Kɔlɔnikɔ Maa-ŋuŋ 26 - Yálá laawoo hɛɓɛ (dc)

Bɛlɛ́ laaləi nuą heekpəlinna; Levi lonnii kɛ kólo takpɛli

¹ Bɛlɛ́ laaləi mąąkpɛ nuą heekpəlina ka: Kore yəi bɛlɛ́n nuą: Asafə mąnįn Meselemiahu, yai a Kore lon,

² Meselemiahu lonnii ka: Non dɔlɔɔ ɓaa a Ɉekariahu, veelɛnąą ɓaa a Yediaɛlə, ɉaaɓanąą ɓaa a Ɉevadiahu, nąąnąą ɓaa a Yatniɛlə;

³ nɔɔlinąą ɓaa a Elamə, mɛ̨idanąą ɓaa a Yehohanan, mɛ̨ihveelɛnąą ɓaa a Ɛliehoenai;

⁴ Ovɛdə-Edomə lonnii ka: dɔlɔɔ ɓaa a Semaya, veelɛnąą ɓaa a Yehozavadə, ɉaaɓanąą ɓaa a Yoa, nąąnąą ɓaa a Sakarə, nɔɔlinąą ɓaa a Netanɛlə;

⁵ mɛ̨idanąą ɓaa a Amiɛlə, mɛ̨ihveelɛnąą ɓaa a Isakarə, mɛ̨ihaaɓanąą ɓaa a Peuletai; mąąhɔlɔɓo, Yálá ə lúwɔ́ too mą.

⁶ Non Semaya ə lonŋąą kaa, woo mąn ə kɛ diɛ, nu kanŋaa lɔwai, mąąhɔlɔɓo, di kɛ a kpakoloɠaa.

⁷ Semaya lonnii laa ka: Otni, Refaɛlə, Ovɛdə, Ɛlzavadə da di kaayɔwɔɠaa Elihu da Semakiahu. Di kɛ a kpakoloɠaa.

⁸ Di kəlee kpun, di kɛ a Ovɛdə-Edomə lonnii, diɛ-o, di lonnii, da di kaayɔwɔɠaa di kɛ a kpakoloɠaa di kɛ kolóɠaa hu. Diɛi tii kɛ a Ovɛdə-Edomə ŋą nuą, di kɛ a nu pow mɛ̨ida gɔw hveelɛ.

⁹ Meselemiahu lonnii da gaayɔwɔɠaa, di kɛ a nu pow gɔw mɛ̨ihaaɓa, diɛ ɓo a kpakoloɠaa.

¹⁰ Merari lon Hosa, ə lonŋąą kaa, diɛ ɓo a nu nąąn; Simri ɓə kɛ a di nwun nąmu. Ya hvó kɛ a nu pɔlɔ laamun, kɛlaa, nąn mə gɛ a di nwun nąmu.

¹¹ Hilkiyahu ɓə kɛ a veelɛnąą, Tevaliahu ɓə kɛ a ɉaaɓanąą, Ɉekariahu yɛ ɓo a nąąnąą, Hosa lonnii pɛlɛɛ gaayɔwɔɠaa diɛ, di kɛ a nu pow kɔ́w haaɓa.

¹² Bɛlɛ́ laaləi mąąkpɛ nuą heekpəlinna nuą tii, di ɲɛ̨itɔwɔ nuą diɛn, di kɛ lɔ a di kaayɔwɔɠaa, diɛ di kɛ kóló kɛ Yai-Laa yəi bɛlɛ́n.

¹³ Ə həɠə nokolo ɓa, ə həli la nu kɛnɛ̨ ɓa, di bɛlɛ́ laaləi mɛ̨ikaa ɲąąkwɛlɛ di lɔwai a kpɛɛn biliɛ.

¹⁴ Voló ɓɛlai bələ ɓə lɛɛ Selemiahu yəi. Non Ɉekariahu, yai kɛ gbɛɛn mɛ̨nį nwun na a galanɉon da, ə lɛɛ ɲanwuɔ̨ pələ.

¹⁵ Ovɛdə-Edomə ə lɛɛ ɲakpalaa pələ, nonnii ɓə lɛɛ ɉɛnŋąą pu pɛlɛ́ laaləi pələ.

¹⁶ Supimə da Hosa, hvóló ɓɛlai bələ kpon, da kɛ mą: Salɛkɛtə, yai ɲee kpukpu ɓa pələ. Golóɠaa heekpəlinna kɛ pələ ka:

¹⁷ Hvóló tɔ̨nɔ̨ Levi mɛ̨ida, diɛ ɓə da kɛ voló tooi pələ. Ɉɛɠɛɛ pələ nu nąąn hvóló ɓa, ɲanwuɔ̨ pələ nu nąąn hvóló ɓa, ɉɛnŋąą pui bələ, nu hveelɛ hveelɛ.

¹⁸ Bɛlɛ́ lon ŋɛ̨i kɛ voló tooi pələ, nu nąąn; veelɛ a kɛ bɛlɛ́n, veelɛ ə ɓo ɲįmąn mu.

¹⁹ Bələ ɓə Kore da Merari lonnii tii kɛ, a bɛlɛ́ laaləi mąąkpɛnuą, di heekpəlinna ə kɛ la.

Golóɠaa kpɔ kɛ galihvaɓoɔ Levi taɠaa diɛ

²⁰ Lévi taɠaa, a di kaayɔwɔɠaa, di kɛ Yálá nwɔ pɛlɛ́i ɉɛngɔw mɛ̨nį nwun na, daɠaa di ɓo ɉaláá kulɔ hɛnŋąą nwun na.

²¹ Laedan lonnii, Gɛrsɔn lonnii, di wɔɔ pɛlɛ́i ɲąąwooɓo nuą ɓaa kɛ a Yehieli, Laedan pɔ pələ;

²² Yehieli lonnii, Ɉetamə da gaayɔwɔ Yoɛlə, di di lɛɛ Yai-Laa nwɔ pɛlɛ́i mu hɛnŋąą nwun na.

²³ Amramə nuą, Yiseharə nuą, Hebrɔn nuą, Uziɛlə nuą,

²⁴ Sevuɛlə ə kɛ a Gɛrsɔmə lon, yaa tii ə ɓo a Moisə lon, yaa ɓə ɉɛngɔw mɛ̨nį ɲąąwoo ə kɛ na.

²⁵ Eliezɛrə pɔ pələ, gaayɔwɔ ɓaa kɛ a Rehaviahu lon, yili non maa a: Yesayahu; Yesayahu ə Yoramə kaa, Yoramə ə Ɉikri kaa, Ɉikri ə Selomitə kaa.

²⁶ Selomitə tii da gaayɔwɔɠaa ɓə di di tɛɛ ɉɛngɔwɠaa, da ɉaláá kulɔ hɛnŋąą tii tɔɔmun Davidə ə di laakwɛlanmo Yálá ɓa nwun na, da pɛlɛ́ nwun nąmįną, nu waa tɔ̨nɔ̨ nwun nąmįną, nu nwundɔ̨nɔ̨ nwun nąmįną, da kɔlaɠa nwun nąmįną.

²⁷ Ɉɛnŋąąi di di hon gɔ́ hu, di naakwɛlanmo Yálá ɓa, diɛ ɓo a Yai-Laa nwɔ pɛlɛ́i laahɔnmo hɛnŋąą.

²⁸ Da yiiɠaai gwɛlɛɛn gɛɛ kaamun Samuɛlə ə naakwɛlanmo Yálá ɓa, da yii Kisə lon Saulə, ə mą kɛ Nɛrə lon Avnɛrə da Seruya lon Ɉoabə, ɉɛnŋąą kpɔ tii kɛ naakwɛlanmoɔ, di gəlee kalihvaɓo Selomitə da gaayɔwɔɠaa diɛ.

²⁹ Yii ɓaa Yisehari lonnii, da Kenaniahu lonnii, di di tɛɛ Israɛlə lɔi nwun na a hɛɓɛ́ kɛ nuą, da kiti tee nuą kpɛa-kpɛaa.

³⁰ Hebrɔn nuą, Hasaviahu nuą da di kaayɔwɔɠaa, diɛi kɛ a kpakoloɠaa, di kɛ a nu waa tɔ̨nɔ̨ pulu nwun mɛ̨ihveelɛ; diɛ ɓə kɛi di ɲɛ̨i kɛ Israɛlə lɔi hvóló tooi pələ Ɉurdɛn kwɛlɛ pələ ɓa, diɛ Yai-Laa mąą mɛ̨nįɠaa ɲɛ̨i kulɔ di ɲɛ̨i ə ɓo tɔɔmun nwɔ kólói ɓa.

³¹ Hebrɔn nuą di wɛi, Yeriya ɓə kɛ a dɔɔmun, Hebrɔn nuą tii lɔ, di ɉu pili, ə həɠə kpɔ di kalaɓɔlɔni diɛ, ə həli la gwɛlan bow nąąn Davidə ə gɛ dɔɔlaa hu mą, di laa ə kɛ lɔ kpakolo kɛɛnąąɠaa ɓa. Diɛ ɓaa a: Yazɛrə da Galaadə.

³² Yaa, da gaayɔwɔɠaa, di kɛ a kpakolo waa hveelɛ pulu nwun mɛ̨ihveelɛ, a pɛlɛ́ nąmįną; diɛ ɓə tɔɔmun Davidə ə di hee Rubɛn nwɔ pɛlɛ́i nwun na, da Gadə nwɛiɠaai, ɛlɛɛ, Manase huwu bələ tɔ̨nɔ̨i kɛ ɲanwuɔ̨ pələ; diɛ ɓə di yee ə kɛ Yálá mąą mɛ̨nį ɲɛ̨ikulɔ mɛ̨nįɠaa diɛ, da dɔɔmun nwɛiɠaai.