Korɛntə dɔlɔɔ 6 - Yálá laawoo hɛɓɛ (dc)Kalan nɛa lɔwai mɛ̨nį 1 Akɛ mɛ̨nį ta a too ká lɔwai, lə mɛ̨nį ɓa ká li tɔɔi, káá li la yɛnɛ̨ɛ̨ nuą liila giti tee mɛ̨nį ɓa, ká hvo giti laa li nu mąąhəɠɛɛɠaa liila? 2 Ka hvo gbaɠala kɔ́lɔn kaa diɛ, Yálá nwɔ nuąi ɓə pai yɛnɛ̨ɛ̨ nuą kiti teei? Akɛ, káá ɓə pai yɛnɛ̨ɛ̨ kiti teei, lə mɛ̨nį ɓa ka hva pɛli mɛ̨nį hvįikpɛɛ kiti teei ka lɔwai? 3 Ká hvo gɔlɔn kaa diɛ, guɔ ɓə pai malakaɠaa kiti teei, gu hvo mun kɛ ɲɛ̨nɛ̨ɛ̨ ŋɛ̨i hu mɛ̨nįɠaa? 4 Yaan, akɛ mɛ̨nį ta a kɛ ka lɔwai, lə mɛ̨nį ɓa nuąi di hvo mɛ̨nį ta kɔ́lɔn yɛ hvilɛn na gbɔn ɓa, káá di kɛ a ka wɔ kiti tee nuą? 5 Yii ŋɛ̨i gáá moi, yili kaa a ká nwumɛ̨ mɛ̨nį. Akɛti, nu ta hvo ka lɔwai yii kili kaa mą, yɛ pɛli ka lɔwai mɛ̨nį ɓoi? 6 Kɛlaa, mɛ̨nį ta a kɛ nąn nonnii hveelɛ lɔwai, yili ɓo mɛ̨nį ɓa lə yɛnɛ̨ɛ̨ nuą ɲɛ̨i ɓa? 7 Ə kɛ a pələ lɔpee gəlee, nwumɛ̨ mɛ̨nį ɓaa, kiti yɛ ɓo ká lɔwai. Lə mɛ̨nį ɓa ka hva pɛli ka liikpələi ka ɓɛlan da hɔn mu? Lə mɛ̨nį ɓa, ka hva nɛɛ laa di hvo ká mąąkpoloon? 8 Kɛlaa yaamun mə ká yee laa hulu mɛ̨nį hu, da nuą mąą kpoloon mɛ̨nį, yá pa, diɛ ɓo a ká nąn nonnii. 9 Ka hvo gɔlɔn káá, hulu kɛ nuą, di wɔɔ naa hvo Yálá nwɔ tɔɔlaai hu? Ká hvo ka kpɔwɔ ɓowo yili hu! Ə kɛ a wɛli hon nuą, ə kɛ a nuąi da kwɛli hvilɛn hali ɓa, ə kɛ a wɛlikɛ nuą, ə kɛa nɛ̨ąąi da laa a di kee, ə kɛ a hinąąi da laa a di kee, 10 ə kɛ a nwuɔ̨ nuą, ə kɛ a wɛa hɛn ɉəɠə nuą, ə kɛ a lɔɔ honŋaa, ə kɛ a nu laa kala nuą, ə kɛa gbąną-gbąną hɛn ɉəɠə nuą; di tai lɔpee heei hvo Yálá nwɔ tɔɔlaai hu. 11 Bələ ɓə tɔlɔɔ ká taɠaa di kɛ la. Kɛlaa, ka mąą aa waa, ká mąą aa həɠə, káá kɛ kɛa a tələnmo nuą gu Ną́mu Jesus Kristə laa hu da gu wɔ Yálái nwɔ Kilii háálai. Mɛ̨nį kəlee mąą laa kaa ɲə́i 12 «Mɛ̨nį kəlee mąą laa kaa ɲə́i», kɛlaa gəlee hva mą́ą́ hon. «Mɛ̨nį kəlee mąą laa kaa ɲə́i», kɛlaa, vá pɛli gbɔ́wɔ́ kɛi a hɛn da ŋą luwɔ. 13 «Kɔ̨nɔ̨n gaa a koo lon nwɔɔ, koo lon yaan, kɔ̨nɔ̨n mɛ̨nį ɓə gaa la nu ɓa.» Tɛ̨ą li, kɛlaa, koo lon da kɔ̨nɔ̨n, gəlee kaa a kala hɛn Yálá ɲɛ̨i ɓa. Kɛlaa, nu kpįnį nwɛi, hvo a túwɔ́ pələ ɲɔ̨n gulɔ nwɔɔ, nu kpįnį kaa a gu Nąmu nwɔɔ, gu Ną́mu yɛ ɓo a nu kpįnį nwɔɔ. 14 Yaan, Yálái ŋɛ̨i gu Ną́mu kulɔ haaɓɛlaa lɔwai, yaa lɔ ɓə pai gu kulɔi haaɓɛlaa lɔwai a nwɔ huwalawala. 15 Ká hvo gɔlɔn káá: Ká kpįnį kaa a Kristə tɔɔ-tɔɔiɠaa Akɛ yili kaa tii, lə mɛ̨nį ɓa ŋą́ Kristə tɔɔ-tɔɔi tii həɠə gɛ́ gɛ a wɛlikɛ hɛn? Gɛ́ mą: Kpaa-o! 16 Ka hvo gɔlɔn káá, nu ka wɛlikɛ nɛ̨ɛ̨nu ka laa, a kɛ tii da yaa daa kɛ a kɔ́lɔ tɔ̨nɔ̨? Mąąhɔlɔɓo, moɔi, diɛ mą: «Nu hveelɛi tii daa kɛ tanɔ̨n.» 17 Kɛlaa, nui da Ną́mu daa yili di kee ɓa, di kili a kɛ tanɔ̨n. 18 Ka pu ka həɠə túwɔ́ pələ ɲɔ̨n dɔwɔ, nɛ̨ŋɛ̨n da kpɛliɠaa kaa laa, nu a ɉəɠə hva gɔlɔ mąą liɓi. Kɛlaa, túwɔ́ pələ ɲɔ̨n gulɔmun a nɛ̨ŋɛ̨n ɉəɠə gbɔwɔ kɔ́lɔ ɓa. 19 A wala kɛ tii, ka hvo gɔlɔn káá: ka káá a Kili-Mąąhəɠɛɛi gaa ká hu, ɉee pɛlɛ́, yai Yálá ə dɛɛ ka pɔ? Ká pɔɔ hvaa a ka kpįnį? 20 Nu ta ɓə ka nwun mąąɓo a ɉɔ̨nwɔ̨ kɛnɛ̨. 'Ká Yálá mąąwiɛ kan a ka kɔlɔ. |