Korɛntə dɔlɔɔ 8 - Yálá laawoo hɛɓɛ (dc)

Hali kɔ huwɔ

¹ Yii hvilɛn na huwɔɠaai daa gulɔ a haláá hali ɓa, yɛ bələi gu gɔlɔn na mɛ̨nį tamąą kɔ́lɔn yɛ hvilɛn mą. Mɛ̨nį kɔlɔnŋąą a nu huɲąŋą kɛnɛ̨, kɛlaa, wɛlikɛmąąlaa a nu tɛ tɔwɔ.

² Kɛlaa nu a gbɔwɔ kaa yɛ mɛ̨nį kɔ́lɔn mun, a kɛ tii, hvo gɔlɔn yɛ bələi kɛ mąąnɛ̨ɛ̨ ə gɔlɔn na.

³ Kɛlaa, nui Yálá wɛli kaa mą, mąą nu kɔ́lɔnŋąąi Yálá yəi.

⁴ Akɛtii, huwɔi daa gulɔ a haláá hali ɓa, gwa pɛli da mįi? Gu gɔlɔn guɔ, hali lɔpee ta hvo yɛnɛ̨ɛ̨, ɛlɛɛ, yálá takpɛli hvo laa, ə kulɔ Yálá yaa tanɔ̨n gbən bulu.

⁵ Mąąhɔlɔɓo, bələi mąn nuą da yálá tamąą mąą mɛ̨nį ɓo la, daɠaa diɛ ɓo yələi, da lɔi mɛ̨i, bələi mąn ɲáláɠaai tii tamąąi la, nąmuɠaa tamąą la;

⁶ gu wɛi Yálá tanɔ̨n gbən mə gu yəi, a gu Nąn, yai hɛn gəlee a həɠə bɔ, bɔ pələ lɔ ɓə nwɔ̨nɔ̨ gu kaa lii la, ɛlɛɛ, gu Nąmu ə ɓo tanɔ̨n, yai a Jesus Kristə; yai hɛn gəlee kaa yɛnɛ̨ɛ̨ ɉaalai, guɔ ɓo ɲee kɔnma.

⁷ Kɛlaa, nu kəlee hvə dɛ̨ą tii kɔ́lɔn. Nu taɠaa daa kulɔ hali yíi hu a nįnɛ̨, bɔɔ ə ɓo ni diɛ, da kɛi ɉuwɔɠaa tii mįi, da kɛ gaai yɛ hali kɔ́ hɛn gbɔ-kpɔ, di wɔɔ kiliŋąhiɛ hvįikpɛɛ pələ, diɛ kɛ gɔ̨nɔ̨n tii a kɛ di mąąliɓii.

⁸ Yaan kɔ̨nɔ̨n və a gu mąą lɛɠɛ Yálá ɓa, gu mįi-o, gu hvo mįi-o, hva gu lɛɛ pulu, hva gu tɛ tɔwɔ.

⁹ Kɛlaa, ka gɛ a nɛlɛɛ, nɛɛ gbɔwɔ ɓa laai tii ka yəi, yili hvo kɛ a ká ɓɛlaai di hvii kpɛɛ, di lan ɉɛn.

¹⁰ Kɛlaa, yɛ́i mɛ̨nįi ti dɛ̨ą kɔlɔn, da ə́ kaa heeni hali kɔi, yɛ́ nąą hɛn mįi, yili hva kɛ a nuąi di hvįikpɛɛ di lan ɉɛn?

¹¹ A kɛ tii, ə́ wɔɔ mɛ̨nį kɔlɔn bələi tii kaa pai gɛi, nui ŋɛ̨i Kristə ə haa mąą mɛ̨nį ɓa, nwun na ə pili.

¹² Ka kɛi nɛ̨ŋɛ̨n ɉəɠə tii ka nąn nonnii diɛ, diɛi di wɔ kilitɔɔmąą laa hvo kɛnɛ̨ li, káá di hvįikpɛɛ tii, a kɛ tii, Kristə kpįnįi ka tii ka káá nɛ̨ŋɛ̨n ɉəɠəi mą.

¹³ Yili ɓə gɛ, a kɛ ŋą́ kɔ̨nɔ̨n da mįi a kɛ a mɛ́lan lan ɉɛn,, vá kpɔ kɛa huwɔ mįi, ə gɛ, və́ pa mɛ́lan nan.