Tɔɔɓɛlaa dɔlɔɔ 14 - Yálá laawoo hɛɓɛ (dc)Ɉeroboamə dɔlɔɔ nwɔ tɔɔlaa kpɛɛ pələ 1 Mąą yələi tii, Ɉeroboamə lon Aviya ə ɲɔ̨n ɉəɠə. 2 Ɉeroboamə yɛ nɛ̨ą ɓa: «Ə́ muhəɠə, ə́ ə́ mąąhəɠə mąąhvalin, yɛ́ gɛ a ə́ loo pələ; nu ta hvo pɛli gɔlɔn ɉii akɛ Ɉeroboamə nɛ̨ą ɓaa yɛ́. Yili pulu, ə́ li Silo, Yálá kwəi mɛ̨nį hukulɔ mun Ahiya kaa laa; ya ɓə wɔlɔ kɛ mą́ą́, gáá pai kɛi a nu huwui ŋɛ̨i nwɔ tɔɔmun. 3 Lɛɠɛ kpi bow həɠə, da nwɔ̨mįi da kwɛ̨in-nwulɔ muluu dɔ̨nɔ̨, ə́ li ə́ həli mą, mɛ̨nįi pai həlii nokoloi ŋɛ̨i ɓa, gaa pai moi yɛ́.» 4 Ɉeroboamə nɛ̨ą ə gɛ tii, ə muhəɠə ə li Silo; ə həli Ahiya yəi bɛlɛ́n, Ahiya ɲɛ̨i hvo kɛi kɛɛ mąąkpɛɛ, bɔlɔ pələ ɓa. 5 Yai-Laa aa kɛ Ahiya ɓa: «Ɉeroboamə nɛ̨ą kaa bələ pɔ yɛ pa ə́ mąąnin kɛi, ɲɔ̨n non gaa gɛi mąą mɛ̨nį ɓa. Mɛ̨nį ə́ kaa pai moi mą, ya ka; a pa, gaa pai gbɔwɔ kɛi a nu takpɛli.» 6 Ahiya ə gɔwɔ mu tin mɛ̨n nɔ; ɓɛlɔwai ə lɔ la bɛlɛ́n, yili yɛ mą: «Lɔ, Ɉeroboamə nɛ̨ą! Ə́ kaa ə́ kpɔwɔ kɛi a nu takpɛli lə mɛ̨nį ɓa? Daa dɔ́ɔ́ a wɛlɛɛ ɲɔ̨nwɔ̨ɔ̨ mąąnɛ̨ɛ̨ ŋą́ naa həli yɛ́. 7 'Li yɛ́ Ɉeroboamə ɓa: Yai-Laa Israɛlə nwɔ Yálái yɛ: ‹Ŋą́ ə́ həɠə nɔi lonnii lɔwai, ŋą́ ə́ tɔɔ a nwɔ nu huwui Israɛlə ɲąąnwooɓomun. 8 Ŋą́ dɔɔlaa kulɔ Davidə nwɔ pɛ́lɛ́i yəi, ŋą́ dɛɛ ə́ pɔ; kɛlaa, hvó gɛ li yɛ bələi nwɔ́ tímun Davidə ə gɛ la. Nwɛi, ə ɲee kɛ nwɔ́ tiɓoɠaai diɛ, ɛlɛɛ, ə kanąn mą́ą́ gwəi tɔ̨nɔ̨ mɛ̨i. Mɛ̨nįi kɛ ɉaŋąą ɲɛ̨́i mu, ya lɔ ɓə ə kɛi gɛ. 9 Yáá túwɔ́ a ɲɔ̨nwɔ̨ɔ̨ dɛɛ nuąi kpɔ kɛ ə́ tɔwɔ gəlee diɛ. Yáá li, yáá haliɠaa pɛli yɛ́, da hɛn mąąnįnįnŋąą, yɛ́ nwą́ną lɔ, yáá bíli ə́ pulu pələ. 10 Yili mąą mɛ̨nį ɓa, gáá hinąą kpɛɛi Ɉeroboamə yəi bɛlɛ́n, yɛi kɛ a luwɔ a wala kɛ tii lɛɛ gbɔwɔ ɓa mun ɓɛ Israɛlə lɔi hu. Gáá pai Ɉeroboamə yəi bɛlɛ́n nonnii kələi yə bələi da kala kələ la. 11 Ɉeroboamə yəi bɛlɛ́n mun lɔpee pai haai taai, yilɛɠaa kaa pai mįi, ɛlɛɛ, bɛlɛ́n mun lɔpee pai haai lɔwɔi, yələi nwɛ̨nįɠaa da mįi.› Yai-Laa woo li.» 12 Ə́ wɛi, ə́ muhəɠə, pənə ə́ li ə́ pɔɔli, ɓɛlɔwai ə́ kaa pai lɔi la taai, nokolo kaa pai haai. 13 Israɛlə nuą kəlee kaa pai ɉaa mɛ̨nį ɲɛ̨i kulɔi, di noo mąąhɔlɔɓo, Ɉeroboamə yəi bɛlɛ́n nuą lɔwai, yaa tɔ̨nɔ̨ gbən ɓə kiliŋąhiɛ lɛlɛɛ ə kɛ gwəi, yɛ hvilɛn na Yai-Laa Israɛlə nwɔ Yálái ɓa, yili ɓə pai gɛi yɛ laa la kámą hu. 14 Yai-Laa kaa pai tɔɔmun da tɛɛi Israɛlə pɔ, yɛ Ɉeroboamə nwɔ pɛ́lɛ́i wolo. Háákələi mɛ̨nį ɓə. Ləi? Yiihu kpɔlɔ! 15 Yai-Laa kaa pai Israɛlə kɛlɛi; gaa pai kɛi yɛ hveen gbaɠai a kɛ kpɛlin ɉii yá yəi. Gaa pai Israɛlə kulɔi nɔi lɛlɛɛ ŋɛ̨i hu, yai ə dɛɛ nąnni pɔ. Ɛlɛɛ, gaa pai daɠa taɠai ɲa pulu pələ; mąąhɔlɔɓo, daa wulu kpiɛnŋąą pɛli, diɛ di kɔ́. Diɛ Yai-Laa nwąną lɔ la tii. 16 Gaa pai kulɔi Israɛlə pulu, nɛ̨ŋɛ̨nŋaai ŋɛ̨i Ɉeroboamə ə ɉəɠə yɛ Israɛlə yee lɔ ɉu mąą mɛ̨nį ɓa. 17 Ɉeroboamə nɛ̨ą ə muhəɠə, ə li ə həli Tirsa. Ɓɛlɔwai ə kɛi həli la bɛlɛ́ laaləi, non ə haa. 18 Di noo, Israɛlə nuą kəlee di ɉaa mɛ̨nį kɛ, yɛ bələi Yai-Laa ə nɔ la nwɔ tímun Ahiya la yɛ mo. 19 Ɉeroboamə kɛ mɛ̨nį gbəliɠaa, gɔɠaai ə gɔ́, da dɔɔlaa, gəlee pɛ̨ɛ̨ Israɛlə tɔɔɓɛlaa kɛ mɛ̨nį hɛɓɛ́ hu. 20 Ɉeroboamə nwɔ tɔɔlaai ə lamun ɉu a kwɛlan bow hveelɛ kɔ́w hveelɛ, ə laa nąnni kwɛlɛ. Non Nadabə ə hee a mąąhvalin. Roboamə Ɉuda tɔɔmun 21 Salomɔn lon Roboamə ə kɛ a tɔɔmun Ɉuda lɔi hu, Roboamə kaa kwɛlan ə kɛ pow nąąn, ɓɛlɔwai ə dɔɔlaa hɔlɔɓo la. Ə dɔɔlaa kɛ kwɛlan bow kɔ́w mɛ̨ihveelɛ yee mu Ɉerusalɛmə. Nąą ɓə Yai-Laa ə ɉəɠə ɉu Israɛlə lɔi nąą kəlee, ə gɛ ə naa hee laa. Roboamə nee laa ɓaa kɛ Naama, yai kɛ a Amɔn mun. 22 Mɛ̨nįi kɛ ɲɔ̨nwɔ̨ɔ̨ Yai-Laa ɲɛ̨i ɓa, Ɉuda nuą di di yee lɔ ɉu, nɛ̨ŋɛ̨nŋaai di ɉəɠə, di Yai-Laa lii kələn gwəi ə tɛɛ la di nąnni diɛ. 23 Di haláá kulɔiɠaa pɛli yɛ di nąnni, a kwɛni kalanŋąą da wuluɠaa, diɛ haláá kulɔ ɲeeɠaa ɓá wulu kpɛa kpɛa kəlee mu. 24 Haláá wɛlikɛ nuą di di muhəɠə lɔi hu, di túwɔ́ kpɔlɔɔ yɛ bələi nuąi Yai-Laa ə di hukala Israɛlə mąą mɛ̨nį ɓa, di kɛɛ kala la. 25 Roboamə nwɔ tɔɔlaa gwɛlan nɔɔli nąą, Sisakə Eziptə tɔɔmun, ə li ə kɔ́ pɛlɛ Ɉerusalɛmə ɓa. 26 Ə Yai-Laa nwɔ pɛ́lɛ́i mu hɛnŋąą kəlee həɠə, da tɔɔmun ɲəi bɛlɛ́n hɛn gɔwɠaa, ə gəlee həɠə kpɔ tɛ̨ɛ̨tɛ̨ɛ̨, ə mą kɛ, gɔ́kɔ gbalaɠaai Salomɔn ə bɛli a ɉɛni, ə gəlee həɠə. 27 Tɔɔmun Roboamə ə dakpɛliɠaa pɛli a ɓala kwɛli, ə di kalihvaɓo bɛlɛ́ mąąkpɛ kɔlaɠa nwun nąmįną diɛ, diɛi di ɲɛ̨i ə kɛ tɔɔmun nwɔ pɛ́lɛ́i laaləi. 28 Tɔɔmun ni pələ tɛitɛi Yai-Laa yəi bɛlɛ́n, gulááɠaa di kɛi gɔ́kɔ kwɛli hɛnŋąą tii həɠə, yili pulu, di pənə di paa la guláá pɛlɛ́ mu. 29 Roboamə kɛ mɛ̨nį gbəli, mɛ̨nįɠaa kpɔ ə gɛ, kɛlɛi di bɛ̨ɛ̨ Ɉuda tɔɔɓɛlaa kɛ mɛ̨nį hɛɓɛ́ hu-e? 30 Kɔ ə kɛ lɔ Roboamə da Ɉeroboamə di lɔwai lɔ a yələ kəlee. 31 Roboamə ə laa nąnnii kwɛlɛ, di bowa loo nąnni kámą hu Davidə taa. Roboamə lon Abiyamə ɓə hee dɔɔkpəli ɉu a nąn mąąhvalin. Roboamə nee laa ɓa kɛ a Naama, Amɔn lon. |