Kɔlɔnikɔ Maa-ŋuŋ 5 - Yálá laawoo hɛɓɛ (dc)

Rubɛn nwɔ pɛlɛ́i mu nuą

¹ Israɛlə, yai naa ɓa a Ɉakɔbə, non dɔlɔɔ Rubɛn, lonnii laa ka; Rubɛn tii ɓə kɛ a nąn non ɉulɔnu tɔlɔɔ, kɛlaa, ə nąn naa gbin ɓɛlɛtoo. Yili ɓə gɛ, nu pɔlɔ laa ŋɛ̨i kɛ mąąnɛ̨ɛ̨ ə kɛ ɲəi, ə lɛɛ Israɛlə lon Ɉosɛfə nonnii yəi. Ə kɛ kɛa a nui nu pɔlɔ laa aa kulɔ ɲəi nąn ɲəi bɛlɛ́n.

² Kɛlaa yaan, Ɉuda ɓə kɛa kɛ nąn nonnii lɔwai a nu kɛnɛ̨, ɉuwu hu ɓə Heeɓomun gɛnɛ̨ ə kulɔ laa. Kɛlaa, nu pɔlɔ laa nwɛi, ə kɛ Ɉosɛfə ɓa.

³ Israɛlə lon dɔlɔɔ Rubɛn lonnii laa ka: Hanɔkə Palu, Hɛsrɔn da Karmi.

⁴ Yoɛlə lonnii: Semaya, Gɔgə, Simei,

⁵ Mika, Reaya, Baalə

⁶ da Beera. Beera ə kɛ a pɛlɛ́ nąmu Rubɛn lonnii lɔwai. Yaa ka tii Tilgatə-Pilnesɛrə Asiri ŋą heeɓomun ə ɉon a luwɔ.

⁷ Gaayɔwɔɠaa kpɛli mąn di kɛ a pɛlɛ́ nąmįną, yɛ bələi di heekpəlin na ə kɛ la; dɔlɔɔ ɓaa, Yeiɛlə, yili pulu, Ɉekaryahu, da

⁸ Bɛla, Azazə lon, yai kɛ a Sema lon, a Yoɛlə lon. Rubɛn huwui tii di kɛ heeni ə həɠə Aroɛrə ə li Nebo da Baalə-Meɔn.

⁹ Voló ɓɛlai pələ, di hee lɔi ə həli nɔi pun mą Eufratə ɲalee kwɛlɛ, mąąhɔlɔɓo, di wɔɔ taatɛlɛɛi gbulu hu kɛnɛ̨i kɛ Galaadə lɔi hu.

¹⁰ Saulə nwɔ hvólói hu, di kɔ́ pɛlɛ Hagri nuą diɛ, di lɛɛ di yee mu, diɛi tii, di lɔ di wɔɔ həɠə pɛlɛ́ɠaai mu Galaadə voló həɠəi bələ nąą kəlee.

Gadə nwɔ pɛlɛ́i mu nuą

¹¹ Gadə yəi bɛlɛ́n nuą di pa, di hee Rubɛn ni tənən ma, Basan lɔi hu, ə lɛɛ ɉu ə həli la Salka lɔi ɓa.

¹² Yoɛlə nwɔ pɛlɛ́i ɓə kɛ di ɲɛ̨itɔwɔ, a həɠə laa, Safamə, Yaenai da Safatə, Basan lɔi hu.

¹³ Di kaayɔwɔɠaa, yɛ bələi bɛlɛ́ɠaa kaa la, diɛ ɓaa: Mikaɛlə, Mesulamə, Seva, Yorai, Yaekan, Ɉia da Ebɛrə; di kɛ a nu mɛ̨ihveelɛ.

¹⁴ Bɛlɛ́ɠaa tii mu nuą ka: Avihailə lonnii, Huri lonnii, Yaroa lonnii, Galaadə lonnii, Mikaɛlə lonnii, Yesisai lonnii, Yado lonnii, da Buzə lonnii.

¹⁵ Ahi, Avdiɛlə lon, Guni lon, ya ɓə kɛ a bɛlɛ́ɠaa tii nwun nąmu.

¹⁶ Di kɛ heeni Galaadə, Basan lɔi hu da ɲee mu lɔiɠaa, bɛlɛɛ daatɛlɛɛɠaa laa mį́iɠaa diɛ, ə həli la di ɲɛ̨n ma, Sarɔn.

¹⁷ Di nuą tii kəlee lonon Ɉuda nwɔ heeɓomun Yoramə da Israɛlə nwɔ heeɓomun Ɉeroboamə ni di wɔɔ yələi.

¹⁸ Rubɛn lonnii, Gadə lonnii da Manase nwɔ pɛlɛ́i bələ tɔ̨nɔ̨, di laa ə kɛ guláaɠaa lɔwai, da nuąi kɛi ɓɔwa kɔ́nwɔ̨ da hə́mə́; diɛ pɛli kilɛn bilii, di yɛlɛɛ kɔ́ kɔ́i; di kɛ a nu waa pow nąąn kɔ́w nąąn nu nwun mɛ̨ihveelɛ ɲee mɛ̨ida (44.760), diɛ ɓə kɛ di hąą yiliɛ kɔ́ mɛ̨nį ɓa.

¹⁹ Di kɔ́ pɛlɛ Hagri nuą diɛ, di bɛlɛ Yeturə ɓa, di bɛlɛ Nafisə da Nodavə ɓa.

²⁰ Gɔi tii mɛ̨i ɓə di wɔlɔ laa Yálá ɓa, ə kpɔnmąą tɛɛ di pɔ, di yee ə tɛɛ di yowoɠaa diɛ, hvó gaai di kilitɔɔi kɛ Yálá ɓa. Di Hagri hon a kɔ́, da di yee pɔwaa kəlee.

²¹ Di nɛ̨ɛ̨mą, di di wɔɔ taatɛlɛɛɠaa kəlee hon, yii nonon ŋąą ə kɛ a: Ɲɔ̨nwɔ̨mɛ̨ɛ̨ waa nwun nɔɔli, ɓɛlaa pɛlɛɛ ɓooli ɓa yɛ ɓo a waa nwun veelɛ ɲee lɔɔli, Hoohvaalən nwaa hveelɛ; nu kan ə ɓo a nu waa nwun nɔɔli.

²² Di di yowoɠaa tamąą paa, mąąhɔlɔɓo, gɔi tii, ə həɠə Yálá pɔ. Di nɛ̨ɛ̨mą di hee di heei.

²³ Manase huwu bələ tɔ̨nɔ̨ heɛi kɛ nɔi, ə həɠə Basan, ə li la Baalə-Hɛrmɔn, Senirə da Hɛrmɔn yee ɓa. Di kpulu kɛnɛ̨i kɛ.

²⁴ Bɛlɛ nąmįną laa ka: Efɛrə, Yisei, Eliɛlə, Azriɛlə, Yirmeya, Hodawia da Yadiɛlə. Nuą tii di kɛ a kuláaɠaa, di laa tɛɛ, diɛ ɓo a di wɔɔ pɛlɛ́i nąmįną.

²⁵ Di hvó lɛɛ di nąnnii di wɔ Yálái pulu di kwəi tɔ̨nɔ̨ mɛ̨i, di Yálá lɛɛ, nuąi Yálá ə di hukala di ɲɛ̨itɔwɔ, di hvilɛn di wɔɔ haliɠaa pulu.

²⁶ Yili ɓə gɛ, Yálá ə Asiri tɔɔɓɛlaai nuąi kɛ a Pulə da Tilgatə-Pilnesɛrə lii muhəɠə Rubɛn huwu, Gadə huwu da Manase huwu bələ tɔ̨nɔ̨ diɛ, di di hon a luwɔɠaa, di li a diɛ, Hala, Habɔrə, Hara da ɲalee ŋɛ̨i kɛ Gozan gwɛlɛ; háá ɓa háá di kaa laa.

Levi nwɔ pɛlɛ́i mu nuą

²⁷ Levi lonnii laa ka: Gɛrsɔn, Kehatə da Merari.

²⁸ Kehatə lonnii laa ka: Amramə, Yiseharə, Hebrɔn da Uziɛlə.

²⁹ Amramə lonnii laa ka: Aarɔn, Moisə, da Miriamə. Aarɔn nwɔ lonnii ɓaa: Nadavə, Avihu, Eleazarə da Itamarə.

³⁰ Eleazarə ə Pinasə kaa, Pinasə ə Avisua kaa,

³¹ Avisua ə Buki kaa, Buki ə Uzi kaa,

³² Uzi ə Zerahia kaa, Zerahia ə Merayotə kaa,

³³ Merayotə ə Amaria kaa, Amaria ə Ahituvə kaa,

³⁴ Ahituvə ə Sadɔkə kaa, Sadɔkə ə Ahimaasə kaa,

³⁵ Ahimaasə ə Azaria kaa, Azaria ə Yohanan kaa,

³⁶ Yohanan ə Azaria kaa. Yálá hee pɛlɛ́i ŋɛ̨i Salomɔn ə dɔɔ Ɉerusalɛmə, Azaria tii ɓə kɛ mu, a ɉaláá laa həli mun gɛnɛ̨.

³⁷ Azaria ə Amaria kaa, Amaria ə Ahituvə kaa,

³⁸ Ahituvə ə Sadɔkə kaa, Sadɔkə ə Salumə kaa,

³⁹ Salumə ə Hilkiya kaa, Hilkiya ə Azaria kaa,

⁴⁰ Azaria ə Seraya kaa, Seraya ə Yehosadakə kaa;

⁴¹ Yehosadakə ə lɛɛ Ɉuda nuą, da Ɉerusalɛmə nuą pɔ diɛ li luwɔlaa hu, ɓɛlɔwai Yai-Laa ə di lɔ la Nabukodonosorə yee ɲą.