Kɔlɔnikɔ Maa-ŋuŋ 28 - Yálá laawoo hɛɓɛ (dc)

Davidə ə Salomɔn lɛ a mąąhvalin

¹ Davidə ə Israɛlə ɲąąwooɓo nuą kəlee ɲąąkpɔn Ɉerusalɛmə, ə bɛlɛ, nɔi nwun nąmįną diɛ, gɔláɠa nwun nąmįnąi kpɔ kɛ tɔɔmun ɲee mu, da nuąi kɛ a nu waa nwundɔ̨nɔ̨ nąmįną, nuąi kɛ tɔɔmun da nonnii di wɔɔ hɛngɔwɠaa da daatɛlɛɛ kəlee nwun na, da gbɛtɛgbuwuɠaa, da nuąi tɔɔmun nonnii mɛ̨ikaa mɛ̨nį nwun na, ə mą kɛ, yiiɠaai kɛ gɔɓuwu nwun na, da nu kpɛa-kpɛaɠaa kəlee.

² Ya ɓə, tɔɔmun Davidə ə haŋą ə tɔɔ, yɛ diɛ: «Ną́n nonnii, ka pɛlɛɛ nwɔ́ nuą diɛ! 'Ka ká wəli tɔɔ mą́ą́! Ŋą́ kɛ kpɔ bɔ, ŋą́ pɛlɛ́ tɔɔ, ɓɛi Yai-Laa ŋą mįnɛ̨ kəhii a kɛ laa, da gu wɔ Yálái kɔ́wɔ hvilɛn ɉii. Ŋą́ą́ bɛlɛ́i tii tɔɔ hɛnŋąą ɲąąkpɔn.

³ Kɛlaa, Yálá ə kɛ mą́ą́: ‹'Hvá pɛli pɛlɛ́ tɔɔi, náá ə ɓo mą; Mąąhɔlɔɓo, kɔ́kɔ́mun maa a yɛ́, ɛlɛɛ, yáá ɲąmą pu.›

⁴ Yai-Laa Israɛlə nwɔ Yálá ə ɉə́ɠə ɉu, ɲə́i bɛlɛ́n nuą kəlee lɔwai, ə gɛ́ a Israɛlə tɔɔmun, a yələ kəlee mɛ̨nį. Hvó gaai, ə ɉə́ɠə Ɉuda yəi bɛlɛ́n, ɓɛi ną́n ə kulɔ laa, ŋą́ kɛ a Ɉuda tənən dɔɔ mun. Ną́n nonnii lɔwai, ɲą́ą́ ɓə laa a Yálá lii, yɛ gɛ́ a heeɓomun Israɛlə kəlee nwun na.

⁵ Yai-Laa ə gɔ́ a lon gbulu tamąą, nónnii lɔwai, nón Salomɔn ɓə ə ɉəɠə ɉu, ə ɉee Yai-Laa nwɔ tɔɔkpəlin mɛ̨i, Israɛlə nwun na.

⁶ Yili pulu, Yai-Laa yɛ mą́ą́: ‹Ə́ lon Salomɔn ɓə pai nwɔ́ pɛlɛ́i tɔɔi, da nwɔ́ kwəliɠaai. Mąąhɔlɔɓo, ya ɓə ŋą́ą́ ɉəɠə ɉu ŋą́ą́ gɛ a nón, ɛlɛɛ ŋą́ kɛ a nąn.

⁷ Ŋą́ą́ nwɔ́ tɔɔlaai kɔwɔ hvilɛn a yələ kəlee mɛ̨nį, a kɛ a kąnąn nwɔ́ tíɓoɠaai da nwɔ́ tɔ́nnwooɠaai diɛ, yɛ di laahɔnmo yɛ bələi gaa la haa kəlee.›

⁸ Israɛlə kəlee ɲɛ̨i ɓa, Yai-Laa ŋą kpɔn ɲɛ̨i ɓa, gu wɔ Yálái ɲɛ̨i ɓa; 'ə həli kani kaa: 'Ka ká yee kąnąn Yai-Laa gu wɔ Yálái nwɔ tíɓoɠaai diɛ, 'ká naahɔnmo, ə gɛ nɔi lɛlɛɛi ɲɛ̨i yɛ pɛli kɛi a ka wɔɔ, ɛlɛɛ ka kulɔ ɉu, ə lɛɛ ka lonnii yəi a yələ kəlee mɛ̨nį.

⁹ Yɛ́i ɓaa a nón Salomɔn, 'ə́ nąn nwɔ Yálái kɔ́lɔn, 'ə́ tí mą a ə́ kwəi kwəlɛɛ, da ə́ kwəinɛ̨ɛ̨. Gbala ə tɔɔ Yai-Laa a nu kwəi kili kəlee hu kaa, yɛ kiliŋąhiɛ kəlee hu kpɛ. Yá gwɛli, a gbɔwɔ lɛ yɛ́, ə́ laa ə́ gaa. Kɛlaa yá həɠə bulu, a ə́ lɛɛ laa a yələ kəlee mɛ̨nį.

¹⁰ Ə həli kani yɛ́: Yai-Laa aa ə́ həɠə ɉu, yɛ ə́ pɛlɛ́ tɔɔ mą, a mąąwiɛ pɛlɛ́. 'Ə́ hąą yili, 'Ə́ goló kɛ.

¹¹ Davidə ə bɛlɛ́ laaləi tɔɔ pələ kpaɠala lɛ non Salomɔn ɓa, da bɛlɛ́ɠaa, bɛlɛɛ ɉɛnŋąą pui ɓa, ə mą kɛ, ɲələi pələ pɛlɛ́ɠaa, da nɔi ɓa pələ pɛlɛ́ɠaa, da mįnɛ̨ kəhi hee pɛlɛ́ nwɛi.

¹² Mɛ̨nįɠaai kpɔ ə kɛli pa gɛi, yɛ hvilɛn na Yai-Laa yəi gwəlii ɓa, gulɔ-gbinma mɛ̨nįɠaa, Yálá yəi bɛlɛ́n ɉɛngɔwɠaa, da ɉaláá kulɔ hɛnŋąą, ə yili lɛ mą.

¹³ Ə mą kɛ ɉaláá laa həli nuą, da léviɠaa heekpəlin na kɛ pələ, da Yai-Laa nwɔ pɛlɛ́i golóɠaa kəlee.

¹⁴ Ɉɛni kpuɠulu, ɉɛnii kɛ mąąnɛ̨ɛ̨ ə lɔ goló kɛ hɛnŋąą kəlee hu, da nwalii kɛ da nɔ nwali koló kɛ hɛnŋąą kəlee hu, da goló kɛ hɛnŋąą mu wiɛ pələ;

¹⁵ Nabon ɉee hɛnŋąą tii kɛ a hɛni, da nabonŋąąi kɛ a hɛni, nabon ɉee hɛnŋąą wiɛ pələ, da nabonŋąą wiyə pələ, ə nwaliɠaai tii kɛ lɔ tii, nabon ɉee hɛnŋąą da nabonŋąą, yɛ bələi nabon ɉeei tɛitɛi ŋą kóló ə kɛ la.

¹⁶ Ɉɛnii kɛ a lɔ nɛɠɛ laa taɓali tɛi tɛi pɛli mɛ̨nį hu, da nwali, a nwali taɓaliɠaa di wɛi.

¹⁷ Ɉɛnŋąą hɛlɛnɉɛnŋąą, gəgənŋąą, ɲá haɠa hɛnŋąą, a hɛni tee-tee, gbələ gəgənŋąąi a hɛni, da gəgənŋąąi mu wiɛ pələ, ə mą kɛ, nwali gəgən bɛlɛɛɠaa, da gəgən dɛitɛi mu wiɛ pələ.

¹⁸ Lencen kələn ɉii, ə kɛ a hɛni tee-tee da muwiɛ pələ, ə mą kɛ wotolo pɛli pələ, da mąąkpɛ malakaɠaai kɛ a hɛni, di koon ɉuhvoloon ŋąą, bɛlɛɛ Yai-Laa nwɔ mįnɛ̨ kəhii mɛ̨i.

¹⁹ Mɛ̨nįɠaa tii kəlee kaa hɛɓɛ́ ta hu, Yai-Laa ɓə bɛ̨ɛ̨ a ɲee, yɛ ɉɛɓɛ́i tii hu kolóɠaa kəlee kpaɠala lɛ mą́ą́.»

²⁰ Davidə yɛ nwɔ̨nɔ̨ non Salomɔn ɓa: «'Gɛ a hulɔnu laa, 'ə́ ə́ liikpələ! 'Hvó ɲɔw, ə́ mąą hvo kpɛlin! Yai-Laa ə́ nwɔ́ Yálái kaa ə́ pɔ. Hvo pai gili kulɔi ə́ hu, va ɲee ɓo yɛ́, ə lɛɛ la ɉu, hvo kɛli yá kpɛɛ a Yai-Laa nwɔ pɛlɛ́i tɔɔ kolóɠaa kəlee kɛɛ.

²¹ Ɉaláá laa həli nuą, da Levi lonnii heekpəlinna ka, Yálá nwɔ pɛlɛ́i mu koló kəlee kɛ mɛ̨nį ɓa, nuąi da kɛ nwɔ̨nɔ̨ ə́ pɔ, diɛ ɓaa: nuąi kiliŋąhiɛ lɛlɛɛ kaa diɛ, di yɛlɛɛ, diɛ ɓo a koló huwui lɔpee gɛ pələ kpaɠala kɔ́lɔn ŋąą; nɔi kalanɉonŋąą da nɔi lonnii kəlee kaa ə́ yee mu.»