Korɛntə dɔlɔɔ 16 - Yálá laawoo hɛɓɛ (dc)

Kpɔnmąą hɛn di gulɔ a Ɉerusalɛmə kalan gbɔn nwɔɔ

¹ Yii hvilɛn na galan nɛa kpɔnmąą ɓo mɛ̨nį ɓa, káá mąn, kpaaləi ŋį́ nɛ Galatə kalan gbɔnŋaa diɛ, 'ká hvilɛn bulu.

² Lɔwɔ tɛitɛi ŋą hvoló tɔlɔɔ, yii nu tɛitɛi a pɛli ɉɔlɔɓoi, yɛ gulɔ ɲəi hɛnŋaa hu, yɛ naa gwɛlɛ, yɛ bələi ŋą yee pɛli mąą laa kaa la; 'ká hvo bái lɔwai mąąkpɔn, ɉɛnŋaa tii ɲąąkpɔn mɛ̨nį ɓa.

³ Ɓɛlɔwai ŋą́ paa la, nuąi ká di həɠə ɉu, ŋą́ dɛɛ di pɔ ŋą́ bɛlɛ hɛɓɛ́ ɓa, də li la Ɉerusalɛmə.

⁴ Akɛ mąąnɛ̨ɛ̨ ɲą́ą́ gbinį ŋą́ li, kwa nuą tii kwa ɉiɛ kulɔ gee pɔ.

Polə ŋą hiɛ kulɔ mɛ̨nį

⁵ Gáá pai Masedoanə hu ɓɔi, gɛ́ pa ka pɔɔli.

⁶ Ŋą́ pa, gu kaa pai lɔwai tawolo kɛi gu kee ɓa, ŋą́ pa, ŋą́ lɛɛ laa ə lɛɛ la ɉu hąmą lɔɔ ə kpɛɛ. A kɛ tii, ɓɛɠaai ŋą́ kɛi pa lii laa, ká kpɔnmąą tɛɛ bɔ́ ŋą́ li laa.

⁷ Yii ŋɛ̨i nwɛi, və́ pai tɛɛi ɉa, a kɛ Ną́mu a hvaa mą, gáá pai yíi kuu tawolo kɛi ka pɔ.

⁸ Kɛlaa, gáá pai lɛɛi ɓɛ Efɛsə daai, ə lɛɛ la ɉu Pantəkotə lɔwai.

⁹ Mąąhɔlɔɓo, pələ kɛnɛ̨ laa aa ɓo gɛ́ kólo tɔwɔ, ɛlɛɛ ɲówoɠaa tamąąi.

¹⁰ Timote a pa laa, ka ká yee hee mu a nɛlɛɛ, mąąhɔlɔɓo, kwa yaa ɓə ku kaa Ną́mu nwɔ kólói ɓa kuɔ gɛ.

¹¹ Nui lɔpee ta hvo mɛlɛkpɛɛ ma, yaamun, ka kpɔnmąą tɛɛ bɔ, ə gɛ, ə nwɔ hiɛ kulɔ liilaa hu, ə gɛ, ə pənə ə pa, ə həli mą́ą́. Mąąhɔlɔɓo, kwa gu nąn nonnii ku kaa mąąkpɔn ɉii.

¹² Yii ɓaa ną́n non Apɔlɔsə nwɛi, ŋą́ kɛ vaŋąlɔi a yələ kəlee, ə gɛ, ə pa ka pɔɔli, da gu nąn nonnii takpɛliɠaa, kɛlaa, hvo bɔ ni hvo pa laa yiihu. A lɔwai hɔlɔɓo, gaa pai həlii laa ka pɔɔli.

Liɛwoo kpəli da yələ wala too woo

¹³ 'Ká lɛɛ a 'ká ɲɛ̨i, 'ká tɔɔ a ká nwąnąi laa na laa pələ mɛ̨i, 'ká ká liikpələ, 'ká ká huwalawala.

¹⁴ Ka mɛ̨nį kəlee kɛ a wɛlikɛmąąlaa.

¹⁵ Ną́n nonnii! Mɛ̨nį tɔ̨nɔ̨ ɓə gáá ɉu hvɛlii káá, 'ká kili kaa ɉu, Stefanasə da ɲəi bɛlɛ́n nuą ɓə kɛ a Akaiə nuą dɔlɔɔ, diɛ di kpɔwɔ kɛ a nu mąąhəɠɛɛɠaa di wɔɔ tínuą.

¹⁶ 'Ká lɛɛ nu ɓɛlɛmąąɠaa tii woo mu, da nuąi kóló kɛi kee ɓa, di yee ə ɓo mɔ̨nɔ̨ tɔ̨nɔ̨ hu.

¹⁷ Stefanasə da Fortunatusə, ɛlɛɛ, Akaikusə di pa mɛ̨nį ɓɛ aa gwə́nɛ̨ɛ̨, yɛ pələi ka hvo la ɓɛ gwɛ́lɛ, yii mą́ą́kpaan ə kɛ mą, daa dɛɛ bɔ́,

¹⁸ daa níilaa, daa káá kpɛlimąn ká liilaa. 'Ká nu huwu taaləi tii hvaŋąlɔ.

¹⁹ Yálá nwɔ nu Yálá ŋą kpɔnŋaai Asi lɔi hu, diɛ ka túwɔ́ ɓo. Akilasə da Priska, diɛ kpɛli di kaa ká túwɔ́ɓo, ə mą kɛ gbɔn a kɛ ɲąąkpɔn ɉi di yəi bɛlɛ́n, diɛ kpɛli, diɛ ka túwɔ́ɓo gu Ną́mu hu.

²⁰ Nąn nonnii kəlee diɛ ka túwɔ́ɓo. 'Ka ká kee yee tuwɔ ɓo a wɛlikɛmąą túwɔ́.

²¹ Dúwɔ́wooɠaa ŋɛ̨i kaa a ɲą́ą́ gbinįlee ɲə́ə́ pɔɔ.

²² Nui gu Ną́mu wɛli hvo mą, mąą nu nɛ̨ŋɛ̨n naa ɓə. Maranata! (Mukulaa ɓaa: Ną́mu, pa!)

²³ Gu Ną́mu Jesus ŋą nɛ̨ɛ̨laa ə kɛ ka pɔ.

²⁴ Ká kəlee ká wɛlikɛ kaa mą́ą́, gu Ną́mu Jesus Kristə hu.