Korɛntə dɔlɔɔ 7 - Yálá laawoo hɛɓɛ (dc)

Hilɛtai mɛ̨nį

¹ Mɛ̨nii ká ɉɛɓɛ́ tɛɛ mą́ą́, ka gu da ɓo. Yii nɛlɛɛ, ya ɓaa: Hulɔnu hvo nɛ̨ą həɠə,

² Kɛlaa, ə gɛ, túwɔ́ pələ ɲɔ̨n hvo kɛ, hulɔnu nɛ̨ą ə kɛ tanɔ̨n, ɛlɛɛ, nɛ̨ɛ̨nu ɉilɛ ə kɛ tanɔ̨n.

³ Mąąnɛ̨ɛ̨ hulɔnu ə nwɔ hulɔnu laa tɛɛ nɛ̨ą pɔ, nɛ̨ɛ̨nu kpɛli ə nwɔ nɛ̨ɛ̨nu laa tɛɛ ɉilɛ pɔ.

⁴ Nɛ̨ɛ̨nu pɔɔ hvaa gbinį, ɉilɛ pɔɔ li, hulɔnu yaan, bɔɔ hvaa gbinį, nɛ̨ą nwɔ li.

⁵ 'Ká hvo lənə ka kee ɓa, hvo kɛli ə kɛ a ka nu hveelɛi ka laa mąą woo, kaa gɛ tii Yálá hvɛli mɛ̨nį ɓa. Yili pulu, ka pənə ka ɉilɛtaai yíi ɓo yɛ bələi mąąnɛ̨ɛ̨ la, a wala kɛ tii ka wala pɛli ka kpɔwɔ hu hon ɉii, ka too ɓilihi ŋą ɲąąhɛn hu.

⁶ Ŋą́ kɛi mo tii, nwɔ́ kiliŋąhiɛ li, kɛlaa, və́ ká tíi la.

⁷ Gáá kɛ bɔ, nu kəlee di kɛ ɲą́ą́, kəlee, nu tɛitɛi ə Yálá nwɔ mɛ̨inɛ̨ɛ̨ hɔlɔɓo a dee-tee; nu yii nwɛi a pɛli kɛi a yii, awala kɛ tii, yii.

⁸ Gáá moi kan kwɛaɠaa da galanįnŋaa diɛ, ya ɓa: Akɛ da hvaa mą, di lɛɛ lɔ tii di kpɔɔ ɓa yɛ pələi gáá la.

⁹ Kɛlaa akɛ ká yee hva pɛli ká kpɔwɔ ɓa, mąąnɛ̨ɛ̨ ka húlú lɔ. Mąąhɔlɔɓo, yii viɛlaɓoɔ ya ɓaa: Hulɔnu ə nɛ̨ą hee, nɛ̨ɛ̨nu ə hilɛ hee. Yili lɛlɛɛ ə tɛɛ nɛ̨ą wɛli kɛɛ hulɔnu kələn ɉii ɓa, a wala kɛ tii hilɛ wɛli yɛ nɛ̨ɛ̨nu kələn.

¹⁰ Nuąi di hvo a kwɛaɠaa, diɛ ɓə gáá mɛ̨nį ŋɛ̨i moi diɛ, kɛlaa gbɔ́ɔ́ woo hvə li, gu Ną́mu woo li. Gɛ́ diɛ: Nɛ̨ɛ̨nu yii hilɛ kaa mą, hvo ɉilɛ lɛɛ.

¹¹ Akɛ da Ɉilɛ daa taɠa, hvo kɛ gaa heei hulɔnu takpɛli nwuɔ̨, kɛlaa, da ɉilɛ di di lɔwai woo ɓo, di hee di kee pɔ. Hulɔnu yaan, mąą hvo nɛ̨ɛ̨li hvo nɛ̨ą kpɛ.

¹² Yii ŋɛ̨i nwɔ̨nɔ̨ gáá moi, gbɔ́ɔ́ kpįnįi woo li, və́ ɉəɠə li gu Ną́mu la, akɛ kalan non da, nɛ̨ą a wala kɛ a laa na mun, nɛ̨ɛ̨nu a gaa yɛ da ɉulɔnu di kaa lɛɛi di kee ɓa, mąą hvo nɛ̨ɛ̨li ɉulɔnu hvo nɛ̨ą kpɛ.

¹³ Akɛ nwɔ̨nɔ̨ kalan non nɛ̨ɛ̨nu ta, ɉilɛ a wala kɛ a laa na mun, ɉulɔnu a gaa yɛ da nɛ̨ą di kaa lɛɛi di kee ɓa, mąą hvo nɛ̨ɛ̨li nɛ̨ɛ̨nu hvo ɉulɔnu lɛɛ.

¹⁴ Mąąhɔlɔɓo, ɉulɔnui hvo a laa na mun, kalan non nɛ̨ɛ̨nu yɛ ɓo ɲəi, mąąhəɠɛɛi nɛ̨ą háálai. Ɛlɛɛ, nɛ̨ɛ̨nui hvo a laa na mun, ɉilɛ yɛ ɓo a kalan non, mąąhəɠɛɛi ɉilɛ háálai. Yili awala kɛ tii, di lonnii da kɛ yɛ hali pulu nuą; yá pa, di mąąhəɠɛɛi.

¹⁵ Akɛ nui hvo a laa na mun, a kɛ yɛ ə mɛlan nɛɛ, 'ə nɛɛ; yili a kɛ tii, galan non mąą aa holoon. Yálá ə ka təli, ə gɛ, ka ká wɔ yɛnɛ̨ɛ̨ kɛ liilaa hu.

¹⁶ Yili ɓa nɛ̨ɛ̨nu, ə́ kili hvo ɉu yɛ́ kɛ, yɛ́ ɓə pai ə́ hilɛ nwun mąąɓoi? Hulɔnu, ə́ kili hvo ɉu yɛ́ kɛ, yɛ́ ɓə pai ə́ nɛ̨ą nwun mąąɓoi?

'Ká hvo ká yíi pələ mąąhvalin

¹⁷ Nu kəlee ə túwɔ́ yɛ bələi gu Nąmu ə dí la, yɛ bələi lɔ ə kɛ la Yálá yɛ dəli. Niɛwooi tii ɓə gáá gɛi gbɔn kəlee ɓa.

¹⁸ Nui kɛ a kɛ́nɛ̨ lon Yálá yɛ dəli, mąą nu hvo nwɔ kɛ́nɛ̨ mɛ̨nį ɓɛlɛkpɛɛ mą, nui a kɛ a kɛ́nɛ̨ kpoloa, hvo kɛ diɛ, hvo kɛli da Ɉee kɛ́nɛ̨ ɓa.

¹⁹ Kɛ́nɛ̨ lon naa da kɛ́nɛ̨ kpoloa laa di hvo a mɛ̨nį ta, yii nwalawala ya ɓaa: Nu ə Yálá nwɔ tɔ́n nwooi pɔ mɛ̨nį kɛ.

²⁰ Bələi ə́ kɛ la Yálá yɛɛ ə́ təli, lɛɛ lɔ tii.

²¹ Akɛ ə́ kɛ a luwɔ Yálá yɛ ə təli, hvo ə́ liihɛlɛn, kɛlaa, akɛ yá pɛli lɛɛ gbɔwɔ ɓa laa hɔlɔɓoi, tɔɔ a ə́ walaa, ə́ ɉɔlɔɓo.

²² Mąąhɔlɔɓo, luwɔ yii gu Ną́mu ə dəli, ə nwun mąąɓo gaa a gu Ną́mu nwɔɔ. Nui yaan kɛ gbɔwɔ ɓa diɛ dəli, gaa a Kristə nwɔ luwɔ.

²³ Nu ta aa ká nwun mąąɓo a ɉɔ̨nwɔ̨ kɛnɛ̨, mąą hvo nɛ̨ɛ̨li ka hvo kɛ a nu nwɔ luwɔ.

²⁴ Yili ɓa ną́n nonnii, pələi ə́ kɛ la Yálá yɛ ə́ təli, lɛɛ lɔ tii.

Mąąɲąŋąaɠaa, Toonwəlii nɛ̨ą, da kalanin

²⁵ Yii hvilɛn na mąąɲąŋąąɠaa diɛ, gu Nąmu hvo dí li a mɛ̨nį ta, kɛlaa, nwɔ́ giliŋąhiɛ ka ŋɛ̨i gáá nɛi, yɛ nui gu Ną́mu nwɔ ɲɛ̨imąąwɛli kaa háálai, nuą da di kilitɔɔ mą, nwoo.

²⁶ Yɛ bələi lii kələn gwəi mɛ̨nį tamąą da həli la nuą diɛ yiihu, nwɔ́ kwəi, nuąi tii, mąąnɛ̨ɛ̨ lɔ di lɛɛ yɛ pələi tii di kaa la.

²⁷ Akɛ nɛ̨ą kaa yɛ́, və́ kɛ li ə́ nɛɛ laa. Akɛ nɛ̨ą hvə yɛ́, və́ kɛ li ə́ nɛ̨ą həɠə.

²⁸ Kɛlaa, akɛ yá nɛ̨ą həɠə a wala kɛ tii, yá hilɛ həɠə, hvo nɛ̨ŋɛ̨n ɉəɠə li. Kɛlaa, nuą yiiɠaai nɛ̨ą kaa diɛ, a wala kɛ tii, hilɛ yɛ ɓo diɛ; mɔ̨nɔ̨ tamąą ɓə da mįi di yɛnɛ̨ɛ̨ hu, ŋą́ kɛ bɔ yili ə hvoló káá.

²⁹ Ną́n nonnii, mɛ̨nį gɛ́ ŋą́ mo kaa ya ɓa: Ɲɛnɛ̨ɛ̨ hu hvo kɛa kwɛa li, gɛ́ nuąi nɛ̨ą kaa diɛ, di di kpɔɔ kaa lɔ yɛ nɛ̨ą a wala kɛ diɛ.

³⁰ Nuąi wɔlɔi, di gɛ yɛ da wala kɛ wɔlɔi, yiiɠaai di kwəinɛ̨ɛ̨, di gɛ yɛ di kwəi a wala kɛ a nɛ̨ɛ̨, yiiɠaai hɛnŋąa yai, di gɛ yɛ hɛn da a wala kɛ di yəi.

³¹ Nuąi tɔnɔ kwɛlii ɲɛ̨nɛ̨ɛ̨ ŋɛ̨i hu, di gɛ yɛ da wala kɛ ɉɔlɔɓoi a neelee, mąąhɔlɔɓo, ɲɛ̨nɛ̨ɛ̨ ŋɛ̨i kaa pai tɛɛi.

³² Gáá bɔ liihɛlɛn lɔpee ta hvo kɛ kaa, nui nɛ̨ą hvo mą, a niihɛlɛn a gu Ną́mu mąą mɛ̨nį, gu Nąmu liiɓa ɓə gɛ liihɛlɛn a kɛ mą.

³³ Kɛlaa, nui nɛ̨ą kaa mą, niihɛlɛn a ɲɛ̨nɛ̨ɛ̨ ŋɛ̨i hu mɛ̨nįɠaa, a kɛ bɔ ə nɛ̨ą liiɓa kɛ.

³⁴ A kɛ tii kɛa, nwɔ kiliŋąhiɛ a kɛ pələ hveelɛ. Bələ lɔ ɓə gaa la, nɛ̨ɛ̨nui hilɛ hvo mą, da mąąɲąŋąą, da di liihɛlɛn a gu Nąmu mąą mɛ̨nį, ə gɛ, di mąą ə kɛ a ɉəɠɛɛ di kɔlɔ ɓa, da di lii hu pələ. Kɛlaa, nɛ̨ɛ̨nui hilɛ kaa mą, a niihɛlɛn a yɛnɛ̨ɛ̨ mɛ̨nįɠaa, ə gɛ, ə ɉilɛ liiɓa kɛ.

³⁵ Mɛ̨ni ŋɛ̨i gáá moi káá, gaa moi a ka wɔ mɛ̨nį lɛlɛɛ, kɛlaa, və́ moi a kɛ a ka kpaan mɛ̨nį. Gáá lɔ bɔ nu kəlee ə nwɔ yɛnɛ̨ɛ̨ kɛ a ɲąąnɛ̨ɛ̨, ganąn ŋąą Yálá ɓa.

³⁶ Akɛ hilɔnu ta a wɛli hon, a gaa yɛ hvo pai pɛli ŋą wɛlii ɓɛlɛ lɔi, a pɛli ə nɛɛ laa, hvo nɛ̨ŋɛ̨n ɉəɠə li, ə gɛ yɛ bələi ə giliŋąhiɛ la; nu hveelɛi, da pɛli di dakpɛliɠaa həɠə.

³⁷ Kɛlaa, nui a naa kpɔ gwəi, di hvo gbaan ni, ə ɉəɠə kpɔ goo kpala, a niiɓa, yɛ, gaa pai ɉilɛtai mɛ̨nį ɓɛlɛ kɛi mą, akɛtii, aa gɛ a nɛlɛɛ.

³⁸ Yili ɓa, nui a nwɔ wɛlii həɠə a nɛ̨ą, aa gɛ a nɛlɛɛ; nui nwɔ̨nɔ̨ awala nwɛi həɠə, yili hviɛlaɓoɔi.

³⁹ Hilɛtai nɛ̨a yiliɛ hilɛ ɓa ŋą yɛnɛ̨ɛ̨ kəlee yee mu. Akɛ ɉilɛ a haa, mąą aa hvoloon, a pɛli hee hulɔnui nwɛli kaa mą bɔ, kɛlaa, ə kɛ a Kristalon da.

⁴⁰ Kɛlaa yaamun, yɛ bələi nwɔ kiliŋąhiɛ kaa la, a lɛɛ gbɔwɔ ɓa, a kɛ nɛ̨ɛ̨ hu. Ɲą́ą́ gbɛli, náái na gɛ́, Yálá nwɔ Kilii ka ɲəi.