Korɛntə dɔlɔɔ 9 - Yálá laawoo hɛɓɛ (dc)

Polə ə lənə dɔɔi ɓa

¹ Akɛti, lɛɛ gbɔwɔ ɓa laa hvo mɔ̨ɔ̨ ɲə́i? Və́ mɔ̨ɔ̨ a gɛlaɠaa ta? Akɛti, və́ mɔ̨ɔ̨ gu Ną́mu Jesus kaa? Ka hvo mɔ̨ɔ̨ a gɛ́ kólo, gu Ną́mu hu?

² Akɛ nu takpɛliɠaa da wala gáá a kɛla, ka wɛi, mąąnɛ̨ɛ̨ kɛ ka gɔ́lɔ́n. Gbala ə tɔɔ, káá ɓə a nwɔ́ kɛla laa kɔlɔn ɉɛn gu Nąmu hu.

³ Nuąi da kɛ náá pələ ɲɔ̨nwɔ ɓoi, pələi ŋą́ mą́ą́kɔ̨nwɔ̨ la di yəi bələ ka:

⁴ Kuɔ kpɛli, ku hva mɔ̨ɔ̨ pɛli ku kɔ̨nɔ̨n ɉɔlɔɓoi, ku hvo ku kpələ?

⁵ Akɛti, mąąlaa hvo mɔ̨ɔ̨ ku yəi, ku hvo kristalon nɛ̨ąą hvilɛn ku pɔ, yɛ bələi, gɛlaɠaa takpɛliɠaa di gɛ la, a gu Nąmu kaayɔwɔɠaa da Sefasə?

⁶ A wala kɛ tii, ɲą́ą́ dɔnɔ̨ lɔ kwa Barnabasə ɓə ku laa hva pɛli kulɔi kolo hu?

⁷ Gbɛɛ ɓə da ɉon, gɔ̨nɔ̨n ə ɓo gbɔwɔ nwuɔ̨? Gbɛɛ ɓə a tíi kɛ, hva má ta mįi? Gbɛɛ ɓə a taatɛlɛɛ tɔɔ, hva ɲįnįyá kɛ a gɔ̨nɔ̨n?

⁸ Nu kanŋaa lɔ ɓə yili kaa di lɔwai, awala kɛ tii, Dɔn nwoo hvo mɔ̨ɔ̨ mɛ̨nį tɔ̨nɔ̨i tii ɓo?

⁹ Moisə nwɔ tɔ́n yɛ: «Nįŋɛ̨ a kɛi mɔ̨nun dan, hvo kwɛli too na.» Akɛti, niŋɛ̨ɠaa lɔ ɓə di mąą liihɛlɛn gaa Yálá ɓa?

¹⁰ Kɛlɛi, guɔ ŋɛ̨i gu mąą mɛ̨nį ɓə ə yili pɛ̨ɛ̨ la. Mąąhɔlɔɓo, hvo kɛli, gɛɛhinmun gilitɔɔi ə kɛ mą, mɔ̨nun danmun gili ə ɓo ɉu, yɛ, yaa kpɛli nwɔɔ kaa ɉu.

¹¹ Akɛ kwaa Yálá-taa mɛ̨inɛ̨ɛ̨ hin ká kili pɔ, mɛ̨nį ɲɔ̨n maa mɔ̨ɔ̨ ku ku wɔɔ hɔlɔɓo ká kɛ kolo hu?

¹² Akɛ nu taɠaa da kɛ ɉɛnŋąą tii hɔlɔɓoi ka yəi, gu hvo mun kɛ kuɔ? Kɛlaa yaamun, ku hvo gɛ li tii, ku ku liikpələ, ku mɔ̨nɔ̨ mįi, ə gɛ, mɛ̨nį ta hvo pa kpɛ̨ąn Kristə mąą wɛlɛɛ lɛlɛɛ hu.

¹³ Ka hvo gɔlɔn kaa nuąi da tiɓo kɛ Yálá hee pɛlɛ́ mu, naa lɔ ɓə da di kɔ̨nɔ̨n ɉɔlɔɓo laa? Nuąi da kɛ haláá kulɔi Yálá nwɔ haláá kulɔ kəhi mɛ̨i, nąą ɓə da di kɔ̨nɔ̨n ɉɔlɔɓo laa?

¹⁴ Bələ lɔ ɓə gu Ną́mu ə niɛwoo kɛ la yɛ diɛ: Nwɛlɛɛ lɛlɛɛ laa həli nuą kɔ̨nɔ̨n a kulɔ nwɛlɛɛ lɛlɛɛ hu.

¹⁵ Kɛlaa nwɛ́i, bələi mąn mąą laa ə kɛ la ɲə́i, və́ yili ta kɛ li, və́ nwɔ̨nɔ̨ ɉɛɓɛ́i ŋɛ̨i pɛ̨ɛ̨i, gɛ́ di huhvɛli la káá. Ŋą́ mą haa! Nu ta hva pɛli dɔ́ɔ́i ti həɠəi!

¹⁶ Mąąhɔlɔɓo, nwɛlɛɛ lɛlɛɛ laa həliɛ hvo ɲə́i a gbɔwɔ ɲąąkɛnɛ̨, gaa a mɛ̨nįi hvo kɛli ŋą́ gɛ, ŋą́ wala nwɛlɛɛ lɛlɛɛ laa həli, gaa mą́ą́ a mɛ̨nį.

¹⁷ Akɛ gáá gɛi gbɔ́wɔ́ ɓa, ŋą́ li və́la mɛ̨nį ɓo, kɛlaa, akɛ di dí la, yili kaa a nwuɔ́ tiɛ̨.

¹⁸ Və́la ɓaa kan a lə? Və́la ɓaa, nwɛlɛɛ lɛlɛɛi gáá naa həli, ŋį́ gɛ a mɛ̨inɛ̨ɛ̨, ə mą kɛ yii mąąnɛ̨ɛ̨ kɛ ŋą́ ɉɔlɔɓo nwɛlɛɛ lɛlɛɛ laa həliɛ hu, və́ Ɉɔlɔɓo li.

¹⁹ Və́ nu ta yee mu, lɛɛ gbɔwɔ ɓa laa kaa ɲə́i, kɛlaa, ŋą́ gbɔ́wɔ́ kɛ a nu kəlee nwɔ luwɔ, ə gɛ, ŋą́ nu tamąą hɔlɔɓo.

²⁰ Ŋį́ kɛ Ɉuifəɠaa pɔ, yɛ di ta, gɛ́ pɛli di hɔlɔɓoi a Kristə nwɔɔ. Nuąi Moisə nwɔ tɔ́n yee mu, ŋį́ kɛ yɛ diɛ, yá pa və́ la, ə gɛ, ŋį́ di hɔlɔɓo a Kristə nwɔɔ.

²¹ Nuąi di hvo Moisə nwɔ tɔ́n yee mu, ŋį́ kɛ yɛ di pɔ, yɛ ŋą́ wala kɛ tɔn yee mu, yá pa, gáá Yálá ŋą́ tɔn yee mu; hvo gaai, Kristə ɓə a nwɔ́ tɔn, ə gɛ, gɛ́ pɛli nuąi di hvo tɔn mu, di hɔlɔɓoi a Kristə nwɔɔ.

²² Ŋį́ too hvįikpɛɛ nuą pɔ, kwa diɛni ku tɔɔi ə kɛ tanɔ̨n, ə gɛ, ŋą́ di hɔlɔɓo a Kristə nwɔɔ. Ŋį́ gbɔ́wɔ́ kɛ a nu kəlee ŋą nu, gɛ́ pɛli daɠaa ɓaloi ɉu a Kristə nwɔɔ.

²³ Ŋą́ yili kəlee kɛ nwɛlɛɛ lɛlɛɛ mąą mɛ̨nį ɓa, gɛ́ pɛli nwɔ́ɔ́ hɔlɔɓoi ɉu.

Pə́lə́ kɛ pələ mąą tɔnŋaa

²⁴ Ká hvo gɔlɔn káá, nuąi da kɛ hɛn da mąą gilɛ həɠəi, di kəlee da gilɛ həɠə, kɛlaa, nu tɔ̨nɔ̨ lɔ ɓə a ɉɛn tii hɔlɔɓo? 'Ká gilɛ həɠə kan, káá pɛli ká wɔ gilɛi mąą hvɛla hɔlɔɓo.

²⁵ Pə́lə́ lɔpee gəlee kɛ nuą da tɔn naa di kpɔwɔ ɓa. Kɛlaa di wɛi, hɛn yii a kala, ya ɓə da mąą gilɛ həɠə, gu wɛi, gaa a yii hva kala.

²⁶ Yili ɓə gɛi, gilɛi gáá ɉəɠəi, və́ gɛi nwún ɉu kun ma, ŋą́ ɲéé pili, vá bili kpɛli-kpɛli.

²⁷ Kɛlaa yaamun, gáá gɔ́lɔ́ laa nɔ̨nwɔ̨ ɓoi, ŋą́ ɉon yɛ luwɔ, ə gɛ, və́ pa kúlaa laa kɛ nwɛlɛɛ lɛlɛɛ laa həliɛ hu, ɲąąkpɛɛi di hvo náá kulɔ ɉu.