Kɔlɔnikɔ Maa-ŋuŋ 27 - Yálá laawoo hɛɓɛ (dc)

Gulaaɠaa heekpəlinna kɛ pələ

¹ Israɛlə lonnii lononŋaa ka, a bɛlɛ́ɠaa laa, waa nąmįną, nwundɔ̨nɔ̨ nąmįną, da ɲalá nąmįnąi kɛ tɔɔmun bɔ diɛ nuą ɲąąkwɛlɛ, nu kpulu yii kɛi li, da yii kɛi li ɲąnįn dɛitɛi yee mu, gwɛlan ɉu ɲąnįn gəlee yee mu. Nu waa pow hveelɛ gɔw nąąn mə kɛ kpulu tɔ̨nɔ̨ hu.

² Nu kpulu dɔlɔɔ tɔlɔɔ, ɲąnįn dɔlɔɔ hu: Ɉavdiɛlə lon Yasoveamə ɓə nwɔ nuą di kɛ a nu waa pow hveelɛ kɔ́w nąąn.

³ Pɛrɛsə lon da li kɛ, ə kɛli gulaa nwun nąmįną kəlee ɲąąwooɓo ɲąnin dɔlɔɔ yee mu.

⁴ Ɲąnin veelɛnąą nwɔ nu kpului ɓaa kɛ a: Dodai Ahoa mun ni kɛ, Miklotə ɓə kɛi nwɔ nu kpului ɲąąwooɓo; di kɛ a nu waa pow hveelɛ gɔw nąąn.

⁵ Ɲąnin ɉaaɓanąą yee mu, nu kpulu ɉaaɓanąą ɓaa kɛ a: Ɉaláá laa həli mun gɛnɛ̨ Yehoyada lon Benayahu, ya ɓə kɛ nuą nwun na, di kɛ a nu waa pow hveelɛ gɔw nąąn.

⁶ Benayahu tii ɓə kɛ ɉuwalawalaa nu pow haaɓai tii lɔwai, ə ɓo nwɔnɔ̨ a nu pow haaɓai tii di nwun nąmu. Nwɔ nu kpului ə ɓo non Amizavadə yəi.

⁷ Nu kpulu nąąnąą ɲąnįn nąąnąą ɲee mu ə kɛ a: Asahɛlə Ɉoabə gaayɔwɔ, ə lɛɛ, Asahɛlə lon Ɉavadia, yaai pai lɛɛi bulu. Nwɔ nuą di kɛ a nu waa pow hveelɛ kɔ́w nąąn.

⁸ Nu kpulu nɔɔlinąą, ɲąnįn nɔɔlinąą ɲee mu ə kɛ a: Samhutə yai kɛ a Yizrahi mun, ya ɓə kɛ di nwun na, nu kpulu waa pow hveelɛ gɔw nąąn mə kɛ ɲəi.

⁹ Nu kpulu mɛ̨idanąą, ɲąnįn mɛ̨idanąą ɲee mu ə kɛ a: Ira Tekoa mun Ikɛsə non; nu kpulu waa pow hveelɛ gɔw nąąn mə kɛ ɲəi.

¹⁰ Nu kpulu mɛ̨ihveelɛnąą, ɲąnįn mɛ̨ihveelɛnąą ɲee mu ə kɛ a: Hɛlɛsə Pelɔn mun mə kɛ di nwun na, Ɛfraimə lonnii lɔwai; nu waa pow hveelɛ gɔw nąąn.

¹¹ Nu kpulu mɛ̨ihaaɓanąą, ɲąnįn mɛ̨ihaaɓanąą ɲee mu ə kɛ a: Sibekai Husa mun, ə kɛ a Ɉari mun da, ə kɛ nu waa pow hveelɛ gɔw nąąn nwun na.

¹² Nu kpulu mɛ̨inąąnnąą, ɲąnįn mɛ̨inąąnąą ɲee mu, ə kɛ a: Aviɛzɛrə Anatotə mun, yɛ ɓo a Bɛnɉamɛn lon da, nu waa pow hveelɛ gɔw nąąn ɓə kɛ ɲəi.

¹³ Nu kpulu pow nąą, ɲąnįn bow nąą ɲee mu, ə kɛ a: Marai Netofa mun, yai kɛ a Ɉarhi mun da, nu waa pow hveelɛ gɔw nąąn mə kɛ ɲəi.

¹⁴ Nu kpulu pow gɔw tanɔ̨nnąą, ɲąnįn bow gɔw tanɔ̨nnąą ɲee mu ə kɛ a: Benaya yai kɛ a Pireatɔn mun, a Ɛfraimə lon da, nu waa pow hveelɛ gɔw nąąn mə kɛ ɲəi.

¹⁵ Nu kpulu pow gɔw hveelɛnąą, ɲąnįn bow gɔw hveelɛnąą ɲee mu, ə kɛ a: Hɛldai yai kɛ a Netofa mun, a Otniɛlə huwu ta, nu waa pow hveelɛ gɔw nąąn mə kɛ ɲəi.

¹⁶ Israɛlə nu huwu ɲąąwooɓo nuą: Rubɛn pɛlɛ mu, Eliezɛrə Ɉikri lon. Simeɔn yəi bɛlɛ́n, Sefatiahu, Maaka lon.

¹⁷ Levi yəi bɛlɛ́n, Hasavia Kemuɛlə lon. Aarɔn yəi bɛlɛ́n, Sadɔkə.

¹⁸ Ɉuda yəi bɛlɛ́n, Elihu Davidə kaayɔwɔ ta. Isakarə yəi bɛlɛ́n, Omri Mikaɛlə lon.

¹⁹ Zabulɔn pɛlɛ́ mu, Yismayahu Ovadiahu lon. Nɛftali yəi bɛlɛ́n, Yerimotə Azriɛlə lon.

²⁰ Ɛfraimə lonnii yəi bɛlɛ́n, Hosea Azaziahu lon. Manase nu huwu bələ tɔ̨nɔ̨, Yoɛlə Pedayahu.

²¹ Manase nu huwu bələ tɔ̨nɔ̨ yii kɛ Galaadə, Ido Ɉekariahu lon mə lɛɛ di mɛ̨i. Bɛnɉamɛn yəi bɛlɛ́n, Yaasiɛlə Avnɛrə lon.

²² Dan pɛlɛ mu, Azarɛlə Yerohamə lon. Bələ ɓə Israɛlə nu huwu ɲąąwooɓo nuą di heekpəlinna kɛ pələ ə kɛ la.

²³ Nuąi di kaa kwɛlan ə kɛ pow hveelɛ, da yiiɠaai kɛ di wɛi toɔ mu, Davidə hvó yiliɠaa lonon. Mąąhɔlɔɓo, Yai-Laa aa ta kɛ diɛi: Gaa pai Israɛlə nu huwu tamąi yɛ yələi pɛmɛ̨lɛ̨n-gɔwɠaa.

²⁴ Seruya lon Ɉoabə aa kɛ gbalatɔɔ, yɛ nonon ɓo kɛ, kɛlaa, hvo naakulɔ; mąąhɔlɔɓo, yili mąą mɛ̨nį ɓə Yálá nwɔ liiholi ə yɛɛ Israɛlə mɛ̨i. Yili mąą mɛ̨nį ɓə gɛ, nuą lononŋąą hvo kɛ laa tɔɔmun Davidə kɛ mɛ̨nį hɛɓɛ́ɠaa ta hu.

Nɔi ɲąąwooɓo pələ

²⁵ Adiɛlə lon Azmawɛtə ɓə kɛ tɔɔmun nwɔ hɛngɔwɠaa nwun na. Gɔ̨nɔ̨n gɛɛnąąɠaai ɲɛakɔwɔ hu, daa pɛlɛɛ da daa kpɛaɠaa hu, ə lɛɛ, daa mąąkɔ̨nwɔ̨ pɛlɛ́ɠaa mu, Uziyahu lon mə kɛ di nwun na.

²⁶ Keluvə lon Ɛzri ɓə kɛ díikɛnuą nwun na.

²⁷ Nui kɛ viɲə yɛɛ nwun na, ya ɓaa a Rama mun Simei. Da viɲəɠaa yá kulɔ, nui gaa nɔɔ mɛ̨nį nwun na ya ɓaa a Sefamə mun Ɉavdi.

²⁸ Olivə yɛa, ɓɔɔla yɛa kɛ nɛ̨ŋɛ̨-lɔi hu, Baalə-Hanan Gedɛrə mun, ya ɓə kɛ nwun na. Da nwulɔ kɛ, nui kɛ a lɛɛ nwun na, ya ɓaa a: Yohasə.

²⁹ Nįŋɛ̨ kpului kɛ Sarɔn yɛɛkɔwɔ hu, Sitrai Sarɔn mun, ya ɓə kɛ nwun na. Yiiɠaai kɛ ɲee lɔwai lɔiɠaa hu, Adlai Safatə lon mə kɛ nwun na.

³⁰ Ovilə Ismaɛlə mun da ɓə kɛ ɲɔ̨nwɔ̨mɛ̨ɛ̨ɠaa nwun na. Yehdeyahu Meronotə mun mə kɛ ɉoohvaalənŋąą nwun na.

³¹ Yazizə Hagri mun mə kɛ daatɛlɛɛ pɛlɛɛɠaa nwun na. Nuąi kpɔ tii ɓə kɛ heeni tɔɔmun Davidə nwɔ hɛngɔwɠaai nwun na.

³² Davidə gala Yehonatan ɓə kɛ a ɉee gwɛlɛ, kilimąą mun ni kɛ, yɛ ɓo a hɛɓɛ́ kɛmun. Hakmoni lon Yehiɛlə ɓə tɔɔmun nonnii di kɛ ɲəi.

³³ Ahitofɛlə ɓə tɔɔmun ə kɛi nwun dɔɔ la, ɛlɛɛ, Husai Arki mun ə kɛ a tɔɔmun mɛlanmun.

³⁴ Benayahu lon Yehoyada da Abiatarə ɓə Ahitofɛlə mąąhvalin. Ɉoabə ɓə kɛ a gɔláɠa nwun nąmu.