Korɛntə dɔlɔɔ 5 - Yálá laawoo hɛɓɛ (dc)Túwɔ́ pələ ɲɔ̨n da 1 Pə́lə́ ta kaa ɓoi kɛɛnąą kəlee ɓa, diɛ kɛ: Wɛli mɛ̨nį huwu ta aa kulɔ ká lɔwai, a wɛli mɛ̨nį huwu yii di hvo ta ɲɔ̨nwɔ̨ɔ̨mąn gaa li, hali pulu nuą yíi pələ hu. Ya ɓaa, ká tɔ̨nɔ̨ da nąn nɛ̨ą di kaa yíi ɓa. 2 Ɛlɛɛ kaamun, káá hvɛɛ a kpɔwɔ ɲąąkɛnɛ̨, ka hvo yili kaa li, a nwumɛ̨ mɛ̨nį, ká hvo mąą wɛli hee ɓo, yɛ haa a too káá, ká mɛ̨nį tii kɛmun gulɔ ká lɔwai. 3 Nwɛ́i, bələi mąn ti gbį́nį hvo la laa, kɛlaa, gili kaa laa; nui mɛ̨nį taaləi tii kɛ, ŋą́ą́ gbɛa giti tee, yɛ ŋą́ kɛ kɛ laa ká lɔwai. 4 Gu Ną́mu Jesus laa hu, da nwɔ Hééɓolaa laa hu, hvo kɛli ká kpɔn doo mɛ̨nįi tii ɓa, ŋą́ ɓo ká lɔwai a gíli. 5 Yili ɓa, gu nu taaləi tii, tɛɛ ɓilihi pɔ, gɔlɔ hu kala mɛ̨nį ɓa, nįį yɛ pɛli ɓaloi a gu Ną́mu nwɔ hvólói. 6 Mɛ̨nįi tii ka káá ka kpɔwɔ ɲąąkɛnɛ̨i ɉu, hvo lɛlɛ li, ka hvo gɔlɔn kaa diɛ: «Lɛɠɛi dɛ hɛn nogolo a pɛli ə lɛɠɛ kpɔlɔ kɛnɛ̨ tɛ?» 7 'Ká nɛɠɛ tɛ hɛn bɔlɔ pɔlɔi tii kulɔ kani káá, káá pɛli kɛi a lɛɠɛ yɔwɔɔ nįnɛ̨; hvo gaai, ká tɛ hɛn və ká hu, mąąhɔlɔɓo, Kristə ŋɛ̨i a guɔ tɛɛ nwun mɛ̨i haláá hɛn, daa baa. 8 Yili ɓa, ká gu gu wɔɔ hɛli pu kan, hvo kɛ a lɛɠɛi dɛ hɛn bɔlɔ pɔlɔ, hvo kɛ a kili ɲɔ̨nwɔ̨ɔ̨ da túwɔ́ pələ ɲɔ̨n. Kɛlaa, ká gu gɛ a lɛɠɛ yii gala hɛn və ɉu, kwəi kwələlaa hu da tɛ̨ą hu. 9 Nwɔ́ hɛɓɛ́ dɔlɔɔ ŋɛ̨i ŋą dɛɛ káá, ŋą́ bɛ̨ɛ̨ ɉu gɛ́ mą: Nuąi nwɛli mɛ̨nį taaləi tii hu, 'ká diɛni, ká mąą mɛ̨nį ta hvo kɛ gee ɓa. 10 Nwɛlikɛ nuąi ɲɛ̨nɛ̨ɛ̨ ŋɛ̨i hu nuą lɔwai, diɛ hvəə gíli hvilɛnŋąąi diɛ, gɛ́ mɛ̨nįi ŋɛ̨i ɓo la, da hɛn nwɛli nuą, nwuɔ̨ nuą, nuąi da kwɛlihvilɛn hali ɓa. Mąąhɔlɔɓo, hvo kɛli lɔ kɛ, ká kulɔ ɲɛ̨nɛ̨ɛ̨ ŋɛ̨i hu. 11 Kpələ! Ŋą́ mo ɉɛɓɛ́ hu, gɛ́i: Nui gu Nąn naa kaa mą, mąą nu a kɛ a wɛlikɛnmun, awala kɛ tii, a kɛ a hɛn nwɛlimun, a nui a kwɛli hvilɛn hali ɓa, a wala kɛ tii, a laa kalamun, a lɔɔ-hon, a nwuɔ̨mun; ká nu taaləi ti ká mąą mɛ̨nį ta hvo pɛlɛ gee ɓa, 'ká hvo mąn kɔ̨nɔ̨n mįi gee ɓa. 12 Nuąi di hvo Yálá ŋą kpɔn hu, ɲą́ą́ ɓə mɔ̨ɔ̨ ŋą́ li tɔɔi gɛ́ di kiti tee, lə laa hu? Kɛlɛi bɛlɛ́n nuą ɓə káá ŋɛ̨i mąąnɛ̨ɛ̨ ká di kiti tee. 13 Nuąi di hvo gu pɔ, Yálá ɓə pai di kiti teei. «'Ká mɛ̨nį ɲɔ̨n gɛmun kulɔ ká lɔwai.» |