Tɔɔɓɛlaa dɔlɔɔ 10 - Yálá laawoo hɛɓɛ (dc)

Saba tɔɔ nɛ̨ɛ̨nui ə pa nwoo pili Salomɔn ɓa

¹ Salomɔn laa tɛ pələ, da Yai-Laa nwɔ mąąwiɛ nwɔ kɛ pələ mɛ̨i, dɔɔ nɛ̨ɛ̨nui ŋɛ̨i kɛ Saba ə bələ mąn; Nɛ̨ɛ̨nui tii ə pa Salomɔn hukɔɔn ɉii a hanwon ɉikpinɛ̨ɛ̨ɠaa.

² Ə pa Ɉerusalɛmə, nu kpulu kɛnɛ̨ yɛ ɓo bɔ, da ɲɔ̨nwɔmɛ̨ɛ̨ɠaa wulɔ kun nɛ̨ɛ̨ɠaa, da hɛni di ɓo kpɔ diɛ̨ hu kɛnɛ̨, da Kúwɔ́-kwɛni lɛlɛɛɠaa. Həlii nɛ̨ɛ̨nui tii ə mo Salomɔn ɓa, mɛ̨nįɠaa kpɔ kɛ mąą mɛ̨nį nwąnąą mą, ə gəlee ɓo.

³ Salomɔn ə nwɔ kɛɛ mąąnin nwooɠaa kəlee pulu pənə. Mɛ̨nį ta hvo kɛ laa, yii ɉu kpinį pələ a gɛ tɔɔmun hva pɛli bulu pənəi.

⁴ Saba tɔɔ nɛ̨ɛ̨nui tii ə Salomɔn nwɔ kili kɛnɛ̨ pələ kaa, ə mą kɛ bɛlɛ́i ə dɔɔ,

⁵ da kɔ̨nɔ̨n di kɛi ɉee nííla, ɲee pɔ nuą yii pɛlɛ́, ɲəi bɛlɛ́n gɔ̨nɔ̨n gɛ nuą kɛ pələ, da di mąą həɠəɠaa, nɔɔ mɛ̨nį ɲɛ̨i kulɔ nuą, haláái da gəlee kələn, yai ə kɛi gulɔ Yai-Laa yəi bɛlɛ́n, yili kəlee di nɛ̨ɛ̨nui tii, hvinnatɔn, hvo kpɛli pɛli vaa pələ kaai.

⁶ Nɛ̨ɛ̨nui tii yɛ tɔɔmun ma: «Yii ŋą́ mɛ̨n nwɔ́ lɔi hu, yɛ hvilɛn na ə́ wɔ mɛ̨nį ɓo pələ ɓa, da ə́ wɔ kili kɛ ɲəi laa, gaa kpɔ tii a tɛ̨ą.

⁷ Və́ kɛi mɛ̨nįɠaa tii kaa a tɛ̨ą, mąąhɔlɔɓo, və́ nii kɛ pa li və́ di kaa a ɲɛ̨́i kɔ́w. Dɛ̨ą bələ tɔ̨nɔ̨ lɔ ɓə di mo mą́ą́; ə́ wɔ kili kɛ ɲəi laa, da ə́ wɔ kɛ pələɠaa tɛɛi yii ŋą́ mɛ̨n a diɛ-woo mą.

⁸ Ə́ wɔ nuąi nwun na nɛ̨ɛ̨i, ə́ yee pɔ nuą nwun na nɛ̨ɛ̨. Diɛi di kaa lɔ tɔɔni ə́ lííla a yələ kəlee diɛ ə́ wɔ mɛ̨nį kɔ́lɔn gili wooɠaai mɛ̨n.

⁹ Mąąwiɛ ə kɛ Yai-Laa ə́ wɔ Yálái ɓa, yai ə laa a nii, yɛ ə́ hee Israɛlə dɔɔ kpəlin ɉu. Israɛlə wɛli ɓə gaa Yai-Laa ɓa a yələ kəlee, yili ɓə gɛ yɛ ə́ hee a tɔɔmun, yɛ́ pɛli ɲąąwooɓo kɛi tələnmolaa hu.»

¹⁰ Nɛ̨ɛ̨nui tii ə hɛni kilə waa haaɓa pulu nwun mɛ̨ida tɛɛ tɔɔmun Salomɔn pɔ, da wulɔ kun nɛ̨ɛ̨ɠaa kpɔ kɛnɛ̨, da Kúwɔ́-kwɛni lɛlɛɛɠaa, nwulɔ kun nɛ̨ɛ̨ tii ta hvo ta kɛ pa li nɔi tii hu, yɛ bələi Saba tɔɔ nɛ̨ɛ̨nui tii ə paa la tɔɔmun Salomɔn pɔ.

¹¹ Hiramə nwɔ kələnŋąą di pa a hɛni, diɛ həɠə la Ofirə, di pa nwɔ̨nɔ̨ a wulu huwu lɛlɛɛ ta, da Kúwɔ́-kwɛni lɛlɛɛɠaa.

¹² Tɔɔmun ə nwului tii kɛ a Yai-Laa nwɔ pɛ́lɛ́i, da tɔɔmun nwɔ pɛ́lɛ́i bɛlɛ́ nwąną mąą kpulu hɛnŋąą, da gwɛnįnŋaa da bɛlɛgwəiɠaa; nwələ too nuą mąą mɛ̨nį ɓa. Nwulu huwu taaləi tii, ta hvo kɛa ta pa li, di hvo ta pənə li di hvo da kaa, aa lɛɛ la ɉu háákələi yələ aa ɉəli.

¹³ Hɛn kpɔ Saba tɔɔ nɛ̨ɛ̨nui tii ə vɛli tɔɔmun Salomɔn ɓa, di gəlee tɛɛ bɔ, mɛ̨inɛ̨ɛ̨ɠaa laa kulaa ɉu. Tɔɔmun Salomɔn yaa tɔ̨nɔ̨ lɔ ɓə a pɛli kɛ ɲɔ̨nwɔ̨mąn gɛi. Yili pulu, ə bulu pənə, yɛ li bɔ lɔi, yaa, da bɔ nuą.

Salomɔn yəi hɛn gɔwɠaa

¹⁴ Ɉɛnii Salomɔn ə kɛi ɉɔlɔɓo kwɛlan dɔ̨nɔ̨ yee mu, ə kɛ a hɛni kilə waa pow hveelɛ.

¹⁵ Yii ɉiɛ kulɔ nuą da ɲɔw ɓɛlaa, da vóló kulɔi pələ tɔɔɓɛlaa di kɛi gulɔ, da yii nɔi ɲąąwooɓo nuą di kɛi paa la, naa kulaa ɉu.

¹⁶ Tɔɔmun Salomɔn ə héméɠaa pɛli, ə gɛ a gɔ́kulááɠaa di wɔɔ a gbɛa-kpɛaa nwun veelɛ, di ɓo a hɛni. Dɛitɛi kəlee ə kɛ a hɛni kilə mɛ̨ida.

¹⁷ Ə mą kɛ hémé pɛlɛɛ-pɛlɛɛ nwun ɉaaɓa, gəlee di ɓo a hɛni, dɔ̨nɔ̨ ə ɓo a kilə tɔ̨nɔ̨ da gbulɔ. Tɔɔmun ə ɉɛnŋąą tii laikɛ, bɛlɛ́i di kɛi kɛ mą: «Liban wəla», mu.

¹⁸ Tɔɔmun ə tɔɔkpəlin gɛnɛ̨ ta pɛli a hə́lə́ ɲįn ə mąą pu a hɛni hu waa.

¹⁹ Nu aa kɛi hee ɉu, a tɛ mą, ə gɔwɔ hvilɛn ɉii kɛ mɛ̨ida yɛ teɠa hee kpəlin ɉu. Ɓɛi nu a tunwɔ̨n naa gbəlin ɉu, nąą ə kɛ kɛlɛ-gɛlɛ; gbəlin ɲee ə kɛ mą hveelɛ, di ɓo yala hveelɛ mąąnįnįn mɛ̨i.

²⁰ Gbəlin ə kɛ heeni yala pow kɔ́w hveelɛ di ɓo nu kɔ́wɔ hvilɛn ɉii mɛ̨idai ɓa, mɛ̨ida yɛ ɓo ɓɛ pələ, mɛ̨ida ə ɓo ɓɛ pələ. Di hvo ta yili gulɔ mąą kaa li lɔi ta hu.

²¹ Tɔɔmun Salomɔn kpələ hɛɲąŋą kəlee di kɛ a hɛni, Liban wəla mu hɛnŋąą kəlee di kɛ a hɛni leelee, da hvo kɛ a wali kwɛli. Tɔɔmun Salomɔn nwɔ yələi, wali kwɛli dɔlɔ hvo kɛ mą.

²² Tarsisə kələnŋąą di kɛ tɔɔmun ɲəi gboloyá ŋą, diɛ hiɛ kulɔ da Hiramə nwɛiɠaai, ɛlɛɛ, kwɛlan ɉaaɓa tɛɛ pələ tɛitɛi kəlee, gələnŋąą tii di kɛi pa di laahvɛɛ a hɛniɠaa, da wali, da hə́lə́ ɲin, kwalaɠaa, da nwɛ̨nį huwu lɛlɛɛɠaa diɛ kɛ di laa ɓaa: Paon.

²³ Tɔɔmun Salomɔn nwɔ kɛnɛ̨ laa ə tɛɛ lɔi mɛ̨i tɔɔɓɛlaa kəlee diɛ, hɛn gɔw nąmu laa hu, da kilimąą mɛ̨nį hu.

²⁴ Yɛnɛ̨ɛ̨ nuą kəlee di kɛi Salomɔn kaa mɛ̨nį giliŋąhiɛ kɛ, diɛ kɛ gilii tii Yálá ə dɛɛ bɔ, di da wolo hɔlɔɓo.

²⁵ Di kəlee di kɛi pa a di wɔ hamą pilɛɠaa: wali kwɛli hɛnŋąą da hɛni hɛnŋąą, həɠəɠaa da kɔ́ kɔ́ hɛnŋąą, wulɔ kun nɛ̨ɛ̨ɠaa, hooɠaa, da tiɛ̨-həɠə hooɠaa, yili ə kɛi kɛ tii kwɛlan dɛitɛi yee mu.

²⁶ Salomɔn ə kɔ́ kɔ́ wotoloɠaa ŋąąkpɔn da hoo gilɛ həɠə nuą. Wotolo waa tɔ̨nɔ̨ pulu nwun nąąn mə kɛ ɲəi, da hoo gilɛ həɠə nuą waa pow kɔ́w hveelɛ, ə li ə di hee daaɠaa hu ɓɛi gɔ́laɠaɠaa kaa laa, ə daɠaa lɛɛ gwɛlɛ Ɉerusalɛmə.

²⁷ Gɛ pələi tɔɔmun ə gɛ la, wali ə kɛnɛ̨ Ɉerusalɛmə yɛ kwɛni wəyan, ɛlɛɛ, kpitili wulɔ kɛnɛ̨ laa yɛ ɓɔlaa wuluɠaai nɛ̨ŋɛ̨ lɔi hu.

²⁸ Di kɛi həɠə a Salomɔn nwɔ hooɠaa Eziptə lɔi hu, da Kewe. Tɔɔmun nwɔ yɔwɠaa ɓə kɛi li diɛ di ya.

²⁹ Wotoloi a həɠə Eziptə, ɉɔ̨nwɔ̨ ə kɛ a wali kwələ nwun mɛ̨ida, hoo tɔ̨nɔ̨ hɔ̨nwɔ̨ ə ɓo a wali kwələ nwun dɔ̨nɔ̨ yee lɔɔli. Bələ lɔ ɓə Hɛtə tɔɔɓɛlaa di kɛi gɛ la. Aramə tɔɔmun nwɛi, ə kɛi dɛɛ nwɔ yɔw kɛ nuąi pɔ diɛ li la.