Zɔ̂ŋ Maa-ŋuŋ 1 - Yálá laawoo hɛɓɛ (dc)

Ɲɛ̨i kaa

¹ Yii wɔlɔ kɛ laa a gɔwɔ tɔɔ yələ yai ku mɛ̨n, yai ku gaa a ku ɲɛ̨i kɔw, yai ku mąąkpɛɛ, ɛlɛɛ, ku yee ə tunwɔ̨n mą, yai a Wooi a yɛnɛ̨ɛ̨ tɛɛ,

² gbala ə tɔɔ yɛnɛ̨ɛ̨ ə too pono ɲą, ɛlɛɛ, ku gaa, ɛlɛɛ, kuɔ mąą kɛla hvaaɓo, ɛlɛɛ, kuɔ yɛnɛ̨ɛ̨ hva kpɛɛ laa həli káá, a yai kɛ ɲɛ̨i tínɛ̨nŋąą Nąn bɔ pələ ɛlɛɛ, ə gbɔwɔ lɛ kuɔ,

³ yii ku gaa, ku mɛ̨n, ya ɓə ku kaa naa həlii káá, káá kpɛlimąn, əgɛ, káá mąn, gwa kááni gu kɛ tanɔ̨n. Guɔ kɛ la tanɔ̨n gwa Nąn, ɛlɛɛ gwa Lon Jesus Kristə.

⁴ Ɛlɛɛ, Ku kaa yili pɛ̨ɛ̨i ku dɛɛ kaa, ə gə, ku wɔɔ kwəinɛ̨ɛ̨ laa ə kulɔ.

'Ka kulɔ nɛ̨ŋɛ̨n ɲəi, 'ká hiɛ kɛɛ pono hu

⁵ Nwɛlɛɛ lɛlɛɛi ku mɛ̨n Jesus Kristə la, kuɔ naa həli káá ya ka: Yálá kaa a kɛɛ pono, nįnįn danɔ̨n kpɛli hvə ɉu.

⁶ Gwa kɛ diɛ gwa Yálá ni gu kaa ɉu tɔnɔ, guɔn, guɔ hiɛ kpini hu, a kɛ ti gu kaa lɛɛ kɛi, ɛlɛɛ, gu hvo tɛ̨ą ɓoi.

⁷ Kɛlaa, a kɛ gwa kɛi hiɛ kɛɛ pono hu, yɛ bələi Yaa kpinii gaa la a kɛɛ pono, akɛ tii gu kəlee gu kaa ɉu tanɔn, Non Jesus ɲąmą a gu mąąhəɠə nɛ̨ŋɛ̨n ɲəi.

⁸ Gwa kɛ nwɔ̨nɔ̨ diɛ, gu hvo a nɛ̨ŋɛ̨n ɉəɠə nuą, akɛ tii gu kaa gu kpɔwɔ lan ɉi, ɛlɛɛ, tɛ̨ą hvo gu hu.

⁹ Akɛ gwa hvaa gu wɔ nɛ̨ŋɛ̨nŋaa diɛ, kulɔ nwoo ɓa laa da tələnmo laa hu, yɛ Yaa, a gu wɔ nɛ̨ŋɛ̨nŋaa mąąhvaalɛɛ, ɛlɛɛ, yɛ gu wɔ tuwɔ pələ ɲɔ̨nŋaa kəlee waa guɔ.

¹⁰ Akɛ gwa kɛ diɛ, gu hvo a nɛ̨ŋɛ̨n ɉəɠə nuą, akɛ tii gu kaa Yálá kɛi a lɛɛmun, ɛlɛɛ, nwoo hvo gu hu.