Kɔlɔnikɔ Maa-ŋuŋ 29 - Yálá laawoo hɛɓɛ (dc)

Mɛ̨inɛ̨ɛ̨ɠaa di gɛ Yálá nwɔ pɛlɛ́i tɔɔ mɛ̨nį ɓa

¹ Tɔɔmun Davidə ə mo nu kpɔn gəlee ɓa, yɛ diɛ: «Nu tɔ̨nɔ̨i lɔ Yálá ə ɉəɠə ɉu, yaa lɔ ɓaa a nón Salomɔn, gaa nii a hulɔnon, ɉu hvo walawala li, goló yaan gɛnɛ̨, ɛlɛɛ, golói ŋɛ̨i hvo a nu kan nwɔɔ, kɛlaa, gaa a Yai-Laa nwɔɔ.

² Ŋą́ą́ tɔɔ kpɔ a nwąnąi, ŋą́ą́ Ną́mu Yálá nwɔ pɛlɛ́i tɔɔ hɛnŋąą ŋąąkpɔn; hɛni, a yii mąąnɛ̨ɛ̨ a hɛni, wali, a yii mąąnɛ̨ɛ̨ a wali, ɓala kwɛli, a yii mąąnɛ̨ɛ̨ a ɓala kwɛli, wulu, a yii mąąnɛ̨ɛ̨ a wulu, kwɛli kpəlee, a yii mąąnɛ̨ɛ̨ a kwɛli kpəlee; kuwɔ-kwɛni lɛlɛɛɠaa: onisə. Kwɛni lɛlɛɛ huwu tamąą, daɠaa tɛɠiɛɛ, kwɛni kwɛlɛɛ huwu tamąą; ŋą́ą́ ɉɛnŋąą tii kwɛli kpɔ kɛnɛ̨.

³ Yili pulu, yii kpɔ Ną́mu Yálá nwɔ pɛlɛ́i mąą mɛ̨nį kaa a gwə́inɛ̨ɛ̨ mɛ̨nį, hɛni da walii ɲə́i a gbɔ́wɔ́ nwɔɔ, ŋį́ dɛɛ Ną́mu Yálá nwɔ pɛlɛ́i tɔɔ mɛ̨nį ɓa, ə pɛlɛ la bɛlɛ́ tɔɔ hɛnŋąąi kpɔ ŋį́ ŋąąkpɔn mą.

⁴ Ofirə hɛni kilə waa nwun dɔ̨nɔ̨, wali huwaa kilə waa nwun veelɛ yeenąą, yili ɓə da bɛlɛ Yálá nwɔ pɛlɛ́i bɛlɛ́nwąną ɓa;

⁵ golóɠaa kpɔ hvilɛn na hɛni ɓa, wali da yɛlɛ koló lɔpee da gɛ di yee ŋą mąą mɛ̨nį ɓa; gbɛɛ ɓə gaa bɔ ə ɉɛnŋąą tii ta laakwɛlanmo Yai-Laa ɓa a naa gwəi mɛ̨inɛ̨ɛ̨?»

⁶ Ya ɓə bɛlɛ nąmįną, nuąi kɛ ɉį́įɠaa nwun na Israɛlə lɔi hu, yiiɠaa kɛ nu waa tɛitɛi nwun na, nu nwun dɛitɛi nwun na, da nuąi kɛ tɔɔmun nwɔ hɛnŋąą nwun na, di pa a naa gwəi mɛ̨inɛ̨ɛ̨ a di liiɓa pələ,

⁷ di dɛɛ Yálá nwɔ pɛlɛ́i mąą mɛ̨nį ɓa: Hɛni kilə waa nwun dɔ̨nɔ̨ ɲeemɛ̨ihveelɛ, da hɛni kpuwulu waa pow, wali kilə waa nwun ɉaaɓa da da, ɓala kwɛli kilə waa nwun mɛ̨inda pɔɔla, kwɛli kpəlee kilə miliɔn ɉaaɓa.

⁸ Nuą yiiɠaa kúwɔ́-kwɛni lɛlɛɛɠaa di kɛ di yəi, di dɛɛ Gɛrsɔn mun Yehiɛlə pɔ, di bu Yálá nwɔ pɛlɛ́i ɉɛn gɔw kɛɛnąą.

⁹ Nuą tii kəlee di ɉɛnŋąą tii tɛɛ a di kwəinɛ̨ɛ̨, hvo gaai, di kɛi di tɛɛ Yai-Laa pɔ a di kwəi kwəlɛɛ. Tɔɔmun Davidə yaa kpɛli mąn, gwəi ə nɛ̨ɛ̨ ɉu kpɔ kɛnɛ̨.

¹⁰ Davidə ə Yai-Laa mąątɛ̨nɛ̨ nu kpɔn tii kəlee ɲɛ̨i ɓa, yɛ kɛ diɛ: «Mąąwiɛ ə kɛ Yai-Laa ɓa ɲɛ̨n deei hvo mą! Yai gaa a ku kalaɓɔlɔ Ɉakɔbə nwɔ Yálá!

¹¹ Heeɓolaa, huwalawalalaa, lɛlɛ, mąąɲįnɛ̨n, mąąwiɛ, di kaa Ə́ yəi, gbala ə tɔɔ, hɛn lɔpee yələ kɔ́lɔn ɉu, da lɔi ɓa, Ə́ wɔɔ ɓaa a gəlee. Ə́ wɔ tɔɔlaa da ɲąąwooɓolaa pɛlɛɛi hɛn gəlee mɛ̨i.

¹² Hɛngɔw da mąąwiɛ da həɠə Ə́ pɔ, Ə́ ɓo heeni hɛn gəlee mɛ̨i. Heeɓolaa da huwalawalalaa, di kaa Ə́ yəi ŋą, mąąlaa kaa Ə́ yəi, Yɛ́ hɛn gəlee muhəɠə, Yɛ́ di huwalawala.

¹³ A kɛ tii, háákələi, ku wɔ Yálá, ku kaa Ə́ hɛɠɛɛɓoi, kuɔ ə́ nwɔ kɛnɛ̨laa laa mąąwiaa 'ə tɛ.

¹⁴ Gbala ə tɔɔ, gbɛɛ ɓaa a ɲą́ą́, gbɛɛ ɓaa a nwɔ́ nu kanŋaai, yai kwa pɛli mąąlaa hɔlɔɓoi kuɔ ku liiɓa mɛ̨inɛ̨ɛ̨ kɛ, yɛ́ yiiɠaai ŋɛ̨i hvo gaai, hɛn gəlee a həɠə Ə́ pɔ, ɛlɛɛ ɉɛn ku gwɛlɛi, Ə́ yee ɲą lɔ ɓə ə həɠə laa.

¹⁵ Gbala ə tɔɔ, ku kaa Ə́ ɲɛ̨i mu yɛ nwɛ̨ąą, yɛ tɛɛ nuą, lɔ yɛ ku nąnni kəlee di kɛ la. Ku yíi hvólóɠaai ɓɛ ku yəi yɛ̨nɛ̨ɛ̨, di kaa yɛ nįnįn, ɲali bulu hvo mą.

¹⁶ Yai-Laa, ku wɔ Yálá, ɉɛnŋaai kpɔ ŋɛ̨i ku di ɲąąkpɔn gee ɓa, kuɔ gɛ pɛlɛ́ tɔɔ la Ə́ Laa Mąąhəɠɛɛ ɓa, gəlee da həɠə Ə́ yee ŋą, Ə́ pɔɔ ɓaa a diɛ.

¹⁷ Ną́mu Yálá, gbaɠala kaa mą́ą́, gɛ́: Yá nu kwəi kaa, kwəi kwələlaa yɛ Ə́ lii hon, nwɛ́i, ŋą́ą́ ɉɛnŋąąi tii kəlee tɛɛ kpɔ Ə́ pɔ gbɔ́wɔ́ ɓa, ɛlɛɛ a gwə́inɛ̨ɛ̨. Ya ka nwɔ̨nɔ̨, gáá ə́ nwɔ nuąi ŋɛ̨i ɓɛ di kaai, diɛ pa Ə́ pɔ di kpɔwɔ ɓa a mɛ̨inɛ̨ɛ̨ɠaa.

¹⁸ Yai-Laa, Abrahamə, da Isaakə, da Israɛlə, ku káláni di wɔ Yálá, 'Ə́ ɲɛ̨́i kɛ Yɛ́ nuąi di wɔ kiliŋąhiɛi tii ɓa a yələ kəlee. Ɛlɛɛ Ə́ di kili tínɛ̨n Ə́ pɔ pələ, a nwala walaa.

¹⁹ 'Kili lɛlɛɛ tɛɛ nón Salomɔn pɔ, yɛ pɛli, ə́ wɔ Tíɓoɠaai, ə́ wɔ tɔ́nnwooɠaai, da ə́ wɔ lɔi hon bələ mąą yɛlɛ kɛi, yɛ gəlee pɔ túwɔ́ ɓo, ɛlɛɛ bɛlɛ́i ŋɛ̨i ŋį́ dɔɔ-hɛnŋaa ɲąąkpɔn, yɛ dɔɔ.»

²⁰ Davidə yɛ nu kpɔn gəlee ɓa: «'Ka Yai-Laa, ka wɔ Yálái mąątɛ̨nɛ̨.» Nu kpɔn kəlee di Yai-Laa di nąnni di wɔ Yálá mąątɛ̨nɛ̨, di pɛlɛ nɔi ɓa, di gwɛli hvilɛn Yai-Laa líi la, ɛlɛɛ, da tɔɔmun nií la.

²¹ Bulu ɓa yələ laaɓɔɔ di haláá kulɔ Yai-Laa ɓa, a haláá hɛnŋąąi da gəlee kələn: Nįŋɛ̨ hilɛ waa tɔ̨nɔ̨, ɓɛlaa hilɛ waa tɔ̨nɔ̨, ɓɛlaa lonnii waa tɔ̨nɔ̨, da nɔɔi mąąnɛ̨ɛ̨ di bu nɔi ɓa; di haláá tamąą kulɔ Israɛlə kəlee mąą mɛ̨nį ɓa.

²² Di di laa mįi, di di kpələ a kwəinɛ̨ɛ̨, Yai-Laa líi la a ɲələi tii, di Davidə lon Salomɔn hee a tɔɔmun, di pənə di wulɔ lɔ mą a Yai-Laa Laa, ə kɛ a ɲąąwooɓo kɛmun, ɛlɛɛ Sadɔkə ə kɛ a ɉaláá laa həli mun gɛnɛ̨.

²³ Salomɔn ə hee Yai-Laa nwɔ tɔɔkpəlin hu a nąn Davidə mąąhvalin, ɛlɛɛ hɛn gəlee ə lɛlɛ mą; Israɛlə nuą kəlee di kɛ nwoo ɲą.

²⁴ Nɔi ɲąąwooɓo nuą kəlee, gulaaɠaa kəlee, da tɔɔmun Davidə lonnii kəlee di kɛ tɔɔmun Salomɔn woo ɲą.

²⁵ Yai-Laa ə Salomɔn kɛnɛ̨ kpɔ kpąą Israɛlə nuą kəlee ɲɛ̨i ɓa, ɛlɛɛ ə nwɔ tɔɔlaai mąąɲįnɛ̨n gɛ mą, ɲɔ̨nwɔ̨mąn və ta kɛli mą a Israɛlə tɔɔmun da.

²⁶ Ɉɛse lon Davidə ə kɛ a tɔɔmun Israɛlə nuą kəlee mɛ̨i.

²⁷ Ə lamun dɔɔlaa Israɛlə mɛ̨i a kwɛlan bow nąąn. Ə kwɛlan mɛ̨ihveelɛ kɛ dɔɔlaa hu Hebrɔn, ɛlɛɛ, ə kwɛlan bowhaaɓa kɔ́w haaɓa kɛ Ɉerusalɛmə.

²⁸ Ə nwɔ yɛnɛ̨ɛ̨ kɛ liilaa hu, mąąwiɛ laa hu da hɛn nąmu laa, ə pɔlɔ kpɔ a lɛlɛɛ, ə laa nąnni kwɛlɛ. Ɛlɛɛ non Salomɔn ə kɛ a tɔɔmun, a mąąhvalin.

²⁹ Tɔɔmun Davidə kɛ mɛ̨nįɠaa dɔlɔɔ tɔlɔɔɠaa da gbɛlamąąɠaa, di bɛ̨ɛ̨ gɛɛ kaamun Samuɛlə, da Yálá kwəi mɛ̨nį hukulɔ mun Natan di wɔ hɛɓɛ́i hu, da gɛɛ kaamun Gadə nwɛi hu,

³⁰ ə mą kɛ, ŋą heeɓolaa kəlee, da ŋą tɔɔlaa kəlee, mɔ̨nɔ̨ɠaai laa mą nwɔ yɛnɛ̨ɛ̨ hu, yii laa mą Israɛlə yəi, da yɛnɛ̨ɛ̨ lɔi takpɛliɠaa, gəlee pɛ̨ɛ̨i ɉɛɓɛ́ɠaai tii hu.