Korɛntə dɔlɔɔ 12 - Yálá laawoo hɛɓɛ (dc)Kili yəi mɛ̨inɛ̨ɛ̨ɠaa 1 Yii hvilɛn na Kilii yəi mɛ̨inɛ̨ɛ̨ɠaa diɛ, ną́n nonnii, və́ bɔ ka hvo lɛɛ ká tɛɠii yili hu. 2 'Ká kili kaa ɉu, káá, ká kɛɛ hali yíi hu, ká kɛli lɔ li ká nwun ɉu kun ma, ɉaliɠaa tii di hva hvaa, di pɔ pələ. 3 Yili ɓa, gáá moi káá; nu ta a kɛli pələ ɓo Yálá ŋą Kilii yee kɔnma, hva pɛli kɛi diɛ, «Jesus nɛ̨ŋɛ̨n naai», nu ta yaan hva pɛli kɛi diɛ: «Jesus kaa a Nąmu», akɛ Kili-Mąąhəɠɛɛ hvə dɔɔ li la. 4 Mɛ̨inɛ̨ɛ̨ huwu tamąąi, kɛlaa, Kili-Mąąhəɠɛɛ kaa lɔ tɔ̨nɔ̨ gbən. 5 Góló tamąąi, kɛlaa, Nąmu kaa tanɔ̨n. 6 Góló ɉee kpəlin na tamąąi, kɛlaa, Yálá tanɔ̨n nɔ ɓə a nu kəlee nwɔɔ too ɉu. 7 Kili-Mąąhəɠɛɛ a nu tɛitɛi kɛ kóló tɛɛ bɔ, mɛlaa mąą mɛ̨nį ɓa. 8 Kili-Mąąhəɠɛɛ a nu taɠaa di wɛi kɛ a kilikɛɲəi wooɓoɔ, daɠaa di wɛi yɛ ɓo a: mɛ̨nį kɔ́lɔn nwoo Kili tanɔ̨n tii haalai; 9 Kili tanɔ̨n tii lɔ ɓə, a laa na laa tɛɛ nu taɠaa pɔ, Kili tanɔ̨n lɔ ɓə nwɔ̨nɔ̨ a nu ɓalo mɛ̨nį mąą laa tɛɛ nu taɠaa pɔ; 10 ə kpalo mɛ̨nį kɛɛ mąą laa tɛɛ da pɔ, ə Yálá kwəi mɛ̨nį hukulaa tɛɛ da pɔ, ə dakpɛli nwɛi kɛ a mɛ̨nį hukpɛ kili, da yɛnɛ̨ɛ̨ mɛ̨nįɠaa hu tɔɔ, ə da nwɔɔ kɛ a hį́iwooɠaa ɓoɔ, ə da nwɔɔ kɛ nwɔ̨nɔ̨ a laawoo tɛɛ kɛɛ. 11 Kɛlaa, mɛ̨nįɠaa tii kəlee, Kili tanɔ̨n tii kɛ-kóló li, yɛ nu tɛitɛi nwɛi tɛɛ bɔ, yɛ bələi a laa la a nii. Nu kpįnį kaa tɔ̨nɔ̨ dɔɔ-tɔɔiɠaa tamąą 12 Bələi lɔ ɓə gaa la, nu kpįnį kaa la tɔ̨nɔ̨, dɔɔ-tɔɔi tamąąi mą, kɛlaa, bələi mąn tii damąąi la, gaa lɔ a kɔlɔ tɔ̨nɔ̨; bələ lɔ ɓə Kristə kaa la. 13 Mąąhɔlɔɓo, di gu kəlee gu mąąwaa Kili-Mąąhəɠɛɛ tɔ̨nɔ̨ hu, ə gɛ, gu kɛ a kɔlɔ tɔ̨nɔ̨, yɛ ə kɛ a Ɉuifə, yɛ ə kɛ a Grɛkə, ə kɛ a luwɔ, ə kɛ a kaalon; yá nwun gulɔi tɔ̨nɔ̨ ɓə gu gu kpələ la, Kili-Mąąhəɠɛɛ tanɔ̨n ɉu. 14 Nu kpįnį yan dɔɔ-tɔɔi hvo lɔ mą tanɔ̨n, kɛlaa, damąąi. 15 Kɔwɔ a kɛ diɛ: «Yii və́ a yee, və́ a nu nąą ta», akɛti, hva kɛ mɔ̨ɔ̨ a kɔlɔ nąą ta? 16 Wəli a kɛ diɛ: «Yii və́ a ɲɛ̨i kɔw, və́ a nu nąą ta», akɛti, hva kɛ mɔ̨ɔ̨ a kɔlɔ nąą ta? 17 Nu nąą kəlee a lɛɛ lɔ a, ɲɛ̨i kɔw, a mɛ̨nį mɛ̨n a nə? Nu nąą kəlee a lɛɛ lɔ a wəli, a hɛn kun mɛ̨n a lə? 18 Kɛlaa, Yálá ə nu tɔɔ-tɔɔi kɛ mą, yɛ bələi niiɓa kaa la. 19 Nu nąą kəlee a lɛɛ lɔ a dɔɔi tanɔ̨n, gbįnį a kɛ mį? 20 Nu tɔɔ-tɔɔi kaa mą tamąą, kɛlaa, kɔ́lɔ tɔ̨nɔ̨ li. 21 Ɲɛ̨i kɔ́w hva kɛ yee ɓa: «Mą́ą́ kpaan və yɛ», ə mą kɛ, nwun galən hva pɛli kɛi kɔ́wɔ ɓa: «Mą́ą́ kpaan və yɛ́.» 22 Bələi mąn gaa la tii, tɔɔ-tɔɔiɠaai gaa yɛ da kɛ a di hvįikpɛɛ, di mąą mɛ̨nį nwąnąąi, 23 ɛlɛɛ, yiiɠaai di mąą hvo wiɛ li a dənən gu ɲɛ̨i ɓa, diɛmun mə, gwa di mąąwiɛ. A diɛi tii di mąą hvo wiɛ li a dənən, diɛ ɓə gwa di mąąwiɛ pələ kwɛli, 24 yiiɠaai mąąwiɛ kaa diɛ, hɛn da mąąkpaan və yiliɠaa diɛ. Kɛlaa Yálá ə nu pɛli, ə ɉeekpəlin na kɛ, yiiɠaa di mąą hvo wiɛ li, di mąą yɛ pɛli wiɛi. 25 Ə gɛ, ɓɛlaɓo hvo kɛ gu tɔɔ-tɔɔɠaa lɔwai, kɛlaa, di tɛitɛi, di mąą liihɛlɛn ə ɓo di kee ɓa. 26 Nu tɔɔ-tɔɔi ta a kɛli nwąną, mɛlaa kəlee da ɉu mɔ̨nɔ̨ mįi, dɔ̨nɔ̨ a kwəinɛ̨ɛ̨ hɔlɔɓo, nąą kəlee a kɛ gwəinɛ̨ɛ̨ hu. 27 Yaan, ka káá a Kristə kpįnį, kaa ɓo a dɔɔ-tɔɔiɠaa nu kəlee da dɔɔi. 28 Nuąi Yálá ə di hee gbɔn nwun na, dɔlɔɔɠaa ɓaa: Gɛlaɠaa, a həɠə laa: Gwəi mɛ̨nį hukulɔ nuą, da həɠə laa: Nuąi di ɓɛlaa mąąkwɛli mɛ̨nį kaa di nwuɔ̨, yili a hələ laa: Kpalo mɛ̨nį kɛ nuą, ɓalo ɓo kɛ nuą, nuąi da kpɔnmąą tɛɛ di ɓɛlaa pɔ, ɲɛ̨i tɔwɔ nuą, da hįiwoo ɓo nuą 29 Nu kəlee mə mɔ̨ɔ̨ a Gɛlaɠaa? A gwəi mɛ̨nį hukulɔ nuą? A mąąkwɛli kɛ nuą? Gəlee da mɔ̨ɔ̨ kpalo mɛ̨nį kɛ? 30 Nu kəlee ɓə mɔ̨ɔ̨ a ɓalo ɓo kɛ? Gəlee ɓə mɔ̨ɔ̨ da hįiwooɠaa ɓo? Gəlee da mɔ̨ɔ̨ woo laa tɛɛ kɛ? 31 'Ká mɛ̨inɛ̨ɛ̨ leeleeɠaa mąą gilɛ həɠə. Gəlee ə mą kɛ, gáá pələ lɛi káá, nɛlɛɛ dɛɛ gəlee ɓa. |