Tɔɔɓɛlaa dɔlɔɔ 12 - Yálá laawoo hɛɓɛ (dc)

Israɛlə nuą di ŋąąkpɔn gɛnɛ̨ too Sisɛmə

¹ Roboamə ə li Sisɛmə, mąąhɔlɔɓo, Sisɛmə ɓə Israɛlə nuą kəlee di pa laa, ə gɛ, di ɉee a tɔɔmun.

² Bələ mɛ̨n Nevatə lon Ɉeroboamə ə mo, ə ɓo Eziptə lɔi hu, aa kɛ pu tɔɔmun Salomɔn ɓa, aa li aa hee Eziptə.

³ Di nu ta tɔɔ Ɉeroboamə pulu, ə pa ɲąąkpɔn ma, da Israɛlə nuą kəlee. Di mo Roboamə ɓa, diɛ mą:

⁴ «Ə́ nąn ə tiɛ̨ wiɛ laa ku nwuɔ̨, yiihu ku kaa bɔ ə́ nuwɔlaa da diɲɛ̨ wiɛi tii ə́ nąn ə ɉee ku nwuɔ̨, da kulɔ mą, ya gɛ tii, kwa tí yɛ́.»

⁵ Yɛ diɛ: «Ka li, ka pənə ka pa hvóló haaɓa tɛɛ pulu.» Nɔi lonnii di li.

⁶ Tɔɔmun Roboamə ə nwun dɔɔ a galanɉonŋaai tii kɛ nąn Salomɔn kwɛlɛ, ɓɛlɔwai ə kɛ la yɛnɛ̨ɛ̨. Yɛ diɛ: «Ka káá mɛ̨nįi ŋɛ̨i kaai ləi?»

⁷ Diɛ mą: «Yá ə́ kpɔwɔ kɛ háákələi a nɔi lonnii ŋɛ̨i di wɔ tímun, ya di mąą mɛ̨nį ɲɛ̨i kulɔ, ə́ di woo pulu pənə a woo lɛlɛɛ, di kaa pai kɛi a ə́ wɔ tínuą a yələ kəlee.»

⁸ Kɛlaa, niɛwooi tii galanɉonŋąą di gɛ Roboamə ɓa, ə doo gɔwɔ pɔ. Ə li ə nwun dɔɔ a ɉilɛlɛai tii da diɛni di di muhəɠə gee pɔ, di ɓo ɲee mu.

⁹ Yɛ diɛ: «Ɛlɛɛ kaa ŋɛ̨i, kaa lə? Woo lə kɛɛ ɓə gwa nuąi ŋɛ̨i woo pulu pənə la? Diɛi kɛi mą́ą́: ‹Diɲɛ̨i ə́ nąn ə naa ku nwuɔ̨ da kulɔ mą.›»

¹⁰ Ɉilɛlɛa diɛ mą: «Bələi ə́ kaa pai hvaai la di pɔ bələ ka: Yá kɛ diɛ: Ɲéé kpiɛ lon bulu kɛnɛ̨i dɛɛ ną́n ɲee kɔ́nma.

¹¹ Ə həɠə yiihu ɓa, yii ną́n ə tiɛ̨ wiɛ laa ka nwuɔ̨, nwɛi gáá pai nwiɛ yee ta pɛlɛi mą. Yii ną́n ə kɛi ka hutɔɔ a hvaɠa nwɛi gáá pai ka hutɔɔi a galakpa, kwɛli ə ɓo ɉunwɔ̨ la.»

¹² Ɉeroboamə da nɔi lonnii kəlee di pa Roboamə pɔ, voló ɉaaɓa yələ; yɛ bələi tɔɔmun ə mo la diɛ; yɛ di pa kuu tɔɔ hvóló haaɓa tɛɛ pulu.

¹³ Tɔɔmun ə nuą woo pulu pənə a nwalawalaa. Niɛwooi galanɉonŋąą di gɛ mą, ə bili.

¹⁴ Ə hvaa nuą diɛ yɛ bələi ɉilɛlɛa di niɛwoo ɓo la, yɛ diɛ: «Ną́n ə ka wɔ tiŋɛ̨i wiɛ; ɲą́ą́n gáá pai ka wɔ tiɛ̨ wiɛ yee ta pɛlɛi mą. Ną́n ə ka hutɔɔ a hvaɠa, nwɛ́i, gáá pai ka hutɔɔi a galakpa, kwɛli ə ɓo ɉunwɔ̨ la.»

¹⁵ Tɔɔmun və nwəli tɔɔ nuą woo ɓa, bələ ɓə Yai-Laa ə tɛɛ la mɛ̨nįi tii ta ə mo Silo mun Ahiya laaləi, yɛ mo Nevatə lon Ɉeroboamə ɓa, yɛ bɔ mɛ̨nį kɛ.

Nɔi ə mɛlaɓo ɉu hveelɛ

¹⁶ Israɛlə nuą kəlee di gaa diɛ tɔɔmun və nwəli tɔɔ li di woo ɓa, nuą di nwoo pulu pənə, diɛ mą: «Lə mɛ̨nį ɓə kwa Davidə ni ku lɔwai? Ku kpɔnmąą hɛn və laa, kwa Ɉɛse lonnii. Israɛlə nuą, nu kəlee ə li ɲəi bɛlɛ́ laaləi, Davidə lon ə́ wɛi, Ə́ ɲɛ̨i lɛɛ kɛa ə́ wɔ pɛ́lɛ́i ɓa.» Israɛlə nuą di li di yəi bɛlɛ́ɠaa mu.

¹⁷ Kɛlaa, Israɛlə lonnii yiiɠaai kɛ heeni Ɉuda taaɠaa hu, Roboamə ə lɛɛ di mɛ̨i a di wɔɔ tɔɔmun.

¹⁸ Roboamə ə góló nwun nąmu Adoramə tɔɔ, kɛlaa, Israɛlə nu kəlee di lɛɛ ɉɔɔi a kwɛni, ə lɛɛ ɉu ə haa. Tɔɔmun ə gaa kɛa yɛ kɛ, hvo kɛli, ə tɛ nwɔ wotoloi hu, ə pu, ə li Ɉerusalɛmə pələ.

¹⁹ Israɛlə ə kulɔ Davidə nwɔ pɛ́lɛ́i ɓa, ə mą kɛ háákələi.

²⁰ Bələ mɛ̨n Israɛlə nuą di mo, diɛ kɛ Ɉeroboamə aa pənə aa pa, di dəli nwun dɔɔ hu, ɛlɛɛ, di ɉee a tɔɔmun Israɛlə lɔi kəlee mɛ̨i. Ɉuda nu huwu yaa tɔ̨nɔ̨ gbən ɓə lɛɛ Davidə nwɔ pɛ́lɛ́i ɓa.

²¹ Roboamə ə li Ɉerusalɛmə, ə Ɉuda nwɔ pɛ́lɛ́i da Bɛnɉamɛn nwɛi təli, di kɛ a nu waa nwun dɔ̨nɔ̨, nu waa pow mɛ̨ihaaɓa, a kuláá kpɔ kpɔɔɠaa, diɛ pɛli lii kɔ́ pɛlɛi Israɛlə ɓa. Ɛlɛɛ, diɛ pɛli dɔɔlaa tɛɛi Salomɔn lon Roboamə pɔ.

²² Kɛlaa, Yálá hvaa wo ə too Yálá nwɔ nu Semaya wəlii, yɛ kɛ mą:

²³ «'Mo Salomɔn lon Roboamə ɓa, yai gaa a Ɉuda tɔɔmun, da Ɉuda nuą, ə mą kɛ Bɛnɉamɛn lonnii da nɔi lonnii kəlee diɛ, yɛ diɛ:

²⁴ Yai-Laa woo ka: ‹Ka hvo kɛ ka káá kɔ́ pɛlɛi ka kaayɔwɔɠaa Israɛlə lonnii diɛ, nu kəlee ə pənə ə li bɔɔli. Mąąhɔlɔɓo, mɛ̨nįi ŋɛ̨i, ɲą́ą́ ɓə gɛ.›» Di di wəli tɔɔ Yai-Laa woo ɓa, di yali di pulu, yɛ bələi Yai-Laa ə mo la diɛ.

²⁵ Ɉeroboamə ə Sisɛmə mąątinɛ̨n a hįi, daai tii kaa Ɛfraimə yee hu, ə hee laa. Yili pulu, ə həɠə laa ə Penuɛlə mąątinɛ̨n a hįi.

Ɉeroboamə nwɔ nɛ̨ŋɛ̨n

²⁶ Yii kɛa Ɉeroboamə ə kɛ a Israɛlə tɔɔmun, ə mo gwəi pələ, yɛ diɛ: «Bələi nuąi ŋɛ̨i ɲɛ̨i tɔɔ pələ kaa la, nwɔ́ lɔi kaa pai pənəi ə li Davidə nwɔ pɛ́lɛ́i pɔ pələ.

²⁷ Nuą da lɛɛ diɛ li Ɉerusalɛmə Yálá hee pɛlɛ́ mu, haláá kulɔ mɛ̨nį ɓa, di kili a kulɔ di wɔ tɔɔmun Roboamə pɔ, yai a Salomɔn lon Ɉuda tɔɔmun. A kɛ tii, di kaa pai báái.»

²⁸ Giliŋąhiɛ taaləi tii kɛi ə mo, ə nįŋɛ̨ lon mąąnįnįn veelɛ pɛli a hɛni. Yɛ nuą diɛ: «Kaa wɔlɔ lamun lii Ɉerusalɛmə, Israɛlə nuą. Yálái ka kulɔ Eziptə, ya ka.»

²⁹ Ɉeroboamə ə dɔ̨nɔ̨ tɔɔ Betɛlə, ə dɔ̨nɔ̨ tɔɔ Dan.

³⁰ Nu kpulu ə tɔɔ kpɔ ɲɛ̨i tɔwɔ, ə lɛɛ ɉu di li Dan.

³¹ Ɉeroboamə ə haláá kulɔiɠaa hee, ɛlɛɛ, ə ɉaláá laa həli nuą həɠə lɔ nuą lɔwai, yiliɠaai di hvo kɛ a Levi nu huwu ta.

³² Ɉeroboamə ə hɛli kɛnɛ̨ pu a ɲąnin mɛ̨ihaaɓa nąą nwɔ hvóló pow kɔ́w lɔɔli yələ, yɛ bələi di kɛi gɛ la Ɉuda lɔi hu, ɛlɛɛ, ə tɔɔ ɉaláá kulɔi lííla. Bələ ɓə ə gɛ la Betɛlə, yɛ haláá kulɔ nįŋɛ̨ lon ŋɛ̨i ə bɛli mą, ə nɛɛ mą ə haláá laa həli nuą hee Betɛlə, Yálá kɔ́iɠaa tii ɓa, yai ə dɔɔ.

³³ Yálá kɔ́i ŋɛ̨i ə bɛli Betɛlə, ə tɛ laa a ɲąnin nwɔ hvóló pow kɔ́w lɔɔli yələ, guui tii ɓə ə ɉəɠə ɉu gbɔwɔ ɓa. Ə hɛli pu Israɛlə lonnii mąą mɛ̨nį ɓa. Ə tɔɔ ɉaláá kulɔi, yɛ lansan kələn.