Korɛntə dɔlɔɔ 10 - Yálá laawoo hɛɓɛ (dc)Bələi Israɛlə ə túwɔ́ la nɔi pun ɉu 1 Ną́n nonnii, və́ bɔ, və́ ká lɛɛ ká tɛŋíi, gu nąnni kəlee di kɛ dulɔ kpinįn mu, di kəlee di gbaloyá teen, 2 ɛlɛɛ, di di kəlee di mąąwaa da Moisə ni dulɔ kpinįn mu, da gboloyá hu. 3 Di kəlee di Yálá-taa kɔ̨nɔ̨n mįi, 4 ɛlɛɛ, di kəlee di di kpələ a Yálá-taa yá, Yálá-taa kwɛnii kɛ di pulu, Kristə li kɛ, yai di kpələyá ə kɛi kulɔ ɉu. 5 Bələi mąn ə kɛ la tii, damąą di hvo Yálá lii hon, hvo gaai, mɔlɔɓɛlaa di haa nɔi pun ɉu. 6 Mɛ̨nįɠaai tii di kɛ tii, ə gɛ, ə kɛ háákələi gu yəi a mɛ̨nį kɔ́ɔn mąą, ə gɛ, gu ɲɛ̨i hvo pa kulɔ mɛ̨nį ɲɔ̨n bɔ, yɛ bələi di ɲɛ̨i ə kula bɔ. 7 'Ká hvo kɛ a hali kɔ nuą yɛ di taɠaa, yɛ bələi bɛ̨ɛ̨i la: «Nuą di hee di di laa mįi, di di kpələ, yili pulu di di muhəɠə diɛ pə́lə́ kɛ.» 8 Gu hvo kɛ a túwɔ́ pələ ɲɔ̨n gulɔ nuą, yɛ bələi daɠaa di gɛ la, yili ɓə gɛ, nu waa pow hveelɛ kɔ́w haaɓa ə haa a hvoló tɔ̨nɔ̨. 9 'Ka gu hvo gu Ną́mu ɲąąhɛn, yɛ pələi daɠaa di gɛ la, diɛn, kaalə ə gəlee nwun na pili. 10 'Ká hvo hvaa ká nwun ɉu, yɛ bələi daɠaa di gɛ la; nwun na pilimun yɛ di nwun na pili. 11 Mɛ̨nįɠaai kpɔ tii di gɛ, di yiliɠaai pɛ̨ɛ̨, ə gɛ, ə kɛ a mɛ̨nį kɔɔn mąą, di bɛ̨ɛ̨, gu mąąkwɛli mɛ̨nį ɓa, guɔi gu kaa lɛɠɛi ɲɛ̨nɛ̨ɛ̨ ɲąąkpɛɛi lɔwai ŋɛ̨i ɓa. 12 Yili ɓa, nui a giliŋąhiɛ yɛ gaa tɔɔni, ə gɛ a nɛlɛɛ, hvo pa too. 13 Ɲąąhɛn mɛ̨nįɠaai həli káá, bɛliɛi lɔ nu kanma, Yálá a kulɔ nwoo ɓa, hvo pai nɛɛi laa, di hvo ká ɲąąhɛn, hvo tɛɛ ká hvaŋą ɓa. Ɲąąhɛn mɛ̨nį a həli káá, a ká kulɔ ɉu pələ lɛ káá, a hvaŋą tɛɛ ká pɔ, káá pɛli mu. Ká ɓilihi ni ká hvo kpɔn mɛ̨nį ta ɓa 14 Yili ɓə gaa mą, nwɛ́likɛmąą nuą, 'ká kpɛla kwɛli hvilɛn ɉii hali ɓa. 15 Kaa kɛɛ mɔ̨ɔ̨ a mɛ̨nį ŋąą kaa nuą, ya ɓə gɛi gɛ́ mɛ̨nįɠaai tii ɓo la kaa. Kaa kpįnįi, ka ɉu kwɛli. 16 Núwɔ́ kpələ kɔwɔi gwa kɛ lúwɔ́ kɛi mą, hvo mɔ̨ɔ̨ gu tɔɔi kɛ tanɔ̨n Kristə ɲąmą hu? Nɛɠɛ gwa kɛ ɲąąkwɛlɛi gu gee lɔwai, yai a Kristə kɔlɔ, hva mɔ̨ɔ̨ gu yee lɔ gii hu gwa diɛ ni? 17 Yɛ bələi nɛɠɛ kaa la tanɔ̨n, gu kaa lɔ ti a kɔlɔ tɔ̨nɔ̨; hvo gaai, gu kəlee nɛɠɛ tɔ̨nɔ̨i ti ɓə gwa ɉɔlɔɓo. 18 'Ká Israɛlə lonnii kaa; nuąi da ɉaláá hɛnŋaa mįi, di yee lɔɔi lɔ gii hu da ɉaláá kulɔi. 19 Gɛ́ ŋį́ kɛ lə? Ɉuwɔi da baa hali ɓa, awala kɛ tii, ɉali kpinįlee, lə kɛ hɛn maa a diɛ? 20 Kpaa-o! Kɛlaa yɛ bələi da ɉaláá kulɔ la ɲįnɛ̨ŋaa diɛ, di hva gulɔ Yálá ɓa, və́ bɔ ká ɲįnɛ̨nŋaa ká hvo ká yee lɔ gii hu. 21 Ka hva pɛli mą ka hvo ka kpələ a gu Ną́mu nwɔ kpələ kɔwɔi, káá nwɔ̨nɔ̨ ká kpələ a ɲinɛ̨nŋaa di wɔ kpələ kɔwɔ. Ká hva pɛli kɔ̨nɔ̨n mįi gu Ną́mu nwɔ kɔ́wɔi hu, káá nwɔ̨nɔ̨ ká yee lɔ ɲinɛ̨nŋaa di wɔ kɔ́wɔi hu. 22 Akɛti, gu kaa bɔ gu Ną́mu nwɔ toloi muhəɠə? Gaa ká kwəi gu hvaŋą kɛnɛ̨i gu tɛɛ mą? 'Ká mɛ̨nį kəlee kɛ a Yálá mąąwiɛ pələ 23 «Mɛ̨nį kəlee mąą laa kaa gu ɲəi», kɛlaa gəlee hva mą́ą́ hon. «Mɛ̨nį kəlee mąą laa kaa gu ɲəi», kɛlaa, mɛ̨nį kəlee hvə a gu tɛ tɔwɔ. 24 Nu ta hvo kɛ gaa gbɔwɔ tɔ̨nɔ̨ kwɛlii, kɛlaa, ə mɛlaa di wɛi kwɛli. 25 Hɛn lɔpee da nɔwɔtɔɔ lɔwɔ kpalan ŋą, ká ɲá ká mįi, ká hvo ká kwəi kwɛli; 26 Gba la ə tɔɔ, «lɔi da ɉu hɛnŋaa kəlee kaa a Yálá nwɔɔ.» 27 Akɛ nui hvo a kalan non, a ka təli kɔ̨nɔ̨n ma, ka hvaa mą, ka li, yii lɔpee a ká kɔ la, 'ká mįi, 'ká hvo ka kwəi kwɛli. 28 Kɛlaa, akɛ nu ta a kɛ káá; haláá kɔ̨nɔ̨n ga, 'ká hvo da mįi, nui tii ka kilaa pono mąą mɛ̨nį ɓa, da ká kwəi kili mąą mɛ̨nį ɓa. 29 Ká kwəi kili hvə gáá nwɛi ɓoi, kɛlaa, nu takpɛli nwɛi ɓə. Yili ɓa, lə mɛ̨nį ɓa ŋą́ nwɔ́ lɛɛ gbɔwɔlaa lɛɛ laa nu takpɛli yɛ ɉutɔɔ? 30 Akɛ ŋą́ Yálá hɛɠɛɛɓo kɔ̨nɔ̨n ma, gɛ́ mįi, lə mɛ̨nį ɓa ɉɛn gáá mįi, gɛ́ Yálá hɛɠɛɛɓo, ká haŋą mą́ą́ mąą mɛ̨nį ɓa? 31 Ká kɛ kɔ̨nɔ̨n mįi-o ká kɛ ká kpələi-o, yii lɔpee ka káá gɛi, 'ká gəlee kɛ Yálá mąąwiɛ mɛ̨nį ɓa. 32 'Ká hvo kɛ a nui lɔpee ta too hɛn, ə kɛ a Ɉuifə, ə kɛ a, Grɛkə, ə kɛ nwɔ̨nɔ̨ a Yálá nwɔ kpɔn. 33 Yili ɓə a gɛ, ɲą́ą́ gbínįi ŋą́ tɔɔ a nwą́ną́i, gɛ́ gbɔ́wɔ́ lɛlɛ pələ kwɛli nu kəlee ɲɛ̨i ɓa mɛ̨nį kəlee hu, a gbɔ́wɔ́ tɔ̨nɔ̨i vá gwɛli, kɛlaa, nu kpulu kɛnɛ̨ nwɛi, ə gɛ, di nwun mąą ə ɓo. |