikɛi, da yii kɛ tɔɔmun yəi ɉɛn gɔw kəhi hu ɲəi bɛlɛ́n, Asa ə gəlee həɠə ə dɛɛ nwɔ tínuą pɔ, ə gɛ, di li la Bɛn-Hadadə pɔ, yai a Aramə tɔɔmun, ə ɓo a Hɛziɔn lon Tavrimɔn lon; ə kə heeni Damasə. Ə mo yili ɓa, yɛ mą:

¹⁹ «Mįnɛ̨ kaa gwa yɛ́ gu lɔwai, ə́ nąn da ną́n di lɔwai, gáá wali da hɛni di tɛɛi yɛ́. Mįnɛ̨i tii gaa ka Israɛlə tɔɔmun Baesa ka lɔwai, 'gala, akɛ tii, hva kɛa pɛli kɔ́ pɛlɛi mą́ą́.»

²⁰ Tɔɔmun Asa woo tii ə nɛ̨ɛ̨ Bɛn-Hadadə ɓa. Ə nɛɛ mą, ə nwɔ kɔ́kulááɠaa tɔɔ, di kɔ́ pɛlɛ Israɛlə taaɠaa diɛ, di Iyɔn, Dan, Avɛlə-Bɛtə-Maaka kɛlɛ, da Kinerotə taa kəlee, da ɓɛi kpɔ kɔ́ kɔ́ kwɛli hɛn ə kɛ laa Nɛftali.

²¹ Yii kɛa Baesa ə mɛ̨nįi tii bələ mɛ̨n, ə Rama hįi tɔɔ kpəla mą ɛlɛɛ Tirsa.

²² Tɔɔmun Asa ə Ɉuda nuą kəlee hvilɛn bulu, Rama tii Baesa ə kɛi ɉįi tɔɔ mą, di gwɛniɠaa da nwuluɠaa həɠə, Asa ə hįi tɔɔ la Gɛva da Mispa diɛ; Gɛva ŋɛ̨i kɛ Bɛnɉamɛn nwɔ lɔi hu.

²³ Asa kɛ mɛ̨nį kəlee gbəli, nwɔ kuláá laa mɛ̨nįɠaai kpɔ ə gɛ, daaɠaai kpɔ ə dɔɔ, kɛlɛi gəlee pɛ̨ɛ̨ Ɉuda tɔɔɓɛlaa kɛ mɛ̨nį hɛɓɛ́ hu-e? Ə kulɔ lɔ bɔlɔɔ kɔ́lɔi ɓə, ɲɔ̨n ə pɛlɛ la gɔwɔ ɓa.

²⁴ Asa ə laa nąnni kwɛlɛ, di bowa loo galá Davidə taa. Non Ɉosafatə ə hee dɔɔkpəlin ɉu, a nąn mąąhvalin.

Nadabə ə kɛ a Israɛlə tɔɔmun

²⁵ Ɉeroboamə lon Nadabə ə tɔɔlaa hɔlɔɓo Israɛlə lɔi hu; Ɉuda tɔɔmun Asa nwɔ tɔɔlaa gwɛlan veelɛ lɔwai. Nadabə ə tɔɔlaa kɛ Israɛlə nwun na a kwɛlan veelɛ.

²⁶ Mɛ̨nįi ɲɔ̨nwɔ̨ɔ̨ Yai-Laa ɲɛ̨i ɓa, ya ɓə Nadabə ə ɲee lɔ ɉu. Ə hvilɛn nąn dúwɔ́ pələ pulu. Nɛ̨ŋɛ̨n nąn ə Israɛlə nuą yee lɔ ɉu, yaai tii ə da kɛ.

²⁷ Ahiya lon Baesa, yai kɛ a Isakarə yəi bɛlɛ́n mun da, ə lɔgilii kɛ Nadabə ɓa. Baesa ə baa Gibetɔn. Gɛɛnąą tii ə kɛ a Filisti nuą di wɔ. Ə Nadabə paa, ɓɛlɔwai yili da Israɛlə nuą kəlee daa pa kɛ la kɔ́ pɛlɛ Gibetɔn taa ɓa.

²⁸ Baesa ə Nadabə paa, Ɉuda tɔɔmun Asa nwɔ tɔɔlaa gwɛlan ɉaaɓa lɔwai. Ə hee yili heei dɔɔlaa hu.

²⁹ Ə dɔɔlaa hɔlɔɓo lɔ, ə Ɉeroboamə nwɔ pɛ́lɛ́i kəlee mu nuą paa. Hvo nui lɔpee ta lɛɛ Ɉeroboamə yəi bɛlɛ́n a vulú; yɛ bələi Yai-Laa ə nɔ la nwɔ tímun Ahiya la, yai kɛ a Silo mun.

³⁰ Nɛ̨ŋɛ̨nŋaai Ɉeroboamə ə ɉəɠə, da yii ə gɛ Israɛlə ə ɉəɠə, yɛ Yai-Laa Israɛlə nwɔ Yálái nwąną lɔ la, mąą mɛ̨nį ɓə gɛ, yili yɛ laa nwɔ pɛ́lɛ́i ɓa.

³¹ Nadabə kɛ mɛ̨nįɠaa gbəli, mɛ̨nįɠaai kpɔ ə di kɛ, kɛlɛi gəlee pɛ̨ɛ̨ Israɛlə tɔɔɓɛlaa kɛ mɛ̨nį hɛɓɛ́ hu-e?

³² Kɔ ə kɛ Asa da Israɛlə tɔɔmun Baesa di lɔwai, di wɔ yɛnɛ̨ɛ̨ kəlee yee mu.

Baesa ə kɛ a tɔɔmun Israɛlə lɔi hu

³³ Ɉuda tɔɔmun Asa nwɔ tɔɔlaa gwɛlan ɉaaɓa nąą, Ahiya lon Baesa ə kɛ a tɔɔmun Israɛlə lɔi nwun na. Dɔɔmun ɉeɛi kɛ Tirsa, kwɛlan bow hveelɛ kɔ́w nąąn mə ə gɛ dɔɔlaa hu.

³⁴ Ə túwɔ́ kpɔ a ɲɔ̨nwɔ̨ɔ̨ Yai-Laa ɲɛ̨i ɓa, ə hvilɛn Ɉeroboamə túwɔ́ pələ pulu. Nɛ̨ŋɛ̨n yili ə gɛ Israɛlə yɛ ɉəɠə, yaa kpɛli ə da kɛ.